1. Ti ari ti Elasar a nakikumplot ken Kedorlaomer ken iti dua a sabali pay nga ar-ari. Dinuprakda ti panagrebelde ti Sodoma, Gomorra, ken dagiti kaaliansa dagitoy, ket impanawda ni Lot ken iti sangakabbalayanna. Idi agangay, nakamakam ni Abraham dagitoy a manangduprak, inabakna ni Arioc ken dagiti kakapponna, ket inispalna ni Lot. (Ge 14:1-16; kitaenyo ti KEDORLAOMER.) Saan a masinunuo ti ayan ti kadaanan nga Elasar.​—Kitaenyo ti ELASAR.

  2. Ti panguluen ti para-guardia ni Nabucodonosor. Nabilin a papatayenna ti amin a masirib a tattao ti Babilonia idi saanda a maipalgak ken maibuksilan ti tagtagainep ti ari. Idi naammuanna a sisasagana ni Daniel a mangipalgak iti tagtagainep ken mangibuksil iti kayuloganna, “ni Arioc, nga agdardaras, inserrekna ni Daniel iti sanguanan ti ari.”​—Da 2:12-25.