Mareko 1:1-45
1 Iesu Keriso ena sivarai namona be iniseniai ia matamaia:
2 Peroveta tauna Isaia ese ia torea bamona, ia gwau: “Lau ese egu gwaukau tauna lau siaia inai, ia be do ia lao guna bona emu dala do ia hegaegaelaia.*
3 Kamonai! Tau ta be tano gagaena* ai ia boiboi: ‘Iehova ena dala umui hegaegaelaia! Iena dala umui hamaoromaoroa.’”
4 Ioane Bapatiso be tano gagaena dekenai ia lao, bona taunimanima ia haroro henidia do idia bapatiso, unai amo edia helalo-kerehai toana idia hahedinaraia, bena Dirava ese edia kara dika do ia gwauatao.
5 Vadaeni Iudea ena gabu ibounai bona Ierusalema ai idia noho taudia ibounai be ia dekenai idia lao, edia kara dika idia gwauraia hedinarai bona Ioridane Sinavaina ai idia ia bapatisoa.
6 Ioane be kamelo ena huina amo idia karaia dabua ia hahedokilaia, ena gabana ai beleta ia kwatua, bona kwadi bona uda ena hani ia ania.
7 Bona ia haroro ia gwau: “Lauegu murinai ia mai tauna ese egu siahu ia hereaia, lau hegeregere lasi lau igo diho bona ena tamaka varona lau kokia.
8 Lau ese ranu amo umui lau bapatisoa, to ia ese lauma helaga* amo umui do ia bapatisoa.”
9 Unai negai, Iesu be Galilea ena Nasareta amo ia mai bona Ioane ese Ioridane Sinavaina ai ia bapatisoa.
10 Bena maoromaoro ranu amo ia daekau neganai, ia itaia guba ia kehoa, bona lauma helaga be pune ta bamona ia latanai ia diho,
11 bona guba amo gado ta ia mai, ia gwau: “Oi be egu Natuna, egu lalokau, oi lau lalonamo henia.”
12 Bena maoromaoro lauma helaga ese ia hasiahua dainai, tano gagaena dekenai ia lao.
13 Bona unuseniai dina 40 ia noho. Bena Satani ese ia dibagania. Bona ia be uda animal edia huanai ia noho, to aneru ese ia idia durua.
14 Ioane idia dogoatao murinai, Iesu be Galilea dekenai ia lao, Dirava ena sivarai namona ia harorolaia,
15 bona ia gwau: “Nega be ia ginidae vadaeni bona Dirava ena Basileia be ia kahirakahira. Umui helalo-kerehai bona sivarai namona umui abidadama henia.”
16 Galilea Gohuna badinai ia raka lao neganai, ia itaia Simona bona ena tadikaka Andrea ese edia reke be davara dekenai idia negea, badina idia be haoda taudia.
17 Vadaeni Iesu be idia dekenai ia gwau: “Lau murinai umui mai, bona taunimanima haoda henia taudia ai umui do lau halaoa.”
18 Bona maoromaoro edia reke idia rakatania bona ia murinai idia raka.
19 Bona ia lao sisina murinai, Sebedeo ena natudia rua Iamesi bona Ioane ia itaia, edia bouti lalonai edia reke idia hanamoa noho,
20 bona maoromaoro ia boiridia. Vadaeni edia tamana Sebedeo bona gaukara taudia be bouti ai idia rakatania, bena Iesu idia badinaia,
21 bona Kaperanauma dekenai idia lao.
Vadaeni Sabati dinana ai, Iesu be maoromaoro sinagoga* lalonai ia vareai bona ia hadibaia matamaia.
22 Bona taunimanima be ena hadibaia dalana dekenai idia hoa bada, badina ia be taravatu hadibaia taudia amo ia idau, ia be mai siahu ida idia ia hadibaia.
23 Danu unai negai, edia sinagoga ai lauma dikana ese ia biagua tauna ta ia noho, ia boiboi,
24 ia gwau: “Nasareta tauna Iesu e, dahaka dainai oi mai? Ai oi hadikaia ore totona oi mai, a? Lau diba momokani oi be daika, oi be Dirava ena Helaga Tauna.”
25 To Iesu ese ia gwau henia, ia gwau: “Oi hereva lasi, ia amo oi raka-lasi!”
26 Bona lauma dikana ese unai tau ia hamarerea bada, unai murinai lauma dikana be ia boiboi badabada bona unai tauna amo ia raka-lasi.
27 Taunimanima ibounai be idia hoa bada dainai idia herevahereva hebou, idia gwau: “Inai be dahaka? Inai be hadibaia hereva matamatana! Mai ena siahu ida lauma dikadia danu ia oda henidia bona idia ese ena hereva idia kamonai.”
28 Vadaeni maoromaoro unai sivarai be Galilea ena gabu ibounai dekenai ia lao.
29 Bona maoromaoro sinagoga idia rakatania bona Simona bona Andrea edia ruma dekenai idia lao, bona Iamesi bona Ioane danu idia lao.
30 Simona ena ravana hahine be fiva ia abia dainai ia hekure noho, bona maoromaoro Iesu idia hadibaia.
31 Vadaeni hahine dekenai ia lao, ena imana ia dogoatao bona ia abia isi, vadaeni hahine ena fiva ia ore bona idia ia hesiai henia matamaia.
32 Bena adorahi momokani ai, gabu ia dibura neganai, taunimanima ese Iesu dekenai gorere taudia bona demoni ese idia biagua taudia ibounai idia mailaia,
33 bona taoni taudia ibounai be iduara vairanai idia hebou.
34 Unai dainai ia ese gorere idauidau taudia momo ia hanamoa bona demoni momo ia lulua, bona gwaumaoro ia henidia lasi idia hereva totona, badina idia diba ia be Keriso.
35 Bona daba momokani ai, gabu ia do dibura neganai, ia toreisi, ia raka-lasi bona taunimanima lasi gabuna ta dekenai ia lao, bona unuseniai ia guriguri matamaia.
36 To Simona bona ia ida idia noho taudia ese ia idia tahua,
37 bona ia idia davaria neganai, idia gwau: “Ibounai be oi idia tahua noho.”
38 To idia dekenai ia gwau: “Gabu ma ta dekenai ita lao, kahirakahira idia noho taoni dekenai, unuseniai do lau haroro danu, lau mai ena badina be unai.”
39 Bena ia lao, Galilea ena gabu ibounai dekenai bona edia sinagoga lalonai ia haroro bona demoni ia luludia.
40 Lepera tauna ta be Iesu dekenai ia mai, ia tui diho bona ia noinoi, ia dekenai ia gwau: “Bema oi ura, lau oi hanamoa diba.”
41 Unai tauna ia hebogahisi henia dainai, ena imana be ia dekenai ia atoa bona ia gwau: “Lau ura, harihari do oi goeva.”
42 Vadaeni maoromaoro unai tauna ena lepera gorere ia ore bena ia goeva.
43 Ma danu ia oda henia,
44 ia gwau: “Tau ta dekenai gau ta oi gwauraia lasi, to oi lao, hahelaga tauna vairanai oi hedinarai, bona oi goeva dainai Mose ena hahegani hegeregerena, harihari gauna oi henia, unai amo do idia hamomokania oi be oi goeva vadaeni.” Bena unai tauna ia siaia lao.
45 To unai tau ia lao bona taunimanima momo dekenai unai gauna ia herevalaia bona unai sivarai be gabu ibounai dekenai ia lao. Unai dainai Iesu be taoni lalonai ia vareai diba lasi, to taunimanima lasi gabudia dekenai ia lao. To gabu ibounai amo taunimanima be ia dekenai idia mai noho.
