“Matutum nga Saksi sa Kahawaan”

GINADAYAW na sadto pa sang mga mamalaybay kag mga manugkomposo sing ambahanon ang katahom sang bulan. Halimbawa, ang isa ka ambahanon nga ginkomposo sa bulig sang balaan nga espiritu sang Dios naghinambit sa isa ka babayi nga “magayon subong sang bulan.” (Ambahanon ni Solomon 6:10) Kag ang isa naman ka salmista mabinalaybayon nga naglaragway sa bulan subong “matutum nga saksi sa kahawaan.” (Salmo 89:37) Ano ang buot silingon sini?

Ang bulan wala gid nagapalya sa paglibot sa duta kada 27.3 ka adlaw. Busa, ginpatuhuyan ini nga matutom kay masaligan ini. Apang, may gusto pa ipahangop ang salmista. Gintawag niya ang bulan nga “matutum nga saksi” sa isa ka matagnaon nga ambahanon tuhoy sa Ginharian nga gintudlo ni Jesus sa iya mga sumulunod nga ipangamuyo nila.—Mateo 6:9, 10.

Sang nagligad nga kapin sa 3,000 ka tuig, nakigkatipan si Jehova nga Dios kay Hari David sang dumaan nga Israel para sa isa ka Ginharian. (2 Samuel 7:12-16) Ginhimo ini nga katipan agod si Jesucristo mangin lehitimo nga manunubli sang trono ni David sing dayon. (Isaias 9:7; Lucas 1:32, 33) Sa paglaragway sa paghari sang “kaliwat” ni David, ang salmista nag-amba: “Lig-onon ini sa gihapon subong sang bulan; subong sang matutum nga saksi sa kahawaan.”—Salmo 89:36, 37.

Ang ‘sulo nga nagagahum sa kagab-ihon,’ nga amo ang bulan, nagakaigo gid nga pahanumdom nga magagahom si Cristo sing dayon. (Genesis 1:16) Tuhoy sa iya Ginharian, ang Daniel 7:14 nagsiling: “Ang iya pagbulut-an dayon nga pagbulut-an, nga indi magtaliwan, kag ang iya ginharian amo ang indi malaglag.” Ang bulan isa ka saksi nga nagapahanumdom sa aton tuhoy sa sini nga Ginharian kag sa mga pagpakamaayo nga ihatag sini sa katawhan.

[Credit Line sang piktyur sa pahina 32]

Moon: NASA photo