Nou pe deza gagn bann benediksion gras-a sakrifis Zezi. Par exanp, gras-a laranson, Zeova pardonn nou bann pese. Li pa oblize pardonn nou. Selman, Li anvi fer li. (Ps. 86:5; 103:3, 10-13) Sertin panse ki zot pa merite ki Zeova pardonn zot. Me avredir, personn pa merite gagn pardon Zeova. Lapot Pol ti dir ki li “pa merite ki apel [li] enn zapot.” Selman apre sa, li ti dir: “Me gras-a Bondie so bonte extraordiner mo seki mo ete.” (1 Kor. 15:9, 10) Kan nou repanti pou nou bann pese, Zeova pardonn nou. Kifer Li fer sa? Pa parski nou merite, me parski Li kontan nou. Alor, si to panse ki to pa merite ki Zeova pardonn twa, pa bliye ki Zeova pa’nn donn laranson pou bann dimounn parfe; Li’nn donn laranson pou bann dimounn inparfe, ki regret bann pese ki zot inn fer, ek ki fer zefor pou sanze.—Lik 5:32; 1 Tim. 1:15. w25.01 26-27 ¶3-4

Nou pena kontrol lor seki lezot dir ek fer, me nou ena kontrol lor fason ki nou nou reazir. Ek bien souvan, pli bon fason ki nou kapav reazir se kan nou pardonn lezot. Kifer nou bizin pardone? Parski nou kontan Zeova, ek Li anvi ki nou pardonn lezot. Anplis, si nou kontign res ankoler ek ki nou pa pardone, sa kapav rann nou malad ek sa kapav fer nou azir san reflesi. (Prov. 14:17, 29, 30) Kan nou rezet lakoler ek rankinn, nou protez nou leker kont bann santiman negatif. Avredir, se koumadir nou pe fer nou-mem enn kado—nou aret konsantre lor seki’nn arive dan lepase, ek nou al delavan. Kan enn kikenn bles twa, kouma to kapav sirmont to bann santiman negatif? Premierman, to bizin letan pou to geri. Mem si bann dokter okip bien enn kikenn ki’nn blese, li bizin letan pou li geri. Dan mem fason, kan enn kikenn inn bles to santiman, to bizin letan pou to geri, pou ki to kapav pardonn li ar tou to leker. (Ekle. 3:3; 1 Pier 1:22) Deziemman, priye Zeova ek demann Li pou ed twa pou pardone. w25.02 15-16 ¶8-11

Parmi bann lansegnman debaz, ena lansegnman lor repantans, lafwa, batem, ek rezireksion. (Ebre 6:1, 2) Sa bann lansegnman-la, se bann lansegnman inportan ki ena dan Labib. Se akoz sa ki lapot Pier ti koz lor sa bann lansegnman-la kan li ti pres ar bann dimounn Lapantkot 33 Nou Lepok. (Zist. 2:32-35, 38) Nou bizin aksepte sa bann lansegnman-la pou nou vinn enn disip Zezi. Par exanp, lapot Pol ti dir ki, si enn dimounn pa krwar dan rezireksion, li pa enn vre disip Zezi. (1 Kor. 15:12-14) Selman, pou nou vinn enn Kretien ki ena matirite, nou bizin aprann plis ki bann lansegnman debaz ki ena dan Labib. Apart bann lansegnman debaz, nou bizin osi ‘manz’ bann “manze solid” ki ena dan Labib, setadir bann lalwa ek bann prinsip ki ed nou pou konpran fason panse Zeova. Pou nou gagn bann bienfe gras-a sa bann manze solid la, nou bizin etidie zot, reflesi lor la, ek met zot an pratik. Si nou fer sa, nou pou kapav pran bann desizion ki pou fer Zeova plezir. w24.04 5 ¶12-13

Zeova ti rapel Zonas ki bann Ninivit pa ti “mem konn fer diferans ant seki bon ek seki move.” (Zonas 1:1, 2; 3:10; 4:9-11) Plitar, Zezi ti servi lexanp bann Ninivit pou ansegn bann dimounn ki Zeova Li enn Bondie ki ena mizerikord ek lazistis. Kan Zezi ti dir ki bann Ninivit ti ‘pou resisite kan pou ena zizman,’ ki li ti pe rod dir? Li ti pe rod dir ki dan lavenir ti pou ena enn rezireksion “pou enn zizman.” (Zan 5:29) Sa pou arive pandan Regn Mil An Zezi Kris, kan “bann dimounn ki drwat ek bann dimounn ki inzis” toule-de pou resisite. (Zist. 24:15) Pou bann dimounn ki inzis, sa pou enn rezireksion “pou enn zizman,” savedir ki Zeova ek Zezi pou get zot konportman ek pou gete si zot pe met an pratik bann kitsoz ki zot pe aprann. Si enn Ninivit ki’nn resisite desid pou pa ador Zeova, Zeova pa pou les li viv. (Iza. 65:20) Parkont, tou bann ki swazir pou ador Zeova ek pou res fidel anver Li, zot pou gagn posibilite pou viv pou touletan!—Dan. 12:2. w24.05 5 ¶13-14

Zezi ena mizerikord parey kouma so Papa. (Zan 14:9) Par fason ki li ti koz ar bann dimounn ek ti tret zot, nou konpran ki Zeova ena boukou mizerikord, Li kontan bann dimounn, ek Li anvi ed zot. Kan enn kikenn ti anvi sanz so lavi, Zezi ti ed li pou ki li kapav vinn so disip. (Lik 5:27, 28) Zezi ti kone ki li ti bizin donn so lavi an sakrifis. Plizir fwa, li ti dir so bann disip ki enn kikenn ti pou trayir li ek ki bann dimounn ti pou koulout li lor enn poto. (Mat. 17:22; 20:18, 19) Selman, li ti kone ki so sakrifis ti pou liber bann dimounn ar pese. Zezi ti dir osi ki apre so lamor, li ti pou “atir tou sort kalite dimounn” ver li. (Zan 12:32) Bann dimounn ki inparfe kapav fer Zeova plezir kan zot aksepte Zezi kouma zot Segner ek kan zot swiv so lexanp. Si zot fer sa, avek letan zot pou ‘libere ar pese.’ (Rom. 6:14, 18, 22; Zan 8:32) Alor, pou ki bann dimounn kapav gagn lavi sov, avek kouraz Zezi ti aksepte soufer ek gagn enn vilin lamor.—Zan 10:17, 18. w24.08 5 ¶11-12

Eski to rapel seki to ti resanti kan to ti koumans aprann bann verite ki ena dan Labib? Par exanp, to ti aprann ki to Papa Zeova bien kontan twa ek ki Li anvi ki to form parti so fami. To ti aprann osi ki Li pou tir tou soufrans ek ki Li pou resisit bann dimounn ki to kontan me ki’nn mor, pou ki zot kapav viv dan enn nouvo lemond. (Mark 10:29, 30; Zan 5:28, 29; Rom. 8:38, 39; Rev. 21:3, 4) Sa bann verite-la ek lezot ankor, sirman ti bien tous to leker, pa vre! (Lik 24:32) To ti bien kontan seki to ti pe aprann ek to ti anvi partaz sa ar tou dimounn! (Konpar ar Zeremi 20:9.) Kan nou kontan bann verite ki ena dan Labib, nou pa kapav gard sa pou nou. (Lik 6:45) Nou ena mem santiman ki bann disip Zezi dan premie siek, ki ti dir: “Nou pa kapav aret koz lor bann kitsoz ki nou’nn trouve ek tande.” (Zist. 4:20) Kan nou kontan bann verite ki ena dan Labib, nou anvi partaz sa ar tou dimounn. w24.05 15 ¶5; 16 ¶7

Nou bien kontan nou Papa Zeova! Akoz sa, nou pres ar bann dimounn ek nou ed zot pou aprann konn Li. Me ena sertin ki pa tro zwaye dan predikasion. Kifer? Parski sertin timid ek zot mank konfians an zotmem, ek ena lezot ki gagn onte pou al devan laport bann dimounn. Ena sertin osi ki per tansion bann dimounn ankoler ar zot, ek ena lezot ki prefer evit bann problem. Sa bann frer ek ser la gagn difikilte pou pres ar bann dimounn ki zot pa kone. Eski twa osi to gagn sa bann difikilte-la, ek akoz sa to pa zwaye dan predikasion? Si wi, fode pa to dekouraze. Si to mank konfians an tomem pou to prese, savedir ki to pa anvi atir latansion lor tomem ek ki to pa anvi diskit ar bann dimounn. Anplis, personn pa kontan kan enn kikenn ankoler ar li, sirtou si li pe fer enn bon travay. To Papa Zeova kone ki to ena sa bann difikilte-la ek Li anvi ed twa.—Iza. 41:13. w24.04 14 ¶1-2

Amezir ki to lir Labib, olie ki to esey met an pratik tou seki to pe aprann enn sel kout, fixe bann lobzektif ki rezonab. Esey fer sa: Fer enn lalis tou bann kitsoz ki to anvi ameliore. Apre sa, swazir enn ouswa de kitsoz ladan, lor ki to kapav koumans travay an premie. Lerla, to kapav travay lor leres plitar. Alor, lor ki kitsoz to kapav travay an premie? To kapav koumans par enn lobzektif ki fasil pou realize. Ouswa to kapav desid pou travay lor enn pwin ki to panse to bizin ameliore. Kan to’nn deside lor ki pwin to anvi travay, fer bann resers dan nou bann piblikasion. Priye Zeova konsernan to lobzektif, ek demann Li pou donn twa “dezir ek lafors toule-de pou azir.” (Fil. 2:13) Apre sa, met an pratik seki to’nn aprann. Kan to’nn reisi realiz to lobzektif, sa pou motiv twa pou fixe enn lot lobzektif. Avredir, kan to reisi fer enn sanzman ouswa travay plis lor enn kalite, sa pou ankouraz twa pou kontign amelior tomem. Lerla, kitfwa to pou trouv sa pli fasil pou to fer bann lezot sanzman. w24.09 6 ¶13-14

Eski to trakase parski bann kitsoz ki to’nn fer dan lepase inn fer lezot ditor? Ki kitsoz kapav ed twa? Fer tou seki to kapav pou aranz sitiasion-la. To kapav koumans par al demann dimounn-la pardon. To kapav osi demann Zeova pou ed bann ki to’nn fer ditor. Li kapav ed twa ek ed bann-la osi pou ki zot kontign servi Li ek ki zot santi zot anpe. Aprann ar bann erer ki to’nn fer dan lepase, ek les Zeova servi twa kouma Li Li anvi. Anou get lexanp Zonas. Olie ki li ekout Zeova ek ki li al Niniv, Zonas ti al dan lot direksion. Zeova ti koriz li ek Zonas ti aprann ar so erer. (Zonas 1:1-4, 15-17; 2:7-10) Zeova pa ti abandonn Zonas, ek Li ti donn li enn lot lokazion pou al Niniv. Sann fwa-la, Zonas ti obeir deswit. Li pa ti les erer ki li ti fer dan lepase, anpes li aksepte mision ki Zeova ti donn li.—Zonas 3:1-3. w24.10 8-9 ¶10-11

Zeova pa zis kennsel nou bann det; Li efas zot net. Anou pran enn lexanp pou konpran sa. Fer koumadir enn kikenn inn kennsel nou det; li’nn rey ouswa li’nn met enn lakrwa lor sa som larzan ki nou ti dwa la. Selman, anba lakrwa-la, nou ankor kapav trouv seki’nn ekrir. Parkont, si li efas li, som-la pou disparet net. Dan lepase, lank ki bann dimounn ti servi pou ekrir, ti efase fasilman. Ti bizin zis pas enn kout leponz mouye lor la, ek seki ti ekrir ti disparet net. Alor, kan enn kikenn ti “efas” enn det, det-la ti disparet net. Ti nepli ena okenn tras sa det-la; se koumadir zame li pa ti existe. Nou bien rekonesan anver Zeova parski Li pa zis kennsel nou bann det, me Li efas zot net!—Ps. 51:9. w25.02 10 ¶11

Kan lezot ziz nou ouswa tret nou dan enn move fason, nou sir ki Zeova kone seki’nn arive. Ek parski nou kone ki Zeova pou tir tou sa bann linzistis-la biento, sa kapav ed nou pou andire. Kan nou fer Zeova konfians ek nou atann ki Li regle tou nou bann problem, nou pa pou res ankoler ek nou pa pou ena laenn pou lezot. Anplis, kan nou res ankoler ar lezot, sa kapav fer nou sap lor kal, nou kapav perdi nou lazwa, ek gat nou lamitie ar Zeova. Biensir, nou pa kapav swiv lexanp Zezi dan enn fason parfe. Parfwa, nou dir ek nou fer bann kitsoz ki nou regrete apre. (Zak 3:2) Ek kan enn kikenn inn tret nou dan enn move fason, sa kapav fer nou soufer toutlong nou lavi. Si to dan sa sitiasion-la, to kapav sir ki Zeova konn to soufrans. Zezi osi konpran seki to resanti, parski li osi li’nn konn bann linzistis. (Ebre 4:15, 16) Nou bien kontan ki Zeova inn osi donn nou bann konsey dan Labib ki kapav ed nou pou fer fas ar bann linzistis. w24.11 6 ¶12-13

Pou ki zot kapav “gagn lavi pou touletan,” bann Zwif ti bizin ena lafwa dan Zezi. (Zan 3:16-18, 36; 17:3) Me boukou Zwif pa ti ena lafwa dan Zezi. Akoz sa, zot ti dir Zezi: “Ki mirak to pou fer pou ki nou kapav trouve ek krwar twa?” (Zan 6:30) Apre sa, zot ti dir Zezi ki zot bann anset dan lepok Moiz ti gagn lamann, ki ti koumadir dipin. (Ne. 9:15; Ps. 78:24, 25) Sa ti montre ki zot ti gagn traka zis manze. Ek kan Zezi apre sa ti koz lor “vre dipin ki sorti dan lesiel,” ki donn lavi pou touletan, ek ki pa parey kouma lamann, zot pa ti mem poz li bann kestion pou esey konpran seki li ti pe rod dir. (Zan 6:32) Zot ti telman konsantre lor seki zot ti bizin lor plan fizik, ki zot pa ti mem esey konpran seki Zezi ti pe explik zot lor lavi pou touletan. w24.12 5-6 ¶10-11

Dan lekol, to zanfan kitfwa pou aprann bann lezot form ki ena dan lanatir. Par exanp, laplipar pie ena mem form: Zot ena enn tron, sa tron-la donn bann brans, ek sa bann brans-la donn bann pli tipti brans. Apel sa, form fractal. Dan lanatir, ena boukou lezot kitsoz ki ena form fractal. Me kisann-la ki’nn kree sa bann zoli form-la? Plis to zanfan reflesi lor bann kitsoz extraordiner ki ena dan lanatir, plis sa pou ogmant so lafwa ki se Bondie ki’nn kree tou kitsoz. Ek plis to zanfan grandi, plis to bizin ed li pou konpran kifer li bizin obeir Bondie. Par exanp, to kapav demann li, “Si Bondie inn kree nou, eski to pa panse ki Li konn pli bien ki nou, seki nou bizin fer pou ki nou ere?” Lerla, to kapav dir li ki Bondie inn donn nou Labib pou explik nou kouma nou kapav ere. w24.12 16 ¶8

Zeova ti fer Pol ekrir lasanble Korint enn let ek li ti explik zot ki bizin “tir” sa zom-la dan lasanble. (1 Kor. 5:13) Kouma bann frer ek ser ti bizin tret sa zom-la? Pol ti dir zot “aret frekant” li. Zot ti bizin “mem pa . . . manz avek enn dimounn koumsa.” (1 Kor. 5:11) Kan nou manz avek enn kikenn, savedir ki nou pas letan avek li ek ki nou koz avek li. Alor, li kler ki Pol ti pe dir bann frer ek ser ki zot bizin pa pas letan ar sa dimounn-la. Koumsa, li pa ti pou kapav inflians zot pou fer bann move kitsoz. (1 Kor. 5:5-7) Anplis, sa ti kapav fer sa dimounn-la konpran ki li’nn fer enn move kitsoz. Lerla, kitfwa li ti pou gagn onte ek sa ti kapav motiv li pou repanti. w24.08 15 ¶4-5

Toule lane, pandan Zour Rekonsiliasion, gran pret ti bizin ofer bann sakrifis zanimo pou lepep. Biensir, bann sakrifis zanimo pa ti kapav “efas bann pese” net, parski bann zanimo pena mem valer ki bann dimounn. Me tanki bann Izraelit ti repanti ek ki zot ti ofer bann sakrifis ki Zeova ti demann zot, Zeova ti dispoze pou pardonn zot bann pese. (Ebre 10:1-4) Bann sakrifis ki bann Izraelit ti ofer sa zour-la ti osi rapel zot ki zot ti inparfe ek ki zot ti bizin enn lot kitsoz pou ki zot kapav gagn pardon zot bann pese dan enn fason permanan. Ki Zeova inn fer pou ki Li kapav pardonn pese bann dimounn? Li’nn avoy so Garson ki Li bien kontan lor later pou ki li donn so lavi “enn fwa pou tou pou sarye pese boukou dimounn.” (Ebre 9:28) Zezi inn donn “so lavi kouma enn ranson pou liber boukou dimounn.”—Mat. 20:28. w25.02 4 ¶9-10

“Vremem, lespri anvi fer seki bon, me laser li feb.” (Mat. 26:41b) Sa bann parol Zezi la montre ki li konpran ki nou bann dimounn inparfe ek ki nou pou fer bann erer. Me par sa bann parol-la Zezi ti donn nou enn lavertisman osi: Fode pa nou ena tro boukou konfians dan nou-mem. De-trwa lertan avan ki Zezi ti dir sa bann parol-la, so bann disip ti promet li ki zot pa ti pou abandonn li. (Mat. 26:35) Zot ti ena bann bon lintansion. Selman, zot pa ti realize ki bien vit zot ti kapav vinn feb, parski lezot inn met presion lor zot. Akoz samem, Zezi ti dir zot sa bann parol ki dan nou text pou azordi la. Selman, bann disip pa ti kontign res lor zot gard. Kan ti aret Zezi, eski so bann disip ti res avek li, ouswa zot ti per ek zot ti sove? Malerezman, zot pa ti res lor zot gard ek zot ti fer exakteman seki zot ti promet zot pa pou fer, zot ti abandonn Zezi.—Mat. 26:56. w24.07 14 ¶1-2

Adan ek Ev inn vinn bann lennmi Zeova. O-koumansman, Adan ek Ev ti form parti dan fami Zeova. (Lik 3:38) Me kan zot inn dezobeir Zeova, Li’nn met zot deor dan so fami, ek sa finn arive avan ki zot gagn bann zanfan. (Zen. 3:23, 24; 4:1) Akoz sa, nou, ki bann desandan Adan ek Ev, nou bizin rekonsilie ar Zeova. (Rom. 5:10, 11) Savedir ki nou bizin devlop enn bon lamitie avek Li. Dapre enn liv referans, mo Grek ki’nn servi pou “rekonsilie” vedir “fer enn lennmi vinn enn kamarad.” Mem si nou bann lennmi Zeova, se Zeova ki’nn fer premie pa pou ki nou kapav vinn so kamarad. Sa li vremem extraordiner, pa vre! Me ki bann dispozision Zeova inn pran pou Li fer sa? Zeova inn trouv enn fason pou ki bann dimounn inparfe kapav ena enn bon lamitie avek Li. Li’nn pran bann dispozision pou ki nou kapav gagn seki Adan inn perdi. Ek pou fer sa, Li’nn donn enn kitsoz ki ena mem valer. w25.02 3-4 ¶7-8

Lapot Pol ti dir zot ki “pinision ki mazorite . . . finn donn sa dimounn-la, li ase.” (2 Kor. 2:5-8) Dan lepase, sa zom-la ti gagn relasion sexiel ar so mama belmer. (1 Kor. 5:1) Disiplinn ki li ti gagne ti ed li pou repanti. Alor, lasanble ti nepli bizin kontign disiplinn li. (Ebre 12:11) Sa zom-la ti repanti, alor Pol ti dir bann ansien les li retourn dan lasanble. Me li ti osi ankouraz zot pou akeyir li bien, pou “pardonn li avek tou zot leker ek rekonfort li,” ek osi “rasir li ki zot kontan li.” Pol ti anvi ki, par zot bann parol ek zot bann aksion, zot montre sa zom-la ki zot inn vremem pardonn li ek ki zot kontan li. Koumsa, sa zom-la ti pou santi ki bann frer ek ser kontan ki li’nn retourne. w24.08 15 ¶4; 16-17 ¶6-8

Lapot Pol ti kone seki ti kapav ed bann Kretien Ebre pou andire. Li ti rapel zot ki kan zot gagn persekision, fode pa ki zot kont lor zotmem; zot bizin kont lor Zeova. Avek kouraz, Pol ti kapav dir: “Se Zeova ki ed mwa; mo pa pou per.” (Ebre 13:6) Azordi, sertin parmi nou bann frer ek ser pe gagn persekision. Enn fason ki nou montre ki nou kontan zot, se kan nou priye pou zot ek nou ed zot kan nou kapav. Labib bien kler lor la: “Tou bann ki anvi res atase ar Bondie ek viv dan linite avek Kris Zezi pou gagn persekision zot osi.” (2 Tim. 3:12) Akoz sa, nou tou nou bizin prepar nou pou bann difikilte ki nou pou gagne dan lavenir. Alor, anou kontign met tou nou konfians dan Zeova. Nou kapav sir ki Li pou ed nou pou andir tou nou bann difikilte. Biento, Li pou soulaz tou so bann serviter ki fidel!—2 Tes. 1:7, 8. w24.09 12-13 ¶17-18

Ki kitsoz ti ed bann Korintien pou pran batem? (2 Kor. 10:4, 5) Bondie so Parol ek so lespri sin ti ed bann Korintien pou fer bann gran sanzman dan zot lavi. (Ebre 4:12) Bann Korintien ki ti aksepte bon nouvel lor Zezi, ti reisi aret fer bann kitsoz kouma bwar boukou, kokin, ek ena enn lavi omosexiel. (1 Kor. 6:9-11) Mem si sertin Korintien ti bizin fer bann gran sanzman dan zot lavi, zot pa ti panse ki sa ti tro difisil. Zot ti fer bann gran zefor pou ki zot kapav vinn bann Kretien ek pou mars lor sime ki ti pou fer zot gagn lavi pou touletan. (Mat. 7:13, 14) Eski to pe fer bann gro zefor pou rezet bann move labitid ouswa pou aret fer enn move kitsoz pou ki to kapav pran batem? Si wi, alor pa bes lebra! Sipliy Zeova pou ki Li donn twa so lespri sin, pou ki to kapav kontign lit kont dezir pou fer bann move kitsoz. w25.03 6 ¶15-17

Zeova promet ki Li pou donn nou sazes pou nou pran bann desizion ki fer Li plezir. Anplis, Li donn sa sazes-la “tou dimounn avek zenerozite ek san fer okenn repros.” Apre ki to’nn fini priye Zeova konsernan enn sitiasion, fer zefor pou rode seki Li panse lor la. Pou nou konpran sa, anou pran enn lexanp. Fer koumadir to’nn perdi ek to pe demann enn kikenn ki sime to bizin pran. Eski to pou ale avan mem ki dimounn-la reponn twa? Non. To pou ekout bien bann lexplikasion ki li pou donn twa, pa vre! Dan mem fason, apre ki to’nn fini priye Zeova pou to gagn so sazes, to bizin ekout bien seki Li dir twa. To fer sa kan to fer zefor pou rod bann lalwa ouswa bann prinsip ki ena dan Labib, ki kapav ed twa pou pran bann bon desizion. Par exanp, pou to kone si to pou al enn program, li bon ki to get seki Labib dir lor bann fet kot pena okenn kontrol, lor bann move frekantasion, ek lor linportans pou fer Rwayom Bondie pas avan to bann dezir personel.—Mat. 6:33; Rom. 13:13; 1 Kor. 15:33. w25.01 16 ¶6-7

Dan so profesi, Izai montre diferans ki ena ant lavi bann dimounn ki dan paradi spiritiel ek lavi bann dimounn ki andeor. Zeova pe donn so bann serviter tou seki zot bizin pou ki zot kapav res pros ar Li. Li donn nou so lespri sin, so Parol Labib, ek enn kantite manze spiritiel, pou ki nou kapav “manze, . . . bwar, . . . [ek] dan lazwa.” (Konpar ar Revelasion 22:17.) Sa bien diferan pou bann dimounn ki andeor paradi spiritiel! Profesi Izai dir ki “zot pou gagn fin . . . , zot pou gagn swaf . . . , [ek] zot pou gagn onte.” Zot dan sa sitiasion-la parski zot pena enn bon lamitie ar Zeova. (Amos 8:11) Zeova Li zenere ek Li donn so bann serviter tou seki zot bizin, sirtou lor plan spiritiel. (Zoel 2:21-24) Azordi, Zeova donn nou nou manze spiritiel gras-a Labib, bann piblikasion, nou sit Internet, bann renion, ek bann lasanble. Si nou nouri nou bien sak zour, nou pou an bonn sante ek nou pou santi nou bien. w24.04 21 ¶5-6

Si to anvi koumans frekante ar enn kikenn, ki to kapav fer? To kapav swa koz ar li lor telefonn, swa zwenn li dan enn landrwa piblik, pou fer li konpran ki to ena bann santiman pou li. (1 Kor. 14:9) Si dimounn-la bizin reflesi, donn li letan. (Prov. 15:28) Ek si li pa interese pou frekant ar twa, respekte so santiman. Kouma to bizin reazir si enn kikenn dir twa ki li interese ar twa? Sa dimounn-la inn bizin ena boukou kouraz pou li vinn dir twa seki li resanti. Alor, to bizin zanti ek ena respe pou li. Si to bizin letan pou reflesi, fer dimounn-la kone. Selman, pa tarde pou donn li enn repons. (Prov. 13:12) Si to pa interese ar li, fer li konpran sa ek fer sa ar zantiyes. Si to anvi frekante ar sa dimounn-la, dir li seki to resanti, ek koze ansam pou zot kone kouma zot frekantasion bizin pase. Selman, pa bliye osi ki kitfwa zot pa pou pans parey lor frekantasion. w24.05 23-24 ¶12-13

Kan David ti enn adolesan, li ti al get larme bann Izraelit. Li ti trouve ki bann solda Izraelit ti bien per, parski enn zean ki ti apel Goliat, ti pe “provok larme Izrael.” (1 Sam. 17:10, 11) Bann solda Izraelit ti per parski zot ti res konsantre lor grander sa zean-la ek lor seki li ti pe dir. (1 Sam. 17:24, 25) Parkont, David ti pe konsantre lor enn lot kitsoz. Li ti kone ki Goliat pa ti pe zis provok larme Izrael, me li ti pe osi provok “larme Bondie vivan.” (1 Sam. 17:26) Dan sa ler-la, David ti pe mazinn Zeova. Li ti kone ki so Bondie, ki ti ed li kan li ti enn zenn berze, ti pou ed li dan sa sitiasion-la osi. Alafin, avek led Zeova, David ti touy Goliat!—1 Sam. 17:45-51. w24.06 21 ¶7

Reflesi lor kouma nou lavi ti pou ete azordi si nou pa ti servi Zeova. Kan nou fer sa, sa pou ed nou pou res fidel ar Zeova, ek parey kouma sa ekrivin psom la, nou pou kapav dir: “Me pou mwa, vinn pros ar Bondie, sa li bon pou mwa.” (Ps. 73:28) Nou pou kapav sirmont ninport ki difikilte nou gagne azordi parski nou pe “travay kouma esklav pou enn Bondie ki vivan ek vre.” (1 Tes. 1:9) Nou Bondie Zeova, Li gagn nou traka ek Li pou touletan ed nou. Li’nn ed so bann serviter dan lepase, ek Li pe ed so bann serviter azordi osi. Biento pou ena enn gran soufrans lor later, me nou pa pou tousel; Zeova pou avek nou! Alor, nou tou anou “ena enn gran kouraz ek dir: ‘Se Zeova ki ed mwa; mo pa pou per.’”—Ebre 13:5, 6. w24.06 25 ¶17-18

Labib koz lor plis ki 40 zom ki finn dirize kouma lerwa lor Izrael. Me mem bann bon lerwa ti fer bann move kitsoz. Anou get seki Lerwa David ti fer. Zeova dir: “Mo serviter David . . . ti servi mwa avek tou so leker kan li ti fer zis seki drwat devan mo lizie.” (1 Ler. 14:8) Me kanmem sa, David ti komet limoralite sexiel avek enn madam ki ti marye ek ti maniganse pou fer touy so misie dan enn lager. (2 Sam. 11:4, 14, 15) Labib koz osi lor bann bon kitsoz ki bann move lerwa ti fer. Anou get lexanp Roboam. Zeova dekrir Roboam kouma enn lerwa ki “ti fer seki move.” (2 Kro. 12:14) Me kanmem sa, Roboam ti fer bann bon kitsoz. Par exanp, li ti obeir Zeova kan Zeova ti dir li pa al lager kont dis tribi Izrael ek les zot swazir enn lot lerwa. Pou protez pep Bondie kont so bann lennmi, Roboam ti osi fer bann kitsoz pou fer so bann lavil vinn pli for. (1 Ler. 12:21-24; 2 Kro. 11:5-12) Kouma Zeova ti kone ki enn lerwa li fidel ar Li? Zeova ti gete si sa lerwa-la ti kontan Li avek tou so leker, si li ti repanti kan li ti fer enn kitsoz ki move, ek si li ti kontign ador Li dan bon fason. w24.07 20 ¶1-3

Ki bann ansien bizin fer si enn zanfan ki ankor miner, setadir ki ena mwins ki 18 an, me ki batize, fer enn pese grav? Komite bann ansien pou swazir de ansien ki pou zwenn ar miner-la ansam ar so bann paran, ki bann Kretien. Sa de ansien-la pou demann bann paran-la seki zot inn fer pou ed zanfan-la pou li sanze ek li repanti. Si zanfan-la inn ekout konsey so bann paran ek ki li pe fer bann sanzman ki bizin, sa de ansien-la kapav deside pou les bann paran-la kontign ed zot zanfan. Bann ansien kone ki Zeova inn donn bann paran responsabilite pou koriz zot zanfan, ek zot bizin fer sa avek amour. (Det. 6:6, 7; Prov. 6:20; 22:6; Efe. 6:2-4) Selman, detanzantan, bann ansien-la pou gete si bann paran-la pe donn zot zanfan led ki li bizin. Me ki bann ansien bizin fer si enn miner ki batize pe kontign fer seki pa bon? Dan sa ka-la, komite bann ansien pou form enn group ansien ki pou zwenn miner-la ansam ar so bann paran, ki bann Kretien. w24.08 24 ¶18

Nou tou nou kontan kan nou gagn enn kado. Selman, nou gagn plis lazwa kan se nou ki done. Avredir, li bon ki Zeova inn kree nou koumsa. Kifer nou dir sa? Zeova inn kree nou koumsa, parski Li anvi ki nou lazwa li depann lor nou-mem. Plis nou rod bann lokazion pou donn lezot, plis sa rann nou zwaye. Eski li pa extraordiner ki Zeova inn kree nou dan sa fason-la? (Ps. 139:14) Labib dir ki kan enn kikenn done, sa rann li ere. Alor, nou konpran kifer Zeova Li enn “Bondie ere.” (1 Tim. 1:11) Limem premie ki’nn done, ek pena personn ki donn plis ki Li. Parey kouma lapot Pol ti dir, gras-a Li, “nou ena lavi, nou bouze ek nou existe.” (Zist. 17:28) Avredir, “tou zoli don ek tou kado parfe” sorti kot Zeova. (Zak 1:17) Sirman nou tou, nou ti pou kontan gagn plis lazwa kan nou done. Nou kapav fer sa kan nou imit nou Bondie ki zenere.—Efe. 5:1. w24.09 26 ¶1-4

Apre ki zot inn get bann kondision ki bann ansien bizin ranpli, sertin serviter lasanble kitfwa panse ki zot pa pou kapav ranpli sa bann kondision-la. Selman, fode pa nou bliye ki ni Zeova, ni so lorganizasion, pa atann ki nou ranpli sa bann kondision-la dan enn fason parfe. (1 Pier 2:21) Anplis, se lespri sin Zeova ki pou ed twa pou ranpli sa bann kondision-la. (Fil. 2:13) Alor, eski ena enn parmi sa bann kondision-la lor ki to ti pou kontan travay plis? Priye Zeova lor la. Fer bann resers, ek demann enn ansien seki to kapav fer pou ki to travay plis lor la. Kontign progrese! Priye Zeova ek demann Li pou form twa pou ki to vinn pli itil pou Li ek pou to bann frer ek ser dan lasanble. (Iza. 64:8) Si to fer sa, to kapav sir ki Zeova pou beni to bann zefor pou ki to ranpli bann kondision pou servi kouma ansien. w24.11 24-25 ¶17-18

Fode pa nou panse ki akoz nou pe servi Zeova depi plizir lane, Li oblize pardonn nou. Zeova rapel tou bann kitsoz ki nou’nn fer pou Li. Selman, laranson se pa enn lapey ki nou merite gagne parski nou pe servi Zeova; se enn kado ki Zeova inn fer nou. Alor, fode pa nou panse ki akoz nou’nn fer boukou kitsoz pou Zeova, ki nou merite ki Li pardonn nou. Si nou pans koumsa, se koumadir nou pe dir ki Zezi pa ti bizin mor pou nou. (Konpar ar Galat 2:21.) Lapot Pol ti kone ki ninport ki kantite kitsoz ki li fer pou Zeova, Zeova pa ti oblize pardonn li. Alor, kifer li ti travay otan dir pou Zeova? Li pa ti fer sa pou montre ki li merite ki Zeova pardonn li. Li ti fer sa pou montre ki li ena rekonesans anver Zeova pou bonte ek mizerikord ki Li ti montre anver li. (Efe. 3:7) Parey kouma Pol, nou osi nou kontign servi Zeova ar tou nou leker. Nou fer sa pou montre ki nou rekonesan anver Li, ek pa parski nou merite ki Li pardonn nou. w25.01 27 ¶5-6