Evangeli ra Mateus 6:1-34
6 “Amu tjiti oviṋa oviwa komurungu wovandu okuritjatisa ku wo. Indu tji mwa tjiti nao, Iho womeyuru ke nokumupa ondjambi.
2 Ku nao, indu tji mo yandja oviyandjewa ku varwe,* o tjivisa kovandu tjimuna omundu tji ma posisa ohiva. Imbi ooviṋa ovanatjavivi mbi ve tjita mozosinagoge na momivanda, kokutja ve yozikwe i ovandu. Ami tjiri me mu raere kutja owo kave nokumuna ondjambi okuza ku Mukuru.
3 Posi ya indu tji mo tjitire varwe oviṋa oviwa, o yandjere eke roye rokomamuho ri tjiwe kutja eke roye rokomanene mari ungura ye,
4 kokutja oviṋa oviwa mbi mo tjiti avi ha munikwa i varwe. Tji wa tjiti nao, Iho ngu muna avihe me ku pe ondjambi.
5 “Wina, indu tji mamu kumbu amu ritjindi tjimuna imba mbe ritjinda aayo ovasemba, owo va suvera okukurama nokukumba mozosinagoge na pomahaṋikiro wozondjira kokutja ovandu ve ve mune. Ami tjiri me mu raere kutja owo kave nokumuna ondjambi okuza ku Mukuru.
6 Posi ya indu tji mo kumbu, hita metuwo roye, u pate omuvero, nu u kumbe ku Iho. Nu Iho ngu hamunika posi ya ngu muna avihe, me ku pe ondjambi.
7 Indu tji mo kumbu, o yarukire po omambo yemwe rukwao na rukwao, tjimuna ovandu woviwaṋa tji ve tjita, orondu owo ve muna kutja Mukuru ma puratene ku wo mena rokutja ve kumba ozongumbiro ozonde.
8 Ku nao, amu kara tjimuna wo, orondu Iho u tjiwa oviṋa mbi mamu hepa nandarire ngunda amu hi ya ningira.
9 “Nopu mwa sokukumba momuano mbwi:
“‘Tate wetu ngu ri meyuru, ena roye nga ri yapurwe.*
10 Ouhona woye ngau honapare kombanda yehi, ombango yoye ngai tjitwe kombanda yehi otja tji i tjitwa meyuru.
11 Tu pao omboroto* meyuva randino.
12 Nu tu isira ozondjo zetu otja tji twa isire ovanandjo na eṱe.
13 Nu o tu yandjere kutja tu wire momarorero, posi ya tu yama* komunaurunde.’
14 “Indu tji mwa isire ovakweṋu ozondjo zawo, Iho womeyuru wina me mu isire ozondjo zeṋu,
15 posi ya, tji mu hi nokuisira varwe koviṋa ovivi mbi va tjiti kweṋe, Tate weṋu ke nokumuisira indu tji mwa tjiti oviṋa ovivi.
16 “Indu tji mamu ritjaere kovikurya, amu ningisa ondjenda tjimuna ovandu mbe ritjinda aayo ovasemba tji ve tjita, orondu owo kave koho omirungu vyawo* kokutja ve munike kovandu kutja mave ritjaere kovikurya. Tjiri, ami me mu raere kutja Mukuru ke na ku ve pa ondjambi.
17 Posi ya indu tji mo ritjaere kovikurya, hwa omaze mozondjise zoye nu u rikohe momurungu,
18 kokutja o ha munika kovandu kutja mo ritjaere kovikurya, nungwari u munike ku Iho ngu ha munika. Okuzambo Iho ngu muna avihe mohamunika me ku pe ondjambi.
19 “Iseye okupwika omautumbe weṋu kombanda yehi. Orondu oupuka* nomureru mavi yenene okuvinyona, nu mavi yenene okuvakwa i yomarunga.
20 Nungwari, pwikeye omautumbe meyuru, orondu oupuka nomureru kamaavi yenene okuvinyona nu omarunga kamaaye yenene okuvivaka.
21 Mena rokutja outumbe woye pu u ri, omutima woye opu mau kara wina.
22 “Eho roye ri ri tjimuna erambe ndi ku pa ondjerera. Indu eho roye tji mari yandja ombango koviṋa ovisemba, orutu rwoye aruhe maru yere.*
23 Posi ya indu eho roye tji mari tara koviṋa mbi ri ovivi,* orutu rwoye aruhe maru kara monḓorera. Indu ondjerera ndji ri move tji ya rire onḓorera, tjiri oyo mai rire onḓorera ṱukuṱuku.
24 “Kape nomundu ngu ma yenene okukarera ovahona vevari tjimwe. Eye ma tondo umwe na suvere ingwi owarwe, eye ma rire omuṱakame ku umwe, nu a ha raisa ondengero ku ingwi owarwe. Eṋe kamaamu yenene okukarera Mukuru noutumbe tjimwe.
25 “Ku nao, ami me mu raere kutja iseye okurikenda ohunga nomiinyo vyeṋu kutja mamu ri ye, poo mamu nu ye, poo okurikenda ohunga notutu tweṋu kutja mamu zara ye. Omuinyo omunanḓengu tjinene okukapita ovikurya, nu orutu orunanḓengu okukapita ozombanda.
26 Tareye kouzera mbu tuka, owo kau kunu poo okukonda, nu kau pwikire mondjuwo yomapwikiro, posi ya Tate weṋu ngu ri meyuru u yandja ovikurya kouzera mbwi. Eṋe oweṋe ovananḓengu tjinene pouzera.
27 Ouṋe pweṋe ngu me rikende ohunga nomuinyo we ngu ma yenene okuweza nandarire ominute imwe* komuinyo we kutja ma hupe orure kaṱiṱi?
28 Wina, omena raye tji mu rikenda ohunga nozombanda? Rihongereye okuza komuano oumbloma* wokuti mu u hapa. Owo kau ungura oukukutu poo okuungura ozombanda,
29 posi ya ami me mu raere kutja nandarire Ombara Salomo noutumbe we ke na pe rihwikikire nawa tjimuna oumbloma mbwi.
30 Mukuru u tjita kutja ovimbloma vyokuti mbi vi munike nawa, nandarire kutja vi hapa eyuva rimwe nu eyuva rarwe avi yumbwa momuriro.* Ku nao, eye me mu tjitire ovingi nandarire kutja kamu nongamburiro yomasa.
31 Amu rikende nokutja, ‘Matu ri ye?’ poo, ‘Matu nu ye?’ poo, ‘Matu zara ye?’
32 Orondu ovandu woviwaṋa vyarwe ve rambera oviṋa mbi. Tate weṋu womeyuru ma tjiwa kutja eṋe mu hepa oviṋa avihe mbi.
33 Ku nao, Ouhona noviṋa Mukuru mbye tja ovisemba, aruhe ngavi rire ovitenga mehupo reṋu, tji mwa tjiti nao Mukuru me mu wezire ko oviṋa avihe vyarwe.
34 O rikende neyuva ra muhuka, orondu oro ri nomerikendero waro orini. Eyuva arihe ri nomauzeu waro.
Omambo wokehi
^ Poo “oviyandjewa kovasyona.”
^ Poo “nga ri tjindwe otja eyapuke.”
^ Poo “ovikurya.”
^ Poo “tu kutura.”
^ Poo “kave rituṋu.”
^ Embo rOtjigrike nda ungurisiwa ri hungirira kozombombo nḓe rya ozombanda.
^ Poo “maru kara nondjerera onyingi.”
^ MOtjigrike, “ovirunde.”
^ MOtjigrike, “okuweza okubit imwe.”
^ Poo “ozongara.”
^ MOtjigrike, “yumbwa mezuko.”
