Yayandikwaga na Marko 10:1-52
-
Obuhya n’okushanda obuhya (1-12)
-
Yesu amagisha abana (13-16)
-
Echibazo ch’omusole w’omuchire (17-25)
-
Okuleka byoshi eju y’Obwami (26-31)
-
Yesu amashuba kuderha oku bilolere olufu lwage (32-34)
-
Ebi Yakobo na Yowane bahemaga (35-45)
-
Yesu ali nchungu ya bantu banene (45)
-
-
Yesu amafumya Bartimayo waliri mpumi (46-52)
10 Arhengere ahola, aja oku mipaka ye Yudeya oku lwindi lunda l’Olwinji Yordani, kandi abantu kamama bamuzunguluka. Arhondera kubayigiriza nk’okw’anarhulaga ajira.
2 Naho omu kulonza kumurhega, Abafarisayo bamuyegera bamubaza akaba biyemererwe ne Sheriya omulume ashande obuhya na mukage.
3 Abashubiza ntya: “Rhegeko lihe Musa alibahere?”
4 Baderha ntya: “Musa aliyemerere okuyandika echemezo ch’okufukuza omukazi n’okushanda obuhya naye.”
5 Yesu abashubiza: “Musa abayandikiraga elyola rhegeko eju y’emirhima yenyu mizibu.
6 Aliko kurhangirira oku murhondero g’obulemi, “Mungu abalemaga mulume n’omukazi.
7 Che chirhumire omulume nj’aleka eshe na nyina,
8 banaba mubiri muguma, nantyo barhachili babiri si bakala bali mubiri muguma.
9 Bobola aba Mungu ashwekere haguma nta muntu obakulage haguma.”
10 Bashubire kuba bali omu nju abanafunzi bage barhondera kumubaza oku bilolere ogola mwazi.
11 Ababwira: “Buli muntu yeshi-yeshi washanda obuhya na mukage n’okushaba owindi, aba ey’amajira obugonyi n’okuhemukira mukage,
12 na nk’omukazi amashanda obuhya akashabwa n’owindi mulume anaba ey’amajira obugonyi.”
13 Abantu barhondera kulerhera Yesu abana badorho mpw’abahire kw’efune aliko abanafunzi bage babakalihira.
14 Yesu abwene ntyo, agaya n’okubabwira: “Muleke abana badorho bayinje emunda ndi; murhanalonzaga kubabuza, bulala Obwami bw’embingu buli bwa balala bali nka bowe.
15 Kweri imbabwirire, buli muntu orhayemera Obwami bwa Mungu kuguma n’omwana mudorho, arhakafa abujiremo.
16 Abagalira abana, arhondera kubagisha omu kubaheba kw’efune.
17 Abere y’agenda, muntu muguma ayinja alibirha afukama embere zage amubaza: “Mwalimu mwinja, bichi inkwanene kujira y’impata akalamo k’esiku n’amango?”
18 Yesu amubwira: “Bulagurhe ompamagere mwinja? Nta mwinja obaho olekere muguma yenyine, Mungu.
19 S’oyinji amarhegeko: ‘Orhayirhaga, orhajiraga obugonyi, orhayibaga, orhahamirizaga obubeshi, orhalyalihiranaga, okenge yisho na nyoko.’”
20 Oyola muntu amushubiza: “Mwalimu, kurhenga inchili mwana ey’inankenga ebyola bintu byoshi.”
21 Yesu amulola, ayunva amamusima amubwira ntya: “Hali chintu chiguma obulire: Genda, oguze ebintu byawe byoshi ogabire abakene efuranga, wagwarha obuhirhi omu mbingu; naho oyinje obe mwanafunzi wani.”
22 Aliko oyola mulume ayunvirhe ntyo, avunika omurhima, agenda n’akahinda kanene bulala aligwerhe birugu binene.
23 Yesu amalire kulola eyi n’eyi, abwira abanafunzi bage ntya: “Nji byakomerera balala bagwerhe efuranga okuja omu Bwami bwa Mungu!”
24 Aliko ebyola binwa byasomeza abanafunzi bage. Yesu ababwira: “Bana bani, birhayorohere okuja omu Bwami bwa Mungu!
25 Biyorohere engamiya egere omu chirhule ch’esindani kulusha omuchire okuja omu Bwami bwa Mungu.”
26 Abanafunzi baja basomerwa bwenene, bamubwira: “Inde wakachunguka si berhu?”
27 Yesu abalolereza bwinja, ababwira: “Oku bantu birhakashobokana aliko emwa Mungu byakashobokana, bulala ebintu byoshi byakashobokana emwa Mungu.”
28 Petro arhondera kumubwira: “Tala oku rhwalekere ebintu byoshi rhwakukulikira.”
29 Yesu ashubiza: “Kweri imbabwirire, nta muntu walekere enju, bene-babo, bali-babo, nyina, eshe, abana, changwa amashwa eju yani n’eju y’emyazi minja
30 orhapata kukuba kali egana mu chinola chihe—enju, bene-babo, bali-babo, banyina, abana, amashwa, n’amalibuko—n’omu gulu lyayinjire, akalamo k’esiku n’amango.”
31 Aliko banene bali b’oburhanzi nji baba b’obuzinda, n’ab’obuzinda banaba b’oburhanzi.”
32 Oku banali omu barabara yibazamukira e Yerusalemu, Yesu ali embere zabo, abanafunzi basomerwa n’eby’aliri ajira, n’abantu balibakulikire barhondera kuyubaha oku hali echintu chibi charhengerera. Ashuba kurhola balala 12 abaheka eburhambi arhondera kubabwira ebila bintu byaliri hofi kumuhikira:
33 “Mulole! Obola rhwazamukira e Yerusalemu, Mwen’omuntu ahirwa omu fune z’abakulu b’abadahwa n’abandisi. Bamuchira echihano ch’olufu n’okumuhira omu fune z’amashanja,
34 bamusuzagura, bamuchirako, bamushurha n’okumuyirha, aliko enyuma wa siku esharhu afuka.”
35 Yakobo na Yowane bagala ba Zebedayo, bamuyegera bamubwira: “Mwalimu, rhulonzeze orhujirire buli chintu rhwakuhema.”
36 Abashubiza: “Bichi mulonzeze imbajirirage?”
37 Bamushubiza: “Orhuyemerere nji rhuyikale, muguma ekulyo owindi ekulembe kwawe amango waba omu bukuze bwawe.”
38 Aliko Yesu ababwira: “Murhenji ebi muli mwahema. Mwakagala kunywa echikombe indi nanywa n’okubatizwa omu bubatizo indi nabatizwa?”
39 Bamubwira: “Rhwakagala.” Eju y’echola Yesu ababwira: “Mwanywa echikombe indi nanywa, mwanabatizwa omu bubatizo indi nabatizwa.
40 Aliko arhali nyekwanene kuchishoga inde wayikala ekulyo changwa ekulembe kwani, s’ezola fasi zili za balala zarheganyiizwe.”
41 Amango bala bandi ekumi bayunva ntyo, bayunvira Yakobo na Yowane oburhe.
42 Aliko Yesu abahamagala ababwira: “Mumenyere oku abashushire nka babali barhegeka amashanja, banamarhegeka oku chingufu, n’abarhambo banakolesa oburhwali bwabo kubi oku bantu.
43 Aliko arhali ntyo ku bikwanene kuba ahakagarhi kenyu. Owalonza kuba mukulu aha kagarhi kenyu akwanene kuba mukozi wenyu,
44 n’olonzeze kuba w’oburhanzi ahakagarhi kenyu akwanene kuba muja wa boshi.
45 Bulala chiro na Mwen’omuntu ayinjaga, arhali mpu bamukolere, s’akolerane n’okuhana akalamo kage nka nchungu ahali h’abantu banene.”
46 Bahika e Yeriko. Aliko Yesu n’abanafunzi bage barhengere e Yeriko eyi n’abantu kamama babaherekeze, omuntu w’empumi mpu ye Bartimayo (mugala wa Timayo) wagendaga wahema aliyikere oku njira.
47 Ayunvirhe oku Yesu we Nazareti oyola oli wagera, aderha ntya n’omulenge gunene: “Yesu, Mugala wa Daudi, onyunvire obonjo!”
48 Bantu banene barhondera kumukalihira n’okumubwira asire, aliko aja ayama bwenene aderha: “Mugala wa Daudi, onyunvire obonjo!”
49 Yesu ava ayimanga aderha: “Mumuhamagale.” Bahamagala oyola mulume w’empumi n’okumubwira: “Orhayubahaga! Yumanga; ali akuhamagala.”
50 Akabula omwambaro gwage gw’enyanya, ashimbuka n’okuja emunda Yesu ali.
51 Yesu amubaza: “Bichi olonzeze inkujirirage?” Eyola mpumi yamubwira: “Mwalimu, amasu mani mabone.”
52 Yesu amubwira: “Ogende. Obwemere bwawe bwakufumizye.” Ahola han’aho amasu mage mabona, agenda akulikire Yesu.
