Evangeli ra Mateus 3:1-17
3 Eyuva rimwe Johanes Omupapitise we ya okuyekuzuvarisa mokuti onguza kwa Judea,
2 na tja: “Ritanaureye, orondu Ouhona womeyuru u ri popezu.”
3 Ingwi ongwa hungirirwe okupitira momuprofete Jesaja indu tja tja: “Eraka romundu mokuti mari ravaere kutja: ‘Rongerisa ondjira ya Jehova! Sembamisa ozondjira ze.’”
4 Nu Johanes wa zarere ombanda ndja ungurwa pomainya wongamero nu we rikutire ekwamo nda ungurwa pomukova. Ovikurya vye vya ri ozombahu nouitji wozonyutji.
5 Oruveze ndwo, ovandu va Jerusalem novandu avehe va Judea, novehi arihe ongondoroka na Jordan, aave ya ku ye,
6 nu eye ee ve papitisa* mOnḓonḓu Jordan, nu owo aave rihepura omauvi wawo.
7 Indu tja muna Ovafarisei nOvasaduke ovengi amave ya poruveze paape papitisirwa ovandu, eye we ve raera kutja: “Eṋe zondekurona zozonyoka ozonawanga, owaṋi ngwe mu rakiza okutaurira omazenge wa Mukuru kutja amu ha munu omberero?
8 Ku nao, tjiteye oviṋa mbi mavi raisa kutja mwe ritanaura.
9 Amu munu kutja oweṋe ozondekurona za Abraham, orondu me mu raere kutja Mukuru ma yenene okutjitira Abraham ovanatje okuza pomawe nga.
10 Ekuva ri ri pomize vyomiti. Omuti auhe mbu hi nokutwa ko ovihape oviwa, mau kewa nau yumbwa momuriro.
11 Ami me mu papitisa mena rokutja mwe ritanaura. Me mu papitisa nomeva, posi ya ingwi ngu me ya kombunda yandje u nomasa pwami, nu hi nonḓengu okuhukura ozongaku ze. Eye me mu papitisa nombepo ondjapuke nomuriro.
12 Eye u notjiungurisiwa meke re tji ma haṋa na tjo ovikokotwa kovisisiro. Nu ma kohorora poṋa pu pe kweyerwa ovikokotwa, na wongere ovikokotwa vye mondjuwo yomapwikiro. Posi ya, ovisisiro eye me vi nyosa nomuriro mbu ha zemi.”
13 Jesus wa zire koGalilea na i kOnḓonḓu Jordan kutja ma kapapitisiwe i Johanes.
14 Posi ya, Johanes wa kondja okumutjaera na tja: “Owami ngu me sokupapitisiwa i ove, nu ove we ya kwami?”
15 Jesus we mu zira kutja: “O ndji tjaere, orondu momuano mbwi, eṱe matu yenenisa oviṋa avihe Mukuru mbye vanga.” Okuzambo Johanes wa itavera okumupapitisa.
16 Tja za nokupapitisiwa, tjimanga Jesus wa yeruruka okuza momeva nu okuzambo eyuru ra paturuka, nu a munu ombepo ya Mukuru amai rauka tjimuna onguti, nu ye ya kombanda ye.
17 Nu wina eraka okuza keyuru ra tja: “Ingwi Omuna wandje omusuverwa, ami ngu mba yakura.”
Omambo wokehi
^ Poo “ee ve pundisa momeva.”
