Evangeli ra Mateus 4:1-25
4 Kombunda yombapitisimo ya Jesus, ombepo ya Mukuru ye mu twara mokuti onguza, nu ingo wa karorwa i yOmudiaboli.
2 Eye tja za nokuritjaera kovikurya oure womayuva 40 nomauṱuku 40, eye wa ṱirondjara.
3 Nu Omudiaboli we ya okumurora, na tja: “Tji u ri Omuna wa Mukuru, raera omawe nga ye rire ozomboroto.”
4 Posi ya, eye wa zira a tja: “Omatjangwa maye tja: ‘Omundu kahupu momboroto aiyerike, nungwari u hupisiwa i embo arihe Jehova ndi ma hungire.’”
5 Nu okuzambo Omudiaboli we mu twara kotjihuro otjiyapuke ne kemukuramisa pondomba yondembeli,
6 na tja ku ye: “Tji u ri omuna wa Mukuru, rurumina pehi, orondu Omatjangwa maye tja: ‘Eye ma raere ovaengeli ve okukutjevera nokukuvatera, kokutja o ha vete ombaze yoye kewe.’”
7 Jesus we mu zira a tja: “Omatjangwa wina maye tja: ‘O roro ko Jehova Mukuru woye.’”
8 Nu Omudiaboli we mu twara kondundu onde tjinene, nu okuzambo e mu raisire omauhona ayehe wouye nomautumbe wawo.
9 Nu eye wa tja ku ye: “Me ku pe oviṋa avihe mbi, indu tji wa woro ozongoro norikotamene kwami.”
10 Okuzambo Jesus we mu raera kutja: “Twende, Satan! Orondu Omatjangwa maye tja: ‘Mo sokurikotamena ku Jehova Mukuru woye, nu u karere ye erike.’”
11 Omudiaboli wa za po pu ye, nu ovaengeli ve ya ku ye nave mu yanḓiparisa.
12 Indu tja zuva kutja Johanes wa kamburwa, eye wa ya koGalilea.
13 Kombunda tja za nokupita moNasaret, eye wa katura moKapernaum meṋe yomuronga mbu ri motukondwa twa Sebulon na Naftali,
14 eye wa tjita nao kutja ma yenenise omambo nga hungirwa okupitira momuprofete Jesaja, indu tja tja:
15 “Ove Galilea, mu mwa tura ovandu woviwaṋa vyarwe, wehi ra Sebulon nehi ra Naftali, ngu ri mondjira ndji twara komuronga, munda imbwo warwe wOnḓonḓu Jordan.
16 Ovandu mba haamene monḓorera va muna ondjerera yomasa, noyo ya yera kombanda yaimba mba haamene morukondwa onḓiro mu ya ri tjimuna otjizire kombanda yawo.”
17 Okuza koruveze ndwo Jesus wa uta okuzuvarisa, na tja: “Ritanaureye, orondu Ouhona womeyuru u ri popezu.”
18 Indu Jesus tjaa kawondja meṋe yOmuronga wa Galilea, eye wa muna omuangu nerumbi. Omana wawo ya ri Simon ngu isanewa Petrus, na Andreas, amave yumbu onete momuronga mena rokutja owo va ri ovapate vomahundju.
19 Nu eye wa tja ku wo: “Ndji kongorereye, nami me tjiti kutja mu rire ovapate vovandu.”
20 Nu owo va isa ozonete zawo, nave mu kongorere.
21 Jesus tja za po poruveze ndwo, wa muna ovarumendu vevari mba ri omuangu nerumbi, Jakobus omuatje wa Sebedeus nomuangu we Johanes. Owo va ri mokayaha pu na ihe Sebedeus amave ṱunu ozonete zawo, nu eye we ve isana.
22 Owo va isa okayaha kawo na ihe, nave mu kongorere.
23 Nu eye wa ryanga moGalilea atjihe ama hongo mozosinagoge, nokuzuvarisa ombuze ombwa yOuhona, nokuverukisa omitjise pekepeke ovandu mbi va ri navyo.
24 Nu ombuze ohunga na ye ya handjauka moSiria atjihe, nu owo ve mu etera ovandu mba verere omitjise pekepeke nu mba ri momihihamo, na imba mba ri nozondemone, na imba mbaave seuka otumbamba, na imba mba remanene, nu eye we ve verukisa.
25 Ku nao, ovimbumba ovingi vyovandu okuza koGalilea, na Dekapolis,* na Jerusalem, na Judea, nomunda imbwo warwe wOnḓonḓu Jordan vye mu kongorera.
Omambo wokehi
^ Poo “Ovihuro Omurongo.”
