Mareko 3:1-35
3 Iesu be sinagoga lalonai ia vareai lou, bona imana dika tauna ta be unuseniai ia noho.
2 Unai dainai Farisea taudia be Iesu idia itaia noho, bema ia be Sabati dinana ai unai tauna do ia hanamoa eiava lasi, unai amo ia do idia samania.
3 Vadaeni Iesu be imana dika tauna dekenai ia gwau: “Oi toreisi bona huana dekenai oi mai.”
4 Bona idia dekenai ia gwau: “Sabati dinana ai edena be maoro, kara namo eiava kara dika ita karaia, tau* ta ita hamauria eiava ita hamasea?” To idia hereva lasi.
5 Bona mai badu danu idia ia itaia, edia kudouna ia auka dainai ena lalona ia hisihisi bada, bena imana dika tauna dekenai ia gwau: “Emu imana oi atoa maoromaoro.” Bena ia atoa maoromaoro neganai, ena imana ia namo.
6 Vadaeni Farisea taudia idia lao bona maoromaoro Heroda ena orea taudia ida idia hebou, Iesu hamasea dalana idia karaia totona.
7 To Iesu be ena hahediba taudia ida gohu dekenai idia lao bona Galilea bona Iudea amo taunimanima momo herea be ia idia badinaia.
8 Danu Ierusalema, Idumea, Ioridane ena ist kahana, Turo, bona Sidono amo taunimanima momo herea be Iesu dekenai idia mai, badina idia kamonai ia be hoa karadia momo ia karaia.
9 Vadaeni ena hahediba taudia ia hamaoroa bouti maragina do idia abia hegaegae, unai amo hutuma ese ia do idia hagegea lasi.
10 Taunimanima momo edia gorere ia hanamoa dainai, gorere bada taudia be ia idia hagegea, ia idia dogoatao totona.
11 Lauma* dikadia danu be Iesu idia itaia neganai, ia vairanai idia goru diho bona idia boiboi, idia gwau: “Oi be Dirava ena Natuna.”
12 To nega momo idia ia oda henia ia do idia gwauraia hedinarai lasi totona.
13 Vadaeni Iesu be ororo ta dekenai ia daekau, ia abia hidi taudia ia boiria bona ia dekenai idia lao.
14 Bona tatau 12 ia abia hidi bona unai orea ena ladana ia hatoa aposetolo taudia, unai amo ia do idia bamoa bona do ia siaia idia haroro totona,
15 bona siahu ia henidia demoni do idia lulua.
16 Bona ia abia hidi taudia 12 be inai: Simona, ia dekenai ia henia ladana ma ta be Petero,
17 Sebedeo ena natudia Iamesi bona ena tadikaka Ioane (idia dekenai ladana ma ta ia henia, unai be Boanere, anina be “Guba Boiboi Natudia”),
18 bona Andrea, Filipo, Batolomeo, Mataio, Toma, Alepeo ena natuna Iamesi, Tadeo, Kananaia* tauna Simona,
19 bona Iuda Iskariote, gabeai Iesu ena mase dalana ia karaia tauna.
Bena Iesu be ruma ta dekenai ia vareai.
20 Taunimanima be idia haboua lou dainai, Iesu bona ena hahediba taudia idia aniani diba lasi.
21 Iena varavara be unai idia kamonai neganai, idia lao ia idia dogoatao totona, idia gwau: “Ia be ia kavakava vadaeni.”
22 Danu, Ierusalema amo idia mai taravatu hadibaia taudia be idia gwau: “Ia be Belesebulo* ese ia biagua bona demoni edia lohia ena siahu amo demoni ia luludia.”
23 Unai dainai, idia ia boiria murinai, parabole amo idia ia hadibadia, ia gwau: “Edena dala ai Satani ese Satani ia lulua diba?
24 Bema basileia ta ia parara, do ia gini diba lasi.
25 Bona bema ruma bese ta ia parara, do idia noho hebou diba lasi.
26 Danu, bema Satani be sibona ia tuari henia bona iena kahana taudia idia parara, ia be do ia gini diba lasi, do ia ore.
27 Momokani, tau ta be goada tauna ena ruma lalonai ia vareai bona ena kohu ia henaoa diba lasi. To bema ia ese goada tauna ia kwatua guna, vadaeni unai negana sibona ai, ia ese goada tauna ena kohu do ia henaoa.
28 Umui lau hamaoroa momokani, taunimanima edia kara dika ibounai be do idia gwauatao, herevana dahaka kara dikadia idia karaia bona hadikaia herevadia idia gwauraia.
29 To lauma helaga ia gwauraia dika tauna be Dirava ese do ia gwauatao lasi momokani, to unai dika be do ia noho ela bona hanaihanai.”
30 Iesu be unai bamona ia hereva badina idia gwau: “Ia be mai ena lauma* dikana.”
31 Vadaeni ena sinana bona ena tadikaka idia mai, bona murimuri ai idia gini noho lalonai, ta idia siaia Iesu ia boiria totona.
32 Ia idia hagegea taudia be ia dekenai idia gwau: “Itaia! Emu sinana bona tadikaka be murimuriai, oi idia tahua noho.”
33 To idia dekenai ia haere, ia gwau: “Lauegu sinana bona tadikaka be daidia?”
34 Bena ia idia hagegea taudia ia itadia bona ia gwau: “Itaia, egu sinana bona egu tadikaka!
35 Dirava ena ura ia karaia tauna be egu tadikaka, egu taihuna bona egu sinana.”
