Otja tji pa raisiwa motjiperendero tji tji ri komanene, ovandu ovengi ve muna kutja mEyuva rOmbanguriro ovandu mave etwa komurungu wotjihavero tjouhona tja Mukuru okupangurwa otja koviṋa mbi va tjita. Tjiva mave pewa ondjambi yokukahupa meyuru, nu varwe mave kanyosiwa motjovasengwa. Posi yokutja, Ombeibela i raisa kutja Eyuva rOmbanguriro mari kutura ovandu kouhasemba mbu tjitwa. (Epsalme 96:13) Mukuru wa zika Jesus okurira Omupangure ngu ma eta ousemba kovandu.—Lesa Jesaja 11:1-5; Oviungura 17:31.

Indu omurumendu omutenga Adam tja pirukira Mukuru, eye wa rumatisa ouvi kozondekurona ze, nu wa tjita kutja owo ve mune ouzeu nonḓiro. (Ovaroma 5:12) Okuṱuna ouhasemba mbwo, Jesus ma kakotora ovengi mba ṱa komuinyo. Embo rOmavandururiro ri raisa kutja ihi matji tjitwa mozombura 1 000 zomananeno wa Jesus Kristus.—Lesa Omavandururiro 20:4, 11, 12.

Imba mba pendurwa kave nokukapangurwa otja koviṋa mbi va tjita ngunda ave hi ya ṱa, nungwari mave pangurwa otja koviṋa mbi mave tjiti indu oviṋa mbi ri “momambo” mbya tamunwa mOmavandururiro ekondwa 20 tji vya vandururwa. (Ovaroma 6:7) Omuapostele Paulus wa tja, mokati kaimba mbu mave kotorwa komuinyo nu mbu mave kara noruveze okurihonga ohunga na Mukuru owomba “ovawa novavi.”—Lesa Oviungura 24:15.

Imba mba ṱa nokuhinokutjiwa Jehova Mukuru mave kara noruveze okurundurura ongaro yawo nokutjita oviṋa oviwa. Indu tji va tjiti nao, owo “mave penduka nave kara nomuinyo.” Posi yokutja, tjiva mba pendurwa kamaave vanga okurihonga ombango ya Jehova. Ku nao, owo “mave penduka nave pangurwa.”—Lesa Johanes 5:28, 29; Jesaja 26:10; 65:20.

Komaandero wozombura 1 000 rEyuva rOmbanguriro, Jehova ma tjiti kutja ovandu mbe nonḓuviro ku ye ve rire ohomonena tjimuna kombutiro. (1 Ovakorinte 15:24-28) Iho tjiri matji rire otjiṋa otjiwa kovandu avehe mbe nonḓuviro. Okuzambo, Mukuru ma isa mo Satan Omudiaboli morutjiva rwokehi yehi, ngwa kara mo oure wozombura 1 000. Satan ma kondjo rukwao okutjita kutja ovandu ave ha kara nonḓuviro ku Jehova, posi ya imba mbe mu pirukire mave kayorokera ehupo nga aruhe kombanda yehi.—Lesa Jesaja 25:8; Omavandururiro 20:7-9.

Ombeibela wina i ungurisa embo ndi “eyuva rombanguriro” okuhungirira kovitjitwa mbi mavi tjiti kutja ouye mbwi u ye komaandero. Eyuva rombanguriro ndi mari ya tjimanga otja omupupo wa Noa mbwa nyona ovandu avehe ovarunde voruveze ndwo. Posi ya, omanyoneno wovandu “ovarunde” maye tjiti kutja pe kare ehi epe “mu mamu tura ousemba.”—Lesa 2 Petrus 3:6, 7, 13.