Mareko 16:1-20
16 Sabati ia ore murinai, Maria Magadala, Iamesi ena sinana Maria, bona Salome be bonana namo muramura idia hoia, bona guria gabuna dekenai idia lao, Iesu ena tauanina dekenai idia dahua totona.
2 Vadaeni pura ena dina ginigunana* ai, daba momokani ai dina ia daekau neganai, guria gabuna dekenai idia mai.
3 Bona idia be ta ta dekenai idia gwau: “Daika ese ita totona guria gabuna ena iduara nadina do ia doria siri?”
4 To edia kwarana idia abia isi neganai, idia itaia ta ese nadi ia doria siri vadaeni, ena be unai nadi be bada herea.
5 Guria gabuna lalonai idia vareai neganai, idia itaia tau matamata ta be idibana kahanai ia helai, ena dabua be kurokuro, bona idia hoa bada.
6 Idia dekenai ia gwau: “Umui hoa lasi. Lau diba umui be Iesu umui tahua noho, ia be au dekenai idia kokoa kau* Nasareta tauna. Ia be ia toreisi lou vadaeni, bona iniseniai ia noho lasi. Itaia! Ia idia atoa gabuna be inai.
7 To umui lao, iena hahediba taudia bona Petero umui hamaoroa, ‘Ia be do ia lao guna Galilea dekenai, unuseniai ia do umui itaia, umui ia hamaoroa hegeregerena.’”
8 Vadaeni idia raka-lasi neganai, guria gabuna idia rakatania bona idia heau, idia heudeheude bona idia hoa bada. Bona idia gari dainai, ta idia hadibaia lasi.
HEREVA ORENA KWADOGINA
To idia abia hahegani ibounai edia hereva badadia be Petero ida idia noho taudia dekenai idia gwauraia. Unai murinai, Iesu ese hahediba taudia amo, inai sivarai ia halasia. Unai sivarai be inai, Dirava ia ura taunimanima ia hamauria bona idia dekenai mauri hanaihanai ia henia. Unai sivarai be helaga bona ia dika diba lasi, bona ist kahana amo ela bona west kahana dekenai unai sivarai do idia harorolaia.
HEREVA ORENA LATANA
Inai hereva orena latana be maniuskrip gunadia haida (Codex Alexandinus, Codex Ephraemi, Codex Bezae) bona Baibel haida (Latin Vulgate, Curetonian Syriac, Syriac Peshitta) lalonai idia noho, to ma haida (Codex Sinaiticus, Codex Vaticanus, Sinaitic Syriac codex, Armenian Version) lalonai idia noho lasi:
9 Pura ena dina ginigunana ena daba maragi ai, Iesu be mase amo ia toreisi lou murinai, Maria Magadala dekenai ia hedinarai guna, Iesu ese ia amo demoni 7 ia lulua.
10 Maria ia lao bona Iesu ena hahediba taudia ia hadibaia, badina idia be idia lalohisihisi bona idia taitai.
11 To Iesu ia toreisi lou, bona Maria ese ia itaia sivaraina idia kamonai neganai, idia abia dae lasi.
12 Danu, unai gaudia idia vara murinai, hahediba taudia rua be hanua idia rakatania noho lalonai, Iesu be toana idauna ai idia dekenai ia hedinarai.
13 Bona idia giroa lou bona hahediba taudia ma haida idia hadibaia. To unai taudia edia hereva danu idia abia dae lasi.
14 Gabeai, aposetolo taudia 11 be aniani totona idia helai neganai, idia dekenai ia hedinarai, bona edia abidadama lasi bona laloauka karana dainai, idia ia gwau henia. Badina mase amo ia toreisi lou bona ia idia itaia taudia edia hereva idia abidadama henia lasi.
15 Idia dekenai ia gwau: “Tanobada ibounai dekenai umui lao bona taunimanima ibounai dekenai sivarai namona umui harorolaia.
16 Ia abidadama bona bapatiso ia abia tauna be Dirava ese do ia hamauria, to ia abidadama lasi tauna be panisi do ia abia.
17 Idia abidadama taudia dekenai do idia itaia toa be inai: Lauegu ladana dekenai idia ese demoni do idia lulua bona gado idauidau ai do idia hereva.
18 Edia imana amo gaigai do idia abia isi, bona poisini gauna ta idia inua neganai, dika do idia davaria lasi. Edia imana be gorere taudia dekenai do idia atoa bona unai taudia do idia namo.”
19 Vadaeni Lohiabada Iesu be idia dekenai ia hereva murinai, Dirava ese guba dekenai ia abia daekau bona ena idibana kahanai ia helai.
20 Bena idia lao bona gabu ibounai dekenai idia haroro, Lohiabada be idia danu ia gaukara bona idia karaia toa idauidau amo ia hamomokania idia harorolaia herevana be momokani.
