Yayandikwaga na Marko 4:1-41
4 Yesu ashuba kurhondera kuyigiriza ahaburhambi bw’enyanja, na bantu kamama bachigusha ah’ali. Ava aja omu bwarho ayikala, ashegera hale bugeke n’eshi, aliko abantu boshi bayorha emushengo.
2 Arhondera kubayigiriza bintu binene omu kukolesa emifano, n’okw’anali abayigiriza ababwira ntya:
3 “Muyunve! Muntu muguma ajaga kubyala emburho.
4 Okw’anali abyala, mburho ziguma zarhogera oku njira, enyunyi zayinja zazilya.
5 Ezindi zarhogera oku buhinge b’oku bale aharhali budaka bunene, zamera juba-juba bulala obudaka burhalilugire.
6 Aliko ezuba lyakolere zasirera n’okuyuma juba-juba bulala zirhaliherhe emizi.
7 Ezindi zagwa omu mishaki, n’eyola mishaki yakula yazifundeza, nantyo zirhayanaga amatunda.
8 Aliko ezindi zarhogera omu budaka bwinja, zarhondera kuyana amatunda, ziguma zayera zachiyongera kali 30, ezindi kali 60 n’ezindi kali 100.”
9 Ayongera aderha: “Ogwerhe amarhwiri m’okuyunva, ayunve.”
10 Abere ali yenyine, baguma omu banafunzi bage na balala 12 bayinja bamubaza oku bilolere eyola mifano.
11 Abashubiza ntya: “Mwabo mwahabirwe esiri nchesibwa y’Obwami bwa Mungu, aliko abandi bowe ebintu byoshi banabibona nka mifano konyine,
12 che chirhumire, chiro balola, banalola aliko eyi ntacho babona na chiro bayunviriza, banayunviriza aliko eyi barhayunva eby’aderherwe k’okuderha gurhe; nantyo barhagalukira Mungu omu kuntu abababalire.”
13 Ashuba kubabwira: “Obola murhayunvirhe ogula mufano, gurhe mwaja mwagala kuyunva eyindi mifano yoshi?
14 “Omuhinzi abyalaga omwazi g’Obwami.
15 Bantu baguma bali nka mburho zarhogeraga oku njira, eyi banayunva omwazi g’Obwami ntya, Shetani anayinja anashigula ogola mwazi gwabyerwe omu mirhima yabo.
16 Hali abandi bali nka mburho zabyalwaga omu buhinge b’oku bale; eyi banayunva omwazi g’Obwami ntya, banaguyemera n’obusime.
17 Aliko bulala omwazi g’Obwami gurhashingire emizi omu mirhima yabo, banagenderera mu kasanzi kageke aliko eyi bapata amalibuko n’obupinzani eju y’Obwami, banachika entege.
18 Hali abandi bali nka mburho zabyalwaga omu mishaki. Abola b’abantu banayunva omwazi,
19 aliko emilago y’elila gulu, emisi y’obuchire enarhebekana, n’enyifinjo z’ebindi bintu byoshi byanafundeza omwazi g’Obwami omu mirhima yabo, eyi barhayana amatunda.
20 Buzinda, emburho zabyalwaga omu budaka bwinja bali balala banayunva omwazi g’Obwami, banaguyemera n’obusime bunene banayana amatunda kukuba kali 30, kali 60 na kali 100.”
21 Ashuba kubabwira ntya: “Eyi bakoleza etara banaliheba omu karhanda changwa omu ntalule si? Arhali oku chinara ch’etara ku banaliheba si?
22 Bulala nta chintu chabishirwe chirhakabishulwa; na nta chintu chafunikirwe bwinja-bwinja chirhakafunulwa.
23 Buli yeshi ogwerhe amarhwiri m’okuyunva, ayunve.”
24 Ashuba kuyongera ntya: “Muchilange oku bilolere ebintu munayunva. Omulengo muli mwalengeramo, gu nenyu nji babalengeramo, mwanayongerwa na binene kulusha.
25 Bulala omuntu yeshi ogwerhe obumenyi bamuyongerera obwindi, aliko orhagwerhe bumenyi na higeke akaba agwerhe bamunyegahyo.
26 Agenderera kuderha: “Obwami bwa Mungu buli nka kulala omuntu anashukira emburho omu buhinge.
27 Ebudufu analyama, aliko esezi hanola azuka anabugana emburho zamerere, zalehere aliko ey’arhamenya gurhe byabaga ntyo.
28 Obudaka bonyine bunakuza emburho kubuyabuya-kubuyabuya, ebirhi byanarhanga kurhengerera, naho omukenjera na buzinda emburho zikulire.
29 Aliko ey’emburho zikula anagenda anazishabula bulala akasanzi k’okushalula kanaba eyi kagerereho.”
30 Ashuba kuderha ntya: “Obwami bwa Mungu rhwakabushushanya na bichi, changwa mufano guhe rhwakakolesa yi rhubufasiriya?
31 Buli nka kaburho k’eharadali, ehyola hiburho eyi hibyalwa hiba hiburho higeke bwenene omu mburho zoshi ziba oku gulu.
32 Aliko eyi hibyalwa, hinakula hyanarhenga m’omurhi guzibuzibu kulusha emirhi yoshi y’eshogo, gwanalerha n’amarhabi mazibuzibu omu kuntu enyunyi zinayinja kuyalikira omu nchuchu yago.”
33 Yesu aliri akolesa mifano minene eli nk’eyola omu kubayigiriza echinwa cha Mungu, analiri akolesa ebi bakagala kuyunva.
34 Omu bukweri amango moshi aliri abayigiriza kugerera emifano, aliko amango aliri aba n’abanafunzi bage bonyine, aliri abafasiriya ebintu byoshi.
35 M’olola lusiku, lyabere egolo abwira abanafunzi bage ntya: “Rhuyambuke rhuje oku lwindi lunda lw’enyanja.”
36 Bamalire kusezera abantu bamuheka omu bwarho alirimo eyi hali n’amandi marho olekere obola.
37 Hava harhengerera omulaba gukalihire, ebivundu byarhondera kuchishurha omu bwarho, omu kuntu bwaliri hofi kuyunjula mw’amenji.
38 Aliko Yesu alilyamire enyuma omu bwarho oku mwishegulo. Bamuchula bamubwira ntya: “Mwalimu, ntacho bikubwirire okubona rhwabo rhwazika?”
39 Ava azuka akalihira echiyaga n’okubwira enyanja ntya: “Sira! Rhulera!” Omulaba gwachika, haba ndera nene.
40 Ababwira ntya: “Bulagurhe mwakayubaha ntya? Kugera bunola nta bwemere muza kugwarha chiro?”
41 Aliko bayunva buba bunene, barhondera kubwirana: “Oyula muntu ali nde kanuni? Chiro n’omuyaga n’enyanja yibyamukenga!”
