Mareko 5:1-43
5 Vadaeni idia be gohu ena kahana dekenai idia ginidae, unai be Gerasa tanona.
2 Bona Iesu be maoromaoro bouti amo ia diho neganai, lauma dikana ese ia biagua tauna ta be gara gabuna amo Iesu dekenai ia mai.
3 Ia be gara gabunai ia noho, bona ela bona Iesu ese ia davaria negana ai, ta be ia hegeregere lasi unai tau be seini amo ia guia.
4 Badina nega momo seini amo ena imana bona aena idia guia, to ia ese unai seini ia hamakohidia, bona ta ena goada be ia hegeregere lasi ia dogoatao totona.
5 Ia be hanaihanai dina bona hanuaboi ai, gara gabuna bona ororo dekenai ia boiboi bona nadi amo sibona ia ivaia.
6 To daudau amo Iesu ia itaia neganai, ia heau lao bona ia vairanai ia igo diho,
7 bona ia boiboi badabada, ia gwau: “Iesu, Atai Momokani Diravana ena Natuna e, dahaka dainai oi mai iniseni? Dirava ena ladanai lau oi gwauhamata henia lau do oi hahisia lasi.”
8 Unai bamona ia boiboi badina Iesu be ia dekenai ia gwau: “Lauma dikana e, inai tauna amo oi raka-lasi.”
9 Bena Iesu ese ia nanadaia matamaia: “Emu ladana be daika?” Iesu dekenai ia gwau: “Lauegu ladana be Tuari Orea, badina ai be momo.”
10 Bona Iesu ia noia loulou, lauma be hanua murimurinai do ia siaidia lasi.
11 Bona boroma momo herea be ororo ai idia aniani noho.
12 Unai dainai lauma dikadia ese Iesu idia noia, idia gwau: “Mani boroma lalonai ai oi siaia.”
13 Vadaeni Iesu ese maoro ia henidia. Unai dainai lauma dikadia idia raka-lasi bona boroma lalonai idia vareai, bena boroma 2,000 bamona be hagahaga dekenai idia heau lao, gohu lalonai idia moru, bena ibounai idia maloa mase.
14 Vadaeni boroma naria taudia be taoni bona biru gabudia dekenai idia heau lao bona ia vara gauna idia herevalaia. Bona taunimanima idia mai unai idia itaia totona.
15 Bena Iesu dekenai idia mai, bona idia itaia, guna demoni momo ese idia biagua tauna be ia helai noho, dabua ia hahedokilaia bona ena lalona ia namo. Vadaeni idia gari dikadika.
16 Danu, demoni ese idia biagua tauna bona boroma dekenai idia vara gaudia idia itaia taudia ese idia mai taudia dekenai, unai idia sivarailaia.
17 Unai dainai Iesu idia noia edia gabu do ia rakatania.
18 Vadaeni bouti dekenai ia guia noho lalonai, guna demoni ese idia biagua tauna be Iesu ia noia ia ida do ia lao.
19 To Iesu ese ena noinoi ia abia dae lasi, to ia dekenai ia gwau: “Emu varavara dekenai oi lao, bona Iehova ena hebogahisi bona oi dekenai ia karaia gaudia ibounai be idia dekenai oi gwauraia.”
20 Vadaeni ia lao bona Iesu ese ia dekenai ia karaia gaudia ibounai be Dekapoli* ai ia herevalaia matamaia, bona taunimanima ibounai idia hoa.
21 Iesu be bouti ai ia guia lou bona gohu ena kahana ta dekenai ia ginidae neganai, hutuma bada be ia dekenai idia lao, ia be gohu badinai ia noho.
22 Vadaeni sinagoga ena ofesa ta ladana Iairo ia mai bona Iesu ia itaia neganai, ena aena badinai ia goru diho,
23 bona Iesu ia noia loulou, ia gwau: “Lauegu natuna kekeni maragina be kahirakahira do ia mase. Mani oi mai bona emu imana be ia latanai do oi atoa, bena do ia namo lou bona do ia mauri noho.”
24 Vadaeni Iesu be unai tauna ida ia lao. Bona taunimanima momo herea be ia badibadinai idia raka.
25 Hahine ta be lagani 12 lalonai rara halusia gorerena ia abia.
26 Doketa momo ia itaia ena gorere hanamoa totona, to hisihisi bada ia abia. Bona ena moni ibounai ia haorea, to namo ta ia davaria lasi bona ena gorere be ia bada ia lao.
27 Iesu ena sivarai ia kamonai neganai, taunimanima huana amo Iesu ena murinai ia lao bona ena dabua ia dogoatao.
28 Badina ia be sibona dekenai ia hereva noho: “Bema ena dabua sibona lau dogoatao, do lau namo.”
29 Bena maoromaoro rara ia doko bona ia mamia ena gorere dikana ia ore.
30 Bona maoromaoro Iesu ia mamia siahu be ia amo ia raka-lasi, bena hutuma dekenai ia giroa bona ia gwau: “Daika ese egu dabua ia dogoatao?”
31 To ena hahediba taudia be ia dekenai idia gwau: “Hutuma be oi idia bampaia noho ma oi gwau, ‘Daika ese lau ia dogoatao?’”
32 Bona ia be iena dabua ia dogoatao hahinena ia tahua.
33 To unai hahine be ia dekenai ia vara gauna ia diba dainai, ia gari bada bona ia heudeheude, vadaeni ia mai Iesu vairanai ia tui diho bona ia vara gauna ia gwauraia.
34 Iesu be ia dekenai ia gwau: “Natugu e, emu abidadama ese oi ia hanamoa vadaeni. Mai maino ida oi lao bona inai gorere dikana ese oi do ia hahisia lou lasi.”
35 Iesu ia do hereva noho lalonai, sinagoga ena ofesa ena ruma amo tatau haida idia mai bona idia gwau: “Emu natuna kekeni ia mase vadaeni! Hadibaia Tauna oi hahekwarahia lasi.”
36 To Iesu be edia hereva ia kamonai bona sinagoga ena ofesa dekenai ia gwau: “Oi gari lasi, oi abidadama sibona.”
37 Ia ese ma haida ia boiria lasi to Petero, Iamesi bona ena tadikaka Ioane sibodia ia hakaua lao.
38 Vadaeni sinagoga ena ofesa ena ruma dekenai idia ginidae bona Iesu ese regerege bada ia kamonai bona taunimanima idia taitai mai boiboi bada ida.
39 Bena ia vareai bona idia dekenai ia gwau: “Dahaka dainai umui regerege bona taitai? Kekeni maragina be ia mase lasi, to ia mahuta noho.”
40 Unai neganai ia idia kirikirilaia matamaia. To idia ibounai ia siaia raka-lasi murinai, kekeni ena tama sina bona ia ida idia lao hebou taudia be kekeni ia hekure gabunai idia vareai.
41 Bena kekeni ena imana ia dogoatao bona ia dekenai ia gwau: “Talita kumi,” ena anina be: “Kekeni maragina e, oi lau hamaoroa, ‘Oi toreisi!’”
42 Bona maoromaoro kekeni ia toreisi bona ia raka matamaia. (Iena mauri lagani be 12.) Unai neganai ena tama sina idia moale bada herea.
43 Iesu be idia ia hamaoroa loulou unai sivarai be ta dekenai do idia gwauraia lasi. Bona ia hamaorodia kekeni dekenai aniani do idia henia.
