Mareko 2:1-28
2 To dina haida murinai, Iesu be Kaperanauma dekenai ia giroa lou bona haida idia gwau ia be ruma dekenai ia noho.
2 Vadaeni taunimanima momo idia haboua, idia be momo herea dainai iduara dekenai danu gabu be lasi, bena idia dekenai sivarai namona ia herevalaia matamaia.
3 Bona tatau hani ese ia paralais tauna ta be Iesu dekenai idia huaia mai.
4 To taunimanima be momo dainai, ia be Iesu dekenai idia mailaia diba lasi. Unai dainai Iesu ia noho gabuna ena atai guhina idia kokia bona matu idia karaia murinai, ia paralais tauna be ena mahuta patana amo idia hadihoa.
5 Iesu ese edia abidadama karana ia itaia neganai, ia paralais tauna dekenai ia gwau: “Natugu e, emu kara dika lau gwauatao vadaeni.”
6 Taravatu hadibaia taudia haida danu be unuseniai idia helai bona edia lalona* ai idia gwau:
7 “Dahaka dainai inai tau be unai bamona ia hereva noho? Ia be Dirava ena ladana ia hadikaia. Daika ese kara dika ia gwauatao diba, Dirava sibona, ani?”
8 To Iesu be maoromaoro edia lalohadai ia diba dainai, idia dekenai ia gwau: “Dahaka dainai emui lalona* ai inai bamona gaudia umui laloa noho?
9 Ia paralais tauna dekenai edena do oi gwauraia be haraga, ‘Emu kara dika lau gwauatao,’ eiava ‘Oi toreisi, emu mahuta patana oi abia bona oi raka’?
10 Lau ura umui diba, taunimanima ena Natuna be mai ena siahu tanobada ai kara dika ia gwauatao totona. . . . ” Bena ia paralais tauna dekenai ia gwau:
11 “Oi lau hamaoroa, oi toreisi, emu mahuta patana oi abia bona emu ruma dekenai oi lao.”
12 Vadaeni ia toreisi, maoromaoro ena mahuta patana ia abia bona idia ibounai vairanai ia raka lao. Unai dainai idia ibounai idia hoa bada herea, bona Dirava idia hanamoa, idia gwau: “Unai bamona kara ta be guna ai itaia lasi.”
13 Nega ma ta ai gohu dekenai ia lao, bona hutuma be ia dekenai idia mai noho, bena idia ia hadibaia matamaia.
14 To ia raka lao noho lalonai, Alepeo ena natuna Levi ia itaia, ia be takisi rumana dekenai ia helai, bona ia dekenai ia gwau: “Oi mai egu murinai oi raka.” Vadaeni ia toreisi bona Iesu murinai ia raka.
15 Gabeai Iesu be Levi ena ruma lalonai aniani totona ia helai neganai, takisi gogoa taudia bona kara dika taudia momo be Iesu bona ena hahediba taudia ida idia helai. Idia momo be unai nega amo Iesu murinai idia raka matamaia.
16 To Farisea taudia edia taravatu hadibaia taudia idia itaia Iesu be kara dika taudia bona takisi gogoa taudia ida ia aniani neganai, idia be ena hahediba taudia dekenai idia gwau: “Ia be takisi gogoa taudia bona kara dika taudia ida ia aniani, a?”
17 Iesu be unai ia kamonai neganai, idia dekenai ia gwau: “Idia gorere lasi taudia be doketa idia tahua lasi, to idia gorere taudia sibona ese idia tahua. Kara maoromaoro taudia boiria totona lau mai lasi, to kara dika taudia boiria totona lau mai.”
18 Vadaeni Ioane ena hahediba taudia bona Farisea taudia be idia anivaga. Unai dainai idia mai bona Iesu dekenai idia gwau: “Dahaka dainai Ioane ena hahediba taudia bona Farisea taudia edia hahediba taudia idia anivaga, to oiemu hahediba taudia be idia anivaga lasi?”
19 Unai dainai Iesu be idia dekenai ia gwau: “Headava matamata tauna be ena turadia ida ia noho neganai idia anivaga, a? Lasi. Headava matamata tauna be idia danu ia noho dainai, idia anivaga lasi.
20 To nega do ia ginidae, headava matamata tauna be ena turadia amo do idia abia siri, vadaeni unai neganai do idia anivaga.
21 Ta ese dabua gunana ia darea gabuna ai dabua matamata do ia turia lasi. Bema unai bamona ia karaia, dabua matamata be ia auka dainai, dabua gunana do ia veria bena do ia darea badabada.
22 Danu, ta ese wain matamata be wain puse* gunana dekenai ia bubua lasi. Bema unai bamona ia karaia, wain pusena be do ia pou bona wain be do ia hebubu, bona wain pusena be do ia dika. To taunimanima ese wain matamata be wain puse matamatadia lalonai idia bubua.”
23 Vadaeni Sabati dinana ai, Iesu bona ena hahediba taudia be witi uma huanai idia raka hanai neganai, ena hahediba taudia ese witi idia kokia matamaia.
24 Unai dainai Farisea taudia be Iesu dekenai idia gwau: “Itaia! Dahaka dainai emu hahediba taudia be Sabati dinana ai idia taravatua gauna idia karaia?”
25 To idia dekenai ia gwau: “Davida bona ena bamodia edia aniani ia ore bona idia hitolo neganai, Davida ia karaia karana umui duahia lasi, a?
26 Hahelaga tauna badana Abiatara ena sivarai lalonai, Davida be Dirava ena ruma lalonai ia vareai bona paraoa helagadia ia abia bona ia danu idia lao taudia ida idia ania hebou. Unai paraoa idia ania be maoro lasi, to hahelaga taudia sibona ese idia ania be maoro. Unai umui duahia lasi, a?”
27 Unai dainai idia dekenai ma ia gwau: “Dirava ese Sabati ia karaia taunimanima totona, to taunimanima ia karaia lasi Sabati totona.
28 Unai dainai taunimanima ena Natuna be Sabati ena Lohiabada danu.”
