Yayandikwaga na Marko 14:1-72
-
Abadahwa bamajiira Yesu enama y’okumuyirha (1, 2)
-
Okusheshera Yesu kw’amarashi (3-9)
-
Yuda amalenganya Yesu (10, 11)
-
E Pasaka y’obuzinda (12-21)
-
Okurhonderesa Ebilyo by’Egolo bya Waliha (22-26)
-
Yesu amaba adeha oku Petro amuhakana (27-31)
-
Yesu ali asalira omu Getsemane (32-42)
-
Bamafarha Yesu (43-52)
-
Okusamba embere we Sanendrini (53-65)
-
Petro amahakana Yesu (66-72)
14 Haliyorhere siku ebiri e Pasaka n’Olusiku Lukulu lw’Emigati Erhali mu Levire* byanaba. Abakulu b’abadahwa n’abandisi baliri balonza okuntu bakafarha Yesu omu mayeri n’okumuyirha;
2 bulala baliri baderha: “Rhurhajiraga ntyo oku lusiku lukulu, nkabaga abantu bakakaliha bwenene.”
3 Abere ali e Betaniya, ey’ali alya ebilyo omu mwa Simoni walilwere ebibenzi, mukazi muguma ayinja n’esupa likolerwe ne alabasta lili mw’amavurha m’ebirhi by’enardo marhachangirwe, mahumwire bwinja, maliri ma beyi linene. Afungula elyola supa amasheshera oku rhwe lya Yesu.
4 Eju y’echola baguma bagaya barhondera kubwirana ntya: “Gurhe bakafisa busha amala mavurha m’amarashi?
5 Bulala makaguzizwe dinari zirhalukire 300 n’efuranga zanarhabala abakene!” Nantyo bagaya oyola mukazi bwenene.
6 Aliko Yesu aderha: “Mumuleke n’omurhula. Bulagurhe muli mwamuhahaza? Anjirire echijiro chinja.
7 Bulala esiku zoshi mwaba n’abakene, mwakanabajirira amenja amango mulonzeze, aliko nyono murhaba nani esiku zoshi.
8 Ajirire ech’akagala; amasheshera amarashi oku mubiri gwani omu kuba arheganya okuhambwa kwani.
9 Kweri imbabwirire, buli hoshi emyazi minja nji yahubiribwa omu gulu, echijiro chinja oyula mukazi ajirire nacho nji chaderhwa omu kumuyibuka.”
10 Yuda Iskariyote, muguma mu balala 12, aja kulola abakulu b’abadahwa y’alenganya Yesu emunda bali.
11 Bayunvirhe ntyo basima bwenene, bamulaganya oku bamuha efuranga. Kurhangira agola mango, arhondera kulonza akasanzi k’okumulenganya.
12 Olusiku lurhanzi lw’Emigati Erhali mu Levire,* amango bagendaga bazigana kuhana enterekero ye Pasaka, abanafunzi bage bamubaza: “Ngahe olonzeze rhujage kukurheganyiza ebilyo bye Pasaka?”
13 Arhuma babiri omu banafunzi bage, ababwira: “Mugende omu vile, mwabuganana n’omulume ohekere akabindi k’amenji. Mumukulikire,
14 n’enju ndeke mwabona ajamo, mubwire nyinayo: ‘Mwalimu aderhere ntya: “Ngahe echumba ch’abageni chili nakalira mwe Pasaka nyono n’abanafunzi bani?”’
15 Abayereka echumba chizibuzibu ch’oku etaje chili mw’ebikoleso byoshi chinarheganyizwe. Murhurheganyize e Pasaka omola.”
16 Abanafunzi bagenda baja omu vile, babugana ebintu byoshi nk’okw’anababwiraga, barheganya e Pasaka.
17 Lyabere golo, ayinja na balala 12.
18 Oku banayikere oku meza yibalya, Yesu aderha: “Kweri imbabwirire, muguma mu mwabo oli walya haguma nani andenganya.”
19 Bagaya na buli muguma arhondera kumubaza: “Arhali nyono; ingo?”
20 Ababwira: “Ali muguma mu balala 12, ohebere efune chaligumira nani omu bakuli.
21 Bulala Mwen’omuntu akala kuchigendera nka kulala biyandikirwe oku bimulolere. Aliko buli buhanya k’olala wamulenganya. Kwakabere kwinja oyola muntu arhashibaga aburhwa.”
22 Oku banali bagenderera kulya, arhola omugati, asalira esala ly’okugugisha, abahago n’okuderha: “Murhole; gunola mugati gushushanyize omubiri gwani.”
23 Arhola echikombe chaliri mw’edivayi, asalira esala ly’okuderha koko, abahacho, boshi banywa oku divayi yalirimo.
24 Ababwira: “Eyila eshushanyize eshagama y’endagano yasheshwa eju ya bantu banene.
25 Kweri imbabwirire, intakachinywa oku divayi y’omuzabibu, kugera amango nayinywako ey’ekala mpyahya omu Bwami bwa Mungu.”
26 Bamalire kuyimpa enyimpo z’okusingiza Mungu baja oku Musozi gw’Emizeyituni.
27 Yesu ababwira: “Mweshi mwagoma bulala biyandikirwe: ‘Nji nashurha omungeri, n’entama zanashandala eyi n’eyi.’
28 Aliko amango nji naba nafukire, nji nabarhanga e Galilaya.”
29 Aliko Petro amubwira: “Chiro abandi boshi bagoma, nyono intagoma.”
30 Eju y’echola Yesu amubwira: “Kweri nkubwirire zene, nechi, obudufu bwa zene, embere oluhazi lubike kabiri, waba eyi wamampakana kasharhu.”
31 Aliko agenderera kuhanzika n’okuderha: “Chiro byahema oku nfe haguma nawe, intakafa nakuhakanire.” Abandi nabo narhondera kuderha intyo kon’okola.
32 Bava baja efasi eyirikwa Getsemane, abwira abanafunzi bage: “Muyikale ahala oku nasalira.”
33 Arhola Petro, Yowane, na Yakobo agenda nabo, arhondera kuchiyunva kubi bwenene n’okuyunva mugayo gunene.
34 Ababwira: “Inchiyunvirhe kubi bwenene kugera chiro aha nakafira. Mubere hanola munayorhe muzene.”
35 Ashegera embere bugeke, afukama arhondera kusalira okw’akaba byakashobokana, ebyola bintu* bigere hale naye.
36 Aderha: “Abba,* Darha, akaba byakashobokana, onkulire echila chikombe. Aliko, arhali obulonza bwani s’obulonza bwawe b’obujirikage.”
37 Agaluka abugana bajire ero, abwira Petro: “Simoni, wajire ero? Orhagwerhe emisi y’okuyorha ozene chiro sa nguma?
38 Muyorhe muzene munasalire buzira kuleka yi murharhogera omu chigeregezo. Kweri omurhima gulonzeze aliko omubiri guzambire.
39 Ashuba kuja kusalira, aderha bila binwa byenabilala.
40 Ashubire kugaluka abugana bajire ero, bulala baliyunvirhe ero linene, nantyo barhabonaga echibakamushubiza.
41 Agaluka obwa kasharhu ababwira: “Omu kasanzi kali nk’akala muli mwalyama n’okuhumuka! Hoshaho! Akasanzi kahikire! Mulole! Mwen’omuntu akala kulenganywa n’okuhirwa omu fune z’abanyabyaha.
42 Muyimange rhugende. Mulole! Omulenganyi wani ali hofi.”
43 Ahola han’aho okw’anachili aderha, Yuda, muguma mu balala 12, ayinja n’abantu kamama baherhe engorho n’ebibando, eyi barhumirwe n’abakulu b’abadahwa, abandisi n’abashamuka.
44 Omulenganyi wage abaga abahere echila chimenyeso: “Eyi ndeke mwabona naha ebize, eyi y’oyola; mumufarhe, mumuheke arhabatorokaga.”
45 Yuda ayinja bwinja-bwinja emunda Yesu ali n’okuderha: “Mwalimu!” Amuha ebize.
46 Bava bamufarha n’okumushweka.
47 Muguma omu baliyimangire ahola achomola engorho yage, ayishurha omukozi w’omudahwa mukulu amucha okurhwiri.
48 Omu kushubiza Yesu aderha: “Mwayinjire kunfarha eyi mugwerhe engorho n’ebibando wamenya nk’andi chishambo si?
49 Esiku zoshi naliri naba omu hekalu ey’indi nayigiriza, murhananfarhaga. Aliko ebila byabere omu kuyeneza Amandiko.”
50 Abanafunzi bage boshi bava bamuleka balibirha.
51 Aliko musole muguma waliyambere omwambaro gwinja gonyine agenda amukulikire hofi-hofi, balonza mpu bamufarhe,
52 aliko aleka ogola mwambaro gwage agenda alibirha butambara.*
53 Baheka Yesu em’omudahwa mukulu. Abakulu b’abadahwa boshi n’abashamuka n’abandisi babuganana.
54 Aliko Petro aliri amukulikira ey’anali hale kugera omu mbuga y’omudahwa mukulu. Ayikala haguma n’abakozi banakola omola, arhondera kukaluka oku muliro guli gwaguragura.
55 Abakulu b’abadahwa ne Sanendrini* yoshi, barhondera kulonza obuhamirizi bakashwekera ku Yesu yi bamuyirha, aliko ntabo n’obuguma bapatire.
56 Kweri, bantu banene baliri bahana obuhamirizi b’obubeshi oku bilolere Yesu aliko obuhamirizi bwabo bwaliri bwapingana.
57 Kandi, bantu baguma bayimanga n’okuhamiriza obubeshi oku bimulolere, baderha ntya:
58 “Rhwalimuyunvirhe aderha mpu ‘Nashanduza elila hekalu lyayumbakwaga n’efune na mu siku esharhu nayumbaka elindi lirhakolwa n’efune z’abantu.’”
59 Aliko chiro na kw’ebyola nabyo obuhamirizi bwabo bwalipingene.
60 Omudahwa mukulu ava ayimanga ahagarhi kabo abaza Yesu: “Oku ntacho waderhere? Bichi wakaderha kw’ebila byoshi abala bantu bakusidakire?
61 Aliko ayorha asirire, na ntacho ashubize chiro. Omudahwa mukulu ashuba kumubaza: “Woyo we Kristu Mugala w’Olala Wagishirwe si?
62 Yesu aderha: “Nye yewe; nji mwanabona Mwen’omuntu ayikere ewa kuboko k’okulyo k’olala oherhe obuhashe, n’okuyinja n’ebichu by’embingu.”
63 Eju y’echola omudahwa mukulu asheshenyula emyambaro yage n’okuderha: “Hali obwindi buhamirizi rhuchikenere si?”
64 Mwayunvirhe okuntu adukangire Mungu. Gurhe mubwene? Boshi bamuchira olubanja okw’akwanene olufu.
65 Baguma barhondera kumuchirako, bamufunga amasu, bamushurha engumi n’okumubwira: “Lebaga!” Abalanzi b’oku tribinale nabo bamushurha ebigalo omu masu n’okumuheka.
66 Sasa, Petro aliri eshishi omu mbuga. Muguma omu bajakazi b’omudahwa mukulu ahikaho.
67 Abwene Petro y’akaluka, amulola bwinja-bwinja omu masu, amubwira: “Nawe waliri haguma n’oyu Yesu we Nazareti.”
68 Aliko ahakana n’okuderha: “Intamuyinji chiro intanamenyere bichi oli walonza kuderha.” Agana ewa mulyango g’olupango.
69 Okw’anali ahola, omujakazi amubona ashuba kubwira abaliyimangire ahola: “Oyula ali muguma wa mubo.”
70 Ashuba kuhakana. N’enyuma wa bisanzi bigeke abaliyumangire ahola bashuba kubwira Petro: “Kweri oli muguma mubo, bulala kwanza oli Munyagalilaya.”
71 Kandi alahira n’okuhakana: “Kweri, intamenyere chiro oyola muntu muli mwaderha!”
72 Ahola han’aho oluhazi lwabika eturu ya kabiri, Petro ayibuka ebi Yesu amubwiraga: “Embere oluhazi lubike kabiri, wampakana kasharhu.” Ayunva ababere bwenene, arhondera kulira.
