Magdiretso sa kaundan

Magdiretso sa listahan sang kaundan

Ginasabat Gid sang Dios ang mga Pangamuyo

Ginasabat Gid sang Dios ang mga Pangamuyo

 Ginasabat Gid sang Dios ang mga Pangamuyo

Si Cornelio isa ka tawo sadto nga nagtinguha nga matigayon ang kahamuot sang Dios paagi sa masunson, tinagipusuon nga mga pangamuyo. Dugang pa, ginhimuslan niya ang iya katungdanan subong isa ka opisyal sang hangaway. Suno sa Biblia, “naghatag sia sing madamo nga dulot sang kaluoy” sa mga tawo nga nagakinahanglan.​—⁠Binuhatan 10:​1, 2.

SADTO, ang Cristianong kongregasyon ginhuman sang matinuuhon nga mga Judiyo, mga proselita, kag mga Samaritano. Si Cornelio isa ka di-sirkunsidado nga Gentil kag indi bahin sang Cristianong kongregasyon. Nagakahulugan bala yadto nga ang iya mga pangamuyo walay pulos? Indi. Gintalupangod ni Jehova nga Dios si Cornelio kag ang iya mapangamuyuon nga mga buhat.​—⁠Binuhatan 10:⁠4.

Paagi sa panuytoy sang anghel, nakapakig-angot si Cornelio sa Cristianong kongregasyon. (Binuhatan 10:​30-33) Subong resulta, sila sang iya panimalay may pribilehiyo nga mangin ang una nga di-sirkunsidado nga mga Gentil nga ginbaton sa Cristianong kongregasyon. Nakita ni Jehova nga Dios nga ang personal nga eksperiensia ni Cornelio takus nga ilakip sa kasaysayan sang Biblia. Wala sing duhaduha, naghimo sia sing madamo nga pagbag-o agod ipahisuno sing bug-os ang iya kabuhi sa mga talaksan sang Dios. (Isaias 2:​2-4; Juan 17:16) Ang eksperiensia ni Cornelio dapat mangin daku nga pagpalig-on sa mga tawo sang tanan nga pungsod nga nagatinguha nga matigayon ang kahamuot sang Dios karon. Binagbinaga ang pila ka halimbawa.

Modernong-adlaw nga mga Halimbawa

Ang isa ka lamharon nga babayi sa India nagakinahanglan gid sang lugpay. Nagpamana sa edad nga 21, may duha sia ka anak. Apang wala magdugay nga nabun-ag ang ikaduha nga anak, napatay ang iya bana. Sing hinali lang, sa edad nga 24, nangin balo sia nga may 2-ka-bulan nga anak nga babayi kag 22-ka-bulan nga anak nga lalaki. Indi katingalahan nga kinahanglan gid niya ang lugpay! Sa diin sia makadangop? Isa ka gab-i, sa daku gid nga kalisod, nangamuyo sia, nga nagasiling: “Langitnon nga Amay, palihug lugpayi ako paagi sa imo Pulong.”

Pagkaaga, may yara sia bisita. Ang iya bisita isa sang mga Saksi ni Jehova. Sadto nga adlaw, ang iya pamalaybalay nga ministeryo nangin mabudlay bangod pila lamang ang nagbaton sa iya. Kapoy kag medyo naluyahan, buot na sia magpauli, apang nabatyagan niya nga daw may nagatulod sa iya nga magduaw sa isa na lang ka balay. Amo yadto nga nasugilanon niya ang lamharon nga balo. Ginpadayon niya sia kag ginbaton ang publikasyon nga nagapaathag sang Biblia. Nalugpayan sing daku ang babayi sa pagbasa niya sadto nga publikasyon kag sa iya pagpakighambal sa Saksi. Natun-an niya ang tuhoy sa saad sang Dios nga pagbanhaw sa mga patay kag tuhoy sa Ginharian sang Dios, nga sa indi madugay magahimo sa duta nga  isa ka paraiso. Sing importante gid, nakilala niya kag nahigugma ang isa ka matuod nga Dios, si Jehova, nga nagsabat sang iya pangamuyo.

Si Nora, nga nagapuyo sa siudad sang George, Bagatnan nga Aprika, nagtalana sing isa ka bulan sa pagpakigbahin sa bug-os tion nga pag-ebanghelyo. Antes magsugod, hanuot sia nga nangamuyo kay Jehova nga buligan sia nga makakita sing isa nga interesado gid sa pagtuon sing Biblia. Ang teritoryo nga gintangdo sa iya nagalakip sa puluy-an sang isa ka tawo nga indi gid mainabyanon kay Nora sa nagligad nga mga pagduaw. Maisugon nga ginduaw liwat ni Nora yadto nga puluy-an. Sa iya kakibot, nasapwan niya nga may bag-o gali nga agsador nga nagsaylo, si Noleen. Dugang pa, si Noleen kag ang iya iloy madugay na nagapangamuyo sa Dios nga buligan sila nga mahangpan ang Biblia. “Sang gintanyagan ko sila sing pagtuon sa Biblia,” paathag ni Nora, “nalipay gid sila.” Madasig nga nag-uswag si Noleen kag ang iya iloy. Sang ulihi, nakigbahin sila upod kay Nora sa hilikuton sang espirituwal nga pagpang-ayo.

Ang isa pa ka halimbawa nga nagapakita sang gahom sang pangamuyo amo ang iya sang mag-asawa nga nagapuyo sa siudad sang Johannesburg sa Bagatnan nga Aprika. Sang isa ka Sabado sang gab-i sang 1996, ang pag-asawahay nanday Dennis kag Carol buot na mabungkag. Subong katapusan nga dalangpan, namat-od sila nga mangamuyo sing bulig, nga sulitsulit nila nga ginhimo tubtob sa pagnagob sang kagab-ihon. Pagkaaga, sang alas 11:​00, duha sang mga Saksi ni Jehova ang nanuktok sa ila ganhaan. Ginbuksan ni Dennis ang ganhaan kag ginsilingan sila nga maghulat tubtob nga matawag niya ang iya asawa. Nian ginpaandaman ni Dennis si Carol nga kon padayunon niya ang mga Saksi, mahimo nga mabudlay na nga palakton sila. Ginpahanumdom ni Carol si Dennis nga nagapangamuyo sila sing bulig kag nagsiling nga mahimo amo na ini ang sabat sang Dios sa ila mga pangamuyo. Gani ginpadayon ang mga Saksi, kag nasugdan ang pagtuon sa Biblia sa libro nga Ang Ihibalo nga Nagadul-ong sa Kabuhi nga Walay Katapusan. Nalipay gid sanday Dennis kag Carol sa ila natun-an. Sadto mismo nga hapon, nagtambong sila sa ila nahauna nga miting sa lokal nga Kingdom Hall sang mga Saksi ni Jehova. Paagi sa pag-aplikar sang ihibalo nga ila natun-an gikan sa Biblia, nasapwan nanday Dennis kag Carol ang mga solusyon sa ila mga problema sa pag-asawahay. Malipayon kag bawtismado na sila karon nga mga dumalayaw ni Jehova kag tayuyon nga nagapaambit sang ila pasad-sa-Biblia nga mga pagtuluuhan sa ila mga isigkatawo.

Kamusta Kon Nagabatyag Ikaw nga Indi Takus sa Pagpangamuyo?

Mahimo magabatyag ang pila ka sinsero nga tawo nga indi sila takus mangamuyo bangod sang ila malain nga dalanon sang pagkabuhi. Nagsugid si Jesucristo sing istorya tuhoy sa amo nga sahi sang tawo, ang isa ka gintamay nga manugsukot sing buhis. Nagasulod sa luwang sang templo, ining tawo nagbatyag nga indi takus sa pagsulod sa kinaandan nga duog-palangamuyuan. “Nagatindog sa malayo . . . padayon nga ginapukpok [niya] ang iya dughan, nga nagasiling, ‘O Dios, magmaayo-sing-buot ka sa akon nga isa ka makasasala.’ ” (Lucas 18:13) Suno kay Jesus, ining tawo ginpamatian sing kalahamut-an. Nagapamatuod ini nga si Jehova nga Dios maayo-sing-buot gid kag luyag magbulig sa mahinulsulon sing sinsero nga mga makasasala.

Binagbinaga ang isa ka pamatan-on sa Bagatnan nga Aprika nga si Paul. Sang bata pa sia, nagtambong si Paul sa Cristianong mga miting upod sa iya iloy. Apang sang maghayskul na sia, nakig-upod sia sa mga pamatan-on nga wala nagasunod sa mga dalanon sang Dios. Sang makatapos sa pag-eskwela, nangin soldado sia sang anay apartheid nga  gobierno sang Bagatnan nga Aprika. Pagkatapos, wala ginapaabot nga ginbugras sang iya nobya ang ila relasyon. Bangod sining di-makalilipay nga pagkabuhi ginpung-aw sing daku si Paul. “Isa ka gab-i,” hinumdom niya, “nangamuyo ako kay Jehova kag nagpangayo sang iya bulig, bisan pa nga tinuig na ako nga wala makadangop sing sinsero sa Dios.”

Wala magdugay pagkatapos sining pangamuyo, gin-agda si Paul sang iya iloy nga magtambong sa tuigan nga Memoryal sang kamatayon ni Cristo. (Lucas 22:19) Natingala si Paul nga ginhimo ini sang iya iloy, bangod madugay na sia nga balingag kag halos wala gid magpakita sing interes sa Biblia. “Gintamod ko ining pangagda subong sabat ni Jehova sa akon pangamuyo kag nagbatyag nga dapat ako magbalos.” Kutob sadto padayon, nagtambong si Paul sa tanan nga Cristianong miting. Pagkatapos sing apat ka bulan nga pagtuon sa Biblia, nangin kalipikado sia para sa bawtismo. Dugang pa, nag-untat sia sa pag-eskwela sa pagkaenhinyero kag ginpili ang karera sang pagpakigbahin sa bug-os tion nga pag-ebanghelyo. Sa karon, si Paul isa ka malipayon nga tawo, wala na ginapung-aw tuhoy sa iya nagligad nga pagkabuhi. Sa sulod sang nagligad nga 11 ka tuig, nag-alagad sia sa sanga talatapan sang Watch Tower Society sa Bagatnan nga Aprika.

Sa pagkamatuod, mainayuhon nga ginasabat ni Jehova nga Dios ang mga pangamuyo kag “nangin manugpadya sadtong hanuot nga nagapangita sa iya.” (Hebreo 11:6) Sa indi madugay ang dakung adlaw ni Jehova magaabot kag magadula sang tanan nga kalautan. Samtang wala pa, ginasabat ni Jehova ang mga pangamuyo sang iya katawhan para sa kusog kag panuytoy samtang makugi sila nga nagapakigbahin sa importante nga hilikuton sang pagpanaksi. Sa amo, minilyon ka indibiduwal gikan sa tanan nga pungsod ang ginaagda nga makig-upod sa Cristianong kongregasyon kag ginapakamaayo sang ihibalo sa Biblia nga nagadul-ong sa kabuhi nga walay katapusan.​—⁠Juan 17:⁠3.

[Retrato sa pahina 5]

Bangod sang tinagipusuon nga pangamuyo ni Cornelio, ginduaw sia ni apostol Pedro

[Retrato sa pahina 6]

Ang pangamuyo nakabulig sa madamo sa tion sang kasisit-an

[Retrato sa pahina 7]

Maayo nga mangamuyo sing bulig sa Dios agod mahangpan ang Biblia

Ang mga mag-asawa makapangamuyo sing bulig agod pabakuron ang ila pag-asawahay