LITEYA 17
Yesu azalaki moto ya ndenge nini?
Soki tozali koyekola makambo oyo Yesu alobaki mpe asalaki ntango azalaki awa na mabele, tokomona bizaleli oyo ekotinda biso tókóma baninga na ye mpe ya Tata na ye, Yehova. Na ndakisa, bizaleli nini? Mpe ndenge nini tokoki komekola Yesu na bomoi na biso?
1. Na ndenge nini Yesu azali lokola Tata na ye?
Liboso Yesu aya awa na mabele, azalaki kotala ndenge Tata na ye azalaki kosala makambo mpe ayekolaki makambo mingi epai na ye na boumeli ya bambula ebele mpenza. Yango wana, akanisaka, ayokaka mpe asalaka makambo lokola Tata na ye. (Tángá Yoane 5:19.) Yesu amekolaki bizaleli ya Tata na ye malamumalamu, yango wana alobaki: “Moto oyo amoni ngai amoni mpe Tata.” (Yoane 14:9) Ntango ozali koyekola koyeba bizaleli ya Yesu, okoyeba Yehova malamumalamu. Na ndakisa, mawa oyo Yesu amoniselaki bato emonisi ete Yehova ayokelaka yo mawa.
2. Ndenge nini Yesu amonisaki ete alingaka Yehova?
Yesu alobaki: “Mpo mokili eyeba ete ngai nalingaka Tata, ɛɛ kaka ndenge Tata apesi ngai mitindo, nazali kosala kaka bongo.” (Yoane 14:31) Ntango Yesu azalaki awa na mabele, amonisaki ete alingaka Tata na ye mingi na ndenge azalaki kotosa ye ata ntango ezalaki pɛtɛɛ te. Yesu azalaki mpe kolinga kolobela makambo ya Yehova mpe kosalisa bato bákóma baninga ya Tata na ye.—Yoane 14:23.
3. Ndenge nini Yesu amonisaki ete alingaka bato?
Biblia elobi ete Yesu ‘alingaka mingi bana ya bato.’ (Masese 8:31) Amonisaki bolingo na ndenge azalaki kolendisa bato mpe kosalisa bango na motema moko. Asalaki makamwisi kaka te mpo na komonisa nguya na ye, kasi mpe mpo azalaki koyokela bato mawa. (Marko 1:40-42) Azalaki kosalela bato ya ndenge nyonso makambo na boboto, azalaki kopona bilongi te. Maloba na ye ezalaki kolendisa mpe kopesa elikya na bato nyonso ya mitema sembo, oyo bazalaki koyoka ye. Yesu andimaki konyokwama mpe kokufa mpo alingaka bato nyonso. Kasi alingaka mingimingi bato oyo basalelaka mateya na ye.—Tángá Yoane 15:13, 14.
KƆTÁ NA MOZINDO
Luká koyeba bizaleli mosusu ya Yesu. Mpe talá ndenge okoki komekola ezaleli na ye ya kokaba mpe bolingo na ye.
4. Yesu alingaka Tata na ye
Ndakisa ya Yesu eteyi biso makambo oyo tokoki kosala mpo na komonisa ete tolingaka Nzambe. Tángá Luka 6:12 mpe Yoane 15:10; 17:26. Nsima ya kotánga vɛrsɛ mokomoko, yanolá na motuna oyo:
-
Na kolanda ndakisa ya Yesu, ndenge nini tokoki komonisa ete tolingaka Yehova?
Yesu azalaki kolinga Tata na ye ya likoló mpe azalaki kosolola na ye mbala na mbala na libondeli
5. Yesu asalisaki bato oyo bazalaki na mposa ya lisalisi
Yesu azalaki kotya bamposa ya bato mosusu liboso ya bamposa na ye. Ata ntango alɛmbaki, asalelaki ntango mpe makasi na ye mpo na kosalisa bato. Tángá Marko 6:30-44, mpe na nsima yanolá na mituna oyo:
-
Na lisolo oyo, ndenge nini Yesu amonisaki ete azalaki komitungisa mpo na basusu?—Talá vɛrsɛ 31, 34, 41, mpe 42.
-
Nini etindaki Yesu asalisa bato?—Talá vɛrsɛ 34.
-
Lokola Yesu amekolaka bizaleli ya Yehova, yango eteyi yo nini mpo na Yehova?
-
Tokoki kosala nini mpo na komonisa ete tozali komitungisa mpo na basusu?
6. Yesu akabaka
Yesu azalaki kokaba atako azalaki na biloko mingi te, mpe ayebisi biso tókabaka. Tángá Misala 20:35, mpe na nsima yanolá na motuna oyo:
-
Ndenge Yesu amonisi yango, tosengeli kosala nini mpo tózala na esengo?
Talá VIDEO, mpe na nsima yanolá na motuna oyo elandi.
-
Tokoki kopesa basusu nini ata soki tozali na biloko mingi te?
Oyebaki yango?
Biblia elendisi biso tóbondelaka Yehova na nkombo ya Yesu. (Tángá Yoane 16:23, 24.) Soki tobondeli bongo, tokomonisa ete tozali na botɔndi na oyo Yesu asalaki mpo na kosalisa biso tókóma baninga ya Yehova.
SOKI MOTO ALOBI NA YO: “Nzambe akipaka bampasi na biso te.”
-
Lokola Yesu amekolaki bizaleli ya Tata na ye, ndenge nini makambo oyo asalaki awa na mabele emonisi ete Yehova akipaka biso?
NA MOKUSE
Yesu alingaka Yehova mpe alingaka bato. Yesu azali lokola Tata na ye. Soki toyekoli koyeba Yesu malamumalamu, tokoyeba mpe Yehova malamu.
Bozongeli
-
Ndenge nini tokoki komonisa ete tolingaka Yehova, ndenge Yesu amonisaki yango?
-
Ndenge nini tokoki komonisa ete tolingaka bato, ndenge Yesu asalaki yango?
-
Ezaleli nini ya Yesu osepelaka na yango mingi?
MAKANISI MOSUSU
Talá bizaleli mosusu ya Yesu oyo tokoki komekola.
“Mpo omekola Yesu, . . .” (Yesu azali nzela, solo mpe bomoi, lokasa 317)
Talá mpo na nini kobondela na nkombo ya Yesu ezali na ntina.
“Mpo na nini kobondelaka na nkombo ya Yesu?” (Linɔ́ngi ya Mosɛnzɛli ya 01/02/2008)
Biblia elobeli ndenge oyo Yesu azalaki komonana na miso?
Mateya nini tokoki kozwa na ndenge oyo Yesu azalaki kosalela basi makambo?
“Nzambe alingaka bápesa basi lokumu mpe limemya” (Linɔ́ngi ya Mosɛnzɛli ya 01/09/2012)
Talá mpe...
MITUNA OYO BATO BATUNAKA MINGI
Koyekola Biblia elimboli nini?
Na lisalisi ya boyekoli ya Biblia ya ofele oyo Batatoli ya Yehova bayekolaka bato, okoki kosalela libongoli ya Biblia oyo olingi. Koyoka nsɔni te mpo na kobengisa bato nyonso ya libota na yo to baninga na yo mpo básangana na boyekoli na yo.
