Naganyat sa Manunuga Bangod sang Katahom sang Kamatuoran

PANUGIRON NI TSUYOSHI FUJII

MGA pila ka tuig na ang nagligad, ginhatagan ako sing talagsahon nga kahigayunan. Subong kabulig ni Senei Ikenobo, ang headmaster ukon pangulo sang Ikenobo nga eskwelahan sang pag-areglo sing bulak, magaareglo ako sing bulak sa isa ka harianon nga hulot sang Imperial Palace sa Tokyo, Japan. Nagtrabaho ako nga guardiado. Walay sapayan nga ginakulbaan, naghalong ako nga indi maula bisan ang isa ka tulo sang tubig. Amo yadto ang isa sa pinakaimportante nga mga hitabo sa akon karera sang pag-areglo sing bulak. Ipaathag ko sa inyo kon paano ako nakasulod sa sini nga patag.

Natawo ako sang 1948 sa Nishiwaki City, nga nahamtang sa aminhan-katundan sang Kobe, Japan. Kutob pa sa pagkabata, natandog gid ako sa masami sa nagabaylobaylo nga katahom sang apat ka dag-on subong sang makita sa mga bulak. Apang, ginpadaku ako sang akon lola nga isa ka debotado nga Budhista, gani wala ko gid mahunahuna ang tuhoy sa Manunuga.

Ang akon iloy nagatudlo sing ikebana, ukon pag-areglo sing bulak, sa akon natawhan nga banwa. Sa Japan, ang ikebana, nga nakilal-an man nga kado (ang dalanon sang mga bulak), isa ka talahuron gid nga patag sang pagtuon. Bisan pa nga wala ako direkta nga gintudluan sang akon iloy sa sini, naimpluwensiahan gid niya ako. Sang tion na nga dapat ako magdesisyon kon ano ang gusto ko nga himuon sa palaabuton, ginhandum ko nga magtuon sing ikebana. Gusto sang akon maestro kag sang akon iloy nga magkuha ako sing regular nga kurso sa unibersidad, apang desidido ako nga mag-eskwela sa Ikenobo College. Ang ikenobo amo ang pinakadumaan nga patag sa pagtuon sing ikebana sa Japan. Sang mabaton ako, maukod ko nga gintun-an ang arte sang pag-areglo sing bulak.

Pagtuon sing Ikebana

Ang tema sang ikebana, ang tradisyunal nga arte sang Japan, amo ang kabuhi. Ipaathag ko sa inyo kon ano ini. Ang mga bulak nga nabutang sa balde sa tiendahan sang mga bulak mahimo nga matahom tan-awon, apang kamusta ini kon ipaanggid sa magagmay nga mga tanom nga nagapamulak sa wayang ukon sa mga kakahuyan nga nagapamulak sa kabukiran? Sa mga lugar diin nagapanubo ini, mabatyagan mo ang kabuhi kag ang mga dag-on. Diri sini nga ang imo tagipusuon mahimo gid nga matandog. Ang ikebana amo ang isa ka paagi sa pagpabutyag sina nga katahom sa kinaugali paagi sa paggamit sing mga bulak kag mga tanom, nga nagahimo sing desinyo pasad sa kon ano ang nagatandog gid sa imo.

Pananglitan, luyag mo ipaalinton ang tigragas. Mahimo mo ini paagi sa paggamit sing mga bulak sa tigragas, subong sang gentian kag patrinia, upod ang mga dahon sa tigragas. Luyag mo pa bala ipabatyag ang makaparepresko nga dupoydupoy? Ang pila ka eulalia nga medyo nagahilay magalaragway sang dupoydupoy, nga nagapabatyag sa mga tumalan-aw sang dupoydupoy sa tigragas. Nanamian gid ako sa ikebana, kag nalipay gid ako sa pagpabutyag sang akon kaugalingon paagi sa pagtingob sang mga bulak kag mga tanom sa plorera.

Isa ka Daku nga “Pamilya”

Ang maragtas sang ikebana subong arte sa pagpuni nagsugod sang nagligad nga 500 ka tuig. Ang mga eskwelahan sang ikebana ginadumalahan sang ginatawag nga paggahom sang headmaster nga sistema. Ang posisyon sang headmaster ginapanubli. Subong manunubli sang artistiko nga mga tradisyon,  daw tatay sia sang isa ka daku nga “pamilya” sang mga sumulunod. Lakip sang mga tradisyon, dapat niya tudluan ang masunod nga kaliwatan sing bag-ong mga estilo nga natukiban niya nahisanto sa tion nga ginakabuhian niya.

Sang maggradwar ako sa Ikenobo College kag sa duha-ka-tuig nga teknikal nga kurso sang kado, nagtrabaho ako sa Ikenobo Foundation sang Enero 1971. Ako ang nagplano kag nag-organisar sang “Ikebana Exhibitions by Ikenobo” sa bug-os nga Japan. Naglakbay man ako sa bug-os nga pungsod upod sa headmaster subong isa sang iya mga kabulig sa pag-areglo niya sing bulak.

Madumduman ko pa ang akon una nga pagtindog sa entablado sang Fukuoka Sports Center subong kabulig sang headmaster samtang ginapasundayag niya ang pag-areglo sing bulak. Ginkulbaan gid ako sa atubangan sang linibo ka tawo. Bisan pa nga indi dapat, ginbali ko kag gin-utod ang mga sanga. Apang mapinalanggaon nga ginhimo lang ini sang headmaster nga lahog samtang ginapaathag niya sa tumalambong ang iya ginahimo. Nagbulig ini sa akon nga magrelaks.

Sa tion sang pungsudnon nga mga okasyon nga ginatambungan sang kilala nga mga tawo halin sa iban nga mga pungsod, ginaupdan ko ang headmaster sa pag-areglo sing bulak para sa okasyon. Subong sang ginsambit ko sa panugod, ang isa sa sining mga kahigayunan amo ang pag-areglo ko sing bulak sa harianon nga hulot sang Imperial Palace.

Sang ulihi, sang gintukod ang Ikenobo Central Training School sa tuyo nga tudluan liwat ang mga instruktor sa bug-os nga pungsod, gintulin sa akon ang trabaho may kaangtanan sa pagtudlo, paghimo sing kurikulum, kag pagdumala sa paghimo sing mga teksbok kag film nga gamiton sa mga lektura para sa mga 200,000 nga pagahanason sa 300 ka sanga sa bug-os nga Japan. Naglakbay ako sa bug-os nga pungsod agod dumalahan ang kurso. Ang Ikenobo may mga sanga man sa iban nga mga pungsod, kag naglakbay ako sa Taiwan sing pila ka beses sa isa ka tuig. Gani naangkon ko ang pagsalig sang headmaster kag gintulinan niya ako sing mabug-at nga katungdanan.

Nanamian ako sa akon trabaho, apang indi ako bug-os nga malipayon sa akon kabuhi. Bisan pa ang akon trabaho may yara kahilabtanan sa katahom, may mga butang nga nagapahanusbo sa akon. Ang kahisa kag kaimon sa tunga sang mga ginahanas nagresulta sa pagpakalain nila sa isa kag isa, kag ang lokal nga mga instruktor masami nga nagapangayo sing laygay sa akon. Apang sa isa ka organisasyon nga kontrolado sang mga kinabatasan kag gahom, indi ko kontrolado ang madamo nga butang. Sanglit madamo ang tunay nga mahuyugon sa ikebana kag serioso sa pagtuon, ginhimo ko ang akon tanan nga masarangan agod makatuon sila sing malipayon.

Una nga Pagkahibalo sa Katahom sang Kamatuoran

Indi ako mahuyugon sa relihion bangod nagdumdom ako nga magadul-ong ini sa mental nga pagkabulag. Isa pa, nakita ko ang daku nga pagkasalimpapaw sa tunga sang mga nagahambal sing paghidait kag kalipay. Sa pihak nga bahin, ang akon asawa, nga si Keiko, nagapangita na sing kamatuoran kutob pa sa pagkabata. Interesado sia sa nagkalainlain nga mga relihion kag ginpamatian niya ang ila mga panudlo, apang wala sini mabusog ang iya espirituwal nga pagkagutom.

Gani sang nagduaw ang isa sang mga Saksi ni Jehova sa amon puluy-an, si Keiko nagbaton sing pagtuon sa Biblia. Ginsugiran niya ako sang tanan nga natun-an niya kag sang tanan nga nagkumbinsi sa iya. Naluyagan ko man ang ginsugid ni Keiko sa akon, apang indi ako interesado gid kaangay niya.

Walay sapayan sini, si Keiko kumbinsido gid kag padayon niya ako nga ginsugiran sang tanan nga natun-an niya gikan sa Biblia. Kon maglakbay ako, pirme niya ginabutangan sing tago ang akon maleta sing pila ka magasin tuhoy sa Biblia. Apang wala ko ini ginabasa. Indi ko luyag mawasi ang karera kag kadalag-an nga madugay ko nga ginpangabudlayan. Bag-o lang kami makabakal sang amon kaugalingon nga balay, kag nagdumdom ako nga kon batunon ko ang mga panudlo sang Biblia, dapat ko ibaligya ang balay. Sini man nga tion, si Keiko madasig nga nag-uswag kag nag-aplikar sang ginpatihan niya. Nagbatyag ako nga daw ginpabay-an kag nagaisahanon na lang. Bisan pa nahibaluan ko nga husto ang ginsugid niya sa akon, namatok ako sa iya.

Namatok, Apang Naganyat

Gab-i na ako nagapauli halin sa trabaho, apang sa mga gab-i nga nagatambong si Keiko sa mga miting sang mga Saksi ni Jehova, hungod ako nga labi pa nga nagapagab-i. Bisan pa alas dos ukon alas tres na sa kaagahon ako magpauli, nagahulat gihapon si Keiko sa akon agod sugiran ako sang natabo  sa sina nga adlaw, nga nagapakita sing pagkabalaka sa akon. Apang indi ko gusto nga nagahalin sa balay ang akon pamilya sing pila ka oras agod magtambong sa Cristianong mga miting. Labi pa gid ako nga nagpamatok kag nagsugod nga hambalan ang tuhoy sa diborsio. Apang, nagpabilin nga malig-on si Keiko.

Indi ko gid mahangpan ang reaksion ni Keiko. Walay sapayan nga indi na maayo ang amon relasyon kag pirme sia ginaatake sing hapo, malipayon sia sa tanan nga ginhimo niya. Ang una nga naluyagan ko gid anay kay Keiko amo ang iya pagkaputli sing tagipusuon, pagkasimple, kag pagkamahugmay. Kag amo man ina ang rason kon ngaa nabalaka ako nga basi nalimbungan sia sang nagtuon sia sa Biblia.

Apang, gin-aplikar ni Keiko ang iya natun-an kag ginpanikasugan niya nga mangin maayo nga asawa kag iloy. Bisan pa nagapamatok ako, kon maghingyo gani sia sa akon nga magtambong sa Cristianong mga miting kag mga asambleya, nagatambong ako kon kaisa, ayhan bangod ginapabugal ko si Keiko.

Sa amo man nga tion, naimon ako kay Jehova. Sang nakita ko ang pagpanikasog ni Keiko nga magbag-o, nagpalibog ako kon ngaa may amo ka daku nga epekto ang mga panudlo sang Biblia sa mga tawo. ‘Ngaa handa ang akon asawa nga batason ang tanan nga sahi sang kabudlayan para kay Jehova?’ pamensar ko.

Sang ulihi, ginduaw ako sa puluy-an sang pila ka Cristianong mga utod gikan sa kongregasyon ni Keiko. Wala ako sing tuyo nga atubangon sila. Apang, luyag ko mahibaluan kon ngaa may amo sini nga kalinungan sa hunahuna si Keiko. Sang ulihi, bangod luyag ko gid mahibaluan ang rason kon ngaa, nagpasugot ako nga magtuon sa Biblia. Sang nangin suod na ako sa mga nagduaw sa akon, nabatyagan ko nga may butang nga makaparepresko sa ila. Paagi sa pagtuon kada semana, ang kamatuoran sang Biblia amat-amat nga nagtudok sa akon tagipusuon, kag ang akon pagtamod nagsangkad.

Ang Katahom sang Kinaugali kag sang Kamatuoran

Sang gintinguhaan ko anay nga ipabutyag ang katahom kag gahom sang kinaugali paagi sa ikebana, nagpalibog ako kon paano ko ipaalinton ang pagkahalangdon sini. Nian, sang matun-an ko nga si Jehova gali ang nagtuga sang mga kalatingalahan sa kinaugali, nahangpan ko ang tanan. Paano makig-indis ang isa ka maluya nga tawo sa artistiko nga ikasarang sang Manunuga? Si Jehova amo ang Supremo nga Artist. Apang, paagi sa pagpanikasog nga ilugon sia, naareglo ko ang mga bulak sing labi pa katahom. Ang matuod, sang nagtuon ako sa Biblia, nagsiling ang mga tawo nga ang akon binuhatan nagbag-o, kay nadugangan sing kahugmay ang akon kapagsik.

Sa nahauna nga tion, ang mga kamatuoran sang Biblia nagbulig sa akon nga mahangpan ang madamo nga butang. Sang matun-an ko nga si Satanas nga Yawa amo ang manuggahom sang kalibutan kag ang kabangdanan sang tanan nga pag-antos karon sang mga tawo kag nga ang aton tagipusuon malimbungon bangod sang sala nga napanubli kay Adan, nahangpan ko gid man ang matuod nga kahulugan sang mga hitabo sa palibot naton. (Jeremias 17:⁠9; 1 Juan 5:19) Natun-an ko nga si Jehova isa ka mahidaiton nga Dios, bugana sa gugma, katarungan, gahom, kag kaalam (Deuteronomio 32:⁠4; Roma 11:33; 1 Juan 4:⁠8; Bugna 11:17); nga ginpadala sang Dios si Jesus agod mapatay para sa aton bangod sang iya gugma (Juan 3:16; 2 Corinto 5:14); kag magaabot ang tion nga madula na ang pag-antos ukon kamatayon (Bugna 21:4). Nabihag ako sa katahom sini nga mga kamatuoran. Wala labot sina, ginaaplikar sang mga Saksi ni Jehova ang panudlo ni Jesus nga ‘higugmaon ang imo isigkatawo subong sang imo kaugalingon.’ Bangod nakita ko ini mismo, nakumbinsi ako nga amo ini ang matuod nga relihion.​​—⁠Mateo 22:39.

Isa ka Balagbag nga Dapat Landason

Samtang nagapanggamot ang kamatuoran sa akon tagipusuon, nag-atubang ako sing isa ka hangkat. Sang indi anay makatambong ang headmaster sa mga lubong, ako ang masami nga nagabulos sa iya sa pagpanguna sa Budhista nga mga ritwal. Isa ini ka pagtilaw sa akon sang gusto ko na nga idedikar ang akon kaugalingon kay Jehova. Nagdesisyon ako nga indi na ako makigbahin sa Budhista nga mga rito. (1 Corinto 10:21) Matinahuron ko nga ginpaathag sa headmaster ang akon handum nga magpabawtismo kag ang akon desisyon nga indi na makigbahin sa iban pa nga pagsimba, bisan pa nga may kahilabtanan ini sa akon trabaho. Ginsingganan niya ako nga wala sia nagapamatok nga mangin Cristiano ako kag mahimo ako magdesisyon tuhoy sa relihioso nga mga butang suno sa  luyag ko. Nakibot gid ako kag nalipay sa iya sabat kay nagdumdom ako nga maakig sia kag pahalinon niya ako sa trabaho.

Sang malandas ko ini nga balagbag, nagpabawtismo ako subong simbulo sang akon dedikasyon kay Jehova sa isa ka Cristianong asambleya sang Hunyo 1983, pagkatapos sang isa ka tuig nga pagtuon sa Biblia. Sang nagtakas ako sa baptismal pool, ginsug-alaw ako ni Keiko nga nagayuhum kag nagahibi. Naghibi man ako kag nagpasalamat kami ni Keiko kay Jehova bangod sang amon kalipay.

Desisyon nga Talikdan ang Akon Sekular nga Karera

Mahinangpanon gid ang headmaster sa akon pagtamod subong isa ka dedikado nga Cristiano. Labi pa gid ako nga nag-ukod sa akon mga responsibilidad sa trabaho. Walay sapayan sini, ginhuptan ko pirme nga balanse ang akon sekular nga trabaho kag ang akon Cristianong pagkabuhi. Sa sulod sang pito ka tuig, naghinguyang ako sing madamo nga tion sa Cristianong ministeryo sing pila ka bulan kada tuig.

Apang, dapat ko hunahunaon ang espirituwalidad sang akon bugtong nga anak nga lalaki kag ang nagaluya nga panglawason ni Keiko. Nahunahuna ko, ‘Dapat ako maghinguyang sing mas madamo nga tion upod sa akon pamilya.’ Luyag ko man nga unahon pirme sa akon kabuhi ang mga intereses sang Ginharian. Ining mga kinahanglanon kag mga handum nagpahulag sa akon nga ipangamuyo kay Jehova ang tuhoy sa pagbiya ko sa akon karera sa ikebana. Nakita sang headmaster nga desidido na ako, kag nagretiro ako nga wala sing bisan ano man nga kabudlayan sang Hulyo 1990 sa edad nga 42.

Pagbulig sa Iban nga Makita ang Katahom sang Kamatuoran

Wala madugay sa tapos magretiro, ginsugdan ko ang bug-os tion nga ministeryo agod buligan ang iban nga masapwan ang kamatuoran. Sa karon, nagatudlo ako sang pag-areglo sing bulak sing isa ka adlaw sa isa ka semana, nga wala nalimitehan sang estilo Ikenobo. May pribilehiyo ako nga mag-alagad subong gulang sa kongregasyon, kag si Keiko malipayon nga nagapayunir kag talagsa na lang ginaatake sing hapo. Ang amon anak nga lalaki minyo na karon kag isa ka ministeryal nga alagad sa kaiping nga kongregasyon. Daw ano gid ka hamili nga pribilehiyo nga kami tanan sa pamilya nagaalagad kay Jehova!

Ginakalangkagan ko nga gamiton ang akon mga tanom sa hardin sa paghimo sing matahom nga mga areglo sing bulak sa tion nga maggahom na si Jesucristo sa Ginharian. Handum ko gid nga upod sa akon pinalangga nga pamilya, kabay nga dayawon ko sing dayon ang halangdon nga ngalan ni Jehova, ang Manunuga sang tanan nga matahom nga mga butang.

[Retrato sa pahina 29]

Upod ang akon asawa, ang amon anak, kag ang iya pamilya

[Retrato sa pahina 29]

Paagi sa ikebana, mapabutyag mo ang imo pagdayaw sa katahom sang kinaugali