Maysa a probinsia ti Roma idiay makin-amianan a paset ti Asia Menor. Masarakan iti agdama a makin-amianan a laud a Turkia, a nayunnat nga agpadaya manipud Istanbul iti makin-abagatan nga aplaya ti Nangisit a Baybay. Iti maikadua a panagbaniaga ni Pablo kas misionero, kalpasan a ni Timoteo kimmadua kadakuada ken Silas idiay Listra, nagreggetanda ti agdaliasat nga agturong iti Bitinia, ngem “saan a pinalubosan ida ti espiritu ni Jesus.” (Ara 16:7) Saan a nadakamat no nangasaba sadiay dagiti apostol, ngem nabatad nga addada Kristiano sadiay idi insurat ni Pedro ti umuna a kanonikal a suratna idi agarup 62-64 K.P. (1Pe 1:1) Ni Pliny nga Ub-ubing kas naisangsangayan a komisionado nagsurat manipud Bitinia agpaay iti Romano nga emperador a ni Trajan, ket dinakamatna ti adu a Kristiano iti probinsia, a kinunana a saan laeng nga iti il-ili ti ayan dagiti Kristiano idi rugrugi ti maikadua a siglo, no di ket nagsaknapda met iti “purpurok ken kadagiti distrito iti away.”​—The Letters of Pliny, X, XCVI, 9.