ပူ ၁၁၂
ကဘီဟးဂီၤလၢကီးတဖျၢၣ် အဂ့ၢ်
ကွၢ်တဘီ, ကဘီတဘ့ၣ်န့ၣ် ကလီၤဘျၢလီၤ. ကဲထီၣ်တကူာ်တကူာ်လံ. သုထံၣ်ပှၤလၢ စံၣ်လီၤဆူထံကျါတဖၣ်န့ၣ်ဧါ. တနီၤန့ၣ် ထီၣ်ဝဲသ့ၣ်ဆူကၢၢ်ပၤလံ. တၢ်န့ၣ်ပီလူးဧါ. တၢ်မၤတ့ၢ်အသးဒီးအီၤဒ်လဲၣ်န့ၣ် ပကကွၢ်သကိးတက့ၢ်.
ပီလူးဘၣ်တၢ်တ့ၢ်လီၤအီၤဆူဃိာ်ပူၤ ဖဲဝ့ၢ်ကဲၤစါရံၤ ခံနံၣ်န့ၣ် နသ့ၣ်နီၣ်ဧါ. တၢ်န့ၣ်အလီၢ်ခံ အဝဲဒၣ်ဒီး ပှၤဃိာ်ဖိအဂၤတဖၣ် ဘၣ်တၢ်ဆှၢထီၣ်အီၤဆူ ကဘီတဘ့ၣ်အဖီခိၣ်ဒီး ဘၣ်လဲၤဝဲသ့ၣ်ဆူဝ့ၢ်ရိမ့ၤလီၤ. တုၤအတုၤလၢကီးကြ့တ့ၤ ဒီး ကလံၤမုၢ်ဖးဒိၣ်ဘၣ်အဝဲသ့ၣ်လီၤ. ကလံၤမုၢ်ဆူၣ် ဆံးဒိၣ်လဲၣ်န့ၣ်, ကဲထီၣ်တုၤလၢ ပှၤကၢၤက့ၤကဘီ တန့ၢ်လၢၤဘၣ်န့ၣ်လီၤ. လၢမုၢ်ဆါန့ၣ် တၢ်ထံၣ်မုၢ်တသ့ဘၣ် ဒီးလၢမုၢ်နၤစ့ၢ်ကီး တၢ်ထံၣ်ဆၣ်တဖၣ်တသ့ဘၣ်လီၤ. ယံာ်တဘျုးသီဝံၤ အလီၢ်ခံ ပှၤအိၣ်လၢကဘီပူၤတဖၣ်န့ၣ် တမုၢ်လၢ်လၢကမူဝဲသ့ၣ်လၢၤဘၣ်န့ၣ်လီၤ.
ဖဲန့ၣ်အခါ ပီလူးဂဲၤဆၢထၢၣ်ဒီး စံးဝဲဒၣ်လၢ ‘သုတသံဘၣ်သုဝဲနီတဂၤဘၣ်. ကဟးဂီၤထဲဒၣ် ကဘီန့ၣ်ဧိၤလီၤ. ဘၣ်မနုၤအဃိလဲၣ်န့ၣ် မနၤကၢာ် ယွၤအကလူးတဂၤ ဟဲဆူယအိၣ်ဒီး စံးဘၣ်ယၤလၢ “ပီလူးဧၢ, ပျံၤတၢ်တဂ့ၤ. နကဘၣ်ဆၢထၢၣ်လၢ ရိမ့ၤအစီၤပၤကဲစၢ်အမဲာ်ညါလီၤ. ဒီးပှၤလၢအအိၣ်ဒီးနၤလၢ ကဘီဖီခိၣ်တဖၣ်န့ၣ် ယွၤကမၤပူၤဖျဲးအီၤခဲလၢာ်လီၤ.”’
ကလံၤမုၢ်တွၤလီၤဝံၤအလီၢ်ခံ ၁၄ နံၤတနံၤ, ဖဲဖးဖီမုၢ်အကတီၢ်န့ၣ် ပှၤကဘီဖိတဖၣ်သ့ၣ်ညါလၢ ထံဒီၣ်ဝဲတစဲးဘၣ်တစဲးန့ၣ်လီၤ. ဘၣ်ယိၣ်ဝဲသ့ၣ်လၢ ကဘီကဘၣ်တိၢ်လၢလၢၢ် ဒီးကဟးဂီၤဝဲအဃိ စဲၤလီၤဝဲသ့ၣ် နီၣ်သက့ၤတဖၣ်န့ၣ်လီၤ. တုၤလၢခံတဂီၤတခီ ထံၣ်ဝဲသ့ၣ် ပီၣ်လဲၣ်က့ၣ်ကျီၤန့ၣ်လီၤ. တုၤနုၤတစု, ဂုာ်ကျဲးစၢးလၢ ကကၢၤဘူးဝဲဆူကၢၢ်နံၤန့ၣ်လီၤ.
တုၤအတုၤလၢ ကၢၢ်နံၤဒီး ကဘီတီၣ်ထီၣ်လၢသိၣ်ခိၣ်န့ၣ်လီၤ. လပီဖးဒိၣ်တဖၣ် ဟဲတီၢ်ကဘီနးမးအဃိ ကဘီန့ၣ် ကၢ်ပိၢ်ပြံာ်လၢာ် ကယီကယီန့ၣ်လီၤ. သုးဖိတကယၤအခိၣ်စံးဝဲဒၣ် ‘ပှၤလၢပီၢ်ထံသ့ခဲလၢာ်တဖၣ် စံၣ်လီၤဆူထံကျါဒီး ပီၢ်ထံဆူကၢၢ်နံၤတက့ၢ်. ပှၤအိၣ်တ့ၢ်တဖၣ်စ့ၢ်ကီး စံၣ်လီၤဆူထံကျါဝံၤ ဖီၣ်ဃာ်ကဘီအကၢ်ပြံးအက့အခီတက့ၢ်.’ ဒ်အစံးဝဲအသိး ပှၤမၤဝဲသ့ၣ်လီၤ. ဒ်န့ၣ်ဒီး ဒ်မူခိၣ်ကလူးစံးဝဲအသိး ပှၤလၢကဘီပူၤ ၂၇၆ ဂၤလၢာ် တသံဝဲနီတဂၤဘၣ် ဒီးတုၤဝဲသ့ၣ်လၢကၢၢ်ပၤန့ၣ်လီၤ.
ကီးအဝဲအံၤအမံၤမ့ၢ် မ့းလံတ့ၤန့ၣ်လီၤ. ပှၤကီးဖိတဖၣ် အသးဂ့ၤဝဲဒိၣ်မးန့ၣ်လီၤ. ဒုးအီၣ်ဒုးအီ ပှၤလၢကဘီဖီခိၣ်သ့ၣ်တဖၣ် ဂ့ၤဂ့ၤဘၣ်ဘၣ်လီၤ. မူခိၣ်ကလံၤသီၣ်ဂီ ဘၣ်လီၢ်ဘၣ်စးထီၣ်အခါ ပီလူးဘၣ်တၢ်ဆှၢထီၣ်အီၤဆူ ကဘီလၢခံတဘ့ၣ်အဖီခိၣ်ဝံၤ ဘၣ်လဲၤဝဲဆူ ဝ့ၢ်ရိမ့ၤန့ၣ်လီၤ.
