Mareko 11:1-33
11 Vadaeni idia be Ierusalema kahirakahira idia lao, bona Olive Ororona ai idia noho hanua, Betepage bona Betania ai idia ginidae neganai, Iesu ese ena hahediba taudia rua ia siaia,
2 bona idia ia hamaoroa: “Umui itaia diba hanuana dekenai umui lao, bona unai hanua lalonai umui vareai neganai, do umui itaia doniki natuna ta idia kwatua, taunimanima ta be ia latanai ia do helai lasi. Umui ruhaia bona umui mailaia.
3 Bona bema ta ese umui ia nanadaia, ‘Dahaka dainai inai umui karaia noho?’ umui gwau, ‘Lohiabada be inai doniki ia ura, bona iniseniai do ia siaia lou haraga.’”
4 Unai dainai idia lao bona idia itaia dala badinai ia noho ruma ta ena iduara vairanai doniki natuna ta idia kwatua, vadaeni idia ruhaia.
5 To unuseniai idia gini taudia haida be idia dekenai idia gwau: “Dahaka dainai doniki natuna umui ruhaia?”
6 Hahediba taudia be unai taudia dekenai Iesu ia hereva hegeregerena idia hereva, bena idia koudia lasi.
7 Vadaeni Iesu dekenai doniki natuna idia mailaia, bona edia dabua be doniki natuna latanai idia atoa bena Iesu ia helai.
8 Danu, momo ese edia dabua be dala dekenai idia atoa, bona ma haida be dala badinai idia gini au edia rigi idia utua.
9 Iesu ena vairanai bona ena murinai idia raka taudia idia boiboi noho: “Ai guriguri, hahemauri do oi henia! Iehova ena ladanai ia mai tauna be Ia ese ia hanamoa!
10 Ia mai noho Basileia, iseda tamana Davida ena, be Dirava ese do ia hanamoa! Ai guriguri, guba dekenai ia do oi hamauria!”
11 Ierusalema dekenai ia ginidae, dubu helaga lalonai ia vareai bona gau ibounai ia itaia, to gabu ia dibura vadaeni dainai, ena aposetolo taudia 12 ida Betania dekenai idia lao.
12 Murina dinana ai, Betania idia rakatania neganai, Iesu ia hitolo.
13 Bona daudau amo, fig auna ta mai ena raurau ia itaia, bona ia lao ia itaia bema unai au dekenai huahua ta ia davaria diba. To ia lao kahirakahira neganai, huahua ta ia davaria lasi, raurau sibona, badina unai be fig huahua atoa negana lasi.
14 Vadaeni unai fig auna dekenai ia gwau: “Tau ta be oi amo huahua ta do ia abia lasi ela bona hanaihanai.” Bona ena hahediba taudia be unai idia kamonai.
15 Vadaeni Ierusalema dekenai idia ginidae. Bona dubu helaga lalonai ia vareai bona hoihoi taudia ibounai ia lulua matamaia, bona moni idia senisia taudia edia pata bona pune manu idia hoihoilaia taudia edia helai gaudia ia hagirodia.
16 Bona edia kohu idia huaia bona dubu helaga lalonai idia raka hanai taudia ibounai ia koudia.
17 Danu taunimanima ia hadibaia noho, ia gwau: “Toretore Helagadia ia gwau: ‘Lauegu ruma do idia gwauraia bese ibounai edia guriguri ruma,’ ani? To umui ese henaohenao taudia edia kohua ai umui halaoa.”
18 Vadaeni dubu biagudia bona taravatu hadibaia taudia be ia vara gauna idia kamonai, bona dala idia tahua matamaia ia idia hamasea totona, to idia gari badina taunimanima ibounai be ena hadibaia herevadia dekenai idia hoa bada.
19 Gabu ia do dibura lasi neganai, taoni idia rakatania.
20 To daba maragi ai idia raka hanai neganai, idia itaia fig auna ia kakoro vadaeni, ena ramuna danu.
21 Petero be Iesu ena hereva ia laloatao, vadaeni Iesu dekenai ia gwau: “Rabi* e, itaia, oi gwau henia fig auna be ia kakoro vadaeni.”
22 Bona Iesu be idia ia haere henia, ia gwau: “Dirava umui abidadama henia.
23 Umui lau hamaoroa momokani, bema ta ese inai ororo dekenai ia gwau, ‘Iniseni amo oi toreisi bona davara dekenai oi diho.’ Bona ia be ena lalona* dekenai ia daradara lasi, to ia diba momokani ia herevalaia gauna be do ia vara, vadaeni unai bamona do ia vara.
24 Unai dainai umui lau hamaoroa, umui gurigurilaia bona noinoilaia gaudia ibounai, bema umui abidadama momokani, hegeregere unai gaudia umui abia vadaeni, oibe, do umui abia momokani.
25 Umui gini bona guriguri neganai, umui dekenai kerere idia karaia taudia edia dika umui gwauatao, bena emui Tamana guba ai ia noho ese emui kerere danu do ia gwauatao.”
26 *—
27 Ierusalema dekenai ma idia mai. Bona Iesu be dubu helaga lalonai ia vareai neganai, dubu biagudia, taravatu hadibaia taudia bona tau badadia be ia dekenai idia lao,
28 bona idia gwau: “Edeseni amo siahu oi abia unai gaudia oi karaia totona? Eiava daika be oi dekenai unai siahu ia henia?”
29 Iesu be idia dekenai ia gwau: “Umui dekenai henanadai ta do lau henia. Lau umui haere henia, bona lau danu be umui do lau hamaoroa edeseni amo siahu lau abia unai gaudia lau karaia totona.
30 Ioane ese ia karaia bapatiso be guba amo eiava taunimanima amo? Lau umui haere henia.”
31 Vadaeni sibodia huanai idia herevahereva, idia gwau: “Bema ita gwau, ‘Guba amo,’ do ia gwau, ‘Vadaeni dahaka dainai Ioane umui abidadama henia lasi?’
32 Eiava do ita gwau, ‘Taunimanima amo,’ a?” Idia gari unai bamona idia hereva totona, badina hutuma idia laloa Ioane be peroveta tauna ta.
33 Vadaeni Iesu idia haere henia, idia gwau: “Ai diba lasi.” Bena Iesu be idia dekenai ia gwau: “Lau danu be umui do lau hamaoroa lasi edeseni amo siahu lau abia unai gaudia lau karaia totona.”
