Evangeli ra Mateus 1:1-25
1 Embo rekuruhungi romuhoko wa Jesus Kristus,* omuatje wa David, omuatje wa Abraham:
2 Abraham wa ri ihe ya Isak.
Isak wa ri ihe ya Jakob.
Jakob wa ri ihe ya Juda nomarumbi novangu ve.
3 Juda wa ri ihe ya Peres na Serag nu ina wa ri Tamar.
Peres wa ri ihe ya Hesron.
Hesron wa ri ihe ya Aram.
4 Aram wa ri ihe ya Aminadab.
Aminadab wa ri ihe ya Nakson.
Nakson wa ri ihe ya Salmon.
5 Salmon wa ri ihe ya Boas nu ina wa ri Rahab.
Boas wa ri ihe ya Obed nu ina wa ri Rut.
Obed wa ri ihe ya Isai.
6 Isai wa ri ihe yOmbara David.
David wa ri ihe ya Salomo momukazendu wa Uria.
7 Salomo wa ri ihe ya Rehabeam.
Rehabeam wa ri ihe ya Abija.
Abija wa ri ihe ya Asa.
8 Asa wa ri ihe ya Josafat.
Josafat wa ri ihe ya Joram.
Joram wa ri ihe ya Usija.
9 Usija wa ri ihe ya Jotam.
Jotam wa ri ihe ya Akas.
Akas wa ri ihe ya Hiskija.
10 Hiskija wa ri ihe ya Manasse.
Manasse wa ri ihe ya Amon.
Amon wa ri ihe ya Josia.
11 Josia wa ri ihe ya Jojakin novangu ve. Owo va kwatwa komurungu ya indu Ovajuda tji va ri pokutwarewa otjovahuurwa koBabilon.
12 Kombunda yokutwarewa otjovahuurwa koBabilon, Jojakin wa rira ihe ya Selatiel.
Selatiel wa ri ihe ya Serubabel.
13 Serubabel wa ri ihe ya Abiud.
Abiud wa ri ihe ya Eliakim.
Eliakim wa ri ihe ya Asor.
14 Asor wa ri ihe ya Sadok.
Sadok wa ri ihe ya Akim.
Akim wa ri ihe ya Eliud.
15 Eliud wa ri ihe ya Eleasar.
Eleasar wa ri ihe ya Matan.
Matan wa ri ihe ya Jakob.
16 Jakob wa ri ihe ya Josef omurumendu wa Maria. Nu Maria ongwa kwata Jesus, ngu isanewa Kristus.
17 Otukwato atuhe kumwe, okuza ku Abraham ngandu ku David twa ri 14, okuza ku David ngandu komahuuriro wa Babilon twa ri 14, okuza komahuuriro wa Babilon ngandu ku Kristus twa ri 14.
18 Posi ya ongwatero ya Jesus Kristus ya kayenda momuano mbwi: Moruveze indu ina Maria tja varekerwe okurira omukazendu wa Josef, ombepo ondjapuke* ya tjita kutja Maria ma rire otjingundi ngunda ave hi ya kupasana.
19 Nungwari, Josef wa ri omurumendu omusemba nu kaa vanga okumuyamburura komurungu wovandu, ku nao wa tya okuhaṋika ku na ye nokuhinovandu okutjiwa.
20 Posi ya, eye tja za nokuripurira koviṋa mbi, omuengeli wa Jehova* we rimunikisa ku ye moruroto, na tja: “Josef, muatje wa David, o tira okutwara Maria konganda kutja ma karire omukazendu woye, orondu ombepo ondjapuke ondja tjiti kutja ma rire otjingundi.
21 Eye ma panduka omuatje omuzandu, nu mo mu ruku Jesus,* mena rokutja ma yama ovandu* komauvi wawo.”
22 Oviṋa avihe mbi vya tjitwa kutja vi yenenise oviṋa avihe Jehova mbya hungira okupitira momuprofete we, ngwa tja:
23 “Tara! Omusuko* ma rire otjingundi nu ma panduka omuatje omuzandu nu mave mu ruku Imanuel,” ndi mari hee kutja, “Mukuru u ri pu na eṱe.”
24 Okuzambo Josef wa penduka mozomboṱu na tjiti imbi omuengeli wa Jehova mbye mu raera, na twara omukazendu we konganda.
25 Nungwari eye ke na pa kara nomahakaeneno womonyama pu na Maria nga tja panduka omuatje omuzandu, nu Josef we mu ruka Jesus.
Omambo wokehi
^ Poo “Messias; Omutwirisiwa.”
^ Poo “omasa wa Mukuru.”
^ Ena ra Jehova ri munika povikando 237 mOmatjangwa wOtjigrike, nu ihi otjikando otjitenga ena ndi okutamunwa.
^ MOtjiheberi ena ndi Jesua, poo Josua, ri heya kutja “Jehova Omuyame.”
^ MOtjigrike, “ovandu ve.”
^ Embo rOtjigrike ndi “omusuko” ri heya omundu ngu hi ya rora okukara nomahakaeneno womonyama ku nomurumendu.
