Ii, mouye auhe Ovahongonone va Jehova ve novakazendu ovengi mbe honga Ombeibela. Owo ombe ri otjimbumba otjinene tjovandu mbe zuvarisa ombuze ombwa yOuhona wa Mukuru. Epsalme 68:11 (NWT) ri tja nai ohunga novazuvarise mbo: “Jehova u yandja erakiza; Ovakazendu mbe zuvarisa ombuze ombwa otjimbumba tjovita otjinene.”

Posi ya, o pambaukisiwa i yomazuvarisiro nge tjitwa i yovakazendu vOvahongonone va Jehova nomazuvarisiro nge tjitwa i yovakazendu vozongamburiro zarwe. Pe noviṋa mbi raisa kutja va panguka. Omomiano viṋe mu va panguka?

Ovandu ku ve zuvarisa ko va panguka. Ovakazendu vozongamburiro zarwe ve hongorera po mombongo nu ovandu ku ve zuvarisa ko tjinene ouṋepo wombongo yawo. Ovakazendu vOvahongonone va Jehova ve zuvarisa kovandu mbe ri pendje nombongo, mbu ve hakaena indu tji mave zuvarisa okuza kondjuwo nondjuwo, poo ngamwa pu va hakaene.

Omuano warwe ovakazendu vOvahongonone va Jehova mu va panguka kovakazendu vozongamburiro zarwe omoviṋa mbi ve tjita mombongo. Ovakazendu vozongamburiro zarwe ve hongorera po nokuhonga ongamburiro yawo kouṋepo wawo mokereka. Posi yokutja, ovakazendu vOvahongonone va Jehova kave hongo mombongo indu tji pe novarumendu mba papitisiwa. Ovarumendu aveyerike mba zikwa otjovahonge ombe tjita nao.—1 Timoteus 3:2; Jakobus 3:1.

MOmbeibela ovarumendu aveyerike omba pewa omerizirira wokuhongorera po ombongo. Tara kotjihorera tjomuapostele Paulus indu tja tjanga komunene wombongo omukwao, Titus. Eye wa tja: “Ami mbe ku esa moKreta kokutja . . . u zike ovanene movirongorongo.” Paulus wa weza kutja omurumendu ngu ma zikwa ma “sokukara notjikaro otjiwa; ma sokurira omurumendu womukazendu umwe.” (Titus 1:5, 6) Paulus wa yandja omaronga tjingewo ku Timoteus morutuu rwe. Eye we mu raera kutja: “Tji pe nomundu ngu ma zeri okurira omunane wombongo, eye ma zeri otjiungura otjiwatjiwa. Omunane wombongo ma sokukara nokuhinotjipo; ma sokurira omurumendu womukazendu umwe, . . . ma sokuyenena okuhonga ovandu.”—1 Timoteus 3:1, 2.

Ongwaye omerizirira wokuhongorera po ombongo tji ye yandjewa kovarumendu uriri? Paulus wa tja: “Ami hi nokuyandjera ovakazendu kutja ve honge mombongo poo kutja ve honaparere ovarumendu. Owo ngave mwine nu ve rire ozonyima. Orondu Adam ongwa tengere po okumemwa, tjazumba a rire Eva.” (1 Timoteus 2:12, 13) Adam wa memwa omutenga pu Eva, ku nao ihi tji tu vatera okuzuva nawa kutja ongwaye Mukuru tja yandja omerizirira wokuhonga nokuhongorera po kovarumendu.

Ovahongonone va Jehova ve horera kotjihorera tjOmuhongorere wawo, Jesus Kristus. Omuhongewa Lukas wa tjanga ohunga notjiungura tjokuzuvarisa tja Jesus, nu wa tja: “Jesus wa ryangere movihuro na movirongo ama zuvarisa Ombuze Ombwa youhona waNdjambi.” Kombunda, Jesus wa hinda ovemukongorere okuungura otjiungura tjingetjo. Ombeibela i tja: “Ovahongewa otji va karyanga movirongo avihe amave zuvarisa Ombuze Ombwa.”—Lukas 8:1; 9:2-6.

Ndino, Ovahongonone va Jehova avehe, ovarumendu novakazendu, ve kara norupa mu imbi Jesus mbya hunganeka kutja mavi tjitwa: “Indji Ombuze Ombwa yOuhona mai zuvarisiwa mouye auhe i rire omahongononeno koviwaṋa avihe; nomaandero indino otji maye ya.”—Mateus 24:14.