Milimo ya Atumwa 7:1-60
7 Lyene simapepo mukalamba wamuzizye ati: “Uzye avivyo kwene?”
2 Sitivini nawe waswike ati: “Mwe yantu mwe, inane na ya tata, uvwini. Leza wa lulumbi walolike kuli Abulahamu icikolwe citu lino wali umu Mesopotamya ala atatala waya umu kwikala umu Halani,+
3 nupya wamunenyile ati: ‘Fuma umu mpanga yako nu kusha ya lupwa yako, uye uku mpanga ino namakulanga.’+
4 Lyene wafumile umu mpanga ya Kalideya nu kuyaikala umu Halani. Nupya lino isi wafwile,+ Leza wamulenzile ukuti aikala umu mpanga kwene yii ino mukwikalamo ndakai.+
5 Lelo atamupeezile impanga ya upyanyi ili yonsi nanti sile apa kulyata ulwazo; lelo wamulavile ukuti alamupeela impanga yii nu kwizaipeela uku yana yakwe pa cisila cakuti wafwa+ nanti cakuti ala atatala wakwata umwana pa nsita iiya.
6 Nupya Leza wamunenyile ukuti ana yakwe yalaya yakikale umu mpanga isi yao nu kuti antu yalayalenga ukuya azya nu kuyacuzya pa myaka 400.+
7 Leza walanzile nu kuti: ‘Ndapingula uluko luno yalaombela,+ nupya pa cisila yalafuma umu mpanga iiyo nu kwizampepela umu cifulo cii.’+
8 “Nupya Leza wapangine na Abulahamu upangano wa kuzembululwa,+ nupya Abulahamu wizile aya isi wakwe Isaki+ nu kumuzembulula pa wanda uwalenga 8,+ Isaki nawe wizile aya a isi wakwe* Yakobo, Yakobo nawe wizile aya a isi wa yana 12 aizile iyaya ivikolwe.
9 Nupya ivikolwe vivyo vyuvwilile Jozefu+ uzuwa nu kumukazya uku Ijipti.+ Lelo Leza wali nawe,+
10 nupya wamupuswishe uku ntazi zyonsi zino wakweti nu kumupeela mano, alino nu kumulenga ukutemwikwa kuli Falao umwene wa ku Ijipti. Nupya Falao wamusonsile ukuti aangalila umu Ijipti nu mu ng’anda yakwe yonsi.+
11 Nomba icipowe caponyile umu mpanga yonsi ya Ijipti nu mu Kenani, fwandi wali ucuzi ukalamba, nupya ivikolwe vitu vitakweti ivyakulya.+
12 Lelo Yakobo uvwile ukuti uku Ijipti kuli ivyakulya,* fwandi watumileko ivikolwe vitu pa muku wa kutandikilako.+
13 Lyene umuku wakwe ciili, Jozefu waimanyisizye uku ina yakwe, nupya ulupwa lwakwe Jozefu lwizile ilumanyikwa kuli Falao.+
14 Acino Jozefu watumile ukuti yakaame isi Yakobo kumwi nu lupwa lwakwe ukufuma uku ncende iiya,+ nupya yonsi pamwi yaali 75.+
15 Lyene Yakobo waile uku Ijipti,+ nupya waile afwila kuuku kwene+ kumwi ni vikolwe vitu.+
16 Yayasenzile uku Shekemu nupya yaile iyayaziika umwi lindi lino Abulahamu wakazile umu mpiya zyakwe siuva uku yana yakwe Hamoli umu Shekemu.+
17 “Lino insita yapalamanga iya kufikiliziwa kwa ulayo uno Leza walavile Abulahamu, antu yavuzile nu kuya uluko lukalamba umu Ijipti,
18 kufikila lino kwizile ikuya umwene muze umu Ijipti aataamanyile Jozefu.+
19 Umwene wii waomvizye amapange aipe pa yantu itu nu kupatikizya ivikolwe vitu ukuti vyapuuka utunya twao pakuti tutaya nu umi.+
20 Mose wavilwe pa nsita kwene iiya, nupya wali umusuma sana na kuli Leza kwene. Avyazi yakwe yamulezile sile pa myezi itatu.+
21 Lelo lino yamusumvile,+ mwana Falao umukazyana wamutozile nu kumukuzya wa mwanakwe.+
22 Fwandi Mose wasambiliziwe amano yonsi aa Ina Ijipti. Nupya wali na maka muli vino walandanga na muli vino wacitanga.+
23 “Lyene lino wali ni myaka 40, wapingwilepo ukuyatandalila* aina yakwe, ya mwana Izlaeli.+
24 Lino waweni yakucuzya umwinakwe wenga, wamupokolwile nu kukoma Umwina Ijipti uwamucuzyanga.
25 Welenginye ukuti aina yakwe yamailuka ukuti Leza akulonda ukuyapususha ukuomvya aliwe, lelo yatiilwike.
26 Uwanda uwalondelilepo lino waile uku ina yakwe wazanyile aina yakwe yaili yakulwa, nupya wezizye ukuyawikizya umu mutende, ayanena ati: ‘Mwe yantu mwe, mwemwe ina. U mulandu ci uno mukulwila?’
27 Lelo uwacuzyanga umuze wamusunsile nu kumunena ati: ‘Uzye a weni uwakusonta ukuya intunguluzi nupya kapingula witu?
28 Uzye ukulonda ukunkoma wakwe vino wakomile umwina Ijipti mutondo?’
29 Lino Mose uvwile vivyo, utwike nu kuyaikala uku mpanga ya Midyani kuno waile akwata ana yaili aonsi.+
30 “Pa cisila ca myaka 40, malaika walolekiile kuli Mose umu lwanga pa Mwamba wa Sinai mu cimbilimbili ca moto icakanga ku cimpuza ca myunga.+
31 Mose wazungwike pali vino waweni. Lelo lino wapalamanga pakuti alolekeshe, uvwile izwi lyakwe Yeova* likuti:
32 ‘Nene Leza wa vikolwe vyako, Leza wakwe Abulahamu, Leza wakwe Isaki nupya Leza wakwe Yakobo.’+ Mose watandike ukuzakaza pa mulandu ni ntete nupya atatwalilile ukulolekesha.
33 Yeova* wamunenyile ati: ‘Zuula indyatu, pano incende ino watuwimililapo i ya muzilo.
34 Indola vino antu yane aali umu Ijipti yakucula, inuvwa ukulila kwao,+ nupya iniza kuti injapusushe. Fwandi iza pakuti nkutume uku Ijipti.’
35 Mose kwene wino yakanyile lino yamuzizye iyati: ‘Uzye a weni uwakusonta ukuya intunguluzi nupya kapingula?’+ awino Leza watumile+ ukuya intunguluzi nupya kapususha ukupitila muli malaika uwalolekile kuli aliwe mu cimpuza ca myunga.
36 Muntu wii waile afumya antu mu Ijipti,+ wacisile ni vizungusho ni vimanyililo umu Ijipti+ na pali Yemba Muyenzu+ nu mu lwanga pa myaka 40.+
37 “Mose kwene u walanzile uku yana yakwe Izlaeli ati: ‘Leza alamusontela kasesema uwaya wakwe nene ukufuma umu ina inu.’+
38 Wikwene u wali na Ina Izlaeli umu lwanga, nupya awino malaika+ walanzile nawe+ pa Mwamba wa Sinai alino nu ku vikolwe vitu, nupya wapokelile mazwi yakwe Leza aumi nu kutupeela.+
39 Ivikolwe vitu vitamuvwilile, lelo vyamukanyile,+ nupya vyalondanga ukuswilila uku Ijipti,+
40 vyanenyile Aloni iviti: ‘Tupangile ya leza aakuti yatutungulula. Pano tutamanyile icaticicitika kuli Mose uwatufumizye umu mpanga ya Ijipti.’+
41 Lyene yapanzile umwana wa ng’ombe nu kupeela malambo ku cilubi nupya yatandike nu kusansamukila muli vino yacisile.+
42 Acino Leza wayasile nu kuleka ukuti yapepa ivintu vya mwi yulu,+ wakwe vino calembwa umwi buku lyakwe ya kasesema ukuti: ‘Mwe ya mu ng’anda yakwe Izlaeli, asi nene mwapeelanga ivyaupe na malambo pa myaka 40 ino mwali umu lwanga.
43 Lelo mwasenzile itenti lyakwe Moloki+ nu lutanda lwakwe Lefani leza winu, ivilubi vino mwapanzile kuti mwapepa. Acino ndamuzingila ukutali ukucila uku Babiloni.’+
44 “Ivikolwe vitu vyakweti itenti umu lwanga ilyalanganga ukuti Leza wali navyo. Leza wanenyile Mose ukuti lipangwe ukulingana na vino wamulangilile.+
45 Nupya ivikolwe vitu ivyalondelilepo vyapyanyile itenti lilyo nu kulisenda pamwi na Yoswa mu mpanga ya yantu amu nko zyuze,+ yano Leza wazinzile pa nsita ya vikolwe vitu.+ Lyatwalilile ukuyako suka nu mu manda yakwe Devedi.
46 Devedi wali umutemwikwe kuli Leza nupya walenzile ukuti akuuliile Leza wakwe Yakobo ing’anda.+
47 Lelo Solomoni u wakuuliile Leza ing’anda.+
48 Nomba uwa Papelapela asiikala umu mang’anda aakulwa na antu,+ wakwe vino kasesema walanzile ati:
49 ‘Yeova* wati, iyulu i cilimba cane,+ ni nsi a pa kulyata ingazo zyane.+ Uzye lyene i ng’anda ya musango ci ino mulankuulila? Nanti aekwi ukwayela icifulo cane ica kupuuzilako?
50 Uzye asi nene napanzile ivintu vii vyonsi?’+
51 “Mwatalama nupya mwakoma imyenzo na matwi yasiuvwa, lyonsi mukaakanya umupasi wa muzilo; viivi kwene vino ivikolwe vinu vyacisile avino namwe mukacita.+
52 Uzye a kasesema ci wino ivikolwe vinu vitacuzizye?+ Yakomile alandiile limwi pa kwiza kwa mulungami,+ wino mwemwe kwene mwizile imufutuka nu kumukoma,+
53 Leza wamupeezile Masunde ukupitila muli ya malaika,+ nomba musiyalondela.”
54 Lino yuvwile vivyo, yasosile sana nupya yatandike ukulumanya incecete pa mulandu na aliwe.
55 Lelo vino Sitivini wali nu mupasi wa muzilo, walingamiile umwi yulu nu kulola ululumbi lwakwe Leza nupya waweni Yesu wataimilila ukwi kasa li lunji lyakwe Leza,+
56 nupya walanzile ati: “Nalola iyulu iliyulika nu Mwana wa muntu+ wataimilila ukwi kasa lyakwe Leza ili lunji.”+
57 Lino yuvwile vivyo yamuwelekite nupya yaacilike umu matwi nu kusimwilila kuli aliwe yonsi.
58 Lyene lino yamufumizye ukunzi ya musumba, yatandike ukumutama na mawe.+ Ya kambone+ yasiile yatuulika ivyakuzwala vyao pa mulumendo umwi uwi zina lyakuti Saulo.+
59 Lino yatamanga Sitivini na mawe, walanzile ati: “Mwene Yesu, pokelela umupasi wane.”
60 Lyene lino wafukime, wapunzile ni izwi lya maka ati: “Yeova* utayapeela umulandu pa luyembu luu.”+ Nupya pa cisila ca kulanda mazwi yayo, wafwile.
Mafutunoti
^ Nanti limwi, “nawe wacisile icili cimwi kwene kuli.”
^ Nanti “ingaano.”
^ Nanti “ukuyalola vino aina yakwe yali.”
^ Lolini Ivyeo na Vyuze pa A5.
^ Lolini Ivyeo na Vyuze pa A5.
^ Lolini Ivyeo na Vyuze pa A5.
^ Lolini Ivyeo na Vyuze pa A5.
