ပူ ၈၅
ယ့ၣ်ၡူးအိၣ်ဖျဲၣ်ထီၣ်လၢ တဲကူတဖျၢၣ်အပူၤ
ဖိသၣ်ဖိအံၤမ့ၢ်မတၤလဲၣ် သုသ့ၣ်ညါဧါ. မ့ၢ်လီၤ, တၢ်အံၤယ့ၣ်ၡူးလီၤ. အိၣ်ဖျဲၣ်ထီၣ်ဝဲလၢ ဂီၤဖံးတဲကူတဖျၢၣ်အပူၤဒၣ်ခဲအံၤဖိလီၤ. မၤရံပာ်ယ့ၣ်ၡူးလၢ ဂီၤဖံးအီၣ်ဆၣ်အကျိးပူၤန့ၣ်လီၤ. ဘၣ်မနုၤအဃိ ယိၤသးဒီးမၤရံဘၣ်ဟဲတုၤလၢ ဆၣ်ဖိကီၢ်ဖိအကဆူးအံၤန့ၣ်လဲၣ်. တၢ်လီၢ်အံၤ တမ့ၢ်တၢ်လီၢ်လၢ ကဘၣ်အိၣ်ဖျဲၣ်ဖိသၣ်အလီၢ်ဘၣ်, တမ့ၢ်ဧါ.
မ့ၢ်မးလီၤ. ဘၣ်ဆၣ် ဟဲတုၤဝဲသ့ၣ်အဂ့ၢ်တခီ မ့ၢ်ဒ်အံၤလီၤ. ရိမ့ၤအစီၤပၤ ကဲစၢ်အီၤကူစတူး ခါလီၤအကလုၢ်လၢ မ်ပှၤကိးဂၤဒဲး ဟဲက့ၤဆူအတၢ်အိၣ်ဖျဲၣ်အလီၢ် ဒီးဟဲက့ၤဆဲးလီၤအမံၤန့ၣ်လီၤ. ယိၤသးမ့ၢ် ပှၤအိၣ်ဖျဲၣ်လၢ ဝ့ၢ်ဘ့ၤသလ့ဃ့ၣ်န့ၣ်လီၤ. ဘၣ်ဆၣ် ဖဲအဝဲသ့ၣ်ခံဂၤ ဟဲတုၤလၢဝ့ၢ်အံၤအခါ လၢကအိၣ်တမှံၤအဂီၢ် တၢ်လီၢ်တအိၣ်လၢၤဘၣ်. လၢတၢ်န့ၣ်အဃိ ဘၣ်ဟဲတုၤဝဲသ့ၣ်လၢ ဆၣ်ဖိကီၢ်ဖိအကျါန့ၣ်လီၤသၢၣ်. ဖဲနံၤအဝဲန့ၣ်လီၤ, မၤရံအိၣ်ဖျဲၣ်ထီၣ် ယ့ၣ်ၡူးန့ၣ်လီၤ. ဘၣ်ဆၣ်, ဒ်ပထံၣ်ဘၣ်အသိး ဖိသၣ်ယ့ၣ်ၡူးန့ၣ် အိၣ်ဆူၣ်အိၣ်ချ့ဂ့ၤဂ့ၤဘၣ်ဘၣ်လီၤ.
သုထံၣ်ပှၤကွၢ်သိတဖၣ်လၢ အဟဲဆူယ့ၣ်ၡူးအအိၣ်န့ၣ်ဧါ. ဖဲအဝဲသ့တဖၣ် ကွၢ်သိလၢမုၢ်နၤအခါ တၢ်ကပီၤကပြုၢ်ကပြီၤ ကပီၤထီၣ်ဝးတရံး အဝဲသ့ၣ်န့ၣ်လီၤ. မ့ၢ်လၢမူခိၣ်ကလူးတဂၤ ဟဲတုၤဝဲအဃိ အဝဲသ့ၣ် သူၣ်ပျံၤသးဖုးဒိၣ်မးန့ၣ်လီၤ. ဘၣ်ဆၣ် မူခိၣ်ကလူးစံးအဝဲသ့ၣ်လၢ ‘ပျံၤတၢ်တဂ့ၤ. လၢသုဂီၢ် အိၣ်ဒီးတၢ်ကစီၣ်လၢအဂ့ၤလီၤ. မုၢ်တနံၤညါအံၤ, ခရံာ်ကစၢ် ဘၣ်တၢ်အိၣ်ဖျဲၣ်အီၤလၢ ဝ့ၢ်ဘ့ၤသလ့ဃ့ၣ်န့ၣ်လံလီၤ. အဝဲဒၣ် ကအုၣ်က့ၤခီၣ်က့ၤ ပှၤကညီတဖၣ်လီၤ. သုကထံၣ် ဘၣ်တၢ်ဘိၣ်ဘံဃာ်အီၤလၢ တၢ်ကံးညာ်ဒီး ပုာ်မံလီၤအီၤလၢ ဂီၤဖံးအီၣ်ဆၣ်ကျိးအပူၤန့ၣ်လီၤ.’ ဒီးသတူၢ်ကလာ်န့ၣ် မူခိၣ်ကလူးဂီၢ်မုၢ်ဂီၢ်ပၤ ဟဲပၢၢ်ထီၣ်ဒီး သးဝံၣ်စံးထီၣ်ပတြၢၤ ယွၤအလၤကပီၤန့ၣ်လီၤ. ဝံၤဒီး ပှၤကွၢ်သိတဖၣ်အံၤ ထွးထီၣ်ဖဲန့ၣ်တဘျီဃီလၢ ကလဲၤဃုယ့ၣ်ၡူးအဂီၢ်န့ၣ်လီၤ. ခဲအံၤ အဝဲသ့ၣ်ထံၣ်ယ့ၣ်ၡူးလံ.
ယ့ၣ်ၡူးန့ၣ် ဘၣ်မနုၤအဃိ ဘၣ်လီၤဆီဒိၣ်မးန့ၣ်လဲၣ် သုသ့ၣ်ညါဧါ. နီၢ်နီၢ်တခီ အဝဲမ့ၢ်မတၤလဲၣ်န့ၣ် သုသ့ၣ်ညါဧါ. သ့ၣ်နီၢ်ထီၣ်က့ၤ ပကတိၤသကိးတ့ၢ် ယွၤအဖိဝဲၢ်ကိအဂ့ၢ် လၢလံာ်စီဆှံအပူအဆိကတၢၢ်တယုၢ် အပူၤန့ၣ်လီၤ. ဖိခွါအဝဲအံၤ မၤသကိးတၢ်ဒီးယဟိဝၤလၢ တၢ်တ့လီၤ မူခိၣ်, ဟီၣ်ခိၣ် ဒီးကယဲၢ်တၢ်လၢအအိၣ်ခဲလၢာ်သ့ၣ်တဖၣ်န့ၣ်လီၤ. အၢၣ်, ယ့ၣ်ၡူးမ့ၢ်အဝဲဒၣ်လီၤသၢၣ်.
မ့ၢ်ဝဲသၢၣ်, ယဟိဝၤန့ၣ် ဟံးန့ၢ်ဝဲအဖိခွါအသးဒီး ဒၢနုာ်လီၤဆူ မၤရံအဟၢဖၢပူၤန့ၣ်လီၤ. တဘျီဃီန့ၣ် ဟဲကဲထီၣ်ဝဲဒၣ်ဖိသၣ်တဂၤ, ဒ်သိးဖိသၣ် အဂၤတဖၣ်ဟဲကဲထီၣ် ဒိၣ်ထီၣ်လၢအမိၢ်အဟၢဖၢပူၤ အသိးန့ၣ်လီၤ. ဘၣ်ဆၣ် ဖိသၣ်အဝဲအံၤတခီ မ့ၢ်ဝဲယွၤအဖိခွါန့ၣ်လီၤ. လၢခံကတၢၢ်န့ၣ် ယ့ၣ်ၡူးဘၣ်ဟဲအိၣ်ဖျဲၣ်ထီၣ်ဝဲဒၣ်လၢ ဝ့ၢ်ဘ့ၤသလ့ဃ့ၣ်, လၢတဲကူတဖျၢၣ်အပူၤ ဒ်အံၤသိးန့ၣ်လီၤ. မူခိၣ်ကလူးတဖၣ် ဘၣ်မနုၤအဃိသးခုဝဲဒိၣ်မးလၢ စံးဘၣ်တဲဘၣ်ပှၤဟီၣ်ခိၣ်ဖိတဖၣ် ယ့ၣ်ၡူးအတၢ်အိၣ်ဖျဲၣ်လဲၣ်န့ၣ် သုနၢ်ပၢၢ်လံဧါ.
You May Also Like
တၢ်သံကွၢ်တဖၣ်လၢ အတၢ်စံးဆၢအိၣ်လၢ လံာ်စီဆှံပူၤ
ယ့ၣ်ၡူးအိၣ်ဖျဲၣ်ထီၣ်လၢ အဆၢကတီၢ်ဖဲလဲၣ်
ဃုသ့ၣ်ညါ ဘၣ်ဃး ဘၣ်မနုၤအဃိ ပှၤမၤခရံာ်အိၣ်ဖျဲၣ်လၢ လါဒံၣ်စ့ဘၢၣ် ၂၅ သီလဲၣ်.
