Mareko 8:1-38
8 Unai negadia ai, taunimanima hutuma idia haboua lou, bona gau ta be lasi idia ania totona, unai dainai Iesu ese ena hahediba taudia ia boiria bona idia dekenai ia gwau:
2 “Hutuma lau hebogahisi henidia, badina dina toi lau ida idia noho vadaeni bona gau ta idia ania lasi.
3 Bema edia ruma dekenai mai hitolo danu idia lau siaia lao, dala dekenai do idia moru. Bona idia haida be gabu daudau amo idia mai.”
4 Vadaeni iena hahediba taudia ese ia idia haere henia: “Inai taunimanima lasi gabuna ai, ta ese edeseni amo paraoa ia abia diba inai taudia ia ubua totona?”
5 To Iesu ese idia ma ia nanadaia: “Umui dekenai paraoa hida idia noho?” Idia gwau: “Paraoa 7.”
6 Vadaeni hutuma ia hamaoroa tano dekenai do idia helai. Bena paraoa 7 ia abia, Dirava ia tanikiu henia, ia makohidia bona ena hahediba taudia dekenai ia henia matamaia, bena idia ese hutuma dekenai idia henia.
7 Idia dekenai gwarume maragidia haida idia noho danu, bona Dirava ia tanikiu henia murinai, ena hahediba taudia ia hamaoroa gwarume do idia hariharilaia danu.
8 Idia aniani bona idia bogakunu bona aniani oredia be bosea badadia 7 lalonai idia hahonua.
9 Tatau ibounai be 4,000 bamona. Vadaeni idia ia siaia lao.
10 Bona maoromaoro ena hahediba taudia ida bouti ai idia guia bona Dalamanuta ena kahana haida dekenai idia lao.
11 Vadaeni Farisea taudia idia mai bona Iesu ida idia hepapahuahu matamaia, bona ia tohoa totona, ia idia hamaoroa guba amo toa ta ia hahedinaraia.
12 Unai dainai Iesu ena lalona ia hisihisi bada bona ia gwau: “Dahaka dainai inai uru idia ura toa ta idia itaia? Lau hereva momokani, inai uru dekenai toa ta do lau hahedinaraia lasi.”
13 Vadaeni idia ia rakatania, bouti ia guia lou bena gohu ena kahana dekenai ia lao.
14 To hahediba taudia be idia laloaboio paraoa idia abia totona, bona bouti lalonai aniani ta be lasi, to paraoa tamona sibona.
15 Bona idia ia hamaoroa goevagoeva, ia gwau: “Emui matana umui kehoa noho, bona Heroda bona Farisea taudia edia hatubua muramura dainai do umui naria namonamo.”
16 Unai dainai sibodia idia hepapahuahu matamaia, badina paraoa idia mailaia lasi.
17 Unai ia itaia neganai, idia dekenai ia gwau: “Paraoa umui abia lasi dainai umui hepapahuahu noho, a? Lauegu hereva ena anina umui abia lasi, a? Emui lalona* be idia do koua bona umui do laloparara lasi, a?
18 ‘Ena be umui be mai emui matana, to umui itaia lasi, bona ena be umui be mai emui taiana, to umui kamonai lasi, ani?’ Bona umui laloatao lasi, a?
19 Tatau 5,000 totona paraoa 5 lau makohia neganai, paraoa oredia be bosea hida lalonai umui hahonua?” Ia dekenai idia gwau: “Bosea 12.”
20 “Tatau 4,000 totona paraoa 7 lau makohia neganai, paraoa oredia be bosea badadia hida lalonai umui hahonua?” Bona ia dekenai idia gwau: “Bosea 7.”
21 Vadaeni idia dekenai ia gwau: “Lauegu hereva ena anina umui do lalopararalaia lasi, a?”
22 Vadaeni Betesaida dekenai idia ginidae. Unuseniai taunimanima ese Iesu dekenai matakepulu tauna ta idia mailaia bona ia idia noia unai tauna dekenai ena imana ia atoa totona.
23 Bona Iesu ese matakepulu tauna be ena imana amo ia hakaua lao hanua ena murimuri dekenai, bona ena matana dekenai ia kanudi murinai, ia latanai ena imana ia atoa bona ia nanadaia: “Gau ta oi itaia, a?”
24 Unai tauna ese ena kwarana ia abia isi bona ia gwau: “Taunimanima lau itaia, toana be au bamona, to idia raka loaloa noho.”
25 Bena Iesu ese ena imana be unai tauna ena matana dekenai ia atoa lou, bona ia namo bena gau ibounai ia itaia goevagoeva diba.
26 Vadaeni Iesu ese ia siaia lao, ia gwau: “Hanua lalonai oi vareai lasi.”
27 Iesu bona ena hahediba taudia be Kaisarea Filipi hanua dekenai idia lao, bona dala ai Iesu ese idia ia nanadaia matamaia, ia gwau: “Taunimanima idia gwau lau be daika?”
28 Ia dekenai idia gwau: “Ioane Bapatiso, ma haida idia gwau Elia bona ma haida idia gwau peroveta tauna ta.”
29 Bona idia ia nanadaia: “To umui, umui gwau lau be daika?” Petero ia haere, ia dekenai ia gwau: “Oi be Keriso.”
30 Vadaeni idia ia oda henia tau ta dekenai ia do idia gwauraia hedinarai lasi.
31 Danu, idia ia hadibaia matamaia, taunimanima ena Natuna be hisihisi momo do ia abia, bona tau badadia, dubu biagudia, bona taravatu hadibaia taudia ese do idia dadaraia bena do idia hamasea, bona dina toi murinai do ia toreisi lou.
32 Oibe, mai gari lasi ida unai hereva ia gwauraia. To Petero ese ia hakaua siri bona ia gwau henia matamaia.
33 Iesu ia giroa, ena hahediba taudia ia itaia bona Petero ia gwau henia, ia gwau: “Satani e, egu murinai oi lao! Badina emu lalohadai be Dirava ena lalohadai lasi, to taunimanima edia.”
34 Vadaeni hutuma bona ena hahediba taudia ia boiria bona idia dekenai ia gwau: “Bema ta ia ura egu murinai ia raka, ia sibona ena ura ia dadaraia be namo, bona ena hisihisi auna* do ia huaia bona egu murinai do ia raka noho.
35 Badina ena mauri* ia ura dogoatao tauna ese ena mauri do ia haboioa, to lau bona sivarai namona dainai ena mauri ia haboioa tauna ese mauri do ia davaria.
36 Momokani, bema tau ta ese tanobada ibounai ia abia, to ena mauri ia haboioa, ena namo be dahaka?
37 Eiava tau ta ese dahaka do ia henia ena mauri ia abia lou totona?
38 Inai Dirava badinaia lasi* bona kara dika uruna lalonai, bema tau ta be lau bona egu hereva dekenai ia hemarai, taunimanima ena Natuna be aneru helagadia ida ena Tamana ena hairai lalonai ia mai neganai, ia danu be unai tauna dekenai do ia hemarai.”
