Mareko 14:1-72
14 Pasova bona Hatubua Lasi Paraoa Ariana be dina rua murinai do idia karaia. Vadaeni dubu biagudia bona taravatu hadibaia taudia be dala idia tahua, koikoi dalanai Iesu do idia dogoatao bona do idia hamasea,
2 badina idia hereva loulou, idia gwau: “Aria dekenai unai do ita karaia lasi, taunimanima ese heiriheiri idia havaraia garina.”
3 Iesu be Betania ai, guna lepera tauna Simona ena ruma lalonai aniani totona ia helai neganai, hahine ta be bonana namo dehorona, nadi kavabuna ta lalonai ia mailaia. Unai dehoro be nado* korikorina bona ia be dava bada gauna. Hahine ese kavabu ia kehoa bona Iesu ena kwarana dekenai ia bubua.
4 Unai kara dainai haida be idia moale lasi bona idia gwau: “Dahaka dainai inai bonana namo dehorona ia bubua kava?
5 Badina inai bonana namo dehorona be denario* 300 mai kahana dekenai ia hoihoilaia bona monina be ogogami taudia dekenai ia henia diba!” Bona ia dekenai idia badu dikadika.
6 To Iesu ia gwau: “Ia umui rakatania. Dahaka dainai ena lalona umui hahisia noho? Ia ese lau dekenai kara namona ia karaia.
7 Ogogami taudia be hanaihanai umui danu idia noho, bona umui ura negadiai idia dekenai kara namo umui karaia diba, to lau be hanaihanai umui danu do lau noho lasi.
8 Ia karaia diba gauna ia karaia. Bonana namo dehorona amo egu tauanina ia dahua neganai, lau ia hegaegaelaia do idia guria totona.
9 Umui lau hamaoroa momokani, sivarai namona be tanobada ibounai dekenai idia harorolaia neganai, inai hahine ese ia karaia karana do idia herevalaia danu, ia idia laloatao totona.”
10 Bona aposetolo taudia 12 ta, ladana Iuda Iskariote, be dubu biagudia dekenai ia lao Iesu ena mase dalana ia karaia totona.
11 Dubu biagudia be unai idia kamonai neganai, idia moale bona ia idia gwauhamata henia ia dekenai siliva moni do idia henia. Unai dainai Iesu ena mase dalana karaia totona, dala namona ta ia tahua matamaia.
12 Hatubua lasi paraoa ena dina ginigunana ai, vaia Pasova animal idia bouboulaia. Iesu ena hahediba taudia be ia dekenai idia gwau: “Oi ura edeseniai do ai lao bona Pasova do ai hegaegaelaia oi ania totona?”
13 Vadaeni ena hahediba taudia rua ia siaia bona idia dekenai ia gwau: “Taoni dekenai umui lao, bona hodu mai ena ranu ia huaia tauna ta be umui do ia hedavari henia. Ia do umui badinaia,
14 bona ia vareai rumana ena biaguna do umui hamaoroa, ‘Hadibaia Tauna ia gwau: “Lau bona egu hahediba taudia be edena daiutu ai Pasova do ai ania?”’
15 Umui dekenai idia hegaegaelaia vadaeni atai daiutu badana ta do ia hahedinaraia, bona unuseniai iseda Pasova aniani do umui hegaegaelaia.”
16 Vadaeni hahediba taudia idia lao bona taoni lalonai idia vareai, bona Iesu ena hereva hegeregerena gau ibounai idia vara, bena Pasova idia hegaegaelaia.
17 Dina ia diho murinai, Iesu bona ena aposetolo taudia 12 idia mai.
18 Bona aniani patana dekenai idia helai bona idia aniani noho lalonai, Iesu ia gwau: “Umui lau hamaoroa momokani, umui ta, lau ida ia aniani tauna ese egu mase dalana do ia karaia.”
19 Idia lalohisihisi bona idia ta ta be ia dekenai idia gwau: “Lau lasi, ani?”
20 Vadaeni idia dekenai ia gwau: “Aposetolo taudia 12 ta, lau ida disi tamona dekenai ia aniani tauna ese lau do ia samania.
21 Momokani, taunimanima ena Natuna be do ia mase, Toretore Helagadia lalonai idia torea bamona, to taunimanima ena Natuna ena mase dalana ia karaia tauna, madi o! Do ia namo bema unai tauna ia vara lasi.”
22 Idia aniani noho lalonai, paraoa ia abia, ia guriguri, ia makohia bona idia dekenai ia henia, ia gwau: “Umui abia, inai be egu tauanina ia laulaulaia.”
23 Bena wain kapusi ta ia abia, Dirava ia tanikiu henia bona idia dekenai ia henia, bena idia ibounai idia inua.
24 Bona idia dekenai ia gwau: “Inai be egu rara, ia be ‘kontraka ena rara’ ia laulaulaia, taunimanima totona do ia bubua.
25 Umui lau hamaoroa momokani, wain do lau inua lasi ela bona Dirava ena Basileia lalonai wain matamata do lau inua.”
26 Vadaeni, Dirava hanamoa anedia idia abia murinai, Olive Ororona dekenai idia lao.
27 Bona Iesu be idia dekenai ia gwau: “Umui ese lau do umui rakatania, badina Toretore Helagadia ia gwau: ‘Lau ese mamoe naria tauna do lau alaia mase, bona mamoe be gabu idauidau dekenai do idia heau lao.’
28 To lau toreisi lou murinai, Galilea dekenai do lau lao guna.”
29 To Petero be ia dekenai ia gwau: “Ena be idia ibounai do idia moru, to lau be do lau moru lasi.”
30 Unai neganai Iesu be ia dekenai ia gwau: “Oi lau hamaoroa momokani, hari dina, oibe, inai hanuaboi ai, kokoroku be nega rua ia do tai lasi neganai, nega toi lau do oi gorea.”
31 To Petero ia hereva goada: “Ena be oi ida do lau mase, to oi do lau gorea lasi.” Hahediba taudia ibounai danu be unai bamona idia hereva.
32 Vadaeni gabu ta ladana Getesemane dekenai idia ginidae, bona Iesu be ena hahediba taudia dekenai ia gwau: “Iniseniai umui helai, do lau lao bona guriguri.”
33 Vadaeni Petero, Iamesi, bona Ioane ida ia lao. Bona ena lalona ia hisihisi bona ia lalometau bada.
34 Bena idia dekenai ia gwau: “Lauegu* lalona ia metau bada herea. Iniseniai umui noho bona do umui gima noho.”
35 Vadaeni ia lao sisina, ia goru diho, bona ia guriguri matamaia bema mai dalana, unai gauna be ia dekenai do ia vara lasi.
36 Bona ia gwau: “Abba, Tamagu e, gau ibounai oi karaia diba, mani inai kapusi be lau amo oi kokia. Lauegu ura hegeregerena lasi, to oiemu ura hegeregerena.”
37 Bena ia mai bona ia itaia idia mahuta noho, bona Petero dekenai ia gwau: “Simona e, oi mahuta noho, a? Nega sisina sibona oi gima noho diba lasi, a?
38 Namona be umui gima noho bona umui guriguri, unai amo hedibagani lalonai do umui vareai lasi. Momokani, lalona be ia ura, to tauanina ia manoka.”
39 Ma ia lao bona ia guriguri, guna ia gwauraia hereva ia gwauraia lou.
40 Bona ia giroa lou neganai, ia itaia idia mahuta noho, badina edia matana idia metau. Unai dainai idia diba lasi edena bamona ia do idia haere henia.
41 Vadaeni nega ihatoina ia mai, bona idia dekenai ia gwau: “Dahaka dainai inai mai anina bada negana ai umui mahuta bona umui laga-ani noho? Umui mahuta lasi! Nega ia ginidae vadaeni! Taunimanima ena Natuna be kara dika taudia edia imana dekenai do idia atoa.
42 Umui toreisi, ita lao. Lauegu mase dalana ia karaia tauna be ia mai kahirakahira vadaeni.”
43 Bona ia do hereva noho lalonai, maoromaoro ena aposetolo taudia 12 ta, Iuda ia ginidae, hutuma be ia danu idia mai bona idia be mai edia tuari kaia bona au. Idia be dubu biagudia, taravatu hadibaia taudia bona tau badadia ese idia siaidia.
44 Vadaeni Iesu ena mase dalana ia karaia tauna be idia dekenai toa ta ia henia, ia gwau: “Lau kisi henia tauna, tauna be unai, ia do umui dogoatao bona gima taudia ese do idia hakaua lao.”
45 Bena maoromaoro Iesu dekenai ia lao, ia gwau, “Rabi* e,” bona ia kisi henia.
46 Vadaeni ia idia dogoatao.
47 To unuseniai ia gini tauna ta ese ena tuari kaia ia abia bona hahelaga tauna badana ena igui hesiai tauna ena taiana ia utua oho.
48 Unai dainai Iesu be idia dekenai ia gwau: “Umui be mai emui tuari kaia bona au ida umui mai, henaohenao tauna ta bamona lau umui dogoatao totona, a?
49 Dina ta ta ibounai lau be dubu helaga dekenai lau hadibaia bona umui ida lau noho, to lau umui dogoatao lasi. To inai ia vara, unai amo Toretore Helagadia edia hereva ia guguru diba.”
50 Bena hahediba taudia ibounai ese ia idia rakatania bona idia heau.
51 To matamata tauna ta be dabua namo hereana ta ia hahedokilaia bona Iesu ia badinaia, bona ia idia dogoatao toho.
52 To ena dabua ia rakatania bona kopina kavakava* ia heau boio.
53 Vadaeni hahelaga tauna badana dekenai Iesu idia hakaua lao, unuseniai dubu biagudia, tau badadia, bona taravatu hadibaia taudia ibounai idia hebou.
54 To Petero be daudau amo Iesu ia badinaia ela bona hahelaga tauna badana ena ariara dekenai ia vareai. Bona hesiai taudia ida lahi badinai ia helai, sibona ia hasiahua totona.
55 Unai nega ai, dubu biagudia bona Sanhedrin* taudia ibounai be Iesu do idia samania koikoi herevadia idia tahua, ia idia hamasea totona, to ta idia davaria lasi.
56 Vadaeni Iesu samania koikoi taudia momo idia mai, to edia hereva be idauidau.
57 Danu, ma haida idia toreisi bona koikoi herevadia idia gwauraia, idia gwau:
58 “Ai kamonai, ia gwau, ‘Inai dubu helaga, imana amo idia karaia gauna, be do lau hadikaia bona dina toi lalonai imana amo idia karaia lasi gauna do lau haginia.’”
59 To unai samani hereva dekenai danu edia hereva be idauidau.
60 Vadaeni, hahelaga tauna badana be edia huanai ia gini tore bona Iesu ia nanadaia, ia gwau: “Do oi haere lasi, a? Inai taudia ese oi dekenai idia gwauraia herevadia dainai dahaka do oi gwau?”
61 To Iesu be ia hereva lasi bona haere ta danu ia gwauraia lasi. Bona hahelaga tauna badana ese ia nanadaia lou, ia gwau: “Oi be Keriso, Helaga Tauna ena Natuna, a?”
62 Bena Iesu ia gwau: “Oibe, bona umui ese taunimanima ena Natuna do umui itaia, Siahu Bada Tauna ena idibana kahanai do ia helai bona guba ena ori latanai do ia mai.”
63 Vadaeni hahelaga tauna badana ese ena dabua ia darea bona ia gwau: “Dahaka dainai hereva hamomokania taudia ma haida ita tahua?
64 Umui kamonai vadaeni ia ese Dirava ena ladana ia hadikaia. Emui lalohadai be dahaka?” Bona idia ibounai idia gwau Iesu ia mase be maoro.
65 Bona haida be ia idia kanudia, ena vairana idia koua, idia paisia, bona ia dekenai idia gwau: “Bema oi be peroveta tauna, vadaeni ai oi hamaoroa daika ese oi ia paisia!” Bona kota ena ofesa taudia ese ena vairana idia pataia murinai, ia idia abia lao.
66 Vadaeni Petero be ariara dekenai ia noho lalonai, hahelaga tauna badana ena hesiai kekenina ta ia mai.
67 Ia itaia Petero be lahi badinai ia gini, vadaeni ia raraia bona ia gwau: “Oi danu be inai Nasareta tauna Iesu oi bamoa.”
68 To Petero ese unai hereva ia gorea, ia gwau: “Ia lau diba lasi bona oi herevalaia gauna lau lalopararalaia lasi,” bena ariara ena iduara kahirakahira dekenai ia lao.
69 Unuseniai hesiai kekenina ese Petero ia itaia, bona unuseniai idia gini taudia dekenai ia hereva lou, ia gwau: “Ia be idia ta.”
70 Petero ese unai hereva ia gorea lou. Bona nega sisina murinai Petero badinai idia gini taudia be ia dekenai ma idia gwau: “Momokani oi danu be idia ta, badina oi be Galilea tauna.”
71 To ia gwauhamata, bema hereva momokani ia gwauraia lasi, dika do ia davaria, ia gwau: “Umui herevalaia tauna lau diba lasi!”
72 Bena maoromaoro kokoroku be nega iharuana ia tai. Petero ese Iesu ena hereva ia laloatao, ia gwau: “Kokoroku be nega rua ia do tai lasi neganai, oi ese nega toi lau do oi gorea.” Bena Petero ena lalona ia hisihisi bada bona ia tai dikadika.
