ဆီၣ်ထွဲ ယဟိဝၤယွၤ ပၢတၢ်အခွဲးတက့ၢ်
“ယွၤပကစၢ်ဧၢ, နဂ့ၤဒိးန့ၢ်တၢ်လၤကပီၤ, ဒီးတၢ်ယူးတၢ်ယီၣ်, ဒီးတၢ်စိတၢ်ကမီၤလီၤ. အဂ့ၢ်ဒ်အံၤ, နတ့လီၤတၢ်ခဲလၢာ်” လီၤ. —လီၣ်ဖျါ ၄:၁၁.
၁, ၂. ပဝဲတဂၤစုာ်စုာ် ပကဘၣ်သ့ၣ်ညါတၢ်မနုၤလဲၣ်. (ကွၢ်တၢ်ဂီၤလၢ တၢ်မၤလိအခီၣ်ထံးတက့ၢ်.)
ဒ်ပတဲသကိးလၢ တၢ်မၤလိလၢညါတခါအပူၤအသိး မုၣ်ကီၤလံၢ်တဲဝဲလၢ ယဟိဝၤယွၤတကြၢးပၢ ပှၤဟီၣ်ခိၣ်ဖိတဖၣ်ဘၣ်. ဒီးအဝဲတဲစ့ၢ်ကီးဝဲလၢ ယွၤအတၢ်ပၢန့ၣ် တတီတလိၤဘၣ် ဒီးပှၤဟီၣ်ခိၣ်ဖိ မ့ၢ်ပၢလီၤအသးဒၣ်ဝဲန့ၣ် ကဒိးန့ၢ်ဘၣ် တၢ်သူၣ်ဖှံသးညီအါန့ၢ် အဝဲသ့ၣ်အိၣ်လၢ ယွၤအတၢ်ပၢအဖီလာ်ဒံးလီၤ. မ့ၢ်မုၣ်ကီၤလံၢ်အတၢ်ကတိၤန့ၣ် မ့ၢ်ဝဲတီဝဲဧါ. ဆိကမိၣ်ကွၢ် ပှၤဟီၣ်ခိၣ်ဖိတဖၣ် မ့ၢ်အိၣ်မူဘၣ်လီၤထူလီၤယိာ်ဒီး ပၢလီၤအနီၢ်ကစၢ်အသးန့ၣ် မ့ၢ်အဝဲသ့ၣ်ကဒိးန့ၢ်ဘၣ် တၢ်သူၣ်ဖှံသးညီအါန့ၢ်ဒံး အအိၣ်လၢယွၤအတၢ်ပၢအဖီလာ်န့ၣ်ဧါ. နမ့ၢ်အိၣ်ဒီးတၢ်ခွဲးတၢ်ယာ်လၢ နကအိၣ်မူဘၣ်လီၤထူလီၤယိာ် ဘၣ်ဆၣ် နမ့ၢ်တလိၣ်ဒိကနၣ်ယွၤအကလုၢ်ဘၣ်န့ၣ် မ့ၢ်နကဒိးန့ၢ်ဘၣ်တၢ်သးခုဒိၣ်န့ၢ်ဒံး နအိၣ်လၢကစၢ်ယွၤ အတၢ်ပၢအဖီလာ်န့ၣ်ဧါ.
၂ တၢ်သံကွၢ်တဖၣ်အံၤန့ၣ် ပှၤစံးဆၢန့ၢ်နၤ တသ့နီတဂၤဘၣ်. ပဝဲတဂၤစုာ်စုာ် ပကဘၣ်ဆိကမိၣ်အီၤ လီၤတံၢ်လီၤဆဲးလီၤ. ပမ့ၢ်မၤဒ်အံၤန့ၣ် ပကသ့ၣ်ညါဘၣ်လၢ ယဟိဝၤယွၤအတၢ်ပၢန့ၣ် မ့ၢ်တၢ်ပၢလၢအဂ့ၤကတၢၢ်ဒီး အဝဲကြၢးဒိးန့ၢ်ဘၣ် ပတၢ်ဆီၣ်ထွဲမၤစၢၤလၢ ပသးဒီဖျၢၣ်လီၤ. ဘၣ်ဃးတၢ်ဂ့ၢ်အံၤန့ၣ် လံာ်စီဆှံပာ်ဖျါထီၣ်န့ၢ်ပှၤ တၢ်အုၣ်သးလီၤတံၢ်လီၤဆဲးအဃိ ပနာ်အီၤသ့လီၤ. ခဲအံၤပကကွၢ်သကိး တၢ်ဂ့ၢ်လၢလံာ်စီဆှံပူၤ လၢအဘၣ်ဃးဒီး ယဟိဝၤယွၤ အိၣ်ဒီးတၢ်ခွဲးတၢ်ယာ်လၢ ကပၢတၢ်ခဲလၢာ်န့ၣ်လီၤ.
ယဟိဝၤယွၤ အိၣ်ဒီး တၢ်ခွဲးတၢ်ယာ်လၢ ကပၢတၢ်
၃. ဘၣ်မနုၤအဃိ ယဟိဝၤယွၤအိၣ်ဒီး တၢ်ခွဲးတၢ်ယာ်လၢကပၢတၢ်လဲၣ်.
၃ ယဟိဝၤယွၤမ့ၢ်ယွၤလၢ အစိအကမီၤဒိၣ်ကတၢၢ် ဒီးတၢ်ဘၣ်တ့ခဲလၢာ် အကစၢ်အဃိ အဝဲကြၢးပၢတၢ်ခဲလၢာ်လီၤ. (၁ ကွဲးနီၣ်တၢ် ၂၉:၁၁; မၤတၢ် ၄:၂၄) တၢ်ထံၣ်လၢညါခီအပူၤန့ၣ်ပှၤ ၁၄၄,၀၀၀ လၢကပၢဃုာ်တၢ်ဒီးခရံာ်န့ၣ် စံးဝဲလၢ “ယွၤပကစၢ်ဧၢ, နဂ့ၤဒိးန့ၢ်တၢ်လၤကပီၤ, ဒီးတၢ်ယူးတၢ်ယီၣ်, ဒီးတၢ်စိတၢ်ကမီၤလီၤ. အဂ့ၢ်ဒ်အံၤ, နတ့လီၤတၢ်ခဲလၢာ်, ဒီးမ့ၢ်နသးအိၣ်ဒီး, ကဲထီၣ်ဝဲ, ဒီးဘၣ်တၢ်တ့လီၤအီၤလီၤ.” (လီၣ်ဖျါ ၄:၁၁) ယဟိဝၤယွၤတ့လီၤတၢ်ခဲလၢာ်အဃိ အဝဲအိၣ်ဒီးတၢ်ခွဲးတၢ်ယာ်လၢ ကပၢတၢ်ခဲလၢာ်လၢ အအိၣ်လၢမူခိၣ်မ့ၢ်ဂ့ၤ လၢဟီၣ်ခိၣ်မ့ၢ်ဂ့ၤန့ၣ်လီၤ.
၄. ပအိၣ်ဒီးတၢ်သဘျ့န့ၣ် အဲၣ်ဒိးစံးဝဲ ပအိၣ်ဒီးတၢ်ခွဲးတၢ်ယာ်လၢ ကထီဒါယဟိဝၤယွၤအဂီၢ်န့ၣ်ဧါ.
၄ မုၣ်ကီၤလံၢ်န့ၣ် တတ့လီၤဝဲတၢ်နီတမံၤဘၣ်. လၢတၢ်န့ၣ်အဃိ အဝဲတကြၢးပၢတၢ်နီတမံၤဘၣ်. မုၣ်ကီၤလံၢ်, နီၢ်အံၣ်အုဒီး စီၤအၤဒၣ် ပာ်ဖျါထီၣ်ဝဲလၢ အထီဒါ ယဟိဝၤယွၤပၢတၢ်အခွဲးလီၤ. (ယံးရမံယၤ ၁၀:၂၃) အဝဲသ့ၣ်အိၣ်ဒီးတၢ်သဘျ့လၢ ကဆၢတဲာ်တၢ်လၢအနီၢ်ကစၢ်န့ၣ် အဲၣ်ဒိးစံးဝဲ အဝဲသ့ၣ်အိၣ်ဒီး တၢ်ခွဲးတၢ်ယာ်လၢ ကထီဒါယဟိဝၤယွၤအတၢ်ပၢဧါ. တမ့ၢ်ဘၣ်. ပအိၣ်ဒီးတၢ်သဘျ့န့ၣ် မ့ၢ်ဝဲပအိၣ်ဒီးတၢ်ခွဲးတၢ်ယာ်လၢ ပကဃုထၢတၢ် ဒီးဆၢတဲာ်တၢ်လၢ ပနီၢ်ကစၢ်လီၤ. ဘၣ်ဆၣ် တမ့ၢ်လၢပကထီဒါ တၢ်ဘၣ်တ့ကစၢ်, ယဟိဝၤယွၤအဂီၢ်ဘၣ်. လၢတၢ်န့ၣ်အဃိ ပသ့ၣ်ညါဘၣ်လၢ တၢ်ထီဒါယွၤန့ၣ် မ့ၢ်ဝဲပသူကမၣ် ပတၢ်သဘျ့အံၤန့ၣ်လီၤ. ဒ်ပမ့ၢ် ပှၤဟီၣ်ခိၣ်ဖိတဖၣ်အသိး ပလိၣ်ဘၣ်ယဟိဝၤယွၤအတၢ်ပၢ ဒီးအတၢ်ဟံးစုနဲၣ်ကျဲလီၤ.
ကယဲၢ်တၢ်သိၣ်တၢ်သီ, တၢ်ဟံးစုနဲၣ်ကျဲ မ့တမ့ၢ် တၢ်ဆၢတဲာ်လၢအဟဲလၢ ယဟိဝၤယွၤအအိၣ်န့ၣ် ဘၣ်ဝဲခဲလၢာ်လီၤ
၅. ဘၣ်မနုၤအဃိ ယွၤအတၢ်ဆၢတဲာ်န့ၣ် ဘၣ်ဝဲထီဘိလဲၣ်.
၅ ဆိကမိၣ်ကွၢ်တၢ်ဂ့ၢ်အဂၤတမံၤလၢ ဘၣ်မနုၤအဃိ ယဟိဝၤယွၤ အိၣ်ဒီးတၢ်ခွဲးတၢ်ယာ်လၢ ကပၢတၢ်လဲၣ်န့ၣ်တက့ၢ်. အဝဲသူဝဲ အတၢ်စိတၢ်ကမီၤလၢ ကျဲလၢအဂ့ၤကတၢၢ်န့ၣ်လီၤ. အဝဲတဲဝဲလၢ– “ယမ့ၢ်ယွၤလၢ အမၤတၢ်ဘျုးတၢ်ဖှိၣ်, ဒီးတၢ်စံၣ်ညီၣ်တီ, ဒီးတၢ်တီတၢ်လိၤလၢ ဟီၣ်ခိၣ်ချၢတက့ၢ်. အဂ့ၢ်ဒ်အံၤ, ဘၣ်ယသးလၢတၢ်န့ၣ်တဖၣ်လီၤ, ယွၤစံးဝဲဒၣ်.” (ယံးရမံယၤ ၉:၂၄) ဒ်သိးယဟိဝၤယွၤ ကဆၢတဲာ်တၢ်လၢအဘၣ်အဂီၢ် အဝဲတလိၣ်ပှၤဟီၣ်ခိၣ်ဖိ အတၢ်သိၣ်တၢ်သီဘၣ်. လၢတၢ်န့ၣ်အလီၢ် အဝဲမ့ၢ်ပှၤလၢအပာ်ပနီၣ်ဝဲ တၢ်ဂ့ၤဒီးတၢ်အၢန့ၣ်လီၤ. ဒီးယဟိဝၤယွၤ ဟ့ၣ်လီၤဝဲ ပှၤဟီၣ်ခိၣ်ဖိတဖၣ် တၢ်သိၣ်တၢ်သီလၢ ဒိးသန့ၤထီၣ်အသးလၢ အတၢ်တီတၢ်လိၤန့ၣ်လီၤ. စံးထီၣ်ပတြၢၤ စံးဝဲလၢ– “နလီၢ်ပစိာ်အိၣ်ဝဲဆိးဝဲလၢ တၢ်တီတၢ်လိၤ, ဒီးတၢ်စံၣ်ညီၣ်အပူၤလီၤ.” လၢတၢ်န့ၣ်အဃိ ကယဲၢ်တၢ်သိၣ်တၢ်သီ, တၢ်ဟံးစုနဲၣ်ကျဲ မ့တမ့ၢ် တၢ်ဆၢတဲာ်လၢအဟဲလၢ ယဟိဝၤယွၤအအိၣ်န့ၣ် ဘၣ်ဝဲခဲလၢာ်လီၤ. (စံးထီၣ်ပတြၢၤ ၈၉:၁၄; ၁၁၉:၁၂၈) မုၣ်ကီၤလံၢ် တဲဟးဂီၤဝဲလၢ ယဟိဝၤယွၤအတၢ်ပၢန့ၣ် တတီတလိၤဘၣ်. ဘၣ်ဆၣ် မုၣ်ကီၤလံၢ်အနီၢ်ကစၢ်ဒၣ်ဝဲ ဒုးအိၣ်ထီၣ်တၢ်တီတၢ်လိၤလၢ ဟီၣ်ခိၣ်ချၢတန့ၢ်ဘၣ်.
၆. ဘၣ်မနုၤအဃိ ပတဲသ့လၢ ယဟိဝၤယွၤန့ၣ် အိၣ်ဒီးတၢ်ခွဲးတၢ်ယာ်လၢကပၢတၢ်လဲၣ်.
၆ တၢ်ဂ့ၢ်အဂၤတမံၤလၢ ယဟိဝၤယွၤအိၣ်ဒီး တၢ်ခွဲးတၢ်ယာ်လၢကပၢတၢ်န့ၣ် မ့ၢ်လၢအဝဲအိၣ်ဒီး တၢ်သ့ၣ်ညါဒီးတၢ်ကူၣ်သ့လၢ အကကွၢ်ထွဲတၢ်ခဲလၢာ် ဂ့ၤဂ့ၤဘၣ်ဘၣ်အဃိလီၤ. အဒိ, ယဟိဝၤယွၤဟ့ၣ်လီၤအဖိခွါ တၢ်သ့တၢ်ဘၣ် ဒ်သိးကမၤဘျါ ပှၤဆူးပှၤဆါလၢ ကသံၣ်သရၣ်မၤဘျါဝဲတန့ၢ်ဘၣ် တဖၣ်န့ၣ်လီၤ. (မးသဲ ၄:၂၃, ၂၄; မၢ်ကူး ၅:၂၅-၂၉) တၢ်သ့ၣ်တဖၣ်အံၤ မ့ၢ်ဝဲတၢ်လီၤလးလၢပဂီၢ်ဘၣ်ဆၣ် တမ့ၢ်တၢ်လီၤလးလၢ ယဟိဝၤယွၤအဂီၢ်ဘၣ်. အဝဲသ့ၣ်ညါဝဲ ပနီၢ်ခိက့ၢ်ဂီၤဂ့ၤဂ့ၤ ဒီးမ့ၢ်ဘၣ်ဒိဘၣ်ထံးန့ၣ် ဘှီဂ့ၤထီၣ်က့ၤန့ၢ်ပှၤသ့လီၤ. တကးဒံးဘၣ် အဝဲမၤမူထီၣ်က့ၤပှၤလၢအသံတဖၣ် ဒီးမၤလီၤမၢ်ကွံာ်ဝဲ တၢ်ကီတၢ်ခဲလၢ ကဲထီၣ်အသးလၢ န့ဆၢၣ်အဃိတဖၣ် သ့စ့ၢ်ကီးလီၤ.
၇. ယဟိဝၤယွၤအိၣ်ဒီး တၢ်သ့တၢ်ဘၣ်အါန့ၢ် ပှၤဟီၣ်ခိၣ်ဖိတဖၣ်လၢကျဲဒ်လဲၣ်.
၇ ဟီၣ်ခိၣ်လၢမုၣ်ကီၤလံၢ်ပၢဝဲန့ၣ် ဒုးအိၣ်ထီၣ် တၢ်မုာ်တၢ်ခုၣ်လၢ ထံလီၢ်ကီၢ်ပူၤ မ့တမ့ၢ် ထံကီၢ်တဘ့ၣ်ဒီးတဘ့ၣ် အဘၢၣ်စၢၤတန့ၢ်ဘၣ်. ထဲဒၣ်ယဟိဝၤယွၤတဂၤဧိၤန့ၣ် အိၣ်ဒီးတၢ်သ့တၢ်ဘၣ်လၢ ကဒုးအိၣ်ထီၣ်တၢ်မုာ်တၢ်ခုၣ်လၢ ဟီၣ်ခိၣ်ချၢလီၤ. (ယၡါယၤ ၂:၃, ၄; ၅၄:၁၃) ပတူၢ်ဘၣ်ဒ် စီၤပီလူးတဲဝဲအသိးလီၤ. အဝဲတဲဝဲလၢ– “ယွၤအတၢ်ထူးအတၢ်တီၤ, ဒီးအတၢ်ကူၣ်ဘၣ်ကူၣ်သ့, ဒီးအတၢ်သ့ၣ်ညါန့ၣ်, မ့ၢ်အယိာ်ဆံးဒိၣ်လဲၣ်. အတၢ်စံၣ်ညီၣ်တဖၣ်, ပဃုကွၢ်တဘၣ်ဘၣ်. ဒီးအကျဲအကပူၤန့ၣ်, ပသ့ၣ်ညါထီၣ်တသ့ဘၣ်လီၤ.”—ရိမ့ၤ ၁၁:၃၃.
ယဟိဝၤယွၤအတၢ်ပၢန့ၣ် မ့ၢ်တၢ်ပၢလၢအဂ့ၤကတၢၢ်
၈. ဘၣ်ဃးဒီးယဟိဝၤယွၤ အတၢ်ပၢန့ၣ် မ့ၢ်နထံၣ်အီၤဒ်လဲၣ်.
၈ ဒ်ပသ့ၣ်ညါဘၣ်အသိး လံာ်စီဆှံ ပာ်ဖျါထီၣ်န့ၢ် ပှၤလၢ ယဟိဝၤယွၤန့ၣ် ကြၢးပၢတၢ်လီၤ. ဒီးပာ်ဖျါထီၣ်စ့ၢ်ကီးဝဲလၢ ဘၣ်မနုၤအဃိ အတၢ်ပၢန့ၣ် မ့ၢ်တၢ်ပၢလၢအဂ့ၤကတၢၢ်လဲၣ်န့ၣ်လီၤ. တၢ်ဂ့ၢ်တၢတမံၤလၢ ယဟိဝၤယွၤ ကြၢးပၢတၢ်န့ၣ် မ့ၢ်လၢအဝဲအိၣ်ဒီး တၢ်အဲၣ်တၢ်ကွံအဃိလီၤ. ဖဲပသ့ၣ်ညါထီၣ်လၢ ကစၢ်ယွၤန့ၣ် “အသးအိၣ်တၢ်, ဒီးသးကညီၤတၢ်, သးထီၣ်ကီ, ဒီးအဘျုးအဖှိၣ်ဒီး, အမ့ၢ်အတီအိၣ်ဝဲအါမး” အခါပကဘူးထီၣ်ဒီးအီၤလီၤ. (၂ မိၤၡ့ ၃၄:၆) ကစၢ်ယွၤန့ၣ် တဆိကမိၣ်ဆံးပှၤဘၣ်, အဝဲပာ်လုၢ်ပာ်ပှ့ၤပှၤလီၤ. အဝဲကဟုကယာ်ပှၤအါန့ၢ်ဒံး ပကဟုကယာ်လီၤပသးန့ၣ်လီၤ. မုၣ်ကီၤလံၢ်တဲဝဲလၢ ယဟိဝၤယွၤ တဟ့ၣ်လီၤအခ့အပှၤတဖၣ်လၢ တၢ်အဂ့ၤခဲလၢာ်ဘၣ်. ဘၣ်ဆၣ် မုၣ်ကီၤလံၢ်အတၢ်ကတိၤန့ၣ် ကမၣ်ဝဲလီၤ. ဒ်သိးပကအိၣ်မူဘၣ် လီၤထူလီၤယိာ်အဂီၢ် ကစၢ်ယွၤဟ့ၣ်လီၤပှၤ အဖိခွါလၢအအဲၣ်ဝဲ ဒိၣ်ကတၢၢ်တဂၤလီၤ.—ဖး စံးထီၣ်ပတြၢၤ ၈၄:၁၁; ရိမ့ၤ ၈:၃၂ တက့ၢ်.
ယဟိဝၤယွၤ ကဟုကယာ်ပှၤအါန့ၢ်ဒံး ပကဟုကယာ်လီၤပသးန့ၣ်လီၤ
၉. ယဟိဝၤယွၤ သူၣ်အိၣ်သးအိၣ် ပဝဲတဂၤစုာ်စုာ်န့ၣ် ပသ့ၣ်ညါဘၣ်ဒ်လဲၣ်.
၉ ယဟိဝၤယွၤ အဲၣ်အခ့အပှၤခဲလၢာ်လီၤ. တကးဒံးဘၣ် အဝဲသူၣ်အိၣ်သးအိၣ် ပဝဲဒၣ်တဂၤစုာ်စုာ်လီၤ. ဆိကမိၣ်ကွၢ် တၢ်ကဲထီၣ်အသးဒီး ယွၤအခ့အပှၤလၢပျၢၤတဖၣ်ဒ်လဲၣ် အဂ့ၢ်န့ၣ်တက့ၢ်. လၢအနံၣ်သၢကယၤအတီၢ်ပူၤ ယဟိဝၤယွၤ သူဝဲစံၣ်ညီၣ်ကွီၢ်တဖၣ် ဒ်သိးကဟံးစုနဲၣ်ကျဲ ဒီးမၤစၢၤအပှၤဂီၢ်မုၢ်လၢ ကမၤနၢၤအဒုၣ်အဒါအဂီၢ်လီၤ. တကးဒံးဘၣ် ဖဲန့ၣ်အဆၢကတီၢ် ယဟိဝၤယွၤ ပာ်သူၣ်ပာ်သးပှၤဟီၣ်ခိၣ်ဖိ တဂၤစုာ်စုာ်စ့ၢ်ကီးလီၤ. လၢအကျါတဂၤန့ၣ် အမံၤမ့ၢ်ဝဲ နီၢ်ရူၤသးလီၤ. အဝဲတမ့ၢ်ပှၤအံၣ်စရ့လးဖိဘၣ်ဆၣ် ဒ်သိးအဝဲကဘူၣ်ထီၣ်ဘၣ်ထီၣ် ယဟိဝၤယွၤအဂီၢ် ဘၣ်တူၢ်ဆါအသးအါမးလီၤ. လၢတၢ်န့ၣ်အဃိ ယဟိဝၤယွၤဆိၣ်ဂ့ၤအီၤ ခီဖျိဟ့ၣ်အီၤ ဝၤလၢအဂ့ၤ ဒီးဖိခွါတဂၤန့ၣ်လီၤ. တကးဒံးဘၣ် မ့းၡံအၤန့ၣ် ဟဲလီၤစၢၤလီၤသွဲၣ်လၢ နီၢ်ရူၤသးအဖိခွါလီၤ. ယဟိဝၤယွၤ ကွဲးလီၤစ့ၢ်ကီး နီၢ်ရူၤသးအဂ့ၢ်လၢ လံာ်စီဆှံအပူၤ ဒီးလံာ်အံၤကိးဝဲအမံၤလၢ လံာ်နီၢ်ရူၤသးလီၤ. ဆိကမိၣ်ကွၢ် ဖဲနီၢ်ရူၤသး မ့ၢ်ဂဲၤဆၢထၢၣ်သမူထီၣ်က့ၤ ဒီးသ့ၣ်ညါဘၣ်ဝဲတၢ်ဂ့ၢ်အံၤအခါ ကတူၢ်ဘၣ်ဝဲဒ်လဲၣ်န့ၣ်တက့ၢ်.—ရူၤသး ၄:၁၃; မးသဲ ၁:၅, ၁၆.
၁၀. ဘၣ်မနုၤအဃိ ပတဲသ့လၢ ယဟိဝၤယွၤအတၢ်ပၢန့ၣ် တဃံးတလၢဘၣ်လဲၣ်.
၁၀ ယဟိဝၤယွၤ အတၢ်ပၢန့ၣ် တဃံးတလၢဘၣ်. လၢတၢ်န့ၣ်အလီၢ် ပှၤလၢအဒိကနၣ်အကလုၢ်တဖၣ်န့ၣ် ကဒိးန့ၢ်ဘၣ် တၢ်သဘျ့ ဒီးတၢ်သူၣ်ခုသးခု နီၢ်နီၢ်လီၤ. (၂ ကရံၣ် ၃:၁၇) စီၤဒၤဝံးတဲဝဲ ယဟိဝၤယွၤန့ၣ်– “တၢ်လၤကပီၤ, ဒီးတၢ်ကဟုကညီၢ်အိၣ်လၢအမဲာ်ညါ, ဒီးတၢ်ဂံၢ်တၢ်ဘါ, ဒီးတၢ်သးခုအိၣ်လၢအလီၢ်ပူၤလီၤ.” (၁ ကွဲးနီၣ်တၢ် ၁၆:၇, ၂၇) ပှၤကွဲးထါစံးထီၣ်ပတြၢၤ စီၤအ့သၣ် ကွဲးဝဲလၢ– “ပှၤဂီၢ်မုၢ်လၢ အသ့ၣ်ညါတၢ်သးခုအသီၣ်န့ၣ် ဘၣ်ဆိၣ်ဂ့ၤဝဲလီၤ. အဝဲသ့ၣ်ကလဲၤ, ယွၤဧၢ, လၢနမဲာ်အတၢ်ကပီၤအပူၤလီၤ. သူၣ်ဖှံသးညီလၢနမံၤအပူၤဒီနံၤညါ, ဒီးကထီၣ်ဘးလၢတၢ်ထီၣ်ထီလၢ နတၢ်တီတၢ်လိၤန့ၣ်လီၤ.”—စံးပတြၢၤ ၈၉:၁၅, ၁၆.
၁၁. ပတၢ်နာ် ယဟိဝၤယွၤအတၢ်ပၢ အါထီၣ်ကသ့လၢကျဲဒ်လဲၣ်.
၁၁ ပဆိကမိၣ်ထံ ယဟိဝၤယွၤအတၢ်ဂ့ၤတၢ်ဝါတဖၣ် မ့ၢ်အါထီၣ်န့ၣ် ပတၢ်နာ်လၢ ယဟိဝၤယွၤအတၢ်ပၢအဖီခိၣ်စ့ၢ်ကီး ကဂၢၢ်ကျၢၤထီၣ်ဝဲလီၤ. ပကတူၢ်ဘၣ်ဒ် ပှၤကွဲးထါစံးထီၣ်ပတြၢၤလၢအစံးဘၣ်ယွၤလၢ– “ပအိၣ်ပဆိးလၢနဂၢၤတဖၣ်အပူၤမုၢ်တနံၤ, ဂ့ၤန့ၢ်ပအိၣ်လၢအဂၤတပူၤ အနံၤတကထိန့ၣ်တက့ၢ်လီၤ.” (စံးထီၣ်ပတြၢၤ ၈၄:၉) ယဟိဝၤယွၤ တ့လီၤပှၤအဃိ ဒ်သိးပကအိၣ်ဒီးတၢ်သးခုအဂီၢ် ပကဘၣ်မၤဒ်လဲၣ်န့ၣ် အဝဲသ့ၣ်ညါဝဲလီၤ. အဝဲဟ့ၣ်လီၤပှၤတၢ်လၢ ပလိၣ်ဘၣ်တဖၣ် လၢလၢပှဲၤပှဲၤလီၤ. တၢ်လၢယဟိဝၤယွၤ မၢပမၤတၢ်တမံၤလၢ်လၢ်န့ၣ် ကဲဘျုးလၢပနီၢ်ကစၢ် အဂီၢ်ခဲလၢာ်လီၤ. ပမ့ၢ်ဘၣ်တူၢ်ဆါပသးဒၣ်လဲာ် ပမ့ၢ်ဒိကနၣ် ယဟိဝၤယွၤအကလုၢ်န့ၣ် ပကသူၣ်ခုသးခုထီဘိလီၤ.—ဖး ယၡါယၤ ၄၈:၁၇ တက့ၢ်.
၁၂. ဘၣ်မနုၤအဃိ ပဆီၣ်ထွဲမၤစၢၤ ယဟိဝၤယွၤအတၢ်ပၢန့ၣ်လဲၣ်.
၁၂ လၢလံာ်စီဆှံအပူၤန့ၣ် ပမၤလိဘၣ်လၢ ခရံာ်ပၢတၢ်အနံၣ်တကထိမ့ၢ်ဝံၤအလီၢ်ခံ ပှၤလၢကထီဒါ ယဟိဝၤယွၤအတၢ်ပၢ ကအိၣ်ဒံးဝဲတနီၤလီၤ. (လီၣ်ဖျါ ၂၀:၇, ၈) ဘၣ်မနုၤအဃိ အဝဲသ့ၣ်ကထီဒါတၢ်လဲၣ်. ဖဲန့ၣ်အဆၢကတီၢ် မုၣ်ကီၤလံၢ် ကဂုာ်ကျဲးစၢး လ့ပစီကဒီး ပှၤဟီၣ်ခိၣ်ဖိတဖၣ်လၢ ကမၤဖဲဒၣ်အသးအဂီၢ်လီၤ. အဝဲကမၤဝဲ ဒ်လၢညါအသိးလီၤ. ဘၣ်သ့ၣ်သ့ၣ် အဝဲကဂုာ်ကျဲးစၢး လ့ပစီပှၤဟီၣ်ခိၣ်ဖိတဖၣ် ဒ်သိးအဝဲသ့ၣ်ကနာ်ဝဲလၢ မ့ၢ်တဒိကနၣ် ယဟိဝၤယွၤအကလုၢ်သနာ်က့ အိၣ်မူဘၣ်ဝဲ လီၤထူလီၤယိာ်သ့ဒံးဝဲလီၤ. ဘၣ်ဆၣ် ပကြၢးသံကွၢ်လီၤပသးလၢ ‘မ့ၢ်ယကနာ် မုၣ်ကီၤလံၢ်အတၢ်ကတိၤအံၤဧါ.’ ပမ့ၢ်အဲၣ်ယဟိဝၤယွၤနီၢ်နီၢ်ဒီး နာ်သပှၢ်ကတၢၢ်လၢ အဝဲမ့ၢ်ပှၤလၢအဂ့ၤကတၢၢ် ဒီးအိၣ်ဒီးတၢ်ခွဲးတၢ်ယာ်လၢကပၢ တၢ်ခဲလၢာ်န့ၣ် တမ့ၢ်လၢပကနာ်မုၣ်ကီၤလံၢ် အတၢ်လံၣ်တၢ်လီလၢၤဘၣ်. ဒီးပကအဲၣ်ဒိးအိၣ်မူထဲလၢ ယဟိဝၤယွၤအတၢ်ပၢအဖီလာ် လၢအပှဲၤဒီးတၢ်အဲၣ်တၢ်ကွံန့ၣ်လီၤ.
ဆီၣ်ထွဲယွၤအတၢ်ပၢလၢ တၢ်သူၣ်တီသးတီအပူၤတက့ၢ်
၁၃. ပဆီၣ်ထွဲမၤစၢၤ ယဟိဝၤယွၤ အတၢ်ပၢကသ့လၢကျဲဒ်လဲၣ်.
၁၃ ဒ်ပသ့ၣ်ညါဘၣ်အသိး ယဟိဝၤယွၤန့ၣ် ကြၢးပၢတၢ်ဒီးအတၢ်ပၢန့ၣ်ဂ့ၤကတၢၢ်လီၤ. ဒီးပကြၢးဆီၣ်ထွဲ အတၢ်ပၢလၢပသးဒီဖျၢၣ်လီၤ. ပမ့ၢ်သးတီဒီး ယဟိဝၤယွၤဒီး ကွၢ်လိမၤဒိးအီၤန့ၣ် မ့ၢ်ဒၣ်ပဆီၣ်ထွဲမၤစၢၤအတၢ်ပၢလီၤ. ဖဲပဂုာ်ကျဲးစၢး အိၣ်မူဒ် ယဟိဝၤယွၤအတၢ်ဘၣ်သးအခါ မ့ၢ်ဒၣ်ပပာ်ဖျါထီၣ်လၢ ပအဲၣ်အီၤ ဒီးပဆီၣ်ထွဲမၤစၢၤ အတၢ်ပၢတၢ်ပြးန့ၣ်လီၤ.—ဖး အ့းဖ့းစူး ၅:၁, ၂ တက့ၢ်.
၁၄. ဟံၣ်ခိၣ်ဒီး တၢ်အိၣ်ဖှိၣ်သးပှၢ်သ့ၣ်တဖၣ် ကွၢ်လိမၤဒိး ယဟိဝၤယွၤကသ့ဒ်လဲၣ်.
၁၄ လၢလံာ်စီဆှံအပူၤန့ၣ် ပမၤလိဘၣ်လၢ ယဟိဝၤယွၤ သူဝဲအတၢ်စိတၢ်ကမီၤလၢ တၢ်အဲၣ်တၢ်ကွံအပူၤလီၤ. ဟံၣ်ခိၣ်ဒီးတၢ်အိၣ်ဖှိၣ်သးပှၢ်တဖၣ်လၢ အဆီၣ်ထွဲမၤစၢၤ ယဟိဝၤယွၤအတၢ်ပၢ ဒီးကွၢ်လိမၤဒိးအီၤတဖၣ်န့ၣ် အဝဲသ့ၣ် ကတီခိၣ်ရိၤမဲတၢ်လၢ တၢ်အဲၣ်တၢ်ကွံအပူၤလီၤ. တၢ်မၢဖိပီလူးဂုာ်ကျဲးစၢး ကွၢ်လိမၤဒိးဝဲ ယွၤဒီးအဖိခွါလီၤ. (၁ ကရံၣ်သူး ၁၁:၁) အဝဲတမၤမဲာ်ဆှးပှၤဂၤဘၣ် ဒီးအဝဲတမၢဆူၣ်ပှၤဂၤလၢ ကမၤတၢ်လၢအဘၣ်အဂီၢ်ဘၣ်. လၢတၢ်န့ၣ်အလီၢ် အဝဲဟ့ၣ်သဆၣ်ထီၣ် ပှၤဂၤလၢတၢ်အဲၣ်တၢ်ကွံအပူၤ ဒ်သိးအဝဲသ့ၣ် ကမၤတၢ်လၢအဘၣ်အဂီၢ်လီၤ. (ရိမ့ၤ ၁၂:၁; အ့းဖ့းစူး ၄:၁; ဖံလံမိၣ် ၈-၁၀) စီၤပီလူးမၤဝဲဒ်အံၤန့ၣ် မ့ၢ်ဒၣ်အကွၢ်လိမၤဒိး ယဟိဝၤယွၤလီၤ. ပမ့ၢ်ရ့ဒီးပှၤဂၤလၢ တၢ်ယူးယီၣ်ပာ်ကဲဒီး တၢ်အဲၣ်တၢ်ကွံအပူၤန့ၣ် မ့ၢ်ဒၣ်ပဆီၣ်ထွဲမၤစၢၤ ယဟိဝၤယွၤအတၢ်ပၢလီၤ.
၁၅. ပမ့ၢ်ယူးယီၣ်ပာ်ကဲ ဒီးဒိကနၣ် ပှၤလၢအတီခိၣ်ရိၤမဲတၢ်တဖၣ် အကလုၢ်န့ၣ် မ့ၢ်ပဆီၣ်ထွဲမၤစၢၤ ယွၤအတၢ်ပၢလၢကျဲဒ်လဲၣ်.
၁၅ ပဆီၣ်ထွဲမၤစၢၤ ယဟိဝၤယွၤအတၢ်ပၢခီဖျိ ပယူးယီၣ်ပာ်ကဲ ဒီးမၤသကိးတၢ်ဒီး ပှၤလၢယဟိဝၤယွၤဟ့ၣ်အခွဲးလၢ ကတီခိၣ်ရိၤမဲတၢ်တဖၣ်န့ၣ်လီၤ. တဘျီတခီၣ် ပမ့ၢ်တနၢ်ပၢၢ်တၢ်ဂ့ၢ်တၢ်ကျိၤ မ့တမ့ၢ် ပသးမ့ၢ်တလီၤပလိာ်ဒီး တၢ်ဆၢတဲာ်လၢအဝဲသ့ၣ် မၤဝဲတဖၣ်သနာ်က့ ပကဆဲးဒိးကနၣ်အဝဲသ့ၣ်လီၤ. ပှၤလၢအတူၢ်လိာ်ယဟိဝၤယွၤ အတၢ်ပၢတဖၣ်န့ၣ် အဝဲသ့ၣ်မၤဝဲဒ်န့ၣ်လီၤ. ဘၣ်ဆၣ် မ့မ့ၢ်ပှၤလၢ အတဘူၣ်ထီၣ်ဘါထီၣ်ယဟိဝၤယွၤန့ၣ် တမၤဝဲဒ်န့ၣ်ဘၣ်. (အ့းဖ့းစူး ၅:၂၂, ၂၃; ၆:၁-၃; ဧ့ၤဘြံၤ ၁၃:၁၇) ယဟိဝၤယွၤ အဲၣ်ပှၤဒိၣ်မးအဃိ ပမ့ၢ်ဒိကနၣ်အကလုၢ်န့ၣ် ပကဒိးန့ၢ်ဘၣ်တၢ်သူၣ်ခုသးခုလီၤ.
၁၆. ဖဲပမၤတၢ်ဆၢတဲာ်အခါ ပပာ်ဖျါထီၣ်လၢ ပဆီၣ်ထွဲမၤစၢၤ ကစၢ်ယွၤအတၢ်ပၢကသ့ဒ်လဲၣ်.
၁၆ ဖဲပဆၢတဲာ်တၢ်အခါ ပပာ်ဖျါထီၣ်လၢ ပဆီၣ်ထွဲမၤစၢၤ ယဟိဝၤယွၤအတၢ်ပၢ သ့ဝဲလီၤ. ဘၣ်ဃးဒီး တၢ်ဂ့ၢ်တခါစုာ်စုာ်န့ၣ် ယဟိဝၤယွၤတဟ့ၣ်ပှၤ တၢ်သိၣ်တၢ်သီ လီၤတံၢ်လီၤဆဲးဘၣ်. လၢတၢ်န့ၣ်အလီၢ် အဝဲပာ်ဖျါထီၣ်န့ၢ်ပှၤ ဘၣ်ဃးဒီးအတၢ်ဆိကမိၣ်တဖၣ်န့ၣ်လီၤ. မ့ၢ်လၢအမၤဝဲဒ်န့ၣ်အဃိ မၤစၢၤပှၤလၢ ပကသ့ၣ်ညါထီၣ်လၢ ပကဘၣ်မၤတၢ်ဒ်လဲၣ်ဒ်လဲၣ်န့ၣ်လီၤ. အဒိ, ယဟိဝၤယွၤတဟ့ၣ်ဝဲ ခရံာ်ဖိတဖၣ်တၢ်သိၣ်တၢ်သီ လီၤတံၢ်လီၤဆဲးလၢ အဝဲသ့ၣ်ကဘၣ်ကူဘၣ်သိး ဒ်လဲၣ်ဒ်လဲၣ်န့ၣ်ဘၣ်. လၢတၢ်န့ၣ်အလီၢ် အဝဲတဲနၢ်ပၢၢ်ပှၤလၢ ဒ်ပမ့ၢ်အပှၤအုၣ်အသးတဖၣ်အသိး ပကြၢးကူတၢ်သိးတၢ်လၢ အသညူးသပှၢ်ဒီး ဘံၣ်ဘံၣ်ဘၢဘၢန့ၣ်လီၤ. (၁ တံၤမသ့း ၂:၉, ၁၀) တၢ်ဆၢတဲာ်လၢ ပကမၤသ့ၣ်တဖၣ် ကမၤဘၣ်ဒိပှၤဂၤဒ်လဲၣ်န့ၣ် ကစၢ်ယွၤအဲၣ်ဒိးဝဲလၢ ပကဆိကမိၣ် ဆိပာ်စၢၤအီၤလီၤ. (၁ ကရံၣ်သူး ၁၀:၃၁-၃၃) ပမ့ၢ်မၤတၢ်ဆၢတဲာ်လၢ အလီၤပလိာ်ဒီး ယဟိဝၤယွၤအတၢ်ဘၣ်သးန့ၣ် မ့ၢ်ဒၣ်ပပာ်ဖျါထီၣ်လၢ ပအဲၣ်အီၤဒီးပဆီၣ်ထွဲမၤစၢၤ အတၢ်ပၢတၢ်ပြးန့ၣ်လီၤ.
ဖဲနမၤတၢ်ဆၢတဲာ်အခါမ့ၢ်ဂ့ၤ နမၤတၢ်ဆၢတဲာ်လၢ ဟံၣ်ဖိဃီဖိအဂီၢ်အခါမ့ၢ်ဂ့ၤ ပာ်ဖျါထီၣ်လၢ နဆီၣ်ထွဲ ကစၢ်ယွၤ ပၢတၢ်အခွဲးတက့ၢ် (ကွၢ်လံာ်အဆၢ ၁၆-၁၈)
၁၇, ၁၈. ပှၤနီၢ်ဒီမါဝၤ ခံဂၤပာ်ဖျါထီၣ်ဝဲလၢ အဆီၣ်ထွဲမၤစၢၤ ယဟိဝၤယွၤ အတၢ်ပၢကသ့ဒ်လဲၣ်.
၁၇ ဆိကမိၣ်ကွၢ် ခရံာ်ဖိနီၢ်ဒီမါဝၤတဖၣ် ဆီၣ်ထွဲမၤစၢၤယွၤအတၢ်ပၢ ကသ့လၢကျဲဒ်လဲၣ်န့ၣ်တက့ၢ်. ဘၣ်သ့ၣ်သ့ၣ် ပှၤနီၢ်ဒီမါဝၤခံဂၤ အတၢ်ဆီဟံၣ်ဆီဃီန့ၣ် တကဲထီၣ်အသးဒ် အဝဲသ့ၣ်မုၢ်လၢ်ဝဲအသိးဘၣ်. ဒီးဘၣ်သ့ၣ်သ့ၣ် အဝဲသ့ၣ်ကထံၣ်ဘၣ် တၢ်ကီတၢ်ခဲဖးဒိၣ်လီၤ. ဖဲန့ၣ်အခါ အဝဲသ့ၣ်မ့ၢ်ဆိကမိၣ်ထံဝဲ ဘၣ်ဃးဒီး ယဟိဝၤယွၤအတၢ်ပာ်သူၣ်ပာ်သးလၢ ပှၤအံၣ်စရ့လးဖိအဖီခိၣ်န့ၣ် ကကဲဘျုးဝဲလၢအဝဲသ့ၣ်အဂီၢ်လီၤ. ယဟိဝၤယွၤတဲလီၤအသးလၢ အဝဲလီၤဂာ်ဒ်ဝၤတဂၤအသိးလၢ အခ့အပှၤတဖၣ်အဂီၢ်န့ၣ်လီၤ. (ယၡါယၤ ၅၄:၅; ၆၂:၄) ပှၤဂီၢ်မုၢ်တဖၣ် မၤဟးဂီၤယဟိဝၤယွၤအသး အဘျီတဖၣ်အဘျီလီၤ. ဖဲအဝဲသ့ၣ်မၤဝဲဒ်န့ၣ်အခါ လီၤဂာ်ဒ်တၢ်ကီတၢ်ခဲလၢ နီၢ်ဒီမါဝၤအဘၢၣ်စၢၤန့ၣ်လီၤ. ဘၣ်ဆၣ် ယဟိဝၤယွၤဝံသးစူၤ ပှၤအံၣ်စရ့လးဖိတဖၣ် ဒီးပျၢ်အဝဲသ့ၣ်အတၢ်ကမၣ် တဘျီဝံၤတဘျီ ဒီးဆဲးတီဒီးအတၢ်အၢၣ်လီၤအီလီၤလၢ အမၤဝဲဒီးအဝဲသ့ၣ်န့ၣ်လီၤ.—ဖး စံးထီၣ်ပတြၢၤ ၁၀၆:၄၃-၄၅ တက့ၢ်.
၁၈ ခရံာ်ဖိနီၢ်ဒီမါဝၤတဖၣ်လၢ အအဲၣ်ယဟိဝၤယွၤန့ၣ် ကဂုာ်ကျဲးစၢး ကွၢ်လိမၤဒိးဝဲ ယဟိဝၤယွၤလီၤ. တၢ်ကီတၢ်ခဲမ့ၢ်အိၣ်ထီၣ်လၢ အဝဲသ့ၣ်အဟံၣ်ပူၤဃီပူၤဒၣ်လဲာ် တမၤကတၢၢ်ကွံာ် အတၢ်ဆီဟံၣ်ဆီဃီ ဖဲဒၣ်အသးဒၣ်ဝဲဘၣ်. အဝဲသ့ၣ်သ့ၣ်ညါဝဲလၢ ယဟိဝၤယွၤပာ်လုၢ်ပာ်ပှ့ၤဝဲ တၢ်အၢၣ်လီၤအီလီၤလၢ အမၤဝဲဒီးအသးသမူတံၤသကိးလီၤ. ဒီးအဝဲအဲၣ်ဒိးဝဲလၢ ဝၤန့ၣ် “ကဘျုးအသး” လၢအမါန့ၣ်လီၤ. တၢ်အံၤအဲၣ်ဒိးစံးဝဲလၢ အဝဲသ့ၣ်ကအိၣ်ဒ်သိးသိးလီၤ. မ့တမ့ၢ်လၢ တၢ်အဲၣ်ဘၢမါအဲၣ်ဘၢဝၤအဃိဘၣ်န့ၣ် အဝဲသ့ၣ်တမၤကတၢၢ်ကွံာ် အတၢ်ဆီဟံၣ်ဆီဃီ ဒ်သိးကဆီဟံၣ်ဆီဃီ ဒီးပှၤအသီတဂၤန့ၣ်ဘၣ်. (မးသဲ ၁၉:၅, ၆, ၉) ဖဲခရံာ်ဖိသ့ၣ်တဖၣ် ဂုာ်ကျဲးစၢးမၤဂ့ၤထီၣ် အတၢ်ဆီဟံၣ်ဆီဃီအခါ မ့ၢ်ဒၣ်အဝဲသ့ၣ်ဆီၣ်ထွဲမၤစၢၤ ယဟိဝၤယွၤအတၢ်ပၢလီၤ.
၁၉. ဖဲပမၤဘၣ်တၢ်ကမၣ်အခါ ပကြၢးမၤတၢ်မနုၤလဲၣ်.
၁၉ ပဝဲခဲလၢာ် ပမ့ၢ်ပှၤတလၢတပှဲၤဘၣ်အဃိ ပမၤဘၣ်တၢ်ကမၣ်လၢ အမၤဘၣ်ဒိ ယဟိဝၤယွၤအသးသ့ဝဲန့ၣ်လီၤ. အဝဲနၢ်ပၢၢ်ပှၤအဃိ ကတဲာ်ကတီၤန့ၢ်ပှၤ ယ့ၣ်ၡူးအတၢ်ပှ့ၤက့ၤန့ၣ်လီၤ. လၢတၢ်န့ၣ်အဃိ ဖဲပမၤကမၣ်ဘၣ်တၢ်အခါ ပကြၢးဃ့ပျၢ်ပတၢ်ကမၣ်လၢ ယဟိဝၤယွၤအအိၣ်လီၤ. (၁ ယိၤဟၣ် ၂:၁, ၂) ဒီးလၢပကသူၣ်အုးသးအုးဒီး ပာ်တၢ်ကမၣ်လၢ ပနီၢ်ကစၢ်အလိၤအလီၢ် ပကြၢးဟံးန့ၢ်တၢ်မၤလိလၢ တၢ်ကမၣ်လၢပမၤတ့ၢ်န့ၣ်လီၤ. ပမ့ၢ်ရ့ဒီးယဟိဝၤယွၤ ဘူးဘူးတံၢ်တံၢ်န့ၣ် အဝဲကပျၢ်ပတၢ်ကမၣ် ဒီးကမၤမုာ်ထီၣ်က့ၤပှၤ တကးဒံးဘၣ် ကမၤစၢၤပှၤဒ်သိး ပဆဲးမၤအတၢ်မၤကန့ၢ်အဂီၢ်န့ၣ်လီၤ.—စံးထီၣ်ပတြၢၤ ၁၀၃:၃.
၂၀. ဘၣ်မနုၤအဃိ ပကြၢးဆီၣ်ထွဲ ယဟိဝၤယွၤပၢတၢ်အခွဲးလဲၣ်.
၂၀ လၢဟီၣ်ခိၣ်သီအပူၤန့ၣ် ပှၤခဲလၢာ် ကအိၣ်ဘၣ်လၢ ယဟိဝၤယွၤအတၢ်ပၢဖီလာ်ဒီး အဝဲသ့ၣ်ကသ့ၣ်ညါထီၣ်ဝဲ ကစၢ်ယွၤအတၢ်သိၣ်တၢ်သီန့ၣ်လီၤ. (ယၡါယၤ ၁၁:၉) ဒီးခဲအံၤစ့ၢ်ကီး ပမၤလိဘၣ် ယဟိဝၤယွၤအတၢ်ဆိကမိၣ်ဒီး အဝဲအဲၣ်ဒိးလၢပမၤဘၣ်လိာ်က့ၤ ပနီၢ်ကစၢ်တၢ်ဂ့ၢ်တၢ်ကျိၤတဖၣ် လၢကျဲဒ်လဲၣ်န့ၣ်လီၤ. တယံာ်လၢၤဘၣ်န့ၣ် ယွၤပၢတၢ်အခွဲး ကဖျါထီၣ်ဝဲလီၤ. လၢတၢ်န့ၣ်အဃိ မ်ပကဆီၣ်ထွဲ ယဟိဝၤယွၤအတၢ်ပၢခီဖျိ ပဒိကနၣ်အကလုၢ်, မၤအတၢ်မၤလၢတၢ်သးတီအပူၤ ဒီးဂုာ်ကျဲးစၢးကွၢ်လိမၤဒိးအီၤလၢ တၢ်ခဲလၢာ်အပူၤန့ၣ်တက့ၢ်.
