2 Milandu 21:1-20
21 Lyene Yeoshafati wafwile nu kuziikwa ukwalaala ivikolwe vyakwe mu Musumba Wakwe Devedi; nupya Yeolamu umwanakwe u wamupyanyile pa wene.+
2 Aina yakwe ya mwana Yeoshafati yaali a Azaliya, Yehiyeli, Zekaliya, Azaliya, Mikaeli, na Shefatiya. Yonsi yaa yaali ana ya Mwene Yeoshafati uwa mu Izlaeli.
3 Walanga isi wayapeela ivintu ivingi vyakwe siuva na goldi ni vintu vya mutengo pamwi ni misumba ya malinga umu mpanga ya Yuda;+ lelo wapeezile uwene kuli Yeolamu+ pano wali ali iyeli.
4 Lino Yeolamu wapyanyile isi pa wene, wakomile aina yakwe yonsi,+ kumwi na ya cilolo yamwi amu Izlaeli uku lupanga pakuti akomye uwene wakwe.
5 Yeolamu wali ni myaka 32 lino wizile aya umwene, nupya wateesile imyaka 8 umu Yelusalemu.+
6 Nawe kwene wacitanga wakwe vino ya mwene ya ku Izlaeli yacitanga,+ wakwe vino amu ng’anda yakwe Ahabu yacisile, pano watwazile mwana Ahabu+ nupya watwalilile ukusosha Yeova.
7 Lelo Yeova atalondanga ukulovya amu ng’anda yakwe Devedi pa mulandu nu upangano uno wapangine nawe,+ pano walanga wamulaya ukuti lyonsi umu lupwa lwakwe mulaafuma uwa kuteeka* umu Yelusalemu.+
8 Mu manda yakwe Yeolamu, Aina Edomu yapondokiile Ayuda+ nupya yaisontiile umwene.+
9 Fwandi Yeolamu na akalamba ya yasilika yakwe yapisile na maceleta yao yonsi, nupya wakatwike usiku nu kucimvya Aina Edomu aamuzingulwike kumwi na angalilanga asilika ya pa maceleta.
10 Lelo Aina Edomu yatwalilila ukupondokela Ayuda ukufika na ndakai. Aina Libina+ nayo kwene yayapondokile pano walanga Ayuda yasha Yeova Leza wa vikolwe vyao.+
11 Wasoolwile incende zya kupepelapo+ pa myamba umu mpanga ya Yuda pakuti alenge antu ya mu Yelusalemu ukukanaya ni cisinka kuli Leza nu kulapepa ya leza ya ufi, nupya walenzile antu ya mu Yuda ukupondokela Leza.
12 Lyene Eliya+ kasesema walembiile Yeolamu amazwi yakuti: “Yeova Leza wakwe Devedi icikolwe cako watalanda ati, ‘Wemo utaaya wakwe Yeoshafati+ tata wako nanti wakwe Asa+ umwene wa mu Yuda.
13 Lelo ukacita wakwe vino ya mwene ya mu Izlaeli+ yacitanga nu kulenga antu ya mu mpanga ya Yuda nu mu Yelusalemu kupepa ya leza yauze+ wakwe vino amu ng’anda yakwe Ahabu yacitanga,+ nupya wakoma na ina yako+ amu ng’anda yakwe tata wako aali ningo ukukucila.
14 Fwandi Yeova alafulula antu yako, ana yako na aci yako alino nu konona ivyuma vyako vyonsi.
15 Ulalwala indwala izingi kumwi nu ulwale wa ku mala, cila wanda ulaacula nu ulwale uwo mpaka amala yace yatandike ukufuma.’ ”
16 Lyene Yeova walenzile+ Aina Filisti+ na Ina Alabya+ aikalanga umupiipi na Ina Etiopia ukukatukila Yeolamu.
17 Fwandi ingiile umu mpanga ya Yuda nu kuzanza antu aikalangamo, nupya yasenzile ivyuma vyonsi ivyali umwi sano+ kumwi na ana ya mwene na aci yakwe, wasile sile na Yeowazi*+ kasuli wakwe.
18 Pa cisila, Yeova wamulwalike ulwale uusipola uwa ku mala.+
19 Mu kuya kwa nsita ala papita imyaka iili, amala yatandike ukufuma pa mulandu nu ulwale wakwe, nupya ulwale kwene uwo u wamukomile; nupya antu yakwe yataapemvile umoto kuti yamucindike wakwe vino yacisile uku vikolwe vyakwe.+
20 Wali ni myaka 32 lino watandike ukuteeka nupya wateesile imyaka 8 umu Yelusalemu. Kusi uwalangulwike lino wafwile. Fwandi yamuziisile umu Musumba Wakwe Devedi,+ lelo asi mu ncende ino yaziikangamo ya mwene.+
