Mareko 6:1-56
6 Iesu be unai gabu ia rakatania bona ena hanua dekenai ia lao, bona hahediba taudia be ia danu idia lao.
2 Sabati dinana ai, sinagoga dekenai ia hadibaia matamaia, bona idia kamonai taudia momo be idia hoa bada, idia gwau: “Inai tauna ese inai gaudia be edeseni amo ia abia? Edena bamona inai aonega ia abia bona inai siahu karadia ia karaia?
3 Ia be kapenta tauna bona Maria ena natuna, ena tadikaka be Iamesi, Iosepa, Iuda bona Simona, ani? Bona ena taihudia be ita danu idia noho, ani?” Unai dainai idia ura lasi ia idia abia dae.
4 To Iesu be idia dekenai ia gwau: “Peroveta tauna be gabu ibounai dekenai idia matauraia, to iena hanua, ruma bese taudia bona ena varavara ese ia do idia matauraia lasi.”
5 Unai dainai unuseniai siahu karadia ia karaia lasi, to gorere taudia haida sibona latanai ena imana ia atoa bona idia ia hanamoa.
6 Oibe, ia be edia abidadama lasi karana dainai ia hoa. Vadaeni hanua ta ta dekenai ia lao bona taunimanima ia hadibaia.
7 Aposetolo taudia 12 ia boiria bona rua rua ia siaia matamaia, bona siahu ia henidia lauma dikadia idia lulua totona.
8 Danu, idia ia hamaoroa edia laolao totona gau ta do idia abia lasi, hegeregere paraoa, aniani puse, bona moni,* to itotohi ta sibona do idia abia.
9 Tamaka do idia karaia, to dabua rua do idia hahedokilaia lasi.
10 Idia dekenai ma ia gwau: “Ruma ta lalonai umui vareai neganai, unuseniai do umui noho ela bona unai gabu umui rakatania.
11 Bema gabu ta ai umui idia abia dae lasi eiava idia kamonai henia lasi, unai gabu umui rakatania neganai, emui aena ena kahu do umui dahua oho, unai amo do umui hahedinaraia idia be idia kerere.”
12 Unai dainai idia lao bona idia haroro, unai amo taunimanima do idia helalo-kerehai,
13 bona demoni momo idia lulua bona gorere taudia momo be dehoro amo idia dahua bona idia hanamodia.
14 Vadaeni King Heroda* ese unai sivarai ia kamonai, badina taunimanima momo be Iesu idia diba bona idia gwau: “Ioane Bapatiso be mase amo ia toreisi lou dainai, siahu karadia ia karaia diba.”
15 To ma haida idia gwau: “Ia be Elia.” To ma haida idia gwau: “Ia be idaunega peroveta tauna ta bamona.”
16 To Heroda be unai ia kamonai neganai, ia gwau: “Lauegu oda dainai ena kwarana idia utua oho tauna Ioane, be ia toreisi lou vadaeni.”
17 Heroda ese ena tadikaka Filipo ena adavana, Herodia ia adavaia. Bona Herodia dainai Heroda ese hereva ia siaia Ioane idia dogoatao bona dibura ruma dekenai seini amo idia guia.
18 Badina Ioane be Heroda ia hamaoroa loulou: “Emu tadikaka ena adavana oi abia be maoro lasi.”
19 To Herodia be Ioane ia badu henia bona ia ura ia hamasea, to dala be lasi.
20 Heroda be Ioane ia matauraia, ia diba ia be kara maoromaoro bona helaga tauna dainai, Ioane ia gimaia. Bona Ioane ena hereva ia kamonai murinai, ia diba lasi dahaka do ia karaia, to mai moale ida ena hereva ia kamonai henia noho.
21 To Heroda ena vara dinana ai, ia ese aria ta ia karaia bona dagi bada taudia, tuari biagudia bona Galilea ena ladana bada taudia ia boiria. Unai ese dala ia kehoa Herodia ese ena palani ia hagugurua totona.
22 Vadaeni Herodia ena natuna kekeni ia mai bona ia mavaru bona Heroda bona ia ida pata dekenai idia helai taudia ia hamoalea. King be kekeni dekenai ia gwau: “Oi ura gauna be lau oi hamaoroa, bona oi dekenai do lau henia.”
23 Oibe, kekeni dekenai ia gwauhamata: “Lau dekenai oi noia gauna be oi do lau henia, egu basileia ena kahana danu.”
24 Unai dainai kekeni ia lao bona ena sinana dekenai ia gwau: “Dahaka do lau noia?” Sinana ia gwau: “Ioane Bapatiso ena kwarana.”
25 Vadaeni maoromaoro king dekenai ia lao haraga bona ena ura gauna ia gwauraia: “Lau ura harihari mereki badana ta latanai Ioane Bapatiso ena kwarana be lau dekenai oi henia.”
26 Ena be unai ese king ena lalona ia hahisia bada, to ia ura lasi kekeni ia noia gauna ia dadaraia, badina ia ida pata dekenai idia helai taudia vairanai ia karaia gwauhamatana ia laloa.
27 Vadaeni maoromaoro king ese ena gima tauna ia siaia bona ia oda henia Ioane ena kwarana do ia mailaia. Unai dainai ia lao bona dibura rumana lalonai Ioane ena kwarana ia utua,
28 bona mereki badana ta latanai ia mailaia, kekeni ia henia bona kekeni ese ena sinana dekenai ia henia.
29 Ioane ena hahediba taudia be unai idia kamonai neganai, idia mai bona ena tauanina idia abia bona guria gabuna lalonai idia atoa.
30 Vadaeni aposetolo taudia ibounai be Iesu vairanai idia haboua, bona idia karaia bona hadibaia gaudia ibounai be ia dekenai idia gwauraia.
31 Bona idia dekenai ia gwau: “Umui mai bona taunimanima lasi gabuna dekenai do ita lao bona laga-ani sisina.” Badina taunimanima momo idia lao mai bona idia be nega lasi idia aniani totona.
32 Vadaeni bouti amo taunimanima lasi gabuna dekenai idia lao.
33 To idia lao neganai taunimanima ese idia itadia bona momo be idia lao henia gabuna idia dibaia. Bona taoni ibounai amo taunimanima be aena amo idia heau lao bona idia ginidae guna.
34 Vadaeni bouti amo ia diho neganai, hutuma bada ia itaia bona idia ia hebogahisi henia, badina idia be mamoe naria tauna ese ia naria lasi mamoe bamona. Bona idia dekenai gau momo ia hadibaia matamaia.
35 Adorahi momokani ai, ena hahediba taudia be ia dekenai idia mai bona idia gwau: “Inai be taunimanima lasi gabuna, bona ia leiti vadaeni.
36 Idia oi siaia lao biru gabudia bona badina hanuadia dekenai bona aniani do idia hoia idia ania totona.”
37 Iesu ese idia ia haere henia, ia gwau: “Umui ese idia dekenai aniani umui henia.” Unai neganai Iesu dekenai idia gwau: “Do ai lao bona 200 denario* amo paraoa do ai hoia, bona inai taudia dekenai do ai henia idia ania totona, a?”
38 Idia dekenai ia gwau: “Umui dekenai paraoa hida idia noho? Umui lao bona umui itaia!” Vadaeni idia tahua murinai, idia gwau: “Paraoa 5 bona gwarume rua.”
39 Bona taunimanima ibounai ia hamaoroa orea ta ta be rei matamata dekenai do idia helai.
40 Vadaeni idia helai diho, orea haida be 100 bona ma haida be 50.
41 Bena paraoa 5 bona gwarume rua ia abia, guba ia itaia, bona ia guriguri. Bena paraoa ia makohia bona hahediba taudia dekenai ia henia matamaia, vadaeni taunimanima dekenai idia henia, bona idia ibounai totona gwarume rua ia haria.
42 Vadaeni ibounai idia aniani bona idia bogakunu,
43 bona aniani oredia be bosea 12 dekenai idia hahonua. Bona gwarume oredia haida danu idia noho.
44 Paraoa idia ania tatau be 5,000.
45 Bena maoromaoro Iesu ese ena hahediba taudia ia hamaoroa bouti dekenai idia guia bona Betesaida ena kone kahana dekenai idia lao guna, to ia sibona ese hutuma do ia siaia lao.
46 Vadaeni idia ia bamahuta henia murinai, ororo dekenai ia lao ia guriguri totona.
47 Hanuaboi ai, bouti be davara huanai ia noho, to ia be sibona ia noho ororo dekenai.
48 Ia itaia mai hekwarahi bada ida idia bara, badina lai be idia lao henia gabuna amo ia toa. Daba momokani ai,* gohu latanai idia dekenai ia raka lao, to toana be ia ura idia ia hanaia.
49 Idia itaia Iesu be davara latanai ia raka neganai, idia laloa: “Inai be matahanai ta!” Bena idia boiboi badabada.
50 Idia ibounai ese Iesu idia itaia bona idia gari. To maoromaoro idia dekenai ia hereva bona ia gwau: “Umui lalogoada! Inai be lau, umui gari lasi.”
51 Bona bouti lalonai ia guia bena lai ia doko. Unai dainai idia hoa dikadika.
52 Idia laloparara lasi hoa dalanai paraoa ia henia tauna be unai hoa karana danu ia karaia diba.
53 Gohu idia hanaia bona Genesareta dekenai idia ginidae bona bouti ena dogo idia atoa diho.
54 To maoromaoro bouti amo idia diho neganai, taunimanima idia itaia unai be Iesu.
55 Vadaeni unai gabu ena kahana ibounai dekenai idia heau lao, bona gorere taudia be edia mahuta patana ai idia huaia lao Iesu dekenai.
56 Iesu ia lao henia hanua, taoni bona biru gabudia dekenai, idia ese maketi gabudia dekenai gorere taudia idia abia lao. Bona ia idia noia bema ena dabua ena dorina do idia dogoatao. Vadaeni ena dabua idia dogoatao taudia ibounai idia namo.
