2 Petulo 2:1-22
2 Lelo kwali na ya kasesema ya ufi umu yantu, wakwe vino kulaya na ya kasambilizya ya ufi muli mwemwe.+ Antu yaa yalaapanga utumaumba umu umfisolo, nupya yalakana nu wayakazile kwene,+ nu kuiletela uwononesi zuwa.
2 Nupya antu aingi yalalondela ivicitwa vyao ivya winyi,*+ nupya pa mulandu na antu yayo icumi cilaapontelwa.+
3 Nupya pa mulandu nu lunkumbwa lwao yalezya ukumuponzya ukuomvya mazwi ya ufi. Lelo upinguzi wao uwapingulwa mpiti sana,+ usiwayawaya, nu uwononesi wao uliza nanti ciye uli.+
4 Mu cumi Leza ataakanyile ukufulula ya malaika ayembwike,+ lelo wayasumbiile umu Tatali*+ nu kuyanyepa na maceni umu mfinzi ikulu muno yakalolela upinguzi.+
5 Nupya ataakanyile ukufulula antu ya mpiti aali umu nsi,+ lelo wacingilile Nowa kasimikila wa ulungami+ pamwi na yauze 7+ lino waleesile mulamba pano nsi pa yantu aacitanga iviipe.+
6 Nupya lino wapingwile imisumba ya Sodoma na Gomola, wayosile suka isanguka itwi,+ walangilile ivintu ivilacitikila antu aakacita iviipe.+
7 Nupya wapuswishe Loti umulungami+ uuvwanga sana uyi pa vicitwa vya winyi* vino ya mpulamasunde yacitanga,
8 pano cila wanda umuntu wiyo umulungami wacululukanga sana pa viipe vino walolanga nu kuvwa lino wikalanga na antu yayo.
9 Fwandi Yeova* wamanya ivya kupokolola ya kapepa yakwe umu wezyo,+ lelo antu aakacita iviipe yene yalononwa pa wanda wa upinguzi,+
10 maka maka yayo aakalonda ukukowezya imili yakwe yauze+ nupya asuula utunguluzi.+
Antu yayo aacilumba nupya yakacita vino aineco yakulonda, yasiuvwa intete pa kupontela yano Leza wacindamika,
11 nomba nanti cakuti ya malaika yakwata sana amaka yasiomvya amazwi ya miponto pa kupeela ya kasambilizya ya ufi imilandu, pa mulandu wa kucindika Yeova.*+
12 Lelo antu yaa yaya wa nyama izisielenganya, izikavyalilwa ukulemwa nu kononwa, yakalanda iviipe pa vintu vino yatamanya.+ Yalacula uku wononesi uuliza pa mulandu ni vicitwa vyao iviipe,
13 nupya iviipe ivilayacitikila ali cilambu cao pa mulandu ni milimo yao iipe.
Yakalola ukuti caya ningo ukwikusha ulunkumbwa lwa mili yao,+ nanti sile a kasanya. Yaya wa vikwi ivikakowezya ivyakuzwala nupya yaya wa viyazi vya pa manso pano yakauvwa ningo sana lino yakusambilizya yauze umu ucenjezi nu kuliila pamwi namwe.+
14 Yakaloleka nu mu manso ukuti aacende+ nupya yasiikanya uku luyembu, nupya yakatonsha aatakoma umu utailo. Yasambilizya imyenzo yao ukuya nu lunkumbwa. Aana atiipwa.
15 Yasha inzila ilungame, yaponziwa. Yalondela inzila yakwe Balamu+ mwana Beoli, uwatemilwe ukupeelwa icilambu mu kucita ivintu iviipe.+
16 Lelo wakalipilwe pa mulandu wa kucita iviipe.+ Icinyama icisivwanga cavwanzile wa muntu nu kulesha kasesema ukucita ivya uwelewele.+
17 Yaya wa tufukoka ututakwata manzi, wakwe kungwi aakasendwa ni cimuza, nupya yasungilwa imfinzi ikomeshe.+
18 Yakalanda ivintu ivikaloleka kwati i vicindame lelo ivya uwelewele. Yakaomvya ulunkumbwa lwa mwili+ ni vicitwa vya winyi* pa kutunka antu aitalusha kuli yano yakacita iviipe.+
19 Yakayalaya untungwa lino yene aazya ya vintu iviipe;+ pano ndi cakuti umwi wacimviwa uku muntu umwi, akaya umuzya wa muntu wiyo.*+
20 Ndi cakuti pa cisila ca kufuma uku vintu ivikakowezya ivya mu nsi+ pa mulandu wa kumanya ningo Umwene nupya Kapususha Yesu Klistu, yaswilila nupya uku vintu kwene vivyo nu kucimviwa, imiyele yao iya kushalikizya ikaipisha ukucila iya pa kutandika.+
21 Nga cali ningo iyakana ukumanya inzila ya ulungami ukucila ukuimanya alino pa cisila iiza iyasha masunde ya muzilo yano yapeezilwe.+
22 Ivintu vino yacita avino ni pinda lya cumi likalanda ukuti: “Simbwa waswilila uku malusi yakwe, na kapoli uwatafulwa waya umu kuivumvunya umu matipa.”+
Mafutunoti
^ Nanti “ukupama umu kucita ivya nsonyi.” Mu Cigiliki, a·sel′gei·a. Lolini Ulondolozi wa Mazwi.
^ Lolini Ulondolozi wa Mazwi.
^ Nanti “ukupama umu kucita ivya nsonyi.” Mu Cigiliki, a·sel′gei·a. Lolini Ulondolozi wa Mazwi.
^ Lolini Ivyeo na Vyuze pa A5.
^ Lolini Ivyeo na Vyuze pa A5.
^ Nanti “kupama umu kucita ivya nsonyi.” Mu Cigiliki, a·sel′gei·a. Lolini Ulondolozi wa Mazwi.
^ Nanti “nga wacimviwa ni cintu cimwi, akaya umuzya wa cintu cico.”
