Ku Aebele 13:1-25
13 Twalililini ukutemwana wa ina.+
2 Mutailila ukupokelela aenyi,+ pano umukucita vivyo yamwi yapokelile ya malaika ukwaula ukumanya.+
3 Mwaiusha aya umu vifungo+ kwati mwanyepwa pamwi nayo,+ na yayo aakacuziwa kwati mukuculila pamwi nayo.*
4 Icupo cilinzile ukucindikwa na antu yonsi nupya citalinzile ukuya icikowele,+ pano Leza alapingula aakacita uzelele* na acende.+
5 Lekini uwikazi winu utaya uwa kutemwa impiya,+ lelo mwateeka umwenzo kuli vino mukweti.+ Pano walanda ukuti: “Ntalakusha, nupya ntalatala nkutazyele.”+
6 Pakuti tungasipa nu kulanda ukuti: “Yeova* ali kaazwa wane; ntaluvwa intete. I cani cino umuntu angancita?”+
7 Mwaiusha aakamutungulula,+ aakamusambilizya izwi lyakwe Leza, nupya lino mukwelenganya pa miyele yao isuma, mwakolanya utailo wao.+
8 Yesu Klistu asisenuka, vino wali mutondo avino ali ni lelo nupya avino alaya manda pe.
9 Mutaleka ivisambilizyo ivipusanepusane nupya ivya ufi vimuponzye, pano cazipa ukukomeleziwa ni cikuuku icikulu ukucila uku vyakulya,* ivisiavwa yayo avisumbako sana mano.+
10 Twakwata ulambo uno yayo aakaomba umulimo wa muzilo api tenti yatakwata insambu zya kuliilapo.+
11 Pano inyama zino simapepo mukalamba akasenda uwazi nu kutwala umu ncende ya muzilo pakuti akapeele ilambo pa membu, zikaociwa ukunzi ya nkambi.+
12 Acino na Yesu kwene waculiile ukunzi ya mpongolo ya musumba,+ pakuti asangulule antu ukuomvya uwazi wakwe.+
13 Acino lekini tuye kuli aliwe kunzi ya nkambi nu kuzizimizya umuzewanya, wakwe vino wene wazizimizye,+
14 pano tutakwata umusumba ungikalilila manda pe, lelo tukalondesha uuliza.+
15 Ukupitila muli aliwe lekini lyonsi twapeela ilambo lya kulumbanya kuli Leza,+ kuli kuti ukuomvya imilomo itu+ lino tukulanda apaswe api zina lyakwe.+
16 Nupya mutailila ukucita ivisuma nu kwankanyako yauze vino mukweti,+ pano Leza watemwa malambo ya musango uwo.+
17 Mwauvwila aakamutungulula+ nu kuyatontela,+ pano yakamusakamala nupya yalalondolola,+ pakuti yaomba ni nsansa, yataomba nu ulanda, pano nga caya vivyo ivintu vingamwipila.
18 Twalililini ukutupepelako, pano twasininkizya ukuti twaya na kampingu musuma, pano tukalonda ukuya aacisinka umu vintu vyonsi.+
19 Lelo cino nkumukonkomezya sana i cakuti mwapepa pakuti ince mbwele zuwa kuli mwemwe.
20 Si Leza wa mutende uwatuutulwile Umwene witu Yesu, kacema wa mfwele umukalamba,+ ukuomvya uwazi wa upangano wa pe,
21 amupeele ivisuma vyonsi pakuti mwacita ukulonda kwakwe, nupya atwazwe ukucita ivikamuzanzya ukupitila muli Yesu Klistu, kuli aliwe kuye ululumbi manda pe. Ameni.
22 Lyene nkumukonkomezya inane ukuti mwateeka umwenzo pa kukutika uku mazwi yaa akukomelezya, pano iimulembela kalata umwipi.
23 Nkulonda mumanye ukuti umwina witu Timoti yamufumya umu cifungo. Ndi cakuti wiza zuwa, ale tuliza pamwi nawe umu kumulola.
24 Mundamukile yonsi aakamutungulula na amuzilo yonsi. Aina Itali+ yamulamuka.
25 Icikuuku cikulu ciye namwe mwensi.
Mafutunoti
^ Mu Cigiliki: “Pano namwe kwene mwemwe vilundwa vya mwili.”
^ Lolini Ulondolozi wa Mazwi, “Uzelele.”
^ Lolini Ivyeo na Vyuze pa A5.
^ Kuli kuti masunde ya pa vyakulya.
