Kalpasan a naluktan ti “maikatlo a selio” a natukoy iti Apocalipsis 6:5, 6, naikuna a maysa a denario ti gatad ti maysa a khoiʹnix ti trigo ken ti tallo a khoiʹni·kes ti sebada. Patien ti kaaduan nga eskolar a ti kaadu ti khoiʹnix ket ad-adu bassit ngem iti maysa a litro iti agdama wenno nakurang a maysa a dry quart ti U.S. Yantangay maysa a denario ti inaldaw a tangdan idi tiempo ni Juan (Mt 20:1-12), ti pannakailako ti bukbukel iti kasta a gatad ket mangipasimudaag iti nakaro a panagbisin.