Mareko 7:1-37
7 Vadaeni Ierusalema amo idia mai Farisea taudia bona taravatu hadibaia taudia haida be Iesu dekenai idia lao.
2 Bona idia itaia Iesu ena hahediba taudia haida edia imana be miro,* anina be edia imana idia huria lasi bena idia aniani.
3 (Badina Farisea bona Iuda taudia ibounai be idia do aniani lasi neganai, edia imana idia huria ela bona edia diuna, idia ese sene taudia edia kara idia badinaia.
4 Bona maketi amo idia giroa lou bona idia do aniani lasi neganai, ranu sisina amo sibodia idia hagoevaia, bona sene karadia ma haida idia badinaia, hegeregere kapusi, hodu, bona kopa disi be ranu lalonai idia hadihoa.*)
5 Vadaeni Farisea bona taravatu hadibaia taudia ese Iesu idia nanadaia: “Dahaka dainai emu hahediba taudia ese sene taudia edia kara idia badinaia lasi, to imana mirona ida edia aniani idia ania?”
6 Idia dekenai ia gwau: “Isaia ese umui koikoi taudia ia perovetalaia, ia gwau: ‘Inai taudia be edia udu bibina amo lau idia hanamoa, to edia kudouna be lau amo ia daudau masemase.
7 Lau idia tomadiho henia kava noho, badina edia hahediba herevadia be taunimanima edia taravatu sibona.’
8 Dirava ena taravatu umui dadaraia bona taunimanima edia sene karadia umui badinaia.”
9 Iesu be idia dekenai ma ia gwau: “Umui ese aonega dalanai Dirava ena taravatu umui dadaraia, emui sene karadia umui badinaia totona.
10 Hegeregere, Mose ia gwau, ‘Emu tamana bona emu sinana oi matauraia,’ bona ‘Ena tamana eiava sinana ia hereva dika henia tauna idia hamasea be namo.’
11 To umui gwau, ‘Bema tau ta be ena tamana eiava sinana dekenai ia gwau: “Lauegu kohu amo oi lau durua diba lasi, badina ia be kobana. (Anina be Dirava dekenai idia gwauhamatalaia vadaeni harihari gauna.)”’
12 Unai dala amo unai tauna umui koua ena tamana eiava sinana ia durua totona.
13 Umui henia hanai sene karadia dainai Dirava ena hereva be anina lasi gauna ai umui halaoa. Bona unai bamona karadia momo danu umui karaia.”
14 Unai dainai hutuma ia boiria lou bona idia dekenai ia gwau: “Umui ibounai e, lau umui kamonai henia, bona egu hereva ena anina umui lalopararalaia.
15 Murimuri amo idia mai bona tau ta lalonai idia vareai gaudia ese ia idia hamiroa diba lasi, to tau ta ena lalona amo idia raka-lasi gaudia ese ia idia hamiroa.”
16 *—
17 Vadaeni Iesu be hutuma amo ia raka oho bona ruma ta lalonai ia vareai neganai, iena hahediba taudia be unai parabole dainai ia idia nanadaia matamaia.
18 Bena idia dekenai ia gwau: “Umui danu be idia bamona umui laloparara lasi, a? Murimuri amo idia mai bona tau ta lalonai idia vareai gaudia ese ia idia hamiroa diba lasi. Unai umui diba lasi, a?
19 Badina unai gaudia be ena kudouna lalonai idia vareai lasi, to bogana dekenai idia lao bena toileti dekenai idia diho, ani?” Unai hereva amo Iesu ia hahedinaraia aniani ibounai be idia goeva.
20 Ma ia gwau: “Tau ta ena lalona amo idia raka-lasi gaudia ese ia idia hamiroa,
21 badina lalona amo, oibe, taunimanima edia kudouna amo idia mai gaudia be inai, lalohadai dikadia, matabodaga karadia,* henaohenao, ala-ala,
22 heudahanai, mataganigani, kara dikadia, koikoi karadia, gwau-edeede hemarai karadia,* mama, Dirava ena ladana hadikaia karana, hekokoroku, bona laloa maoromaoro lasi karana.
23 Unai gau dikadia ibounai be tau ta ena lalona amo idia mai bona ia idia hamiroa.”
24 Iesu ia toreisi bona Turo bona Sidono kahanai ia lao. Bona ruma ta lalonai ia vareai bona ia ura lasi ta ia diba ia be unuseniai, to taunimanima ese ia idia itaia.
25 Vadaeni hahine ta, ena natuna kekeni be lauma dikana ese ia biagua, be maoromaoro Iesu ena sivarai ia kamonai neganai, ia lao bona ena aena badinai ia goru diho.
26 Ia be Grik hahinena, Suria ena gabu ta ladana Poinikia amo, bona ia ese Iesu ia noia loulou ena natuna kekeni amo demoni do ia lulua.
27 To Iesu be unai hahine dekenai ia gwau: “Natudia do idia bogakunu guna, badina edia paraoa umui abia bona sisia maragidia dekenai umui negea be maoro lasi.”
28 To hahine ia haere, ia gwau: “Oibe Lohiabada, to teibolo henunai idia noho sisia maragidia be natudia edia aniani momoru idia ania danu.”
29 Bena Iesu be hahine dekenai ia gwau: “Unai bamona oi hereva dainai, oi lao, demoni be emu natuna kekeni amo ia raka-lasi vadaeni.”
30 Bena unai hahine be ena ruma dekenai ia lao, bona ia itaia kekeni be ena mahuta patana dekenai ia hekure bona demoni ese ia rakatania vadaeni.
31 Iesu be Turo ia rakatania bona Sidono amo ia hanaia bena Dekapoli* ena kahana dekenai ia lao, bona Galilea Gohuna dekenai ia mai.
32 Vadaeni ia dekenai taia kudima bona hereva namonamo lasi tauna idia mailaia, bona ia idia noia ena imana be unai tauna latanai do ia atoa.
33 Bona Iesu ese hutuma amo unai tauna ia abia siri bona ena taiana lalonai ena ima kwakikwaki ia atoa, bena ia kanudi murinai, ena imana be unai tauna ena malana dekenai ia atoa.
34 Bena guba ia itaia, ia hahodi badabada bona unai tauna dekenai ia gwau: “Epata,” anina be “Kehoa.”
35 Vadaeni ena taiana idia kehoa bona ena malana ia namo, bena ia hereva namonamo matamaia.
36 Iesu ese idia ia oda henia tau ta do idia hadibaia lasi, herevana idia ia hadibaia loulou, to unai gaudia idia do herevalaia noho.
37 Oibe, idia hoa bada herea bona idia gwau: “Ia ese gau ibounai ia karaia namonamo. Ia dainai taia kudima taudia idia kamonai bona hereva lasi taudia idia hereva.”
