Mareko 4:1-41
4 Bona Iesu be gohu badinai ia hadibaia matamaia lou, bona hutuma bada herea be ia dekenai idia lao. Unai dainai bouti ta dekenai ia guia, ia helai bona daudau sisina ia lao. To hutuma be gohu badinai idia gini.
2 Bena ia ese parabole amo gau momo ia hadibadia matamaia lalonai, ia gwau:
3 “Kamonai. Hadohado tauna be hadohado totona ia lao.
4 Bona ia hadohado noho lalonai, uhe haida be dala badinai idia moru bona manu idia mai bona idia ania ore.
5 Bona uhe ma haida be nadi gabunai idia moru bona idia tubu haraga, badina tano be sisina sibona.
6 To dina ia daekau neganai, idia kakoro bona edia ramuna be lasi dainai idia mase.
7 Bona uhe ma haida be ginigini huanai idia moru, bena ginigini idia tubu, bona tubutubu gaudia idia koua bena huahua idia atoa lasi.
8 To ma haida be tano namona dekenai idia moru, idia tubu bona idia momo idia lao bona huahua idia atoa matamaia, haida 30, haida 60 bona haida 100.”
9 Vadaeni ma ia gwau: “Mai ena taiana tauna ia kamonai be namo.”
10 Iesu be sibona ia noho neganai, ia badinai idia noho taudia bona aposetolo taudia 12 be parabole dainai ia idia henanadai henia.
11 Vadaeni idia dekenai ia gwau: “Dirava ese umui ia durua iena Basileia ena hunia hereva helagana umui lalopararalaia totona, to ma haida be parabole idia kamonai sibona.
12 Unai dainai ena be idia itaia to gau ta idia itaia lasi, bona idia kamonai to anina idia lalopararalaia lasi, bona idia helalo-kerehai lasi dainai, Dirava ese edia kara dika ia gwauatao diba lasi.”
13 Idia dekenai ma ia gwau: “Unai parabole umui lalopararalaia lasi dainai, edena bamona parabole ma haida umui lalopararalaia diba?
14 “Hadohado tauna be Basileia ena hereva ia hadoa.
15 Dala badinai idia hadoa uhe be hegeregere haida edia kudouna ai Basileia ena uhe idia hadoa. To maoromaoro unai hereva idia kamonai neganai, Satani ia mai bona edia kudouna amo unai hereva ia kokia.
16 Unai hegeregerena, nadi gabunai idia hadoa gaudia be, haida ese maoromaoro Basileia ena hereva idia kamonai, bona mai moale ida idia abia dae.
17 To idia be ramuna lasi dainai idia noho daudau lasi. Bena Basileia ena hereva dainai hisihisi bona dagedage idia davaria neganai, idia moru.
18 Danu, taunimanima ma haida be ginigini huanai idia hadoa uhe hegeregerena. Idia be Basileia ena hereva idia kamonai,
19 to inai nega oromana ena lalohekwarahi gaudia, taga ena koikoi siahuna bona gau ma haida ura henia bada karana ese ia koidia, bona Basileia ena hereva ia koua bena huahua ia atoa lasi.
20 Dokonai, tano namona ai idia moru uhe be hegeregere haida ese Basileia ena hereva idia kamonai bona mai moale ida idia abia dae bona huahua idia atoa, haida 30, haida 60 bona haida 100.”
21 Bena idia dekenai ia gwau: “Lamepa be bosea ta eiava bedi ta henunai idia atoa lasi, ani? To lamepa be ena atoa gauna dekenai idia atoa, ani?
22 Badina idia hunia gaudia ibounai be do idia hedinarai, bona idia koua namonamo gaudia ibounai be do idia hedinarai.
23 Mai ena taiana tauna be do ia kamonai be namo.”
24 Idia dekenai ma ia gwau: “Hari umui kamonai herevadia do umui laloa namonamo. Ma haida dekenai umui sikelea hegeregerena, umui dekenai unai bamona do idia sikelea danu. Oibe, unai sikele do idia habadaia.
25 Badina mai ena gau tauna dekenai gau momo do idia henia, to gau lasi tauna dekenai ia noho gauna be ia amo do idia kokia danu.”
26 Ma ia gwau: “Unai dainai Dirava ena Basileia be hegeregere tau ta ese tano dekenai uhe ia negea,
27 hanuaboi ai ia mahuta, bona daba ai ia toreisi neganai, uhe ena raurau matamata ia hedinarai bona ia tubu daekau, to edena bamona ia tubu be ia diba lasi.
28 Tano sibona ese unai uhe ia hatubua metairametaira, guna rau ia atoa, gabeai witi kwarana ia hedinarai bena huahua ia mage.
29 To maoromaoro huahua ia mage neganai, kaia amo ia utua, badina aniani haboua negana be ia ginidae.”
30 Bona ia gwau: “Dirava ena Basileia be dahaka ida ita hahegeregerea, eiava edena parabole amo ita gwauraia hedinarai diba?
31 Ia be mastadi* uhena ta bamona, tano dekenai idia hadoa neganai, ia be tanobada dekenai idia noho uhe ibounai huanai ia be maragi herea,
32 to idia hadoa murinai, ia tubu daekau bona uma aniani ibounai ia hereaia bona ena rigi be idia bada, unai amo guba manudia be ena ikerukeruna ai noho gabuna idia davaria diba.”
33 Unai bamona parabole momo amo Basileia ena hereva ia gwauraia, idia lalopararalaia diba hegeregerena.
34 Momokani, parabole sibona amo idia ia hereva henia, to ena hahediba taudia sibona ida ia noho neganai, unai ibounai ena anina ia gwauraia.
35 Bona unai dina ai, dina ia diho neganai, idia dekenai ia gwau: “Gohu ena kahana dekenai ita lao.”
36 Vadaeni, hahediba taudia ese hutuma idia siaia lao murinai, ia ida bouti ta amo idia lao bona unuseniai bouti ma haida danu idia noho.
37 Lai bada herea ia toa, hurehure ese bouti ia botaia bona ranu be bouti lalonai ia vareai dainai, kahirakahira ia mutu.
38 To Iesu be bouti ena murina kahana ai, pilo latanai ia mahuta noho. Vadaeni ia idia hanogaia bona idia gwau: “Hadibaia Tauna e, ita be kahirakahira do ita mase, unai oi laloa lasi, a?”
39 Vadaeni ia toreisi bena lai ia gwau henia bona gohu dekenai ia gwau: “Hadokoa! Regerege lasi!” Bena lai ia doko, bona gohu ia namo lou.
40 Vadaeni idia dekenai ia gwau: “Dahaka dainai umui gari dikadika? Umui do abidadama lasi, a?”
41 To idia gari bada, bona ta ta dekenai idia gwau: “Inai tauna be daika? Badina lai bona gohu danu ese ia idia kamonai henia.”
