1 Petulo 3:1-22
3 Umu musango uli umwi kwene, mwe yaci mwatontela ya winu,+ pakuti nga kuli yamwi aakukana ukuvwa izwi lyakwe Leza, yangasenuka ukwaula izwi pa mulandu ni miyele isuma iya yaci yao,+
2 pano yalalola imiyele inu isuma+ nu mucinzi uno mwayakwatila.
3 Ukuiyemvya kwinu kutaya ukwa kunzi, kuli ukuti ukuluka inyele nu kuzwala vyakwe goldi+ nanti vyakuzwala ivya mutengo
4 Lelo ukuiyemvya kwinu kulinzile ukuya ukwa mukasi mu mwenzo. Fwandi muye ateekele nupya afuuke,+ pano ali vintu vicindame sana kuli Leza; nupya kuko kwene ali kuyemba ukusiononeka.
5 Pano vikwene avino anaci aliko mpiti nupya aataile Leza yaiyemvyanga, nupya yatontelanga ya iya,
6 wakwe vino Sala uvwilanga Abulahamu nu kumwama ukuti umwene.+ Namwe kwene mungaya wa yana yakwe nga mwatwalilila ukucita icisuma nu kukanaya ni ntete.+
7 Mwe ya iya, umu musango uli umwi kwene twalililini ukwikala na aci inu ukulingana nu kumanya.* Vino anaci, mwayacindika+ wa viya ivitonte, pano nayo kwene i mpyanyi pamwi namwe+ izya umi uno mwapeelwa pa mulandu ni cikuuku cakwe Leza icikulu, pakuti mapepo inu yataapelela.
8 Ica kushalikizya, mwensi muye na melenganyo ali yamwi,+ mwalangulukilana, mwatemwana wa ina, muye sana nu luse,+ nupya muye aicefye.+
9 Mutawezezya uyi pa uyi+ nanti intusi pa ntusi.+ Lelo mwapaala aakamucitila iviipe,+ pano mwamilwe ukuti mwacita vikwene, pakuti mukapokelele mapaalo.
10 Pano “wensi uwatemwa umi nupya aakalonda ukwikala manda aingi, alinzile ukucingilila ululimi lwakwe ku viipe+ ni milomo yakwe uku kulanda ivya ufi.
11 Lekini wene ataluke uku kucita iviipe+ nupya acita ivisuma;+ lekini wene alonda umutende nu kuusungilila.+
12 Pano amanso* yakwe Yeova* yaya pa yalungami, na matwi yakwe yakauvwa kuli vino yakupaapata,+ lelo Yeova* wapata aakacita iviipe.”+
13 A weni angamucita iciipe ndi cakuti mwemwe yacincile ukucita ivisuma?+
14 Lelo nanti cakuti mwacula pa mulandu nu ulungami, ala muli ni nsansa.+ Nupya mutaatiina ivintu vino yakatiina,* nanti ukusakamala.+
15 Lelo mwacindika Klistu Umwene umu myenzo inu, lyonsi mwaya aipekanye ukwasuka wensi uwamuzya pa upaalilo winu, nomba mwacita vivyo nu ufuuke+ alino nu mucinzi sana.+
16 Muye na kampingu musuma,+ pakuti nga yamwi yalanda iviipe pali mwemwe, yaye ni nsonyi+ pa mulandu ni miyele inu isuma iya Wina Klistu.+
17 Cazipa ukucula pa mulandu wa kucita icisuma,+ ndi cakuti avino Leza akulonda, ukucila ukucula pa mulandu wa kucita iciipe.+
18 Pano Klistu wafwile umuku onga sile pa mulandu wa membu,+ umulungami wafwilile antu ataali alungami,+ pakuti amutungulule kuli Leza.+ Wali nu mwili wa untunze+ lino wakomilwe lelo wizile aya u mupasi lino watuutulwilwe.+
19 Nupya waile asimikila uku mipasi iyali umu cifungo,+
20 ino pa kutandika itaali ni cuvwila lino Leza wateesile umwenzo umu manda yakwe Nowa,+ lino ciwato cakuulwanga,+ muno antu anono sile, kuli kuti 8, yapusukile uku manzi.+
21 Ivyacitiike umu manda yaya vyakolana nu lubatizyo ulukumupususha ndakai (asi ukufulala sile pakuti ivikwi vifume uku mwili, lelo u kulenga kampingu musuma kuli Leza),+ ukupitila umu kutuutululwa kwakwe Yesu Klistu.
22 Wikala ukwi kasa li lunji lyakwe Leza,+ pano waile ukwi yulu, nupya ya malaika na ya kateeka na aapeelwa amaka yakamuvwila.+
Mafutunoti
^ Nanti “kuyalangulukila; kuyuvwikisha.”
^ Lolini Ivyeo na Vyuze pa A5.
^ Lolini Ivyeo na Vyuze pa A5.
^ Nanti “icinso cakwe.”
^ Nanti limwi, “mutatiina ivintiinya vyao.”
