Evangeli ra Mateus 27:1-66
27 Nu tji pa tja, ovapristeri oviuru avehe novarumendu ovanene avehe ve ya pamwe okuhungira kutja mave zepa vi Jesus.
2 Tji va za nokumupandeka, owo ve mu twara nave kemuyandja ku Pilatus, ngwa ri ongooneya.
3 Nu Judas ngwe mu horora, tja muna kutja Jesus wa pangurwa kokuṱa, wa kara nomuhihamwatima na yarura ovimariva ovisilveri 30 kovapristeri oviuru novarumendu ovanene,
4 na tja: “Ami mba tjiti ouvi indu tji mba horora ombinḓu ndji hi nondjo.” Owo va tja: “Imbyo kavi tu twaerere. Tara kutja mo tjiti vi!”*
5 Neye wa yumba ovimariva ovisilveri mondembeli, nu e kerireka.
6 Posi ya, ovapristeri oviuru va toora ovimariva ovisilveri, nave tja: “Kanawa okutwa mo ovimariva mbi metuwo eyapuke romapwikiro wovimariva, mena rokutja ovyo ovimariva vyombinḓu.”
7 Nowo tji va za nokuzuvasana, va ungurisa ovimariva mbyo okuranda navyo ehi* mu mamu pakwa ovandu vozonganda.
8 Ku nao, ehi ndo opu ri zokuisanewa kutja Ehi rOmbinḓu nga ku ndino.
9 Nu imbi mbya hungirwa okupitira momuprofete Jeremia vya yenenisiwa, indu tja tja: “Owo va kambura ovimariva ovisilveri 30, ondjambi ovanatje va Israel ndji va zuvasana okumuranda na yo,
10 nu owo ve vi yandja okuranda navyo ehi* otja Jehova pe ndji rakizire.”
11 Jesus wa kuramene komurungu wongooneya, nu oyo ye mu pura ai tja: “Hapo oove ngu ri Ombara yOvajuda?” Jesus wa zirire a tja: “Ove omuini wa ziri.”
12 Ku nao, ngunda ovapristeri oviuru novarumendu ovanene amave mu kuminine, eye ka zirire ko.
13 Pilatus wa tja ku ye: “Hapo ko nokuzuva oviṋa avihe mbi mave ku kuminine?”
14 Posi ya eye ka hungirire embo nandarire rimwe, ku nao ongooneya ya himinwe tjinene.
15 Meyuva enene, ongooneya aruhe aai pitisa omukamburwa, otjimbumba tjovandu tji tja vanga.
16 Nu meyuva ndo, va ri nomukamburwa omutjiukwa wena Barabas.
17 Indu tji va wongarere pamwe, Pilatus wa tja ku wo: “Mamu vanga kutja mbi mu pitisire uṋe? OBarabas poo oJesus ngu ku za oKristus?”
18 Orondu Pilatus tjinga aa tjiwa kutja owo va yandja Jesus ku ye mena reruru.
19 Ngunda Pilatus aa haama kotjihavero tjombanguriro, omukazendu we we mu hindira ombuze ndja i tja: “O tjiti otjiṋa komurumendu omusemba ngo, mena rokutja ndino mba roto ohunga na ye, noruroto ndwo rwe ndji tirisa tjinene.”
20 Posi ya ovapristeri oviuru novarumendu ovanene va popa otjimbumba tjovandu okupitisa Barabas, nu ve yandje Jesus kutja ma ṱe.
21 Nu ongooneya ya pura kutja: “Ouṋe ngu mamu vanga kutja mbi pitise?” Owo va tja: “Barabas.”
22 Pilatus wa tja ku wo: “Nambano, ingwi Jesus ngu ku za oKristus, hi mu tjite vi?” Nu owo avehe va tja: “Kemupapere komuti!”*
23 Eye wa tja: “Omena raye? Eye wa tjiti otjikwaye otjivi?” Nungwari owo va kayenda komurungu okuravaera kutja: “Kemupapere komuti!”
24 Nu tja muna kutja ke notjiṋa tji ma yenene okutjita, nungwari ezunganeno aari ririre ko enyingi uriri, Pilatus wa toora omeva, e rikoho omake komurungu wotjimbumba tjovandu na tja: “Ami hi nondjo nombinḓu yomurumendu ngwi. Eṋe oveni tareye kutja mamu tjiti vi.”
25 Nu ovandu avehe va zira ave tja: “Ombinḓu ye ngai ye kombanda yetu na kombanda yovanatje vetu.”
26 Okuzambo eye wa pitisa Barabas ku wo, posi ya eye wa rakiza kutja Jesus ma tonewe, na rire tje ve pe kutja ma kazepewe komuti.
27 Ovarwe vovita vongooneya va hitisa Jesus mondjuwo yongooneya, nu ave woronganisa ovarwe avehe vovita ongondoroka naye.
28 Owo ve mu hukura ozombanda, nave mu manga erapi eserandu eyere,
29 nu owo va ungura ekori rouhona pomakwiya, ave twa kotjiuru tje, nave mu pe okati meke re rokokunene. Nu va wora ozongoro komurungu we, nave mu nyekerere kutja: “Minikwa,* Mbara yOvajuda!”
30 Owo ve mu tjekera omate, ave kambura okati, nave utu okumutona na ko kotjiuru.
31 Korusenina, tji va za nokumunyekerera, owo ve mu hukura erapi, ave mu hwikike ozombanda ze, nave mu twara kutja ma kapaperwe komuti.
32 Otja tjaave i okupita, owo va muna omurumendu ngwa za koKirene wena Simon. Owo va ṋiṋikiza omurumendu ngo okutoora omuti we wondatumisire.
33 Nu indu tji ve ya poruveze ndwa ru isanewa Golgota, ndi heya Otjikongo tjOtjiuru,
34 owo ve mu pa omavinu nga rungwa noṋango* okunwa, posi ya eye tja rora, wa panḓa okuyenwa.
35 Indu tji ve mu papera komuti, owo va haṋasana ozombanda ze mokuyumba ouwe ouṱiṱi,
36 nave haama mbo amave mu tjevere.
37 Owo wina va tjangere omambo kombanda yotjiuru tje, ngaaye raisa kutja omena raye tji ma verwa. Oyo aaye tja: “Ingwi oJesus, Ombara yOvajuda.”
38 Nu omarunga yevari ya papererwe komuti meṋe ye, umwe komanene na warwe komamuho we.
39 Nu imba mbaave kapita, ve mu hungira omambo omavi, nu aave taka oviuru vyawo
40 nokutja: “Ove ngu mo yenene okuhaṋa ondembeli nu o i tungu momayuva yetatu, riyama omuini! Tji u ri omuna wa Mukuru, heruka komuti wondatumisire!”
41 Momuano tjingewo, ovapristeri oviuru pu novahonge vomatwako novarumendu ovanene wina va uta okumunyekerera, nave tja:
42 “Eye wa yama varwe, posi ya ke nokuyenena okuriyama omuini! Eye Ombara ya Israel, nga heruke pehi okuza komuti wondatumisire, nu eṱe otji matu kambura mu ye.
43 Eye wa twa mo ongamburiro ye mu Mukuru, nge ye me mu yame, eye tje nonyuṋe mu ye, orondu eye wa tja, ‘Owami Omuna wa Mukuru.’”
44 Momuano tjingewo, nandarire omarunga nga papererwe komuti meṋe ye, aaye mu yamburura.
45 Oiri tji ya ri ape omurongo na mbari yometaha,* pa ri nonḓorera mehi arihe ngandu oiri tji ya ri ape ondatu yomapeta.*
46 Ape mondatu yomapeta, Jesus wa ravaera neraka enene ama tja: “Eʹli, Eʹli, laʹma sa·bach·thaʹni?” ngu maye hee, “Mukuru wandje, Mukuru wandje, omena raye tji we ndji imbirahi?”
47 Tjiva mba kuramene mbo tji va zuva omambo nga, va tja: “Omurumendu ngwi ma isana Elia.”
48 Nu umwe wawo wa hakahana okutupuka okukatoora okasponsa, eke tjaveke momavinu omaruru, ne ke twa kokati, nu e ke yandja ku ye okunwa.
49 Posi ya, imbo varwe va tja: “Mwesa ma kare! Tu tare kutja Elia tjiri me ya okumuyama.”
50 Rukwao, Jesus wa ravaera neraka enene na suvana omuinyo we omusenina.*
51 Nu tara! Erapi etjizikize roruveze oruyapuke pondembeli ra tauka motupa tuvari, okuza kombanda nga kehi, nehi ra nyinganyinga nu omawe omanene aye pamuka mokati.
52 Nu omayendo* ya paturuka, notutu otuingi twa imba ovayapuke mba ṱa arire tji twa piti momayendo
53 nu otwo twa munika kovandu ovengi. (Kombunda ya indu Jesus tja za nokupendurwa, ovandu* mbaave zu poruveze omayendo pu ya ri, va hita motjihuro otjiyapuke.)*
54 Posi ya, indu omuhongore wotjimbumba tjovita, na imba mba ri pu na ye okutjevera Jesus tji va muna ehi ama ri nyinganyinga, noviṋa mbyaavi tjitwa, owo va tira tjinene nave tja: “Tjiri, ingwi wa ri Omuna wa Mukuru.”
55 Nu ovakazendu ovengi mba kongorera Jesus okuza koGalilea okumuvatera, va ri mbo amave tarere okuza kokure,
56 mokati kawo mwa ri Maria Magdalena, na Maria ina ya Jakobus na Joses, na ina yovanatje va Sebedeus.
57 Nu tji ya ri mapeta, omurumendu omutumbe wa Arimatea wena Josef, wina ngwa rira omuhongewa wa Jesus, we ya.
58 Omurumendu ngwi wa ya ku Pilatus, na kaningira orutu rwa Jesus. Nu Pilatus wa rakiza kutja ru yandjewe ku ye.
59 Josef wa toora orutu, ne ru manga merapi ekohoke ronḓengu yokombanda,
60 ne ru twa meyendo* re omuini epe, nda kororerwe mewe enene, nu tja za nokuundurira po ewe enene pomahitiro weyendo* arire tja i.
61 Posi ya, Maria Magdalena na Maria ina ya Jakobus na Joses, va haamene mbo komurungu weyendo.
62 Nu meyuva nda kongorera ko, nda ri Esabata,* ovapristeri oviuru, nOvafarisei va worongana pamwe komurungu wa Pilatus,
63 nave tja: “Mutengwa, matu zemburuka kutja omupukise ngo ngunda e nomuinyo wa tjere, ‘Kombunda yomayuva yetatu, ami me pendurwa.’
64 Ku nao, yandja erakiza kutja eyendo ri tjeverwe nga keyuva oritjatatu, kokutja ovahongewa ve ave he ya okuvaka orutu rwe, nokuraera ovandu kutja, ‘Eye wa pendurwa movakoke!’ Tji pa tjitwa nao, otjizeze otjisenina matji rire otjivi pu ihi otjitenga.”
65 Pilatus wa tja ku wo: “Mamu yenene okutwa po omutjevere. Twendeye mu katjeverise indi eyendo nawa, otja pu mamu tjiwa.”
66 Nu owo va ya, nave kasetika eyendo mokuripata nawa newe, nave twa po omutjevere.
Omambo wokehi
^ Poo “Imbo ouzeu woye omuini!”
^ MOtjigrike, “ehi romuungure womunoko.” Mape ya ehi ovaungure vomunoko paave kaungurira po.
^ MOtjigrike, “ehi romuungure womunoko.” Mape ya ehi ovaungure vomunoko paave kaungurira po.
^ Poo “Kemuzepe komuti!”
^ Poo “Hivirikwa.”
^ Omanuwa omaruru.
^ MOtjigrike, “oiri oitjahamboumwe.”
^ MOtjigrike, “oiri oitjamuvyu.”
^ Poo “na ṱu.”
^ Poo “ozombongo; ozongungu.”
^ Mai hungirire kovandu mbaave kapita pomayendo, mba muna otutu twovandu mba ṱa amatu piti mehi, mena romanyinganyingiro wehi.
^ Ondjivisiro ndji ri mouwongo mai hungirire koviṋa mbya katjitwa kombunda.
^ Poo “mombongo ye; mongungu ye.”
^ Poo “wombongo; wongungu.”
^ MOtjigrike, “kombunda yOmerirongerisiro.”
