Mareko 10:1-52
10 Iesu be unai gabu ia rakatania bona Iudea ena boda dekenai ia lao, unai be Ioridane kahanai, bona hutuma be ia dekenai idia haboua lou. Bona vaia ia karaia bamona, idia ia hadibaia matamaia lou.
2 Vadaeni Farisea taudia be Iesu dekenai idia mai, ia dibagania totona idia nanadaia bema tau ta ese ena headava ia hadokoa be maoro eiava lasi.
3 Vadaeni idia ia haere henia, ia gwau: “Mose ese umui dekenai dahaka taravatu ia henia?”
4 Idia gwau: “Mose be gwaumaoro ia henia, tau ta ese headava hadokoa pepana do ia torea bena hahine do ia rakatania.”
5 To Iesu be idia dekenai ia gwau: “Emui kudouna ia auka dainai, Mose ese umui totona unai taravatu ia torea.
6 To, matamana negana amo, ‘Dirava ese taunimanima ia karaia, tau bona hahine.
7 Unai dainai tau ese ena tamana bona sinana do ia rakatania,
8 bona idia ruaosi be tauanina* tamona ai do idia lao,’ vadaeni idia be rua lasi, to tauanina tamona.
9 Unai dainai Dirava ese ia hakapua taudia be ta ese do ia hapararaia lasi be namo.”
10 Ma ruma lalonai idia noho neganai, hahediba taudia be unai hereva dainai ia idia nanadaia.
11 Vadaeni idia dekenai ia gwau: “Bema tau ta be ena headava ia hadokoa bona hahine ma ta ia adavaia, ia be ia heudahanai bona ena hahine dekenai ia kara dika.
12 Bona bema hahine ta be ena headava ia hadokoa murinai, ma tau ta ia adavaia, ia be ia heudahanai.”
13 Vadaeni taunimanima be Iesu dekenai natudia maragidia idia mailaia matamaia, idia dekenai ena imana ia atoa totona, to hahediba taudia ese idia gwau henidia.
14 Iesu be unai ia itaia neganai, ia moale lasi bona idia dekenai ia gwau: “Natudia maragidia be lau dekenai idia mai be namo, umui koudia toho lasi, badina Dirava ena Basileia be unai bamona taudia edia.
15 Umui lau hamaoroa momokani, bema ta be natuna maragina ena kara bamona Dirava ena Basileia ia abia dae lasi, ia be unuseniai do ia vareai lasi momokani.”
16 Vadaeni natudia ia rosia, idia ia hanamoa matamaia, bona ena imana be idia latanai ia atoa.
17 Iesu ia raka lao noho lalonai, tau ta be ia dekenai ia heau mai bona ia vairanai ia tui diho, bena ia henanadai: “Hadibaia Tauna Namona e, mauri hanaihanai abia totona, dahaka lau karaia be namo?”
18 Iesu be ia dekenai ia gwau: “Dahaka dainai lau oi gwauraia namo? Tau ta be ia namo lasi, to tamona sibona, Dirava unai.
19 Taravatu oi diba: ‘Oi ala-ala lasi, oi heudahanai lasi, oi henaohenao lasi, ta oi samania koikoi lasi, koikoi dalana amo ta ena kohu oi abia lasi, bona emu tamana bona sinana oi matauraia.’”
20 Unai tauna be Iesu dekenai ia gwau: “Hadibaia Tauna e, lau maragi negana amo unai taravatu ibounai lau badinaia.”
21 Iesu ese unai tauna ia itaia bona ia lalokau henia, vadaeni ia dekenai ia gwau: “To gau tamona oi do karaia lasi. Oi lao emu kohu oi hoihoilaia bona unai moni be ogogami taudia dekenai oi henia, bena guba dekenai oi be mai emu dava bada kohu, bona oi mai egu hahediba tauna ai oi lao.”
22 To unai hereva dainai mai lalohisihisi ida ia lao, badina ena kohu be momo.
23 Iesu be idia noho taudia ia itaia bena ena hahediba taudia dekenai ia gwau: “Mai edia moni taudia dekenai do ia auka Dirava ena Basileia lalonai idia vareai totona!”
24 To hahediba taudia be iena hereva dainai idia hoa. Vadaeni Iesu ia gwau: “Natudia e, Dirava ena Basileia lalonai vareai be ia auka!
25 Kamelo be nila matuna lalonai ia vareai be auka lasi, to taga tauna be Dirava ena Basileia lalonai ia vareai be auka.”
26 Idia hoa bada bona ia dekenai idia gwau: “Daika be hahemauri ia abia diba?”
27 Iesu ese idia ia itaia, bena ia gwau: “Taunimanima ese unai idia karaia diba lasi, to Dirava ese gau ibounai ia karaia diba.”
28 Petero be Iesu dekenai ia gwau: “Ai be gau ibounai ai rakatania bona oi murinai ai raka noho.”
29 Iesu ia gwau: “Umui lau hamaoroa momokani, egu ladana bona sivarai namona dainai edia ruma, tadikaka, taihu, sinana, tamana, natudia, bona tano idia rakatania taudia
30 be hari inai negai unai gaudia be nega 100 amo do idia abia, ruma, tadikaka, taihu, sinana, natudia bona tano. Bona dagedage danu do idia davaria. Bona do ia mai nega oromana ai mauri hanaihanai do idia abia.
31 To idia guna taudia momo be do idia gabeai bona gabeai taudia be do idia guna.”
32 Iesu bona ena hahediba taudia be Ierusalema dekenai idia daekau lao noho lalonai, Iesu be ia raka guna. Bona hahediba taudia idia hoa, to idia murinai idia raka taudia idia gari matamaia. Iesu ese ena aposetolo taudia 12 ma ia hakaudia siri, bona ia dekenai do idia vara gaudia be idia dekenai ia herevalaia:
33 “Ita be Ierusalema dekenai ita daekau lao noho, bona taunimanima ena Natuna be dubu biagudia bona taravatu hadibaia taudia dekenai do idia henia. Bona idia ese ia hamasea herevana do idia gwauraia bona idau bese taudia dekenai ia do idia henia,
34 bona idia ese ia do idia kirikirilaia, do idia kanudia, do idia dadabaia bona hamasea, to dina toi murinai do ia toreisi lou.”
35 Bena Sebedeo ena natudia rua, Iamesi bona Ioane be Iesu dekenai idia lao bona idia gwau: “Hadibaia Tauna e, ai ura oi ese ai noia gauna do oi karaia.”
36 Idia dekenai ia gwau: “Umui ura umui totona dahaka do lau karaia?”
37 Ia dekenai idia gwau: “Emu hairai oi abia neganai, mani do ai helai, ta be emu idibana kahanai bona ta be emu laurina kahanai.”
38 To Iesu be idia dekenai ia gwau: “Umui noia gauna be umui diba lasi. Lau inua gwauraia kapusi umui inua diba, a? Eiava lau abia noho bapatisona umui abia diba, a?”
39 Ia dekenai idia gwau: “Ai karaia diba.” Vadaeni Iesu be idia dekenai ia gwau: “Lau inua kapusi be do umui inua, bona lau abia bapatisona do umui abia danu.
40 To, lau ese gwaumaoro do lau henia lasi, daika be egu idibana eiava laurina kahanai do ia helai, to Dirava ese do ia abia hidi, daidia be unuseniai do idia helai.”
41 Vadaeni hahediba taudia 10 be unai idia kamonai neganai, Iamesi bona Ioane dekenai idia moale lasi.
42 To Iesu ese idia ia boiria, ia gwau: “Umui diba, bese idauidau taudia edia king ese edia bese idia lohiaia bona edia ladana bada taudia ese idia biagudia auka.
43 Emui huanai unai bamona do ia vara lasi, to bema ta ia ura emui huanai do ia bada, namona be emui hesiai tauna ai do ia lao.
44 Bona bema ta ia ura emui huanai do ia guna, ia be ibounai edia igui hesiai tauna ai ia lao be namo.
45 Badina taunimanima ena Natuna ia mai lasi taunimanima ese ia idia hesiai henia totona, to ma haida hesiai henia totona ia mai, bona ena mauri* ia henia, taunimanima momo edia mauri davana karaia totona.”
46 Iesu bona ena hahediba taudia be Ieriko dekenai idia mai. Bena idia be taunimanima momo ida Ieriko idia rakatania neganai, matakepulu noinoi tauna Batimeo, Timeo ena natuna, be dala badinai ia helai.
47 Ia kamonai Iesu, Nasareta Tauna ia hanaia neganai, ia boiboi matamaia, ia gwau: “Iesu, Davida ena Natuna e, lau oi hebogahisi henia!”
48 To momo ese ia idia gwau henia, do ia hereva lasi, to ena boiboi ia habadaia: “Davida ena Natuna e, lau oi hebogahisi henia!”
49 Vadaeni Iesu ia gini bona ia gwau: “Ia umui boiria.” Bena matakepulu tauna idia boiria, bona ia dekenai idia gwau: “Oi gari lasi! Oi toreisi, ia ese oi ia boiria noho.”
50 Ena dabua ia negea, ia roho isi bona Iesu dekenai ia lao.
51 Bena Iesu be ia dekenai ia gwau: “Oi ura oi totona dahaka do lau karaia?” Matakepulu tauna be ia dekenai ia gwau: “Raboni* e, egu matana oi kehoa.”
52 Iesu be ia dekenai ia gwau: “Oi lao. Emu abidadama ese oi ia hanamoa vadaeni.” Bena maoromaoro ia itaia diba, bona Iesu murinai ia raka matamaia.
