Evangeli ra Mateus 14:1-36
14 Herodes omunane worukondwa rwa Galilea,* wa zuvire ohunga na Jesus
2 neye wa tja kovakarere ve: “Eye oJohanes Omupapitise. Eye wa pendurwa movakoke, nu opu ma zu okutjita ovihimise mbi.”
3 Herodes* wa kamburire Johanes, ne mu pandeke, ne ke mu twa monḓorongo. Otjiṋa hi we tji tjitira mena ra Herodias, omukazendu werumbi re Filipus.
4 Orondu Johanes we mu raerere kutja: “Katjiṋa otjiwa kove okukupa Herodias.”
5 Nandarire kutja Herodes aa vanga okumuzepa, eye aa tira ovandu mena rokutja aave vara Johanes otjomuprofete.
6 Meyuva rongwatero ya Herodes, omukazona wa Herodias wa pundira momurungu wovandu, nu otjiṋa hi tja yorokisa Herodes tjinene.
7 Eye wa tjita oruyano kutja me mu pe atjihe tja ningire.
8 Neye, otja komaraa wa ina, wa tja: “Ndji etera otjiuru tja Johanes Omupapitise motjiyaha.”
9 Nandarire kutja ombara ya ri noruhoze, oyo ya rakiza kutja otjiuru tja Johanes tji yandjewe komukazona mena roruyano ndu ya tjita momurungu wovaṋangwa avehe.*
10 Neye wa hinda omundu kutja ma kakonde otjiuru tja Johanes monḓorongo.
11 Otjiuru tje tja etwa motjiyaha natji yandjewa komukazona, neye wa kayandja ku ina.
12 Kombunda ovahongewa ve veya, ave toora orurova rwe nave kerupaka. Nu okuzambo va karaera Jesus.
13 Indu Jesus tja zuva otjiṋa hi, eye wa karonda mokayaha na i koruveze ka kakara erike. Posi ya, otjimbumba tjovandu tji tja zuva kutja eye wa i mokayaha, otjo tje mu kongorera pehi okuza kovihuro.
14 Indu tja vaza pomukuro, eye wa muna otjimbumba otjinene tjovandu, neye we ve ṱira ondjenda, na verukisa avehe mba verere.
15 Tji ya rira ngurova, ovahongewa ve veya ku Jesus nave tja: “Imwi omokuti, neyuva ra toko. Raera otjimbumba tjovandu kutja tji yende kovirongo vyopopezu ve kerirandere ovikurya.”
16 Posi ya, Jesus we ve raera kutja: “Owo kave nokuhepa okuyenda. Eṋe vepeye ovikurya ve rye.”
17 Owo va tja ku ye: “Eṱe tu nozomboroto ndano nomahundju yevari uriri.”
18 Eye wa tja: “Vi eteye mba kwami.”
19 Eye wa raera otjimbumba tjovandu kutja tji haame pehozu. Okuzambo arire tja toora ozomboroto ndano nomahundju yevari, a tara keyuru na kumbu.* Nu tja za nokukumba, arire tja teya ozomboroto, ne ze yandja kovahongewa, nu ovahongewa ave ze yandja kotjimbumba tjovandu.
20 Nu avehe va rya nave kuta, okuzambo ovahongewa va wonga outekero wozomboroto mbwa hupire, nave urisa ovimbamba 12 na wo.
21 Nu imba mba rire, vari ovarumendu ape 5 000, novakazendu novanatje.
22 Nu tjimanga tji va mana, eye wa raera ovahongewa ve kutja ve ronde mokayaha, nu ve yende munda mbwina nomuronga. Neye wa sewa kongotwe ngandu otjimbumba tjovandu tji tja yaruka.
23 Nu otjimbumba tjovandu tji tja za nokuyaruka, arire tja karonda kondundu erike okukakumba. Tji ya rira ngurova, eye wa ri mbo erike.
24 Oruveze ndwo, okayaha kari kokure* momuronga, nu ozongazona aaze rivete mokayaha tjinga kwa ri nombepo onyingi.
25 Posi ya, omuhukomunene rukuru,* Jesus we ya ku wo ama kawondja kombanda yomuronga.
26 Owo tji ve mu muna ama kawondja kombanda yomuronga, va urumine tjinene nave tja: “Otjikwaye ho?” Nu owo va ura mena rokutja aave tira.
27 Jesus wa hungira ku wo, na tja: “Yanḓipareye! Owami, amu tira.”
28 Petrus we mu zira kutja: “Muhona, ndoovazu oove, ndji raera kutja mbi ye kove ame kawondja kombanda yomeva.”
29 Eye wa tja: “Indjo!” Ku nao, Petrus wa heruka mokayaha na kawondja kombanda yomeva okuyenda ku Jesus.
30 Posi ya Petrus tja muna otjivepo otjinamasa, eye wa uta okutira. Nu otja tja ṱomwine momeva, eye wa ravaera a tja: “Muhona, ndji yama!”
31 Tjimanga Jesus wa nyotorora okuwoko kwe, e mu kambura, na tja: “Ove u nongamburiro onḓiṱi. Ongwaye tji wa ivaiva?”
32 Tji va za nokukaronda mokayaha, otjivepo arire tji tja u pehi.
33 Okuzambo imba mba ri mokayaha, va yandja ondjozikiro* ku ye nave tja: “Tjiri, oove Omuna wa Mukuru.”
34 Nu owo va konda munda mbwina womuronga, okuyenda kehi ra Genesaret.
35 Indu ovarumendu votjirongo ho tji ve mu zemburuka, owo va katjivisa komahi ongondoroka, nu ovandu va eta ovavere ku ye.
36 Nu owo ve riheka ku ye kutja ve ṱune nandarire kotjikoro tjombanda ye, nu avehe mba ṱunine ku yo va veruka.
