Ang Pagtamod sang Biblia

Maayo Bala nga Mag-live-in Anay Antes sang Kasal?

MABAKAL ka bala sang bayo nga wala mo pa matakus kon kaigo sa imo? Mahimo nga indi. Kay kon mabakal mo na ini kag indi man lang gali kaigo sa imo, nag-uyang ka lang sang imo tion kag kuarta.

Amo man sini ang pagpati sang madamo nga tawo parte sa pag-asawahay. Nagapati sila nga mas maayo nga mag-live-in anay ang lalaki kag babayi antes sila magpakasal. ‘Kon indi sila magsahuay,’ pangatarungan nila, ‘mahapos lang para sa lalaki kag babayi nga magbulagay kag indi na kinahanglan ang malawig kag magasto nga proseso sang pagdiborsio.’

Ang mga tawo nga nagapati sa sini mahimo nga may abyan nga ginaabusuhan sang iya bana ukon asawa. Ukon mahimo nakita nila ang masubo nga epekto kon magtahaw na ang gugma sang mag-asawa. Gani para sa ila, mas maayo nga mag-live-in anay agod malikawan ini.

Ano ang pagtamod sang Biblia parte sa sini? Antes naton ini sabton, binagbinagon anay naton ang ginasiling sang Pulong sang Dios parte sa pag-asawahay.

‘Mangin-isa ka Unud’

Si Jehova ang nagtukod sang pag-asawahay, gani ginapalig-on kita sang Biblia nga tahuron ini nga kahimusan. (Genesis 2:21-24) Halin sa ginsuguran, katuyuan ni Jehova nga paagi sa pag-asawahay, ang lalaki kag babayi ‘mangin-isa ka unud.’ (Genesis 2:24) Sa tapos ginkutlo ni Jesus ang ginsiling sang Biblia, nagdugang sia: “Ang gintingob sang Dios indi pagbulagon sang tawo.”—Mateo 19:6.

Matuod, ang pila ka mag-asawa nagabulagay sa ulihi. * Pero, indi ini bangod may diperensia ang kahimusan sang pag-asawahay, kundi bangod wala matuman sang bana ukon asawa ang ila ginsumpaan sa kasal.

Halimbawa, ang isa ka lalaki kag babayi may salakyan. Pero wala nila ini ginmentinar suno sa instruksion sang kompanya nga naghimo sini. Kon naguba ang salakyan, sin-o ang balasulon? Ang kompanya bala ukon ang mga tag-iya nga wala nagmentinar sini?

Amo man sina sa pag-asawahay. Kon mentinahon sang bana kag asawa ang ila relasyon kag tinguhaan nga solbaron ang ila mga problema paagi sa pagsunod sa mga prinsipio sang Biblia, mahimo nga malikawan ang pagbulagay. Kon ang duha ka tawo nagpakasal, nanumpa  sila sa isa kag isa. Bangod sini, nagabatyag sila nga mabakod ang ila pag-asawahay. Gani, ang pag-asawahay amo ang basihan sang mahigugmaon nga pag-updanay.

“Maglikaw Kamo sa Pagpakighilawas”

Ang iban mahimo mamangkot gihapon: ‘Ngaa indi lang anay mag-live-in? Indi bala nga pagpakita sang pagtahod sa pagkasagrado sang kasal kon siguraduhon ninyo anay kon magsahuay kamo antes kamo magsumpaanay?’

Maathag ang sabat sang Biblia. Si Pablo nagsulat: “Maglikaw kamo sa pagpakighilawas.” (1 Tesalonica 4:3) Ang tinaga nga “pagpakighilawas” nagapatuhoy sa tanan nga seksuwal nga relasyon sang mga wala nakasal. Nalakip sa sini ang seksuwal nga relasyon sang mga naga-live-in. Gani, suno sa Biblia, sala ang pag-live-in, bisan pa nagaplano sila nga magpakasal sa ulihi.

Indi na bala praktikal subong ang pagtamod sang Biblia? Mahimo nga amo man sini ang pagpati sang iban. Kay man sa madamo nga lugar, normal na lang ang pag-live-in, may plano man sila nga magpakasal ukon wala. Pero, ano bala ang mga resulta sini? Nagmadinalag-on bala ang pamilya sang mga naga-live-in? Mas malipayon bala sila sangsa mga kasado nga mag-asawa? Mas mainunungon bala sa isa kag isa ang mga mag-asawa nga nag-live-in anay antes nagpakasal? Ginapakita sang mga pagtuon nga indi amo sini ang nagakatabo. Ang matuod, nasapwan nga ang mga mag-asawa nga nag-live-in anay mas madamo sing problema sa ila pag-asawahay kag ang kalabanan sa ila nagbulagay sang ulihi.

Pero suno sa iban nga mga eksperto, indi masaligan ini nga mga pagtuon. “Ang mga tawo nga nagpakasal antes mag-upod tuhay sangsa mga tawo nga nag-live-in anay,” sulat sang isa ka psychologist. Nagsiling sia nga ang panguna nga isyu indi amo ang pag-live-in; kundi ang “pagpabalor sang papel subong bana ukon asawa.”

Kon matuod gid man ini, ginapadaku lamang sang iya ginsiling nga importante nga tamdon naton ang pag-asawahay suno sa pagtamod sang Dios. Ang Biblia nagasiling: “Ang pag-asawahay mangin dungganon sa tanan.” (Hebreo 13:4) Kon ang lalaki kag babayi manumpa nga mangin isa sila ka unod kag tahuron nila ang kahimusan sang pag-asawahay, ang higot sang pag-asawahay indi madali mabugto.—Manugwali 4:12.

Pareho sang ginsambit kaina, dapat takson mo anay ang bayo antes mo ini baklon. Pero, ini nga halimbawa indi maaplikar sa pag-live-in. Sa baylo, naaplikar ini sa pagkilala anay sing maayo sa tawo nga gusto mo pangasaw-on ukon pamanahon. Ini nga paagi masami ginabalewala, pero isa ini sa madamo nga tikang para magmadinalag-on ang pamilya.

[Nota]

NAMANGKOT KA BALA?

▪ Ngaa ang mag-asawa lamang ang ginatugutan sang Biblia nga makigsekso?—Salmo 84:11; 1 Corinto 6:18.

▪ Ano nga mga kinaiya ang dapat mo pangitaon sa imo mangin asawa ukon bana?—Rut 1:16, 17; Hulubaton 31:10-31.

[Kahon sa pahina 29]

“NAGAPAKASALA BATOK SA IYA KAUGALINGON”

Ang Biblia nagsiling: “Sia nga padayon nga nagapakighilawas nagapakasala batok sa iya kaugalingon nga lawas.” (1 Corinto 6:18) Ini nga mga pinamulong napamatud-an halin pa sang nagligad nga mga dekada kay minilyon ang nagkalamatay bangod sa AIDS kag sa iban pa nga balatian nga makuha sa pagpakigsekso. Magluwas pa sa sini, ginapakita sang mga pagtuon nga ang mga pamatan-on nga pirme nagapakigsekso masami nga may depresyon kag nagahikog. Nagaresulta man ini sa batok sa buot nga pagbusong, kag ang pila sa ila nakapamensar pa gani nga magpahulog. Gani, makasiling kita nga ang kasuguan sang Biblia sa moral praktikal gihapon subong.