Yayandikwaga na Marko 7:1-37
7 Abafarisayo na baguma omu bandisi barhenga e Yerusalemu babuganana bazunguluka Yesu.
2 Babona baguma omu banafunzi bage bali balya n’efune zizingire,* k’okuderha eyi barhakalabire.
3 (Bulala Abafarisayo n’Abayahudi boshi barhagendaga balya buzira kukalaba efune kugera oku ngokola, omu kukulikiza emigenzo ya b’eshekuliza,
4 n’eyi barhenga omu soko barhalya barhanayogere. Hali n’eyindi migenzo bahabirwe banakulikiza, nk’okubatiza amagopo, embirika n’ebindi bikoleso by’ekwivre embere babikolese.)
5 Bobola Abafarisayo n’abandisi bamubaza: “Bulagurhe abanafunzi bawe bali balya n’efune zizingire ahali h’okukenga emigenzo y’abantu bamira?
6 Ababwira ntya: “Ego mwe ndyalya mwe! Isaya aliderhere okuli amango aleba ntya oku bibalolere, ‘Nk’oku biyandikirwe, abala bantu banankenga oku bunu konyine aliko emirhima yabo eli hale nani.
7 Obuharamye bali bagenderera kumpa buli bwa busha, bulala ebi banayigiriza maba marhegeko m’abantu.’
8 Muli mwaleka amarhegeko ma Mungu yi mukulikiza emigenzo y’abantu.”
9 Ashuba kubabwira: “Mwasuzagwire erhegeko lya Mungu omu mayeri yi mukulikira emigenzo yenyu.
10 Omufano, Musa aliderhere: ‘Okenge yisho na nyoko, n’owadukanga eshe changwa nyina akwanene kuyirhwa.’
11 Aliko mwabo munaderha, ‘Nk’omuntu abwirire eshe changwa nyina: “Echintu naligwerhe nakakurhaberemo eli korobani (k’okuderha, eli ntulo nalaganyize Mungu),”’
12 murhamuleka akajirira eshe changwa nyina chiro chintu chiguma.
13 Nantyo mwajirire echinwa cha Mungu chibe yi ntacho chimalire eju y’emigenzo yenyu mwahebereho. Mwajirire n’ebintu binene bili nk’ebyola.”
14 Ahamagala abantu kamama abawira: “Mweshi munyunvirize munayunve ebindi naderha k’okuderha gurhe.
15 Nta chintu chinarhengerera embuga chinaja omu muntu chakamuzingisa, s’ebintu binarhengerera omu muntu bye binamuzingisa.
16 ——
17 Abere aja omu nju, aharhali bantu kamama abanafunzi bage barhondera kumubaza oku bilolere ogola mufano.
18 Ava ababwira: “Nenyu murhayunva kuguma nabo si? Murhamenyere oku nta chintu chirhenga embuga chinaja omu muntu chakamuzingisa?
19 Bulala chirhaja omu murhima, si chinagera omu nda na buzinda chanahuluka chanaja omu wese?” Nantyo, atangaza ebilyo byoshi oku bichere.
20 Ashuba kuderha: “Echinarhenga omu muntu che chinamuzingisa.
21 Bulala omu ndani, omu mirhima y’abantu m’omurhenga amawazo mabi: obubaraga, obwizi, obunizi,
22 ebijiro by’obugonyi, obuhugu, ebijiro bibi, okurhebekana, olugenzi l’obukarange lwa buzira shoni, elisho ly’obongwa, okudukanga Mungu, omwibone n’obuhwinja.
23 Ebyola bintu bibi byoshi binarhenga omu muntu n’ebyola bye binamuzingisa.”
24 Arhenga ahola aja omu teritware ye Tiro ne Sidoni. Agerereyo aja omu nju bulala arhalilonzeze abantu bakamenya. Aliko birhagalikanaga kw’agere n’abantu barhamenyaga.
25 Ahola han’aho, mukazi muguma waliherhe omwali ochiri mudorho walifarhirwe n’omuzimu ayunva oku bilolere Yesu, ayinja n’okuchikabula omu magulu mage.
26 Oyola mukazi aliri Mugiriki muburhwa we Sirofoyinike, agenderera kuhema Yesu afukuze oyola muzimu waliri omu mwali.
27 Aliko Yesu amubwira ntya: “Orhange oleke abana bayugurhe, bulala kurhali kwinja okurhola omugati gw’abana okagukabulira ebibwana by’embwa.”
28 Oyola mukazi amushubiza: “Nechi Waliha, aliko chiro n’ebibwana by’embwa bili omushi w’ameza binalya obuhungumukiza abana bali barhoza.”
29 Eju y’echola Yesu amubwira: “Bulala waderhere ntyo, gendaga mwali wawe omuzimu amurhegeremo.”
30 Ava agenda emwage, abugana omwali alyamire oku buliri eyi n’omuzimu amurhegeremo.
31 Amango Yesu arhenga omu teritware ye Tiro, agerera e Sidoni n’omu teritware ye Dekapoli,* agaluka oku nyanja ye Galilaya.
32 Bamulerhera omuntu orhagendaga ayunva orhanaliri agala kuderha babembereza Yesu amuhebe kw’efune.
33 Amuheka eburhambi arhali bantu, amuheba emidoki omu marhwiri, achira, naho amuhuma oku lulimi.
34 Alola embingu, ayisa bwenene aderha ntya: “Efata” k’okuderha: “Funguka.”
35 Amarhwiri mage mava mafunguka n’akasi k’olulimi lwage kachika arhondera kuderha bwinja.
36 Ababwira oku ntaye babwirage, aliko okw’analiri ababwira ntyo, kubanaliri baja babibala buli hoshi.
37 Kweri, balisomerwe bwenene kurhalusya olugero, baderha: “Akolere ebintu byoshi bwinja, ajirire chiro na bihuli ayunve na nyamugama* aderhe.”
