Yayandikwaga na Marko 13:1-37
13 Yesu abere amarhenga omu hekalu, muguma omu banafunzi bage amubwira: “Mwalimu, obwene gurhe amala mabale makwirire n’okuntu enju z’ehekalu ziyumbakirwe bwinja!”
2 Aliko Yesu amubwira: “Ezila nju zikwirire ntya muli mwabona, amabale moshi maziyumbakire mahonongolwa. Inta bale n’eliguma lyayorha lifarhire oku lindi.”
3 Babere bayikere oku Musozi gw’Emizeyituni eyi bali balangira ehekalu, Petro, Yakobo, Yowane, n’Andreya babaza Yesu ntya bwihunze:
4 “Orhubwire mangochi ebila bintu nji byaba, na bichi nji byaba chimenyeso chiyerekene kw’ebila bintu byoshi bili hofi kugera oku buzinda?”
5 Yesu ababwira: “Muchilange nta muntu nj’obarhebekage.
6 Banene nji bayinja omu zino lyani, eyi bali baderha mpu ‘Nyono nye Kristu,’ nji bahabusa na bantu banene.
7 Echindi, amango nji mwayunva evita n’emyazi y’evita, nji murhayubahaga; bulala ebila bintu bikwanene birhange bibe, aliko eyi burhaza kuba buzinda.
8 “Bulala eshanja nji lyalwisa elindi shanja n’obwami bwanalwisa obwindi bwami; nji haba emisisi y’egulu hantu oku handi, nji haba n’echibula ch’ebilyo. Ebyola byoshi nji gwaba murhondero gw’amalibuko makalihire.
9 “Aliko mwabo muchilange. Abantu nji babaheka emw’abarhambo, nji babashurhira enkoni omu masinagogi, nji babayimanza embere za baguvernere n’abami eju yani, yi buba buhamirizi kubo.
10 Echindi, bihemere emyazi minja erhange ehubiribwe omu mashanja moshi.
11 N’amango nji baba yibabaheka kubasambisa, nji murhalagaga eju y’okuchibaza bichi mwaderha; aliko ebi nji mwahabwa mw’akola kasanzi, bi nji muderhage, bulala arhali mwe nji mwaba eyi muli mwaderha, s’eroho lichesibwa.
12 Olekere nantyo, omuntu nj’ahaana mwene wabo ayirhwe, omulume nj’ahaana omwana wage, abana nji balwisa abazere babo n’okubayirhisa.
13 N’abantu nji babashomba eju y’ezino lyani, aliko olala nji walembera kugera oku buzinda yi nji wachunguka.
14 “Olekere nantyo, amango nji mwabona echintu chishologoseze ch’okuharabisa chiyimangire aha chirhakwanene kuyimanga (oli wasoma achirhegereze), ahola abali e Yudeya nji barhondere kubungira oku misozi.
15 Omuntu nji waba ali elugulu w’enju* yage, nj’arhayandagalaga mpw’aja kurhola echintu omu nju;
16 n’omuntu nji waba ali omu shwa nj’arhafulukaga mpw’aja kurhola omwambaro gwage.
17 Buli buhanya oku bakazi nji baba bali bukule n’aba nji baba bali bayonsa mw’ezola siku!
18 Mugenderere kusalira omu kuntu nji birhabaga omu chihe ch’emboho;
19 bulala ezola siku nji zaba siku z’amalibuko makulu marhasaga kubaho kurhangira amango Mungu alema kugera mw’agola mango, marhakanachibaho bwindi.
20 Omu bukweri nka Yehova arhapunguzaga kw’ezola siku, ntaye n’omuguma wakachungukire. Aliko eju ya balala bachishogerwe, apungwize kw’ezola siku.
21 “Echindi, nka hali omuntu obabwirire, mpu ‘Mulole! Kristu ali hanola,’ changwa mpu ‘Mulole! Ali halira,’ murhabiyemeraga.
22 Bulala nji hayinja bantu banene bali bachiyirika mpu ‘Nyono nye Kristu,’ nji harhengerera na balebi banene b’obubeshi, nji bajira ebisomerene n’ebintu bisomeze yi bahabusa, nka bigalikene, chiro na balala bachishogerwe.
23 Bobuno mwabo muyorhe muzene. Nabere nababwira ebintu byoshi embere w’echihe.
24 “Aliko mw’agola mango, enyuma w’amola malibuko, ezuba nji lyaba mwizimya, n’omwezi nji gurhakoleza.
25 Enyenyezi nji zarhoga kurhenga embingu, n’ebintu by’omu mbingu nji byashaganywa.
26 N’enyuma waho nji babona Mwen’omuntu ayinjire omu bichu ey’agwerhe emisi minene, n’obukuze.
27 Na buzinda nj’arhuma bamalayika banagusha abantu bage bachishogerwe kurhenga mu nyunda ene z’egulu, kurhangira oku murhambira gw’egulu kugera oku murhambira gw’embingu.
28 “Muyige kugerera omufano gw’omurhi gw’etini: Ey’amarhabi mago mashisha n’okushoga, mwanamenya okw’echanda chili hofi.
29 Intyo kon’okola, amango nji mwabona ebila bintu byoshi byarhengerera, mwanamenya okw’ali hofi oku milyango.
30 Kweri imbabwirire, echila chizazi chirhakahwa n’ebila bintu byoshi birhaza kurhengerera.
31 Embingu n’egulu nji byahirima aliko ebinwa byani birhakafa byahirimire haba n’akatyu.
32 Oku bilolere olola lusiku n’esa, intaye obimenyere, eyi bamalayika b’omu mbingu, ey’Omugala, olekere Darha yenyine.
33 Mugenderere kuchilanga munayorhe muzene bulala murhenji mangochi ebyola byaba.
34 Bili nka muntu wabalamiraga omu chindi chihugo alekera abakozi enju yage, alekera buli muguma akage kasi, abwira n’omulanzi agenderere kulanga.
35 Mugenderere kuyorha muzene, bulala murhenji mangochi nyin’enju agaluka; akaba egolo, akaba ebudufu bukulu, akaba bulonza kucha* changwa akaba esezi-sezi.
36 Omu kuntu amango nj’abashitukira nj’arhabuganaga mwajire ero.
37 Aliko echimbabwirire, chinambwirire abantu boshi: “Mugenderere kuyorha muzene.”
