Mareko 9:1-50
9 Iesu be idia dekenai ma ia gwau: “Umui lau hamaoroa momokani, iniseniai idia gini taudia haida be do idia mase lasi ela bona Dirava ena Basileia idia itaia guna, mai siahu danu ia mai.”
2 Vadaeni dina 6 murinai, Iesu ese Petero, Iamesi, bona Ioane ia abia bona idia sibona be ororo badana ta dekenai idia lao. Bena idia vairanai ena toana ia idau.
3 Vadaeni ena dabua ia diaridiari matamaia, bona ia kurokuro momokani, ta ese dabua be unai bamona ia huria bona hakurokuroa diba lasi.
4 Danu, Elia bona Mose be idia vairanai idia hedinarai, bona idia be Iesu ida idia herevahereva.
5 Bena Petero be Iesu ia hereva henia, ia gwau: “Rabi* e, inai gabu dekenai ita noho be namo. Mani palai ruma toi do ai haginia, ta be oiemu, ma ta Mose ena, bona ma ta Elia ena.”
6 Momokani, Petero ia diba lasi edena bamona do ia kara, badina idia gari bada.
7 Bena ori ta ia hedinarai, idia ia koua, bona ori amo gado ta ia mai, ia gwau: “Inai be egu Natuna, egu lalokau, iena hereva umui kamonai.”
8 Vadaeni, gabu idia itaia to ta idia itaia lasi, Iesu sibona.
9 Ororo amo idia diho noho lalonai, idia ia oda henia idia itaia gauna be ta do idia hadibaia lasi, ela bona taunimanima ena Natuna be mase amo ia toreisi lou murinai.
10 Idia ese unai hereva be edia kudouna dekenai idia atoa, to mase amo do ia toreisi lou ena anina be sibodia huanai idia herevalaia.
11 Bona Iesu idia nanadaia matamaia, idia gwau: “Dahaka dainai taravatu hadibaia taudia idia gwau Elia be do ia mai guna?”
12 Idia dekenai ia gwau: “Elia be do ia mai guna bona gau ibounai do ia hanamoa lou. To dahaka dainai Toretore Helagadia ia gwau taunimanima ena Natuna be hisihisi momo do ia abia bona do idia dadaraia?
13 To umui lau hamaoroa, Elia be ia mai vadaeni, bona ia dekenai idia ura karaia karadia idia karaia, Toretore Helagadia ia hereva bamona.”
14 Vadaeni idia be hahediba taudia ma haida dekenai idia mai neganai, idia itaia hahediba taudia be hutuma bada edia huanai bona idia be taravatu hadibaia taudia ida idia hepapahuahu.
15 To maoromaoro hutuma ese Iesu idia itaia neganai, idia hoa bada bona ia dekenai idia heau lao bona ia idia hanamoa.
16 Unai dainai idia ia nanadaia: “Idia danu dahaka umui hepapahuahulaia?”
17 Bona hutuma amo ta ese Iesu ia haere henia: “Hadibaia Tauna e, oi dekenai egu natuna mero lau mailaia, badina lauma dikana ta ese ia abia dainai, ia hereva diba lasi.
18 Bona ia lalonai ia vareai neganai, mero be tano dekenai ia negea, bona ena uduna amo ranu ia diho, ena isena ia koria bona ena goada ia ore. Emu hahediba taudia lau hamaoroa unai lauma idia lulua totona, to idia hegeregere lasi.”
19 Idia ia haere henia, ia gwau: “Abidadama lasi uruna e, umui ida do lau noho ela bona edena nega? Umui emui kara do lau haheaukalaia ela bona edena nega? Ia umui mailaia lau dekenai.”
20 Unai dainai Iesu dekenai mero idia abia lao. To unai lauma dikana be Iesu ia itaia neganai, mero be tano dekenai ia negea bona ia mareremarere, tano ai ia giroagiroa bona ena uduna amo ranu ia diho.
21 Bona Iesu ese mero ena tamana ia nanadaia: “Inai gauna be edena negai ia vara matamaia?” Tamana ia gwau: “Ia maragi negana amo,
22 nega momo mero be lahi bona ranu lalonai ia negea, ia hamasea totona. To bema gau ta oi karaia diba, ai oi hebogahisi henia bona ai oi durua.”
23 Iesu be ia dekenai ia gwau: “Inai hereva, ‘Bema oi karaia diba’! Momokani, mai ena abidadama tauna dekenai gau ibounai idia vara diba.”
24 Vadaeni mero ena tamana ia boiboi, ia gwau: “Lau be mai egu abidadama! Lau oi durua egu abidadama lau hagoadaia totona!”
25 Iesu ia itaia hutuma be idia dekenai idia heau mai neganai, ia ese lauma dikana ia gwau henia, ia gwau: “Hereva diba lasi bona taia kudima laumana e, oi lau oda henia mero amo oi raka-lasi bona ia lalonai oi vareai lou lasi.”
26 Lauma dikana ia boiboi bona mero ia hamarerea bada murinai, ia raka-lasi bona mero be ia mase bamona, unai dainai idia momo idia gwau: “Ia mase!”
27 To Iesu ese mero ena imana ia dogoatao bona ia abia isi, bena ia toreisi.
28 Iesu be ruma ta lalonai ia vareai bona sibona ia noho neganai, ena hahediba taudia ese ia idia nanadaia: “Dahaka dainai lauma dikana ai lulua diba lasi?”
29 Bona idia dekenai ia gwau: “Guriguri sibona amo unai bamona lauma dikana ia raka-lasi diba.”
30 Unai gabu idia rakatania bona Galilea dekenai idia lao, to Iesu ia ura lasi taunimanima ese unai idia diba.
31 Badina ena hahediba taudia ia hadibaia, ia gwau: “Taunimanima ena Natuna be taunimanima edia imana dekenai do idia atoa bena do idia hamasea. Ena be ia mase, to dina toi murinai do ia toreisi lou.”
32 To iena hereva ena anina idia lalopararalaia lasi, bona idia gari ia idia nanadaia totona.
33 Bona Kaperanauma dekenai idia ginidae. Vadaeni ruma lalonai ia noho neganai, idia ia nanadaia: “Dala dekenai dahaka umui hepapahuahulaia?”
34 To idia hereva lasi, badina dala dekenai idia sibona huanai idia hepapahuahu daika be ia bada.
35 Vadaeni ia helai bona idia 12 ia boiria, bona idia dekenai ia gwau: “Bema ta ia ura do ia guna, ia be ginigabena ai do ia lao be namo bona ibounai edia hesiai gaukara do ia karaia.”
36 Bena natuna maragina ta ia abia bona edia huanai ia haginia bena natuna ia rosia bona idia dekenai ia gwau:
37 “Lauegu ladanai inai bamona natuna maragina ta ia abia dae tauna ese lau ia abia dae, bona lau ia abia dae tauna ese lau sibona ia abia dae lasi, to lau ia siaia tauna danu ia abia dae.”
38 Ioane be Iesu dekenai ia gwau: “Hadibaia Tauna e, tau ta ai itaia, ia be emu ladana dekenai demoni ia luludia, to ia be ita ia bamoa lasi dainai, ia ai koua toho.”
39 To Iesu ia gwau: “Ia umui koua toho lasi, badina tau ta lasi ese egu ladana dekenai siahu karadia ia karaia diba, bena maoromaoro lau ia gwauraia dika.
40 Badina ita ia inai henia lasi tauna be iseda kahanai.
41 Umui lau hamaoroa momokani, Keriso murinai umui raka dainai, bema tau ta ese ranu kapusi ia henia umui inua totona, unai tauna be ena ahuna do ia abia.
42 To bema lau ia abidadama henia ladana maragi tauna be ta ese ia hahekwakwanaia, do ia namo bema unai tauna ena aiona dekenai nadi badana* ta idia kwatua bona davara dekenai idia negea.
43 “Bona bema emu imana ese oi ia hahekwakwanaia, oi utua oho. Do ia namo bema emu imana ia dika bona mauri* oi abia, to namo lasi imana rua ida Gehena,* ia bodo diba lasi lahina, dekenai oi lao.
44 *—
45 Bona bema emu aena ese oi ia hahekwakwanaia, oi utua oho. Do ia namo bema emu aena ia dika bona mauri* oi abia, to namo lasi aena rua ida Gehena dekenai oi idia negea.
46 *—
47 Bona bema emu matana ese oi ia hahekwakwanaia, oi kokia. Do ia namo bema matana tamona sibona ida Dirava ena Basileia lalonai oi vareai, to namo lasi mai matana rua ida Gehena lalonai oi idia negea.
48 Unuseniai gaigai maragidia idia mase diba lasi bona lahi be ia bodo diba lasi.
49 “Tau ta ese damena ia bubua bamona, lahi be unai bamona taudia latanai do idia bubua.
50 Damena be gau namona, to bema ena mamina ia ore, edena bamona ena mamina umui abia lou diba? Emui mauri lalonai damena ia noho be namo, bona umui ta ta huanai maino do ia noho.”
