Yayandikwaga na Marko 9:1-50
-
Yesu amahindamulwa eshusho (1-13)
-
Yesu amafumya omusole waliri m’omuzimu (14-29)
-
Ebintu byoshi byakashobokana oku muntu oherhe obwemere (23)
-
-
Yesu amashuba kuderha oku bilolere olufu lwage (30-32)
-
Abanafunzi bamajira obuhaka oku bilolere obukulu (33-37)
-
Buli yeshi orhali warhulwisa ey’ali oku lunda lwerhu (38-41)
-
Ebyakarhuma abandi bagoma (42-48)
-
“Mube m’omunyu” (49, 50)
9 Kandi Yesu ababwira ntya: “Kweri imbabwirire, hali abayumangire ahala barhakahonja oku lufu barhanaza kubona gurhe Obwami bwa Mungu bwayinja eyi bugwerhe emisi.”
2 Siku ndarhu enyuma waho, Yesu arhola Petro, Yakobo na Yowane, agenda nabo bonyine oku musozi gulehere bwenene. Ahindamulwa eshusho embere zabo,
3 emyambaro yage yarhondera kubaraganya yaba y’omweru-mweru omu kuntu nta muntu oku gulu onamesha wakagala kujira emyambaro ebe mweru-mweru ntyo.
4 Eliya na Musa nabo babarhengerera eyi bali baganira na Yesu.
5 Petro ava abwira Yesu ntya: “Leka nyumbake mahema masharhu, elyawe, elya Musa n’elya Eliya.”
6 Omu bukweri arhalimenyere gurhe ajirage, bulala baliyunvirhe buba bunene bwenene.
7 N’echichu charhengerera chabashukulira, n’omulenge gwarhenga mucho gwaderha: “Oyula ali Mugala wani, muzigirwa wani. Mumuyunvirize.”
8 Ahola han’aho balolere eyi n’eyi ntaye bachibwene haguma nabo olekere Yesu.
9 Oku banali bayandagala kurhenga oku musozi, abakomereza oku ntaye babwirage ebi babwene kugera amango Mwen’omuntu afuka.
10 Babibika oku murhima, aliko bagenderera kuchibaza okola kufuka aderhere k’okuderha gurhe.
11 Barhondera kumubaza: “Bulagurhe abandisi banaderha oku bihemere Eliya arhange ayinje?”
12 Abashubiza ntya: “Nechi, Eliya akwanene arhange ayinje anakwiza n’ebintu byoshi; bobuno si bulagurhe biyandikirwe oku Mwen’omuntu okw’akwanene agere mu mateso manene n’okusuzagurwa?
13 Aliko imbabwirire, Eliya ayinjire bava bamukolera nk’oku banalonzeze nk’oku byabaga byayandikirwe oku bimulolere.”
14 Babere bagera ah’abandi banafunzi bali, babona abantu kamama babazungulukire eyi n’abandisi bali ahola bali bajira obuhaka nabo.
15 Aliko abola bantu kamama banamubwene ntya, basomerwa bagenda balibirhira emunda ali yi bamulamusa.
16 Yesu ava ababaza ntya: “Buhaka bwa bichi muli mwajira nabo?”
17 Muguma mw’abola bantu amushubiza; “Mwalimu, nakulerheraga mugala wani bulala agwerhe omuzimu wamujirire kaduma.
18 Amango moshi ey’amufarha; anamubanda ahashi, olufula lwanarhenga omu bunu, anarhondera kuhekenya amenyo, n’okugangabala. Nahemere abanafunzi bawe bafukuze oyola muzimu aliko barhagalire kujira ntyo.”
19 Omu kushubiza Yesu ababwira: “Ego chizazi chirhaherhe obwemere wee! Kugera mangochi nagenderera kuba haguma nenyu? Kugera mangochi nagenderera kubalembera? Mumunderhere.”
20 Balerha oyola musole emunda ali, aliko oyola muzimu abwene Yesu, ashaganya-shaganya oyola mwana bwenene, amalire kumubanda ahashi, arhondera kuchigalagula n’okurhenga olufula omu bunu.
21 Yesu abaza eshe w’oyola musole: “Kurhenga mangochi y’ajira echila chibazo? Amushubiza: “Kurhenga achili mwana,
22 anazigana mubanda omu muliro n’omu menji y’amuyirha. Aliko akaba hali echiwakagala kujira, orhuyunvire obonjo onarhurhabale.”
23 Yesu amubwira ntya: “Bulagurhe oderhere, ‘Mpw’akaba wakagala’! Bulala ebintu byoshi byakagalikana ok’ogwerhe obwemere.”
24 Ahola han’aho eshe w’oyola mwana ayama aderha: “Ingwerhe obwemere! Ontabale ahankenere obwemere!”
25 Yesu abwene okw’abantu kamama bali bayinja balibirhira emunda bali, akalihira oyola muzimu n’okumubwira: “Ego muzimu w’okurhaderha n’okurhayunva, buno nanaderha, huluka muye, orhanahira okachimugalukamo!”
26 Oyo muzimu amalire kuyama endulu n’okushaganya-shaganya oyola mwana bwenene, amuhulukamo, aliko oyola mwana ashusha nk’owafire. Abantu baderha: “Amafa!”
27 Aliko Yesu amufarha efune amuzusya, n’oyola mwana ayimanga.
28 Amalire kuja omu nju, abanafunzi bage bamubaza bwihunze: “Charhumaga rhurhagala kumufukuza?”
29 Ababwira: “Esala lyonyine lyelinafukuza omuzimu oli nk’oyula.”
30 Barhenga ahola bagera e Galilaya, aliko barhalilonzeze k’omuntu yeshi-yeshi amenye.
31 Bulala aliri ayigiriza abanafunzi bage n’okubabwira: “Mwen’omuntu alenganywa n’okuhirwa omu fune z’abantu, banamuyirha, aliko chiro akaba oku bamuyirha, afuka enyuma wa siku esharhu.”
32 Chiro akaba oku barhaliri bayunva eby’aliri ababwira, bayubaha kumubaza.
33 Bagera e Kapernaumu. Babere baja omu nju, ababaza echibazo: “Buhaka buchi mwaliri mwajira omu njira.”
34 Bachisirira bulala baliri bagenda bajira obuhaka omu njira oku bilolere inde mukulu.
35 Yesu ayikala ahamagala balala 12 ababwira: “Nk’omuntu alonzeze kuba w’oburhanzi, akwanene kuba w’obuzinda mu boshi, anakwanene kuba mukozi wa boshi.”
36 Arhola omwana mudorho amuyimanza ahagarhi kabo, amuhira kw’efune, ababwira:
37 “Owakaribisa oli nk’oyula mwana mudorho eju y’ezino lyani ey’ankaribisize nani; n’owankaribisize ey’arhankaribisize nyono nyenyine, s’eyakaribisize n’olala wantumaga.”
38 Yowane amubwira: “Mwalimu, rhwalibwene omuntu oli wafukuza abazimu omu zino lyawe, rhwamalonza kumubuza bulala yewe arhali arhukulikira.”
39 Aliko Yesu aderha: “Murhapimaga mwamubuza, bulala inta muntu wakajira ebisomerene omu zino lyani, ahola han’aho akanderha kubi.
40 Bulala buli yeshi orhali warhulwisa ey’ali oku lunda lwerhu.
41 Na buli yeshi wabaha egopo ly’amenji m’okunywa bulala muli bantu ba Kristu, kweri imbabwirire, arhakafunda kuhabwa oluhembo lwage.
42 Aliko owarhuma muguma mw’abala badorho bagwerhe obwemere agoma, kwakabere kwinja ahubwe bamushwekere engashiri nzibuzibu enazunguluswa n’epunda omu gosi n’okumukabula omu nyanja.
43 “Nk’efune yawe eli yarhuma wagoma, oyiche. Kuli kwinja opate akalamo k’esiku n’amango ey’ogwerhe fune nguma, ahali h’okugwarha fune ebiri aliko okakabulwa omu Chihenama,* omu muliro gurhakafa gwazimizwe.
44 ——
45 Na nk’okugulu kwawe yikwarhuma wagoma, okuche. Kuli kwinja opate akalamo ey’oli chilema ahali h’okukabulwa omu Chihenama* ey’ogwerhe magulu mabiri.
46 ——
47 Na nk’elisho lyawe yilyarhuma wagoma, olikabule. Kuli kwinja oje omu Bwami bwa Mungu ey’ogwerhe lisho liguma, ahali h’okugwarha mesho mabiri aliko okakabulwa omu Chihenama,*
48 ah’emivunyu erhafa, n’ah’omuliro gurhazima.
49 “Bulala Mungu nj’ayandagaziza abantu bali nk’abola k’omuliro nka kula banalagaliza omunyu omu bilyo.
50 Omunyu guba gwinja, aliko nka gwamaheza obununu bwago, gurhe mwakabugalulamo? Mube m’omunyu ahakagarhi kenyu, munalange omurhula buli muguma n’owindi.
