Mareko 12:1-44
12 Bena Iesu ese parabole amo idia ia hereva henia matamaia, ia gwau: “Tau ta ese vain umana ta ia karaia bona magu ia atoa. Bena vain huahua moia gabuna bona kohoro ta ia karaia. Vadaeni biru taudia dekenai ia henia idia naria totona, bena gabu daudauna ta dekenai ia lao.
2 Huahua haboua negana ai, ia ese igui hesiai tauna ta be biru taudia dekenai ia siaia, idia amo vain umana ena huahua haida ia gogoa totona.
3 To biru taudia ese ia idia abia, idia dadabaia bona imana kavakava idia siaia lao.
4 Bena igui hesiai tauna ma ta be idia dekenai ia siaia, bona biru taudia ese ena kwarana idia botaia bona idia hahemaraia.
5 Igui hesiai tauna ma ta ia siaia, bona biru taudia ese idia alaia mase. Bena ma momo ia siaia, haida idia dadabaia bona ma haida idia alaia mase.
6 To tamona ia noho, unai be ena lalokau natuna. Dokonai, idia dekenai unai natuna ia siaia, ia gwau, ‘Idia ese egu natuna do idia matauraia.’
7 To biru taudia be sibodia huanai idia herevahereva idia gwau, ‘Inai be vain umana do ia abia tauna. Mai, ia ita hamasea bona ena uma ita abia.’
8 Vadaeni ia idia abia, idia hamasea bena vain umana murimuriai idia negea.
9 Vain umana ena biaguna be dahaka do ia karaia? Do ia mai bona biru taudia do ia hamasea, bona vain umana be ma haida dekenai do ia henia.
10 Toretore Helagadia dekenai inai hereva umui duahia lasi, a? ‘Ruma haginia taudia ese idia dadaraia nadina be kona nadi badana ai ia lao.
11 Unai be Iehova ena amo ia vara, bona iseda matana ai ia be hoa gauna.’”
12 Bena Farisea taudia idia laloparara Iesu be unai parabole amo idia ia herevalaia neganai, dala idia tahua matamaia ia idia dogoatao totona, to hutuma dekenai idia gari. Vadaeni ia idia rakatania bona idia lao.
13 Gabeai Iesu dekenai Farisea taudia bona Heroda ena orea taudia haida idia siaia, ena hereva dekenai ia do idia tarapua totona.
14 Idia ginidae neganai, ia dekenai idia gwau: “Hadibaia Tauna e, ai diba oi be hereva momokani oi gwauraia bona ma ta ena lalonamo oi tahua lasi, badina taunimanima edia dagi oi laloa lasi, to hereva momokani hegeregerena Dirava ena dala oi hadibaia. Kaisara* dekenai takisi moni henia karana be maoro eiava lasi?
15 Do ai henia eiava lasi?” Iesu be edia kara koikoi ia diba dainai, idia dekenai ia gwau: “Dahaka dainai lau umui tohoa? Lau dekenai denario* ta umui hahedinaraia.”
16 Vadaeni ia dekenai denario ta idia mailaia. Bona idia dekenai ia gwau: “Inai be daika ena laulau bona ladana?” Ia dekenai idia gwau: “Kaisara ena.”
17 Bena Iesu ia gwau: “Kaisara ena gaudia be Kaisara dekenai umui henia, to Dirava ena gaudia be Dirava dekenai umui henia.” Bena iena hereva dekenai idia hoa bada.
18 Sadukea* taudia be ia dekenai idia mai, idia be toreisi lou idia abia dae lasi, bona ia idia nanadaia:
19 “Hadibaia Tauna e, Mose ese ita dekenai ia torea herevana be inai, bema tau ta ena tadikaka ia mase bona ena hahine be ia do mauri noho to idia be natuna lasi, namona be ena tadikaka ese unai hahine ia adavaia bona ena tadikaka totona natuna do ia havaraia.
20 Ruma bese ta lalonai tadikaka ibounai be 7, ginigunana ia headava, to ia be natuna lasi bena ia mase.
21 Vadaeni iharuana ese unai hahine ia adavaia, to ia danu be natuna lasi bena ia mase, bona tadikaka ihatoina dekenai unai bamona ia vara danu.
22 Vadaeni tadikaka ibounai 7 be natudia idia havaraia lasi, bena idia mase. Dokonai unai hahine danu ia mase.
23 Toreisi lou ai unai tadikaka 7 amo ia be daika ena adavana? Badina idia ibounai 7 ese ia idia adavaia.”
24 Iesu be idia dekenai ia gwau: “Umui kerere, badina Toretore Helagadia eiava Dirava ena siahu umui diba lasi.
25 Mase amo idia toreisi lou neganai, tatau eiava hahine be do idia headava lasi, to idia be guba dekenai idia noho anerudia bamona.
26 Mase amo toreisi lou karana dekenai, Mose ena buka lalonai, au ginigini ena sivarai umui duahia lasi, a? Dirava be Mose dekenai ia gwau: ‘Lau be Aberahamo ena Dirava, Isako ena Dirava, bona Iakobo ena Dirava.’
27 Ia be mase taudia edia Dirava lasi, to mauri taudia edia Dirava. Umui be umui kerere momokani.”
28 Vadaeni taravatu hadibaia tauna ta ia mai bona edia hepapahuahu ia kamonai. Ia diba Iesu ese dala namona ai idia ia haere henia, vadaeni Iesu ia nanadaia: “Taravatu ibounai amo edena taravatu be mai anina bada?”
29 Iesu ia gwau: “Ginigunana be inai, ‘Israela e, umui kamonai, Iehova iseda Dirava be Iehova tamona,
30 bona Iehova emu Dirava do oi lalokau henia mai emu kudouna ibounai, mai emu mauri* ibounai, mai emu darana ibounai, bona mai emu goada ibounai ida.’
31 Iharuana be inai, ‘Namona be emu dekena tauna oi lalokau henia, oi sibona oi lalokau henia hegeregerena.’ Taravatu ma ta ese unai taravatu rua ia hereaia lasi.”
32 Taravatu hadibaia tauna be Iesu dekenai ia gwau: “Hadibaia Tauna e, oi hereva momokani, ‘Dirava be tamona, bona ma ta be Ia bamona lasi.’
33 Tau ta ese Dirava do ia lalokau henia mai ena kudouna ibounai, mai ena laloparara ibounai, mai ena goada ibounai, bona ena dekena tauna do ia lalokau henia ia sibona ia lalokau henia hegeregerena. Unai ese boubou karadia ibounai* ia hereaia momokani.”
34 Vadaeni Iesu ia diba unai tauna be mai aonega ida ia haere dainai, ia dekenai ia gwau: “Oi be Dirava ena Basileia amo oi daudau lasi.” Bona idia ibounai idia gari ia idia nanadaia lou totona.
35 Iesu be dubu helaga ai ia hadibaia noho lalonai, ia gwau: “Dahaka dainai taravatu hadibaia taudia idia gwau Keriso be Davida ena natuna?
36 Lauma helaga amo Davida sibona ia gwau, ‘Iehova be egu Lohiabada dekenai ia gwau: “Lauegu idibana kahanai oi helai ela bona emu inai taudia be emu aena henunai do lau atoa. “’
37 Davida ese ia gwauraia Lohiabada, to edena bamona ia be Davida ena natuna?”
Bona hutuma bada be mai moale ida ena hereva idia kamonai.
38 Vadaeni ia hadibaia noho lalonai, ia gwau: “Taravatu hadibaia taudia dainai do umui naria namonamo, idia ura dabua latadia idia hahedokilaia bona taunimanima momo gabudiai* idia loaloa, taunimanima ese idia hanamoa totona.
39 Bona sinagoga lalonai, vaira kahanai idia helai bona aria negadiai gabu namodia dekenai idia helai.
40 Idia ese vabu edia kohu idia abia kava bona taunimanima ese idia itaia totona guriguri latadia idia gwauraia. Idia be hahemaoro metauna do idia abia.”
41 Iesu be moni mauana ia itaia diba gabunai ia helai, bona ia itaia hutuma ese moni be moni mauana lalonai idia udaia bona taga taudia be koini momo idia udaia.
42 Vadaeni ogogami vabuna ta ia mai bona koini* maragidia rua ia udaia.
43 Bena Iesu ese ena hahediba taudia ia boiridia bona idia dekenai ia gwau: “Umui lau hamaoroa momokani, inai ogogami vabuna ese ia udaia monina be ibounai ese maua lalonai idia udaia monina ia hereaia.
44 Badina idia ibounai be edia moni bada amo sisina sibona idia udaia, to unai vabu, ena be ia ogogami, ia ese ena mauri durua moni ibounai ia udaia.”
