ပူ ၅၄
ပှၤအဆူၣ်ကတၢၢ် အဂ့ၢ်
သုသ့ၣ်ညါ ပှၤအဆူၣ်ကတၢၢ်လၢဟီၣ်ခိၣ်ချၢ အမံၤန့ၣ်ဧါ. အဝဲမ့ၢ်ပှၤစံၣ်ညီကွီၢ်တဂၤ လၢအမံၤမ့ၢ်ၡံၣ်ၡိၣ်လီၤ. ၡံၣ်ၡိၣ်အိၣ်ဒီး တၢ်ဂံၢ်ဆူၣ်ဘါဆူၣ် ဒ်အံၤန့ၣ် မ့ၢ်လၢယဟိဝၤ ဟ့ၣ်အီၤအဃိလီၤ. ၡံၣ်ၡိၣ်တချုးအိၣ်ဖျဲၣ်ထီၣ်ဒံးဘၣ်န့ၣ် ယဟိဝၤစံးပာ်အမိၢ်လၢ, ‘နၤအံၤ, တယံာ်ဘၣ်ဒီး နကမၤန့ၢ်ဖိခွါတဂၤလီၤ. အဝဲကကဲခိၣ်ကဲနၢ် ဒီးအုၣ်က့ၤခီၣ်က့ၤ ပှၤအံၣ်စရ့လးဖိတဖၣ် လၢပှၤဖလ့ၡသးဖိ အစုပူၤလီၤ’ န့ၣ်လီၤ.
ပှၤဖလ့ၡသးဖိတဖၣ် မ့ၢ်ပှၤအၢပှၤသီတဖၣ် လၢအအိၣ်လၢ ကီၢ်ကနၤဧၣ်အပူၤန့ၣ်လီၤ. အဝဲသ့ၣ်အိၣ်ဒီး ပှၤသုးဖိအါမးဒီး မၤနးမၤဖှီၣ် ပှၤအံၣ်စရ့လးဖိ နးမးန့ၣ်လီၤ. ဘၣ်မုၢ်တနံၤ ၡံၣ်ၡိၣ်န့ၣ်ဖဲအလဲၤဆူ ပှၤဖလ့ၡသးဖိတဖၣ်အအိၣ်အခါ လၢကျဲဖးဖီန့ၣ် ခ့ယုၢ်ဖးဒိၣ်တဒုကညီၤအီၤဒီး ဟဲဆူအအိၣ်န့ၣ်လီၤ. ဘၣ်ဆၣ် တၢ်စုကဝဲၤတအိၣ်ဘၣ်ဒီး ၡံၣ်ၡိၣ်မၤသံဝဲခ့ယုၢ်န့ၣ်လီၤ. မၤသံပှၤဖလ့ၡသးဖိတဖၣ် လၢအကယၤစ့ၢ်ကီးန့ၣ်လီၤ.
လၢခံန့ၣ် ၡံၣ်ၡိၣ်အဲၣ်လိာ်အသးဒီး ပိာ်မုၢ်တဂၤ လၢအမံၤမ့ၢ် ဒလံလၤန့ၣ်လီၤ. ပှၤဖလ့ၡသးဖိတဖၣ် ဟဲဆူဒလံလၤအအိၣ်ဒီး စံးဝဲဒၣ်, နမ့ၢ်တဲဘၣ်ပှၤလၢ ဘၣ်မနုၤလၢၡံၣ်ၡိၣ် အိၣ်ဒီးတၢ်ဂံၢ်ဆူၣ်ဘါဆူၣ်ထဲအံၤလဲၣ်န့ၣ်သၢပျၢၤ ပကဟ့ၣ်နၤစ့ တဂၤ ၁,၁၀၀ န့ၣ်လီၤ. ဒလံလၤတခီ အဲၣ်ဒိးမၤန့ၢ်စ့တဖၣ်အံၤလီၤ. အဝဲဒၣ်န့ၣ် တမ့ၢ် ၡံၣ်ၡိၣ်ဒီးယွၤအပှၤဂီၢ်မုၢ် အတံၤသကိးတံၢ်နီၢ်ဘၣ်. လၢတၢ်အံၤအဃိ ဒလံလၤန့ၣ် သံကွၢ်ဝဲဒၣ်ၡံၣ်ၡိၣ်ခဲအံၤခဲအံၤလၢ ဘၣ်မနုၤအဝဲအိၣ်ဒီး တၢ်ဂံၢ်ဆူၣ်ဘါဆူၣ် ထဲအံၤလဲၣ်န့ၣ်လီၤ.
အကတၢၢ်န့ၣ် ၡံၣ်ၡိၣ်တဲဘၣ် ဒလံလၤလၢ အတၢ်ဂံၢ်ဆူၣ်ဘါဆူၣ် အတၢ်ခူသူၣ်န့ၣ်လီၤ. စံးဝဲဒၣ်, ‘ယခိၣ်န့ၣ် စးထီၣ်လၢယအိၣ်ဖျဲၣ်ထီၣ်လံၤလံၤ ယတလူၤဘၣ်ဒံးနီတဘျီဘၣ်. ကစၢ်ယွၤန့ၣ် ဃုထၢထီၣ်ယၤလၢ အကုၢ်လီၤဆီ လၢတၢ်ကိးလၢပှၤနစၤရံဖိန့ၣ်လီၤ. ပှၤမ့ၢ်လူၤကွံာ်ယခိၣ်သၢပျၢၤ ယဂံၢ်ယဘါကဟးထီၣ်ကွံာ်ဝဲလီၤ.’
တုၤဒလံလၤသ့ၣ်ညါတၢ်ဂ့ၢ်အံၤဒီး ဒုးမံဝဲၡံၣ်ၡိၣ်လၢ အကံၣ်ဒူၣ်ခိၣ်န့ၣ်လီၤ. ဝံၤဒီး ကိးနုာ်ဝဲပှၤတဂၤဆူဒၢးပူၤဝံၤ မၢအလူၤဝဲဒၣ်ၡံၣ်ၡိၣ်အခိၣ်သူန့ၣ်လီၤ. ဖဲၡံၣ်ၡိၣ် ဖုးသံနီၣ်က့ၤအခါ အဂံၢ်အဘါဟးထီၣ်ကွံာ်ဝဲလံန့ၣ်လီၤ. တုၤနုၤတစု, ပှၤဖလ့ၡသးဖိတဖၣ် ဟဲနုာ်လီၤဖီၣ်အီၤန့ၣ်လီၤ. ဝံၤဒီးဆွံဘျီၣ်ကွံာ်အမဲာ်ချံခံဖျၢၣ်လၢာ် ဒီးမၤကဲထီၣ်အီၤလၢ အဝဲသ့ၣ်အကုၢ်အပှၤန့ၣ်လီၤ.
ဘၣ်မုၢ်တနံၤ ပှၤဖလ့ၡသးဖိတဖၣ် မၤဘူၣ်ဖးဒိၣ် လၢအကစၢ်ဒၤကိၣ် အဂီၢ်န့ၣ်လီၤ. တုၤနုၤတစု, ထုးထီၣ်ၡံၣ်ၡိၣ်လၢဃိာ်ပူၤ ဒ်သိးကမၤအီၤလၢ တၢ်လီၤနံၤန့ၣ်လီၤ. ဖဲဆၢကတီၢ်အဝဲန့ၣ် ၡံၣ်ၡိၣ်အခိၣ်သူ ဟဲထီထီၣ်က့ၤဝဲလံ. ၡံၣ်ၡိၣ်စံးဘၣ် ပိာ်ခွါဖိလၢအဖီၣ်အစုဒီးနဲၣ်အီၤကျဲလၢ, ‘လဲၤမိၤယၤဆူ ထူၣ်တဖၣ်လၢ ဟံၣ်ဆၢထၢၣ်လၢအဖီခိၣ် န့ၣ်တက့ၢ်’ န့ၣ်လီၤ. ဝံၤဒီး ၡံၣ်ၡိၣ်ဃ့ထီၣ်တၢ်ဆူယဟိဝၤ ဒ်သိးကဟ့ၣ်က့ၤအီၤအဂံၢ်အဘါ ဒီးဖီၣ်ဝဲတၢၣ်တဖၣ်လီၤ. ဝံၤဒီးကိးသသြီထီၣ်ဝဲ, ‘မ်ယသံဃုာ်ဒီး ပှၤဖလ့ၡသးဖိတဖၣ်တက့ၢ်.’ လၢဘူၣ်ပူၤအံၤ ပှၤဖလ့ၡသးဖိအိၣ် ၃,၀၀၀ န့ၣ်လီၤ. ၡံၣ်ၡိၣ်သကုးလီၤအသးဒီး ဆီၣ်လီၤပှီၢ်ကွံာ်တၢၣ်တဖၣ်အခါ တၢ်သူၣ်ထီၣ် ဟဲလီၤပှီၢ်ဝဲဒီး ပှၤအၢပှၤသီအိၣ်ဖဲန့ၣ် သံခဲလၢာ်န့ၣ်လီၤ.