Evangeli ra Mateus 24:1-51
-
OTJIRAISIRO TJOMAKOTOKERO WA KRISTUS (1-51)
24 Otja Jesus tjaa za po pondembeli, ovahongewa ve ve ya ku ye okumuraisira omatungiro wondembeli.
2 Eye wa zira a tja ku wo: “Hapo eṋe kamu nokumuna oviṋa avihe mbi? Tjiri, me mu raere kutja omawe ayehe nge ri mba maye imbirahiwa, nungwari kape nokusewa ewe nandarire rimwe kombanda yekwao.”
3 Ngunda a haama pOndundu yOmiṋinga, ovahongewa ve ya ku Jesus ngunda ave ri aveyerike, nave mu pura ave tja: “Tu raera kutja oviṋa avihe mbi mavi tjitwa ruṋe, nokutja otjiraisiro tjomakotokero woye notjomaandero wouye mbwi* matji rire tjiṋe?”
4 Jesus wa zira a tja ku wo: “Ritjevereye nawa kutja amu ha pukisiwa i yomundu,
5 orondu ovengi mave ya mena rena randje ave tja, ‘Owami ngu mbi ri Kristus,’ nu mave pukisa ovengi.
6 Eṋe mamu zuu ozombosiro nozombuze zovita motuveze pekepeke. Nungwari amu uruma, oviṋa mbi mavi sokutjitwa, posi ya omaandero ngunda kaye ya.
7 “Orondu otjiwaṋa matji sekamene otjiwaṋa otjikwao, nu ouhona mau sekamene ouhona oukwao, nu kape nokukara ovikurya mbya yenene, nu mape kara omanyinganyingiro wehi motuveze pekepeke.
8 Oviṋa avihe mbi omautiro woruveze rwomihihamo, ndu ri tjimuna ozongama zokupanduka.
9 “Ovandu mave mu yandja kutja mu tatumisiwe, nu mave mu zepa, neṋe mamu tondwa i yoviwaṋa avihe mena rena randje.
10 Nu wina, ovengi mave putarisiwa nokuhororasana nu mave tondasana.
11 Ovaprofete ovengi voposyo mave penduka nave pukisa ovandu ovengi,
12 nu mena rourunde mbu mau takavarere ko, orusuvero rwovengi maru poro.
13 Posi ya ingwi ngwa panḓere po* nga komaandero ma yamwa.
14 Nu indji ombuze ombwa yOuhona mai zuvarisiwa mouye auhe, i rire omahongononeno koviwaṋa avihe, nu okuzambo omaandero otji maye ya.
15 “Ku nao, otja komambo Mukuru nga hungira okupitira momuprofete Daniel, eṋe mamu munu otjiṋa otjiyaukise tji tji nyona oviṋa avihe atja kurama poruveze oruyapuke (ngu ma lese omambo nga, nga zuve nawa).
16 Tji mwa munu oviṋa mbi, imba mbe ri moJudea ngave taurire kozondundu.
17 Ingwi ngu ri komututu wondjuwo, a hiti mondjuwo okukatoora oviṋa vye,
18 nu ingwi ngu ri mehi romakunino, a yaruka okukatoora ozombanda ze.
19 Owee kovakazendu ovingundi na imba mbu mave nyamisisa momayuva ngo.
20 Panḓereye pokukumba kokutja omatauriro weṋu aye ha kara mokupepera poo mEsabata,
21 orondu momayuva ngo mamu kara ozombamisiro ozonene nḓe hi na indu za karere ko okuza kombutiro youye nga ku ndinondi, nu kamaaze kakara ko rukwao.
22 Andakuzu omayuva ngo kaye konderwe okurira omasupi, katja pe kara omundu ngu ma yamwa. Posi ya mena raimba mba toororwa i Mukuru, omayuva ngo maye kondwa kutja ye rire omasupi.
23 “Nu tji pe nomundu ngu ma tja nai kweṋe, ‘Tareye! Kristus eye ngwi,’ poo, ‘Eye ngwina!’ eṋe amu kambura ko.
24 Orondu ooKristus voposyo novaprofete vyoposyo mave penduka nave tjiti ovihimise noviraisiro ovinene okupukisa navyo nandarire imba ovatoororwa.
25 Tareye! Ami me mu rakiza ngunda oviṋa mbi avi hi ya tjitwa.
26 Indu ovandu tji mave tja kweṋe, ‘Tareye! Eye u ri mokuti onguza,’ eṋe amu piti okukatara. Nu tji mave tja, ‘Tareye! U ri momatuwo womoukoto,’ eṋe amu kambura ko.
27 Omakotokero wOmuna womundu maye rire tjimuna orutjeno rwombura ndu maru zire koutjiro naru munika nga koutokero.
28 Orondu pu pe notjinamuinyo tji tja koka, ozonguvi opu ze woronganena.
29 “Tjimanga kombunda yozombamisiro zomayuva ngo, eyuva mari zorere, nomueze kau na ku yera, ozonyose maze u okuza keyuru, nu oviṋa meyuru mavi kurakurisiwa.
30 Okuzambo otjiraisiro tjOmuna womundu matji munika meyuru, nu omihoko avihe vyokombanda yehi mavi ṱoruhoze, nu mavi munu Omuna womundu ame ya movikamba nomasa nouvara ounene.
31 Ohiva mai posisiwa nomasa, neye ma hindi ovaengeli ve komikuma avihe vyouye,* okukawonga ovatoororwa ve okuza komaandero yemwe womayuru nga komaandero womayuru warwe omakwao.
32 “Rihongereye okuza komasasanekero womuti womakuyu: Indu tji mwa munu omuti womakuyu amau utu okutwa ko otutavi, noviyao amavi nyomoka, eṋe mu tjiwa kutja okurooro ku ri popezu.
33 Momuano tjingewo, eṋe tji mamu munu oviṋa avihe mbi, tjiweye kutja eye u ri popezu pomivero.
34 Tjiri, me mu raere kutja ovandu voruveze ndwi kamaave ṱu ngandu oviṋa avihe mbi tji vya tjitwa.
35 Eyuru nehi mavi yanda, nungwari inga omambo wandje kamaaye yanda ko.
36 “Kape nomundu ngu ma tjiwa eyuva ndo noiri, nandarire ovaengeli meyuru, nandarire Omuna, posi ya Tate erike ongu ma tjiwa.
37 Omakotokero wOmuna womundu maye sana ku imbi mbya tjitirwe momayuva wa Noa.
38 Nu otja momayuva ngo komurungu wOmupupo, ovandu aave ri nokunwa, ovarumendu aave kupu, novakazendu aave kupwa, nga keyuva Noa tja hita motjitendeze.
39 Owo kaave yandja ombango ku imbi mbyaavi tjitwa nga Omupupo tji we ya nau ve twara avehe. Otjinga amape kara nao indu Omuna womundu tji ma kotoka.
40 Omuna womundu tji me ya, mape kara ovarumendu vevari motjikunino. Umwe ma toorwa nu omukwao ma isiwa.
41 Ovakazendu vevari mave kweye pamwe kotjikweyero. Umwe ma toorwa nu omukwao ma isiwa.
42 Ku nao kareye katumba, mena rokutja kamu nokutjiwa eyuva oMuhona weṋu ndi me ya.
43 “Posi ya tjiweye otjiṋa hi: Ndoovazu omuini wondjuwo ma tjiwa kutja erunga mari ya moiri iṋe ouṱuku, eye tjiri atja kara katumba, nu a ha yandjere erunga okuteya ondjuwo ye.
44 Mena ranao, eṋe opu mamu sokurirongera, mena rokutja Omuna womundu me ya moiri ndji mu hi nokuundjira ko.
45 “Hapo ouṋe tjiri ngu ri omukarere omuṱakame nomunazondunge?* Omukarere ngwa zikwa i yomuhona we okuyandja ovikurya kovakarere ve moruveze ndu ri ro, ouṋe?
46 Omukarere ngo ma kara nondjoroka indu omuhona we tje ya ne mu vaza ama tjiti nao.
47 Tjiri, me mu raere kutja omuhona ma ziki omukarere ngo kutja ma rire omutjevere womauini we ayehe.
48 “Posi ya omukarere ingo omunaurunde tje rihungirire momutima we kutja omuhona we ma wombo,
49 na utu okutona ovakarere ovakwao, nokurya nokunwa pu na imba mba nḓoronga,
50 omuhona womukarere ngo ma kotoka meyuva eye nde hi nokuundjira ko, na moiri ndje hi nokutjiwa.
51 Nu eye me mu pe omberero onene tjinene, ne mu twa poruveze rumwe pu novanatjavivi. Ingo okumakarira nokukakura omayo kumwe.
