1. Maysa a Cohatita a Levita “iti annak ni Asaf” ken kaputotan ni Kore. (Ex 6:16, 18, 21; 1Cr 9:19; 26:1) Ni Sallum, a maysa kadagiti “agay-aywan iti ruangan ti tolda,” ket nadeskribir iti 1 Cronicas 9:19 kas “anak ni Core nga anak ni Ebiasaf nga anak ni Kore.” Saan a nadakamat iti daytoy a teksto ti amin a kaputotan iti nagbaetan da Sallum ken Ebiasaf, ngem ti nagnagan a nailanad ket karaman iti daytoy a listaan ti kaputotan. Iti 1 Cronicas 26:1, naawagan ti agay-aywan iti ruangan a ni Meselemias kas “anak ni Core.”

  2. Maysa a Levita, “anak ni Imnah” ken “ti agay-aywan iti ruangan iti daya” ti templo idi kaaldawan ni Ari Ezekias. Isu “agay-aywan kadagiti boluntario a daton ti pudno a Dios, tapno itedna ti kontribusion ni Jehova ken ti kasasantuan a bambanag,” ken indauluanna ti dadduma pay a lallaki.​—2Cr 31:14-16.