Mareko 13:1-37
13 Iesu be dubu helaga amo ia raka-lasi noho lalonai, ena hahediba tauna ta be ia dekenai ia gwau: “Hadibaia Tauna e, inai nadi bona ruma badadia oi itaia!”
2 To Iesu be ia dekenai ia gwau: “Inai ruma hairaidia oi itaia noho, a? Iniseniai nadi ta be nadi ta latanai do ia noho lasi, lasi vaitani, to idia ibounai do idia moru.”
3 Bona Iesu be Olive Ororona ai ia helai bona unuseni amo dubu helaga ia itaia diba. Vadaeni Petero, Iamesi, Ioane, bona Andrea sibodia be Iesu dekenai idia lao, ia idia nanadaia matamaia, idia gwau:
4 “Ai oi hamaoroa, unai gaudia be edena negai do idia vara, bona unai gaudia ibounai idia ore ena toana be dahaka?”
5 Vadaeni Iesu be idia dekenai ia gwau: “Umui naria namonamo, ta ese umui ia hakaua kerere garina.
6 Taunimanima momo be egu ladanai do idia mai, bona do idia gwau, ‘Lau be ia,’ bena momo do idia hakaua kerere.
7 Danu, umui ese gabu idauidau amo tuari edia sivarai umui kamonai neganai, umui gari lasi badina unai gaudia be do idia vara, to dokona be do lasi.
8 “Bese ta do ia toreisi bese ta do ia tuari henia, bona basileia ta ese basileia ta do ia tuari henia, bona gabu idauidau ai tano mareremarere bona hitolo bada do idia vara. Unai ibounai be hisihisi ena matamana sibona, mara ena hisihisi bamona.
9 “To umui, do umui naria namonamo, taunimanima ese kota dekenai umui do idia abia lao, bona sinagoga dekenai umui do idia dadabaia, bona lau dainai gavana bona king taudia vairanai do umui gini, unai ese dala do ia kehoa idia dekenai umui haroro totona.
10 Danu, bese ibounai dekenai sivarai namona do idia harorolaia guna be namo.
11 To kota dekenai umui idia henia totona umui idia hakaua lao neganai, do umui gwauraia gauna umui lalohekwarahilaia lasi, to unai nega ai do umui diba gauna umui gwauraia, badina unai be umui hereva lasi, to lauma helaga ia hereva.
12 Danu, tadikaka ese ena tadikaka ena mase dalana do ia karaia, tamana ese natuna ena mase dalana do ia karaia, natudia ese tama sina do idia gwau-edeede henia bona edia mase dalana do idia karaia.
13 Bona egu ladana dainai taunimanima ibounai ese umui do idia inai henia. To ia haheauka ela bona dokona tauna be do ia mauri.
14 “Vadaeni, gabu ia hadikaia gau dika rohorohona be maoro lasi ia gini gabunai ia gini umui itaia neganai (duahia tauna ia laloa namonamo be namo), Iudea dekenai idia noho taudia be ororo dekenai do idia heau lao be namo.
15 Namona be ruma ataiai ia noho tauna ia diho lasi, eiava ena ruma lalonai ia vareai lasi ena kohu ia abia totona.
16 Bona uma dekenai ia noho tauna be do ia giroa lasi ena dabua ia abia totona.
17 Unai nega ai, rogorogo hahine bona beibi dekenai rata idia henia hahinedia, madi o!
18 Umui guriguri noho, emui laolao be keru negana ai do ia vara lasi,
19 badina unai nega ai hisihisi badana do ia vara, Dirava ese tanobada ia karaia matamaia negana amo ema bona inai nega, unai bamona hisihisi ta ia vara lasi, bona do ia vara lou lasi.
20 Momokani, bema Iehova ese unai dina ia hakwadogia lasi, taunimanima ta do ia mauri lasi. To ia ese ia abia hidi taudia dainai, unai dina do ia hakwadogia.
21 “Bona bema ta be umui dekenai ia gwau, ‘Itaia! Keriso be iniseniai,’ eiava ‘Itaia! Keriso be unuseniai,’ do umui abia dae lasi.
22 Badina Keriso koikoidia bona peroveta koikoi taudia do idia hedinarai, toa bona hoa karadia do idia karaia, bona bema mai dalana Dirava ese ia abia hidi taudia danu do idia hakaua kerere.
23 Unai dainai, umui naria namonamo, gau ibounai be umui dekenai lau gwauraia vadaeni.
24 “Unai nega ai, unai hisihisi badana murinai, dina be do ia dibura, hua be do ia diari lasi,
25 hisiu be guba amo do idia moru, bona guba ena siahu gaudia be do idia mareremarere.
26 Bona do idia itaia taunimanima ena Natuna be mai ena siahu bona hairai bada ida ori lalonai do ia mai.
27 Bena ia ese aneru do ia siaia, bona idia ese not, saut, ist, bona west amo Dirava ena abia hidi taudia do idia haboua, tanobada ena kahana ta amo ela bona guba ena kahana ta dekenai.
28 “Fig auna ena haheitalai mani umui laloa: Ena rigi matamata ia tubu bona raurau ia atoa neganai, umui diba vadaeni gau idauidau edia tubu negana be ia kahirakahira.
29 Unai hegeregerena, unai gaudia idia vara umui itaia neganai, namona be umui diba taunimanima ena Natuna be kahirakahira, ia be iduara badinai ia gini.
30 Umui lau hamaoroa momokani, inai uru be do ia ore lasi ela bona unai gaudia ibounai idia vara.
31 Guba bona tanobada be do idia ore, to egu hereva be do ia ore lasi.
32 “Unai dina bona hora be tau ta ia diba lasi, guba anerudia idia diba lasi, Natuna danu be ia diba lasi, to Tamana sibona.
33 Umui gima noho bona umui noga noho, badina Dirava ese ia abia hidi negana be umui diba lasi.
34 Ia be gabu daudau dekenai ia lao tauna hegeregerena, bona ena igui hesiai taudia ta ta dekenai gaukara ia henia ena ruma idia naria totona. Bona iduara naria tauna ia hagania do ia gima noho totona.
35 Unai dainai do umui gima noho, badina umui diba lasi negana ai ruma Biaguna do ia mai. Ia be reana adorahi momokani* ai eiava malokihi* ai eiava kokoroku ia tai* negana ai eiava daba maragi* ai do ia mai.
36 Vadaeni ia ginidae haraga neganai, namo lasi umui ia davaria umui mahuta noho.
37 To umui lau hamaoroa gauna be ibounai dekenai lau gwauraia, gima noho.”
