Sofoni 1:1-18
1 Ala seki Zeova ti dir Sofoni ki ti garson Kousi, ki ti garson Gedalia, ki ti garson Amaria, ki ti garson Ezekias, dan lepok kot Zozias, ki ti garson Ahmonn, ti lerwa Zida:
2 “Mo pou balie net tou kitsoz ki ena lor later,” ala seki Zeova dir.
3 “Mo pou detrir zom ek zanimo.
Mo pou detrir bann zwazo dan lesiel ek bann pwason dan lamer,Ek bann obstak ki fer tonbe* ansam avek bann move dimounn;Ek mo pou fer tou bann dimounn disparet depi lor later,” ala seki Zeova dir.
4 “Mo pou avoy mo lame kont ZidaEk kont tou bann abitan Zerizalem,Ek mo pou fer disparet tou ti tras Baal dan sa plas-la,Ek nom bann pret ki servi bann bondie etranze ansam avek bann pret ki infidel,
5 Ek bann ki prostern devan larme ki dan lesiel depi lor twa bann lakaz,Ek bann ki prostern ek fer serman ki zot pou res fidel ar ZeovaAlor ki zot fer serman pou res fidel ar Malkam;
6 Ek bann ki aret swiv ZeovaEk bann ki pa rod Zeova ouswa pa kestionn li.”
7 Res trankil devan Segner Siprem* Zeova, parski zour Zeova pre.
Zeova inn prepar enn sakrifis; li’nn sanktifie bann ki li’nn invite.
8 “Zour ki Zeova pou fer sakrifis, mo pou demann bann kont ar bann prins,Bann garson lerwa, ek ar tou bann ki met bann linz etranze lor zot.
9 Mo pou demann bann kont ar tou bann ki mont lor lestrad* sa zour-la,Tou bann ki ranpli lakaz zot met avek violans ek foste.”
10 Ala seki Zeova dir, “Sa zour-la,Pou tann kriye depi Laport Pwason,Pou tann kriye ek plore depi Deziem Kartie lavil,Ek enn gro tapaz depi bann kolinn.
11 Kriye ek plore, zot bann abitan Maktes,*Parski finn debaras* tou bann ki fer biznes*Ek finn detrir tou bann ki pez larzan.
12 Sa lepok-la, mo pou rod partou dan Zerizalem avek bann lalanp,Ek mo pou demann bann kont ar bann ki satisfe ar zotmem,* bann ki dir dan zot leker,‘Zeova pa pou fer lebien, ek li pa pou fer lemal.’
13 Pou kokin zot bann rises ek pou detrir zot bann lakaz.
Zot pou aranz zot bann lakaz, me zot pa pou res ladan;Ek zot pou plant bann karo rezin, me zot pa pou bwar divin ki sorti dan sa bann karo-la.
14 Gran zour Zeova pre!
Li pre ek li pe vinn extra vit!*
Tapaz ki zour Zeova fer, li amer.
Sa zour-la enn gerye kriye.
15 Sa zour-la, li enn zour koler ki bien violan,Enn zour maler ek langwas,Enn zour tanpet ek destriksion,Enn zour kot ena nwarte ek ki som,Enn zour kot ena niaz ek kot fer bien nwar,
16 Enn zour kot pou tann korn ek kot pou tann bann ki pe al lager kriyeKont bann lavil ki bien proteze ek kont bann gran latour ki ena dan bann kwin.
17 Mo pou amenn maler lor bann dimounn,Ek zot pou mars parey kouma bann dimounn ki aveg,Parski se kont Zeova ki zot finn fer pese.
Pou vers zot disan parey kouma lapousier,Ek zot laser* parey kouma malpropte zanimo.
18 Ni zot larzan ni zot lor pa pou kapav sov zot pandan zour gran koler Zeova;Parski so devouman ki kouma enn dife pou bril later an-antie,Parski li pou amenn enn exterminasion, wi enn exterminasion ki fer per lor tou bann abitan later.”
Not
^ Kitfwa se bann obze ouswa bann laktivite ki ena enn lien avek lidolatri.
^ Ouswa “Souverin Segner.”
^ Ouswa “podiom.” Kitfwa lestrad kot tronn lerwa ti ete.
^ Kitfwa enn kartie dan Zerizalem pre ar Laport Pwason.
^ Ouswa “touy.”
^ Ouswa “marsan.”
^ Lit., “bann ki kouma lamar ki’nn reste,” dan fon enn barik divin.
^ Ouswa “degaze vini.”
^ Lit., “bann lintestin.”
